Tashches Corintoĉantyidyes 15
15
Vañinyedyeꞌ Jesucristos
1Q̂uinꞌ vojity, mạꞌjeꞌ yụ jiꞌdyijveyac miꞌin mọꞌ jämꞌsiꞌ p̂eyacdyeꞌ Jenꞌsiꞌ muꞌ, mọꞌ voroꞌtyeyacsiꞌ jiquej, mọꞌ jụjjetiñes miꞌin, yódyescheꞌdyemꞌ fer buꞌyicheꞌ u miꞌin. 2Mọꞌdye p̂eyacdyeꞌ jiꞌc̣honnacsiꞌ miꞌin, miꞌin rụij anicyi jụijyaꞌ judyeyaꞌ fer buꞌyi miꞌin, mọꞌ raꞌ tupuj jiꞌc̣honnac miꞌin, jam raꞌ fibiꞌ anicyi miꞌin.
3Yụ jịꞌchiqueyeyac jiquej miꞌin mọꞌ p̂eyacdyeꞌ soꞌminsiꞌ yụ muꞌ Jenꞌ. Ọij mọjoꞌchas p̂eyacdyeꞌ, jäꞌmiij yiꞌ mọꞌ sánacdyeꞌ. Yiꞌ muꞌ Cristo ijac tsunsidyes juchaj, 4judyeyaꞌ nạ́te in. Chibin qui namꞌ mạyedyeꞌ meꞌ buꞌyi toꞌĉan chat qui vañinyeban, yiꞌ sánacdyeꞌ.#15:4 Salmos 16:10 5Aty meꞌsiꞌ jiꞌcavibun Pedroyaꞌ judyeyaꞌ muꞌinyaꞌ yiriꞌtac päräꞌ jiyityyaꞌ in. 6Judyeyaꞌ chimeꞌ jiꞌcavibun muꞌinyaꞌ in anicjetetyyaꞌ Jenꞌ in, ĉanamꞌ quiꞌ cientyityyaꞌ in vajmuꞌyaijtyiꞌ in. Muꞌin muꞌyaꞌ cạvetety in tacaꞌ tsạꞌ q̂uinꞌ in, pạrej qui namꞌ muꞌyayaj in aty sänjan in. 7Judyeyaꞌ Santiagoyaꞌ chimeꞌ jiꞌcaviti, judyeyaꞌ jutactyiꞌyaꞌ Jenꞌtyiꞌ muꞌ.
8Jäquiꞌve jiꞌcaviti yụ́yaꞌ chimeꞌ, chat q̂uinꞌdyemꞌ yụ anicjete, jam jeñej yoctyiꞌ jutactyiꞌ muꞌ, jäquiꞌve muꞌ Jenꞌ yuꞌtyin yụ jutactyiꞌ muꞌ. 9Yụ uyaꞌyaꞌ buꞌyi, jam jeñej yoctyiꞌ jutactyiꞌ muꞌ, mijam yụ tupuj jutactyiꞌ buꞌyi Jenꞌtyiꞌ muꞌ, meꞌ ĉúti yụ, ĉaĉaij na yụ jịꞌñibeꞌcacsi jiquej muꞌin ñuruꞌtyity Jenꞌtyiꞌ muꞌ. 10Muꞌ na Jenꞌ ñịbeꞌjin yụ, ñịbeꞌyedyeꞌyaꞌ muꞌ yoc yuꞌtyin yụ paj qui yocve bäꞌyi yụ. Jam fibiꞌ meꞌ ñịbeꞌjin yụ, ĉaĉaij na yụ mujuꞌchaꞌ fer carijtaqui yụ muꞌdyes, jam jeñej yoctyiꞌ jutactyiꞌ Jenꞌtyiꞌ muꞌ. Jam qui namꞌ ĉụiꞌsiꞌyaꞌ ferdyeꞌ carijtaqui yụ, Jenꞌsiꞌyaꞌ ferdyeꞌ muꞌ paj qui meꞌ carijtaqui yụ. 11Meꞌ tsanꞌ yụ voroꞌtyeyactyiꞌ miꞌin, meꞌ tsanꞌ jam, meꞌ tsanꞌ yoctyiꞌ voroꞌtyinac jụijyaꞌ in, mọꞌ jam jedyeꞌ yiꞌ, ĉaĉaij na mọꞌdye voroꞌyedyeꞌ voroꞌtacsis tsun, yódyesdyemꞌ anicjetiñes u miꞌin.
