Tashches Corintoĉantyidyes 14
14
Muꞌin soꞌmac in yocsiꞌĉan p̂eyacdyeꞌ p̂eyaquity in
1Mọjoꞌchaꞌ dyijtuvac ọij paj qui räjĉan mạꞌjeyacsi bäꞌyi miꞌin. Chimeꞌdye dyijtuvac paj qui muꞌ Jenꞌ meꞌ soꞌminac mọꞌ mọjoꞌchas carijtacdyedyes, mọꞌ soꞌmacsis Jenꞌsiꞌ Ạꞌedyeꞌ muꞌ. Mọꞌ anic mọjoꞌchaꞌ jemonacsiꞌ paj qui soꞌmac miꞌin Jenꞌsiꞌ p̂eyacdyeꞌ muꞌ paj qui mọꞌ jịꞌchiqueyacsi miꞌin. 2Jeshaꞌ muꞌin yocsiꞌĉan p̂eyacdyeꞌ p̂eyaquity in jam muntyidyes p̂eyaqui in, Jenꞌdyes mọmoꞌ p̂eyaqui p̂eyacdyeꞌ in, ĉaĉaij na jam tyi chiquepte p̂eyacdyeꞌ in, ĉaĉaij na mọꞌ p̂eyacdyeꞌ muꞌin jumves muꞌin, mọꞌ Jenꞌsiꞌ Ạꞌedyeꞌ soꞌmacsis. 3Muꞌin na voroꞌyity in mọꞌ soꞌmacsis Jenꞌ, mọꞌ nọ́tacsiꞌ muꞌin anicjetety Jenꞌ in, chịmoꞌdye jiꞌmaꞌyacsiꞌ paj qui fer buꞌyi bäꞌyi in Jenꞌdyes. 4Muꞌin yocsiꞌĉan p̂eyacdyeꞌ p̂eyaquity in ĉụiꞌ mọmoꞌ muꞌin ñútyiti in, ferjoij ạꞌedyeꞌĉan in, muꞌin na voroꞌyity in mọꞌ p̂eyacdyeꞌ soꞌmacsis Jenꞌ, muꞌin nọ́tacsi in muꞌin anicjetety Jenꞌ in.
5Yụ mạꞌjeꞌ tsanꞌ paj qui miꞌin räj p̂eyaqui yocsiꞌĉan p̂eyacdyeꞌ, mọjoꞌchaꞌ qui namꞌ mạꞌjeꞌ yụ paj qui voroꞌyi miꞌin yódyesdyemꞌ soꞌminacsiꞌ Jenꞌ u, mọꞌ mọjoꞌchaꞌ jemonac, ọyaꞌyaꞌ mọꞌ paj qui yocsiꞌĉan p̂eyacdyeꞌ p̂eyaqui miꞌin. Mọꞌĉan p̂eyaqui jụijyaꞌ miꞌin jemoñeꞌ muꞌyaꞌ yirity jịꞌchiqueyacsebantyiꞌ muꞌsiꞌ p̂eyacdyeꞌ muꞌindyes anicjetetydyes Jenꞌ in paj qui mọꞌyaꞌ p̂añi Jenꞌdyes in. Jam jụijyaꞌ meꞌ, fibiꞌ shupquiꞌ yocsiꞌĉan p̂eyacdyeꞌ p̂eyaqui in. 6Jeshaꞌ vojity, yụ ĉọcyac jụijyaꞌ miꞌin, judyeyaꞌ p̂eyaqui jụijyaꞌ yụ yocsiꞌĉan p̂eyacdyeꞌ, fibis ramꞌ shupquiꞌ p̂eyacdyeꞌ yụ, jam raꞌ méquiꞌ mọꞌ ñútyinac miꞌin mọꞌ p̂eyacdyeꞌ. Damꞌdye jämꞌ muntyisĉan mọmoꞌ p̂eyacdyeꞌ jéyac miꞌin yiris jiꞌchäyitidyeꞌ soꞌminsiꞌ yụ muꞌ Jenꞌ, vatyquej muꞌsiꞌĉan chị́dyeꞌ jụijyaꞌ muꞌ jịꞌchiyeyac, vatyquej chimeꞌ voroꞌyi yụ mọꞌ soꞌminsiꞌ Jenꞌ yụ. Meꞌ jịꞌchiyeyac muntyisĉan jụijyaꞌ, mọꞌ chat raꞌ tupuj ñútyinac miꞌin.
