लूका 16

जिमेवारी होड़राः अउल-तउल कहड़ी

1हनते ईसू आँयगरिकुःआ चेलाकू एचेरे मीटोंग कहड़ीय कतातेरा, मी होड़ गिरहत सेटरीग जिमेवारी होड़ दोहोना। हाँयग बदीरे गिरहत होड़ एचेरे तोनोंगीग होड़ कताया, आमरीग जिमेवारी होड़ आमराः आन-धान नपाय मेरेय सुरतायता, माःआन। 2दो गिरहत होड़, जिमेवारी होड़ राःतेडखने होंबरेया, ईंग करा करा उड़ी आम बदीरिंग अयुमेतना? आम मड़ंग दिन ईंगरीग जिमेवारी होड़ ओरोम दोहो अवेनेना। हनालगा ईंगराः आन-धानते चिनचिलाम करेगकेरा हना आम ईंगमे ओजाः उदुःवा।

3हनमेला जिमेवारी होड़ ओंगोलतेरा, नुँहू ईंग करा इयायिंग करजुः? ईंगरीग मालिक ईंग जिमेवारी बुता अतेय उउडुंगता। ईंग हास गडा लगा ओरोयिंग अवेतेरा अरू असे जोम लगा हों ईंग गियुःतना। 4जिमेवारी बुता अते ईंगे वार उडुंग मेला होड़कू ईंग अँननकू ओड़ाःरे दोहो ओवागिंग लगा ईंग चिला एचे इदा, हनायिंग सुदीयतना।

5हनते हाँय मालिकरिकुःआ रिनहादारकू मेमेड होड़े राःतेरा। हाँय मड़ंगीग एचेरेय होंबोरतेरा, ईंग मालिकराः आम एचेरे तुमिन रीन इदा?

6हाँय कताया, मी सव मन जइतून सुनुम रीन इदा।

दो जिमेवारी होड़ हाँय एचेरेय कताया, आम ओजाः दोहोकेराम हना कागदमे उडुंग अगू अरू हनारे पचास मनमे ओजाःगे।

7हनते हाँय एटाः होड़ एचेरेय होंबोरतेरा, आम एचेरे तुमिन रीन इदा?

अरू हाँय कताया, मी सव मन गोहोम। दो हाँयग होड़ एचेरेय कताया, आम ओजाः दोहोकेरा हना कागदरे अससी मनमे ओजाःगे।

8दो कमचोर जिमेवारी होड़ चिलाय एचेकेरा हना हाँयग मालिक अयूमतेड अरू हाँय राःकेडखन हाँय एचेरेय कताया, आम ओंगोल चुवेरकेडखनमे एचेकेरा, माःआन। दो ईसू कताया, “चउंदीसरिकुःआ होड़कू अँननकूरिकुःआ होड़कू सुदा लेन देनरे भगवानराः राइजरिकुःआ होड़कू अते बगरा ओंगोल चुवेरकेडखनकू एचेयता।”#1 कुरि 1:26

9ईसू अरूय कताया, “ईंग अपे एचेरेयिंग कतायतना, नाःआ चउंदीसराः ढिबुवाकूनते एटाःकू संघरावा घड़ीन अपे लगा सउंगताकूपे तुला। दो हना ढिबुवाकून चबन चबनरे भगवान अपे सगर सइट दोहोनता हना ओड़ाःरेय नेत-नेवारपेता। 10गुनमिनाःरे भरसागेयीग होड़े दोहोनता, हाँय मरंग मरंगरे हों भरसागेयीग होड़े दोहोनता। अरू गुनमिनाःरे भरसागेयीग होड़ मेरेय दोहोनता, हाँय मरंग मरंगरे हों भरसागेयीग होड़ मेरेय दोहोनता। 11चउंदीसराः आन-धानरे अपे बिसवासगेयीग मेरपे दोहोन दो, भगवान अपे लगा सेरमो देसराः धन करा इयाय ओवापे? 12अपे एटाःकूराः आन-धानरे बिसवासगेयीग मेरपे दोहोन दो, भगवान अनम लगा करा इयाय एमेय? 13तोनोंगीग होड़ बार होड़ मालिककिन ओरोय सेवा अवेतेडकिना। हँकिन अते मी होड़े अलार-दुलारगेयता अरू मी होड़े हिनइस-बिनइसवायता। मी होड़ सुदा अकूस मनाः घड़ीने दोहोनता अरू मी होड़े आड-बेकारवायता। अपे भगवान अरू आन-धान, बनर ओरोपे सेवा अवेतेरा।”

फरीसीकू अरू ईसू

(मती 11:12-13; 5:31-32; मरकूस 10:11-12)