Vañinyedyeꞌ säñitysiꞌ in
12P̂eyacdyeꞌ jéyacsejas tsun mọꞌ yiꞌ junꞌ chuc muꞌ Cristo vañinyeban jiquej. ¿Junꞌ meꞌ pạrej yi u miꞌin: "Jam raꞌ vañinyeban säñity in?" 13Jam vañinyeban säñity jụijyaꞌ in, a vuty muꞌ Cristo chimeꞌ jam vañinyeban u. 14Jam vañinyebanyaꞌ muꞌ Cristo, a vuty fibiꞌ shupquiꞌ voroꞌyedyeꞌ tsunsiꞌ u, meꞌdye chimeꞌ a vuty fibiꞌ shupquiꞌ anicyedyeꞌ muꞌcheꞌ u miꞌin. 15Jam mọꞌ mọmoꞌ, jam vañinyebanyaꞌ muꞌ, a vuty väñädyeꞌ shupquiꞌ o tsunsiꞌ voroꞌyedyeꞌ u, ĉaĉaij na yi tsun jéyacsi muntyiꞌ in voroꞌyedyeꞌyaꞌ tsun junꞌ chuc muꞌ Jenꞌ jịꞌtsaꞌebajte muꞌ Cristo. 16Jam meꞌ vañinyeban jụijyaꞌ muꞌin säñity in, a vuty muꞌ Cristo jam vañinyeban chimeꞌ u. 17Jam vañinyeban jụijyaꞌ muꞌ Cristo, a vuty fibiꞌ shupquiꞌ anicyedyeꞌ muꞌcheꞌ u miꞌin, a vuty tacaꞌ monꞌdyeꞌĉan juchajĉan u miꞌin, 18a vuty meꞌdye u muꞌin vaꞌtacdyedyety u in muꞌin säñity in anicjetety Cristo jiquej in. 19Jam vañinyeban säñity jụijyaꞌ in, a vuty muꞌ Cristo ñútyisinꞌ u q̂uinꞌsis tupudyeꞌ mọmoꞌ úcheꞌdyemꞌ. A vuty jam vañinyebajshaꞌ raꞌ u, a vuty mujuꞌchaꞌ ñịbeꞌ u tsun, jam jeñej muꞌin jam anicjetety Jenꞌ in, uyaꞌyaꞌ raꞌ ñịbeꞌ muꞌin in.
20Jam na meꞌ, ĉaĉaij na vañinyeban muꞌ. Muꞌ tashi vañinyeban, mọꞌ jiꞌĉuyisinꞌ vañinyeban raꞌ muꞌin sänaquemuntyiꞌ in. 21Aty juchaij jiquej muꞌ tashchety muntyiꞌ q̂uinꞌ räj sänꞌdyety tsun, meꞌdye chimeꞌ muꞌ yirity muntyiꞌ yuꞌsinꞌ tsun paj qui vañinyebajshaꞌ tsun. 22Q̂uinꞌ muntyiꞌ tsun räj sänꞌdyety tsun ĉaĉaij na Adántyiꞌ vóshiꞌ tsun, meꞌdye raꞌ chimeꞌ räj vañinyebajshaꞌ tsun ĉaĉaij na Cristoty tsun. 23Jenꞌ yụꞌtyeꞌ tupudyeꞌ cäts yirityityij in vañinyeban raꞌ in. Tashi Cristo vañinyeban, jäquiꞌve raꞌ tsun vañinyebajshaꞌ Cristoty tsun, junꞌsiꞌ chuc raꞌ atsijbanyaꞌ muꞌ. 24Chat qui raꞌ ayij jadyiquis tupudyeꞌ, Cristo raꞌ räj jiꞌpenacsi ayoꞌ in judyeyaꞌ tashcheꞌ buꞌyity in räjtumdye muꞌin fer buꞌyity in, judyeyaꞌ mọꞌin fer buꞌyis chimeꞌ in, chat qui raꞌ muꞌ Cristo soꞌmaĉan Jenꞌ muꞌ, muꞌ qui raꞌ ayoꞌbuꞌyi räjdyes. 