7Chimeꞌdye mọꞌ vịcdyeꞌ judyeyaꞌ boñedyeꞌ in, jam rụij dyijyedyeꞌtum p̂ujtyejaꞌ jụijyaꞌ tsun, jam raꞌ junꞌ jorojĉan shupquiꞌ mạꞌedyeꞌ mọꞌ. 8Meꞌdye chimeꞌ mọꞌ chutidyedyes boñedyeꞌ, jam rụij dyijyedyeꞌtum p̂ujtac jụijyaꞌ väc̣häꞌtyitydyes in, jam raꞌ junꞌ chiqueꞌ in, jätäjyiꞌ raꞌ mọꞌ, mijam raꞌ jäꞌmiij jämꞌ yuꞌti in paj qui chuti in. 9Meꞌdye miꞌin chimeꞌ, yocsiꞌĉan p̂eyacdyeꞌ p̂eyaqui jụijyaꞌ miꞌin, mọꞌ jam chiqueꞌsiꞌ muntyiꞌ in, fibiꞌ raꞌ mọmoꞌ p̂eyaqui miꞌin, jeñej tyiꞌmu cabunactyiꞌ p̂eyacdyeꞌ miꞌin, meꞌ raꞌ shupquiꞌ p̂eyacdyeꞌ miꞌin. 10Jeshaꞌ, yịjyi mọꞌyaꞌ muntyis p̂eyacdyeꞌ muꞌin, räjenꞌ mọꞌin dyijyedyeꞌtum in. 11Vatyquej yirity muntyiꞌ p̂eyaqui yụ́tum yoctyisĉan p̂eyacdyeꞌ, yụ raꞌ jam junꞌ chicacsi, meꞌ tsanꞌ chätidyeꞌ yụ, jeñej yocvety, meꞌ shupqui yụ́tum, meꞌ buꞌyidye yụ chimeꞌ, jeñej buꞌyi yocvety muꞌtum. 12Aty fer mạꞌjetiñeꞌ u paj qui Jenꞌsiꞌ Ạꞌedyeꞌ muꞌ soꞌminac carijtacdyedyes Jenꞌdyes, damꞌdye jämꞌ dyijtutiñeꞌ mọꞌ mọjoꞌchas carijtacdyeꞌ, paj qui mọꞌyaꞌ p̂añi Jenꞌdyes in muꞌin anicjetety Jenꞌ in.
13Tyi chuc yocsiꞌĉan p̂eyacdyeꞌ p̂eyaquity jụijyaꞌ in, paj cọdyete Jenꞌ in paj qui muꞌ soꞌmacsi in paj qui jịꞌchiqueyacseban in jätäjyiꞌ chuc mọꞌ p̂eyacdyeꞌ. 14Jeshaꞌ, yocsiꞌĉan p̂eyacdyeꞌ cọdaqui Jenꞌcheꞌ jụijyaꞌ yụ, ạꞌedyeꞌĉan qui namꞌ cọdaqui yụ, jam qui chịj yụ jätäjyiꞌ chuc mọꞌ cọdacdyeꞌ yụ. 15¿Jätäjyejaꞌ bu raꞌ tsun? P̂eyaĉaꞌ yocsiꞌĉan p̂eyacdyeꞌ jụijyaꞌ tsun ạꞌedyeꞌĉan mọmoꞌ cọdyeja tsanꞌ, mijam chiquejaꞌ jedyeꞌ buty cạiꞌ mọꞌ. Jemoñeꞌ qui namꞌ dyijyedyeꞌtum cọdyeja tsun chimeꞌ. Tupuj ạꞌedyeꞌĉan jimaĉaꞌ tsun, jemoñeꞌ qui namꞌ dyijyedyeꞌtum jimaĉaꞌ chimeꞌ tsun. 16Jeshaꞌ, yocsiꞌĉan p̂eyacdyeꞌ timaꞌquetinte Jenꞌ jụijyaꞌ miꞌin, ạꞌedyeꞌ mọmoꞌ yiꞌ miꞌin, muꞌin na muꞌĉantyiꞌ in jam meꞌ soꞌmactyiꞌ in, mijam raꞌ junꞌ chịj in jedyeꞌ buty cạiꞌ mọꞌ p̂eyacdyeꞌ miꞌin, mijam raꞌ muꞌin miꞌinmun yoshoropaij jéte Jenꞌ in, mijam raꞌ yi in "Paj meꞌ". 17Meꞌ tsanꞌ rụijsis shupquiꞌ cọdacdyeꞌ miꞌin, mọꞌ jam damꞌ nọ́tacsiꞌ yoctyiꞌ muntyiꞌ in. 18Yụ yoshoropaij jéte Jenꞌ ĉaĉaij na muꞌ soꞌmin yụ paj qui yụ damꞌdye pucmun p̂eyaqui yocsiꞌĉan p̂eyacdyeꞌ, uyaꞌyaꞌ p̂eyaqui miꞌin. 19Meꞌ tsanꞌ meꞌ vajmuꞌyaijĉan jụijyaꞌ tsun, yụ qui namꞌ damꞌdye mạꞌjeꞌ p̂eyeꞌ yụ jụꞌñis chuc jorojĉansiꞌ p̂eyacdyeꞌ, paj tsanꞌ ĉanamꞌ mọmoꞌ p̂eyacdyeꞌ jéyacsi jụijyaꞌ yụ, ọyaꞌyaꞌ mạꞌjeꞌ yụ yocsiꞌĉan p̂eyacdyeꞌ yojdyesdyemꞌ jam jiꞌchäquitis uij, paj tsanꞌ yiriꞌtac mir p̂eyacdyeꞌ jụijyaꞌ yụ, fibis raꞌ mọmoꞌ shupquiꞌ.