14ललचीकू दोहोना हँकुःआ फरीसी होड़कू, ईसूराः बड़रा अयूमवाडखन हाँयकू लंदावाःआ। 15दो ईसू हँकू एचेरेय कताया, “अपे एटाः होड़कू मड़ंगरे नपाय होड़कू इयापे एचे अडिगतना। मनदो भगवान अपेराः जीव जमाय सुदीतना। होड़कू मरंगकू ओंगलेता हना जिनिस भगवान मरंग मेरेय ओंगलेता।

16मोसेसराः नियम अरू भगवानराः बड़रा कता होड़कूराः कता, बतिसमा एमेयीग होड़ एहुना वरीकू पपरसारा। अरू हनानाः बेला वरीते भगवानराः राइजराः नपाय सरवनकू परसार अअगूतना। अरू जमा होड़कू भगवानराः राइजरे रेनहा-पेलहाकू बोलता। 17अपे ईंगपे अयूम, सेरमो अरू ओत टगाव जुवाःता, मनदो भगवानराः सरवन गुनमिनाः टिका हों ओरो टगावनेना।#मती 5:17-19 18अनँयग अइमी अड़ावाडखन एटाः अइमीय सगइता हाँयग होड़ सनहाता। अड़ाःतो अइमी तोनोंगीग होड़ सगइगेय दो, हाँय हों सनहाता।#एचे उडुंग 20:14

लाजर अरू गिरहत होड़राः कहड़ी

19मी होड़ गिरहत होड़ दोहोना। हाँय मुरुक बगरा किमइतराः सोनहेय तुसिंगा अरू जोम ञूवाडखन सगर दिन बहालतेय दोहोना। 20लाजर ञावीग मी होड़ गरीब होड़ दोहोना। हाँय गिरहत होड़राः हता दुवाररेय गेतेगा। हाँयराः जमा देहरे घाव गदाह दोहोना। 21दो लाजर गिरहत होड़राः टिबूल अते जोम एरांगतो लुजुरुःआ हना जोमवाडखन दोंगे पेरेगगे लगाय चहाःआ। हंडा कुतुकू हों वेगवाडखन हाँयराः घाव गदाहकू जड़ाःआ। 22तयोमरे हाँयग गरीब होड़ गोएगयाने अरू सेरमो देसरिकुःआ बराहीलकू हाँय इबराहीम सुदा सेरमो देसरे दुड़ुः लगाकू गोःयाडीग। हना तयोमरे हाँयग गिरहत होड़ होंय गोएगयान अरू हाँयकू तीलगोतेरीग।

23हाँयग गिरहत होड़ नरगरे तोराय अरू मुरुक पीरारेय दोहोना। हाँय संगीलतेडखने ञेलतेरा दो इबराहीम सुदा लाजरे ञेलतेरा। 24दो हाँय कताया, ने अपांग इबराहीम, ईंग नरगराः सेंगेलरेयिंग तड़पाःतना। हनालगा ईंग सोगावाडिंगखन लाजर ईंग एचेरेम वारगेय, जेमहा हाँय आयँगराः अंगरी दाःरे तोपोवाडखन ईंग अलंगरे दाःए जोरो लड़ेगींग।

25दो इबराहीम कतातेरा, ने बेटा, आम चउंदीसरे मुरुक नपाय नपाय जिनिसमे पवावनेना। अरू लाजर आम इया मेरेय पवावगान। मनदो नुँहू हाँय सलसतरे इदानिया अरू आम पीरारेम तड़पाःतना। 26आम अरू अले तलारे मीटोंग मरंग रियाखोह डोडहा इदा। हना अते तोनोंगीग होड़ ओरोय सेने पार अवेनेना।

27दो गिरहत होड़ कताया, ने अपांग, लाजर चउंदीसरे ईंग ओड़ाःरेम वारेय। 28ईंगरिकुःआ पाँचगोटोंग बोपोहकू इदानकुःआ। लाजर हँकू एचेरे सेनेकियानखन कसूर अते जीवकू कुदा लगाय कता उदुःवाकूता, जेमहा हँकू नाःआ पीराराः ततेररे अलोकू वेग।

29दो इबराहीम हाँय एचेरेय कतातेरा, हँकू लगा मोसेस अरू भगवानराः बड़रा कता होड़कूराः सरवन इदा। हना हँकूके अअयूम इदा।

30मनदो हाँयग होड़ कताया, ने अपांग इबराहीम, गोएगतो अते तोनोंगीग हँकू एचेरेय सेन होले हँकू कसूर अते जीवकू कुदाता।

31इबराहीम हाँय एचेरेय कताया, मोसेस अरू भगवानराः बड़रा कता होड़कूराः सरवन हँकू मेरकू मनाः दो गोएगतो होड़कू अते तोनोंगीग जियाव रिमुः हों हँकू कसूर अते जीव ओनोरोकू कुदातेरा।”#एहु 5:46-47

Currently Selected:

लूका 16: kfp

Highlight

Copy