25Mọꞌdyes q̂uinꞌ yejĉoij raꞌ muꞌ ayoꞌbuꞌyi muꞌ Cristo junꞌ quiꞌ chuc muꞌ Jenꞌ jiꞌpenbite muꞌin fạ́quetety in. 26Tas raꞌ jiꞌpenac in fạ́quetety in, muꞌ raꞌ jiꞌpeñeꞌ mọꞌ sänꞌdyeꞌ, mọꞌ jeñej buꞌyiꞌ fáquisinꞌsiꞌ tsun, jadyic raꞌ säñi muntyiꞌ in. 27Yiꞌ sánacdyeꞌ: "Jenꞌ jiꞌpeñeꞌ räj, muꞌ jayuꞌti paj qui muꞌ Cristo räjdyes ayoꞌbuꞌyi." Meꞌ tsanꞌ yiꞌ sánacdyeꞌ: "Räjdyes ayoꞌbuꞌyi muꞌ", chị́jaꞌ qui namꞌ tsun jam jiꞌjäcte Jenꞌ, muꞌ jam ĉụiꞌ yuꞌti paj qui muꞌdyes ayoꞌbuꞌyi Cristo, jam, ĉaĉaij na muꞌdye Jenꞌ yụꞌtyeyete. 28A na raꞌ tas jiꞌpenacyaꞌ mọꞌ, aty qui raꞌ räjenꞌdyes ayoꞌbuꞌyiyaꞌ muꞌ Cristo, chat q̂uinꞌdyemꞌ raꞌ muꞌ Cristo ĉụiꞌ jiꞌsäsdyi paj qui ayoꞌbuꞌyi muꞌdyes muꞌ Jenꞌ, muꞌ jiꞌpenbitety muꞌin fạ́quetety jiquej in, chat q̂uinꞌdyemꞌ raꞌ muꞌ Jenꞌ ayoꞌbuꞌyi räjenꞌdyes.
29Chimeꞌdye jam vañinyebanyaꞌ muꞌin säñity in, ¿junꞌ dash pạrej muꞌin jiꞌchojti in säñitydyes in?#15:29 Jam jorojĉan jedyeꞌ buty cạiꞌ mọꞌ jiꞌchojtidyeꞌ säñitydyes in, jam muꞌ yi Pablo jemoñeꞌ meꞌ tsun, jịꞌĉocdyes mọmoꞌ p̂eyacdyeꞌ jiꞌjäqueꞌ muꞌ Pablo. 30Jam vañinyebanyaꞌ muꞌin säñity in, a vuty fibimꞌ meꞌ räjĉan ñịbeꞌ bäꞌyi u tsun cäc̣häꞌchucdyedyes Jenꞌ. 31Junaꞌ ĉụiꞌ jịjcaijyaꞌ yụ paiꞌ joꞌmeiꞌvevej c̣hojvin yụ in, pạrej mạꞌjeꞌ ujan yụ in. Yụ jéyac vojity, muꞌin nash mạꞌjeꞌ ujan yụ in, meꞌdye yụ chimeꞌ jéyac junꞌ chuc yụ maꞌjotyitiĉaꞌ miꞌin, ĉaĉaij na miꞌin anicjetinte Jesucristo Ayoꞌ tsun. 32Chimeꞌdye muꞌin Efesoĉantyiꞌ in anic fer fáquibun p̂eyacdyeꞌ yụ in, judyeyaꞌ c̣hojvin yụ in jeñej yirity pupujriꞌ, meꞌ cavin yụ in. Jam vañinyebanyaꞌ muꞌin säñity in, a vuty fibimꞌ ñịbeꞌ cạveꞌ u yụ p̂eyacdyedyes, a vuty tupuj yéjaꞌ u: "Säcsejaꞌ mọmoꞌ, jämꞌ raꞌ feshtayejaꞌ, mọꞌ mọmoꞌ dyijtujaꞌ ĉaĉaij na raꞌ nojno jadyic tsun", a vuty tupuj yéjaꞌ tsun u jam vañinyebajshaꞌyaꞌ tsun.
33Anic rụij shupquiꞌ mọꞌ p̂eyacdyeꞌ muntyis, yiꞌ: "Tyi chuc penꞌdyetucsi muꞌin ac̣hiꞌyity in, muꞌ qui raꞌ chimeꞌ jịjcatacsi cäc̣häꞌ", yiꞌ. Anicdye meꞌ, mọꞌdyes jam raꞌ ĉụiꞌ väñätuti miꞌin. 34Tsạꞌejamꞌ dyijyedyeꞌĉan miꞌin, meꞌquiꞌdye raꞌ juchaij miꞌin, ĉaĉaij na pạrej muꞌyaꞌ miꞌinĉantyiꞌ in mijam chị́yete Jenꞌ pạrej in, mijam anicjete in. Där tsị́cadyeꞌ shupquiꞌ mọꞌ miꞌindyes.