20Vojity, jemoñeꞌ rụij dyijtutiñeꞌ miꞌin junꞌ chuc raꞌ p̂eyaqui miꞌin yocsiꞌĉan p̂eyacdyeꞌ, dyijyedyeꞌtum raꞌ bäꞌyi miꞌin yojdyemꞌ ishoꞌ muntyiꞌ, jam raꞌ dyijyi miꞌin yojdyemꞌ miquity u. Meꞌ tsanꞌ meꞌ, yojdyemꞌ miquity u jam aꞌc̣his dyijyedyeꞌ cạiꞌ, meꞌdye raꞌ miꞌin chimeꞌ. 21Yiꞌ sánacdyeꞌ: "Yụ raꞌ jutacsi muꞌin yocve bäꞌyity in, muꞌin qui raꞌ jéyacsi yụs p̂eyacdyeꞌ útsi muntyiꞌ yụ, yoctyisĉan raꞌ p̂eyacdyeꞌ seꞌvibun raꞌ yụ in. Meꞌ raꞌ tsanꞌ meꞌ muꞌin jéyacsi in muntyiꞌ yụ, muꞌin raꞌ jam junꞌ seꞌvibun p̂eyacdyeꞌ yụ in, yi muꞌ Ayoꞌ tsun", yiꞌ sánacdyeꞌ. 22Ọij sánacdyeꞌ jorojĉanjisinꞌ jedyedyes buty muꞌ Jenꞌ soꞌmisinꞌ ferdyeꞌ paj qui yocsiꞌĉan p̂eyacdyeꞌ p̂eyaĉaꞌ tsun, meꞌ buꞌyi muꞌ Jenꞌ jịꞌcaveyacsi ferdyeꞌ muꞌ muꞌin jam anicjetety Jenꞌ in paj qui muꞌin anicyive in, jam tsundyes anicjejatydyes Jenꞌ, meꞌ jịꞌcaveꞌ ferdyeꞌ. Tsun anicjejaty Jenꞌ yocdye soꞌmac tsun, soꞌmisinꞌ ferdyeꞌ paj qui mọꞌyaꞌ tupuj voroꞌyejaꞌ p̂eyacdyeꞌ muꞌ, mọꞌ soꞌmisinꞌsiꞌ tsun, paj qui nọ́tacsejaꞌ muꞌin anicjetety Jenꞌ in. 23Mọꞌdyes vajmuꞌyaij jụijyaꞌ miꞌin anicjetety Jenꞌ yedyej yocsiꞌĉan p̂eyacdyeꞌ p̂eyaqui jụijyaꞌ miꞌin, vatyquej raꞌ säsnac yirity muntyiꞌ jụijyaꞌ, jam meꞌ soꞌmactyiꞌ, vatyquej yirity jụijyaꞌ jam anicjetety Jenꞌ seꞌvinac jụijyaꞌ miꞌin yocsiꞌĉan p̂eyacdyeꞌ mọmoꞌ p̂eyaqui jụijyaꞌ miꞌin, muꞌ raꞌ yi: "Uts nash där shapuijtyiꞌ in." 24Miꞌin na voroꞌyi mọꞌ soꞌminacsiꞌ p̂eyacdyeꞌ Jenꞌ jụijyaꞌ, vatyquej siti yirity jam meꞌ soꞌmactyiꞌ, vatyquej yirity jụijyaꞌ jam anicjetety Jenꞌ, chat qui raꞌ mọꞌ p̂eyacdyeꞌ voroꞌyis miꞌin mọꞌ raꞌ jiꞌdyijvete muꞌ, chat qui raꞌ muꞌ dyijyi juchajcheꞌ muꞌ, 25ĉaĉaij na mọꞌ p̂eyacdyeꞌ jịꞌcaveyete caminsis dyijyedyeꞌ aꞌc̣his muꞌ, mọꞌ raꞌ p̂eyeꞌ muꞌ judyeyaꞌ raꞌ dyụtsyi muꞌ timaꞌquete Jenꞌ, chat qui raꞌ yi muꞌ: "Anicdye meꞌ rụij, muꞌ Jenꞌ miꞌinyaꞌ."
Jämꞌ raꞌ cạjaꞌ vajmuꞌyadyeꞌ tsun
26Mọꞌdyes vojity, yụ raꞌ jéyac, meꞌ raꞌ miꞌin vajmuꞌyadyeꞌĉan miꞌin, tupuj yocsiꞌ yocsiꞌ jämꞌtaqui miꞌin. Pạrej raꞌ jimaqui Jenꞌdyes miꞌin, pạrej raꞌ jiꞌchäyitidyeꞌ tutiñeꞌ miꞌin, judyeyaꞌ pạrej raꞌ voroꞌtacsi p̂eyacdyeꞌ miꞌin, mọꞌ soꞌminacsiꞌ muꞌ Jenꞌ, judyeyaꞌ pạrej raꞌ yocsiꞌĉan p̂eyacdyeꞌ p̂eyaqui miꞌin, judyeyaꞌ pạrej raꞌ jịꞌchiqueyacsebantyiꞌ miꞌin mọꞌ p̂eyacdyeꞌ. Meꞌ meꞌ tupuj vajmuꞌyadyeꞌĉan miꞌin, jemoñeꞌ qui namꞌ dyijyedyeꞌtum cạtiñeꞌ miꞌin paj qui vaj meꞌ p̂añi Jenꞌdyes miꞌin. 27Pạrej muꞌyaꞌ yocsiꞌĉan p̂eyacdyeꞌ p̂eyaqui jụijyaꞌ miꞌin, jam raꞌ daiꞌ yuꞌti meꞌtyity miꞌin, päräꞌ judyeyaꞌ chibin, meꞌsiꞌ ramꞌ p̂eyaqui miꞌin. Jam qui na ramꞌ yiristum yiriꞌyaꞌ p̂eyaqui miꞌin, cäts raꞌ yirity jịjcaij miꞌin, judyeyaꞌ jịꞌchiqueyacsebantyiꞌ p̂eyacdyeꞌ miꞌin. 28Itŝij jịꞌchiqueyacsity jụijyaꞌ, jam raꞌ yocsiꞌĉan p̂eyacdyeꞌ p̂eyaqui miꞌin vajmuꞌyadyeꞌĉan miꞌin, damꞌdye jämꞌ ĉụiꞌ p̂iyiti dyijyedyeꞌĉan miꞌin judyeyaꞌ cọdyetinte Jenꞌ ĉojtyiꞌĉan miꞌin. 29Vajmuꞌyadyeꞌĉan miꞌin tupuj voroꞌyi miꞌin mọꞌ soꞌminacsiꞌ muꞌ Jenꞌ, jam raꞌ daiꞌ meꞌ yuꞌti miꞌin voroꞌyity miꞌin, päräꞌ judyeyaꞌ chibin, meꞌsiꞌ ramꞌ voroꞌyi miꞌin. Yoctyiꞌ tupuj paj qui seꞌvaquity mọmoꞌ in judyeyaꞌ dyijtucsebi p̂eyacdyeꞌ muꞌin, jadac rụijsis, jadac jam. 30Yirity jụijyaꞌ muꞌĉantyiꞌ vatyquej soꞌmactyiꞌ Jenꞌsiꞌ p̂eyacdyeꞌ muꞌ, jemoñeꞌ c̣huꞌc̣huij chum muꞌ voroꞌtacsevaꞌjoijtyiꞌ paj qui muꞌ p̂eyaqui q̂uinꞌdyemꞌ soꞌmactyiꞌ. 31Meꞌ raꞌ chataꞌ tupuj räj miꞌin voroꞌtacsi mọꞌ soꞌminacsiꞌ Jenꞌ, cäts ramꞌ yirity jịjcaij miꞌin, paj qui miꞌin vaj meꞌ chịj miꞌin judyeyaꞌ chimeꞌ paj qui vaj meꞌ p̂añi Jenꞌdyes miꞌin. 