Junꞌ chuc raꞌ cạveꞌ säñity in vañinyebanyaꞌ in
35Vatyquej yirity yi jụijyaꞌ: "¿Junꞌ buty raꞌ vañinyeban muꞌin säñity in? ¿Jụꞌñiiꞌ qui buty raꞌ aꞌ muꞌin?" vatyquej yi jụijyaꞌ pạrej miꞌin. 36Itŝiꞌ jétiñeꞌ dyijyedyeꞌ miꞌin. Jeshaꞌ quịc jụijyaꞌ yiris vej, tạbaiꞌ chum aꞌ mọꞌsiꞌ, chat q̂uinꞌdyemꞌ shupquiꞌ chịpdyeꞌ mọꞌ. 37Quị́jaꞌ jụijyaꞌ tsun jụꞌñis ĉụiꞌ mọmoꞌ vej, vatyquej trivos vatyquej yocsiꞌ vej jụijyaꞌ, yedyes vej quịc, jam aꞌ quịc mọꞌ. 38Aty qui namꞌ chịbiꞌ jụijyaꞌ, yoc qui shupquiꞌ aꞌ mọꞌ, junꞌ chuc muꞌ Jenꞌ jämꞌtyeꞌ, joꞌmeiꞌ shupquiꞌ aꞌ mọꞌ. Jam vaj cäts vej mọꞌin, meꞌ buꞌyiꞌdye chimeꞌ aꞌ mọꞌin, yoc yoc shupquiꞌ mọꞌin, jụꞌñis chuc mọꞌ quịc vej joꞌmeiꞌdye shupquiꞌ aꞌ mọꞌ. Meꞌ buꞌyiꞌdye chimeꞌ, aty nạcyaꞌ aꞌvun tsun mọꞌ jeñej buꞌyiꞌ vej, a qui na raꞌ vañinyebanyaꞌ mọꞌ, anic raꞌ yoc shupquiꞌ mụiꞌsis aꞌ tsun. 39Meꞌ buꞌyiꞌdye chimeꞌ mọꞌin jaccheꞌ bäꞌyis in, mijam vaj joꞌmeiꞌ in. Aꞌ muntyis jam cäts jebacdyeꞌtum, judyeyaꞌ chimeꞌ tạbedyes aꞌ mọꞌ judyeyaꞌ jaijtyistum, jam vaj joꞌmeiꞌdye in, yoc buꞌyiꞌdye aꞌ mọꞌin. Meꞌ buꞌyiꞌdye chimeꞌ, mọꞌ raꞌ vañinyebanꞌ aꞌ tsun, yoc raꞌ shupquiꞌ, jam jeñej q̂uinꞌsis aꞌ tsun. 40Anic jäjämunsiꞌ mọꞌin mạyedyeꞌches jedyeꞌ in, chimeꞌ jäjämunsiꞌ ọ́ches aꞌ muꞌin, mọꞌin qui namꞌ mạyedyeꞌches in anic yocsiꞌ aꞌ muꞌin, jam jeñej ọ́ches aꞌ in. 41Chimeꞌdye muꞌ tsun judyeyaꞌ mọꞌ ịvaj judyeyaꞌ ọ́rotaꞌ in jam vaj cäts mạijyi in. Muꞌin ọ́rotaꞌ in pạrej yoc yoc meꞌchuiꞌ mạijquedyeꞌ muꞌin.
42Meꞌdye raꞌ muꞌin chimeꞌ vañinyebantyiꞌ in, yocve raꞌ shupquiꞌ aꞌ muꞌin. Nạc jụijyaꞌ muntyis aꞌ tsun focoiꞌ. A na raꞌ vañinyebanꞌyaꞌ, mijam raꞌ jụꞌñiꞌ focoiꞌ. 43Nạc jụijyaꞌ muntyis aꞌ tsun, anic aꞌc̣his mọꞌ, itŝiꞌ ferdyeꞌ mọꞌ. A na raꞌ vañinyebanꞌyaꞌ mọꞌ, där raꞌ jämꞌsiꞌ shupĉanꞌ mọꞌ, ferdyeꞌtum raꞌ. 44Nạc jụijyaꞌ aꞌ tsun, ọ́chedyes mọmoꞌ jiquej, a na raꞌ vañinyebanꞌyaꞌ, mụiꞌsis qui raꞌ mọꞌ mạyedyeꞌchedyes qui raꞌ mọꞌ. Mọꞌyaꞌ jacchedyes aꞌ tsun, mọꞌ jiꞌchäquiyisinꞌ mọꞌyaꞌ raꞌ chimeꞌ mạyedyeꞌchedyes aꞌ tsun.