32Muꞌin jasoꞌmitity p̂eyacdyeꞌ Jenꞌ in chịj ĉujcati in ĉụiꞌ, tupuj c̣huꞌc̣huyacsi yoctyiꞌ in. 33Muꞌ Jenꞌ jam mạꞌjeꞌ shapudyeꞌtum cạjaꞌ joꞌmes vajmuꞌyaꞌyejaꞌĉan, muꞌ mạꞌjeꞌ paj qui dyijyedyeꞌtum tsun paj qui räj jämꞌjitidyeꞌtum catiĉaꞌ tsun vajmuꞌyaijĉan.
Meꞌ jịꞌchiyacsi yụ muꞌin ñuruꞌtyity Cristoty muꞌ, paiꞌ bäꞌyity in, 34paj qui mọꞌin p̂en in jam p̂eyaquiꞌ vajmuꞌyadyeꞌĉan in, mọꞌĉan jam tupuj p̂eyaquiꞌ p̂en in. Jemoñeꞌ chicaquiꞌ vämtyiꞌ mọꞌin, yiꞌ Jenꞌsiꞌ yụꞌtacdyeꞌ muꞌ. 35Mạꞌjeꞌ jụijyaꞌ yiris jedyeꞌ chịꞌ in, tupuj jéyaquiꞌ vämtyiꞌ mọꞌin ĉụiꞌsiꞌyaꞌ acaꞌ mọꞌin, ĉaĉaij na jam tupuj joꞌmeiꞌĉan tsudyujñitidyeꞌĉan p̂eyaquiꞌ in, jam meꞌdyes mọꞌ.
36Jam mạꞌjeꞌ seꞌvibutiĉaꞌ ọij jiꞌchäyitidyeꞌ yụs miꞌin, yụ raꞌ jéyac, ¿Miꞌinyaꞌ adac mọmoꞌ naꞌiꞌ Jenꞌsiꞌ p̂eyacdyeꞌ muꞌ? ¿Miꞌin adac mọmoꞌ seꞌvebitinte jiquej? Jam junꞌ. 37Pạrej yi miꞌin: "Yụ nash soꞌmactyiꞌ Jenꞌsiꞌ p̂eyacdyeꞌ muꞌ." Tyi chuc meꞌ yity in muꞌin raꞌ chäyibun yụ in, ọij jiꞌchäyitidyeꞌ sáñes q̂uinꞌ yụ, ọij anic Ayoꞌsiꞌ p̂eyacdyeꞌ muꞌ. 38Jam jụijyaꞌ seꞌvibun ọij p̂eyacdyeꞌ yụ, meꞌdye raꞌ muꞌsiꞌ jam raꞌ seꞌvebitinte miꞌin p̂eyacdyeꞌ muꞌ.
39Mọꞌdyes vojity, fer dyijtuvac miꞌin paj qui soꞌmac miꞌin voroꞌyedyeꞌ Jenꞌsiꞌ muꞌ. Chimeꞌdye raꞌ jam dyäcjeĉunacsi miꞌin muꞌin yocsiꞌĉan p̂eyacdyeꞌ p̂eyaquity in. 40Jemoñeꞌ jämꞌ cạtiñeꞌ miꞌin vajmuꞌyaijĉan miꞌin, bistidyeij raꞌ miꞌin, dyijyedyeꞌtum raꞌ cạtiñeꞌ miꞌin judyeyaꞌ jämꞌyedyeꞌtum chimeꞌ.
Currently Selected:
Tashches Corintoĉantyidyes 14: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'