45Mọꞌdye p̂eyeꞌ mọꞌ sánacdyeꞌ yiꞌ: "Tashchety muntyiꞌ Adán soꞌmac jiquej paj qui tsạꞌ buꞌyi muꞌ"#15:45 Génesis 2:7, yiꞌ mọꞌ, muꞌ na jäquiꞌvety Adán muꞌ anic tsạꞌchusinꞌtyiꞌ tsun ĉụiꞌsiꞌyaꞌ Ạꞌedyeꞌ muꞌ, paj qui Jenꞌyadyety tsun.#15:45 Muꞌ jäquiꞌvety Adán muꞌ nash Cristo. 46Jambiꞌ tashcheꞌ meꞌchujaꞌ mạyedyeꞌchedyes aꞌ tsun, tashcheꞌ meꞌchujaꞌ jacchedyes aꞌ tsun, jäquiꞌve qui raꞌ mọꞌ meꞌchujaꞌ mạyedyeꞌchedyes aꞌ tsun. 47Muꞌ tashchety muntyiꞌ jac jämꞌtac jiquej, jacchedyety muꞌ, muꞌ na jäquiꞌvety muntyiꞌ jam muꞌ meꞌ, mạyedyeꞌchety muꞌ atsij. 48Räj tsun jacchety tsun jac jämꞌtac aꞌ tsun, yojdyemꞌ Adánsiꞌ jiquej umꞌ, muꞌin na mạyedyeꞌchedyety in mạyedyeꞌches aꞌ muꞌin meꞌchuiꞌ in, yojdyemꞌ muꞌ mạyedyeꞌchety muntyiꞌ u.
49Aꞌ tsun yódyesdyemꞌ Adánsiꞌ umꞌ, joꞌmesdyemꞌ meꞌchujaꞌ q̂uinꞌ tsun. Yirisĉan raꞌ mạyedyeꞌ meꞌchujaꞌ mọꞌ mạyedyeꞌchedyes aꞌ tsun, yódyesdyemꞌ muꞌsiꞌ u mạyedyeꞌchetysiꞌ u.
50Yụ raꞌ jéyac vojity, ọij jacchedyes aꞌ tsun, shushtum judyeyaꞌ chäshtum, mọꞌ raꞌ jam Jenꞌyaꞌ jịjcaiꞌ, yóĉandyemꞌ ayoꞌbuꞌyedyes Jenꞌsiꞌ umꞌ, mọꞌ focodyeꞌ jam junꞌ Jenꞌyadyes mọꞌ. 51Jeshaꞌ yụ raꞌ jéyac ọij p̂eyacdyeꞌ jam chị́yes muntyiꞌ in, yiꞌ: pạrej raꞌ jam sänjaꞌ, räj qui na ramꞌ Jenꞌ yoc yuꞌsinꞌ, yocsiꞌ qui raꞌ aꞌ tsun, 52yiristum raꞌ muꞌ yuꞌsinꞌ aty ayijbanꞌyaꞌ mọꞌ tupudyeꞌ. Mạꞌiꞌ raꞌ tujyedyeꞌ, tujyedyeꞌĉandye raꞌ vañinyeban säñity in, aty qui raꞌ jam sänꞌdyety in, tsunsiꞌ raꞌ aꞌ chimeꞌ yoc yuꞌbusinꞌ muꞌ Jenꞌ. 53Mọꞌ focoiꞌsiꞌ q̂uinꞌ aꞌ tsun mọꞌ sänꞌdyes, mụiꞌsis qui raꞌ shubanꞌ mọꞌ, mijam qui raꞌ junꞌ mọtsiꞌ aty qui raꞌ jam junꞌ sänꞌdyes. 54A raꞌ meꞌ yuꞌsinꞌyaꞌ muꞌ Jenꞌ, cạ̈tsiꞌ raꞌ sánacdyeꞌ muꞌ yiꞌsimꞌ: "Aty jiꞌpenac sänꞌdyeꞌ, jadyic ferdyeꞌ mọꞌ. 55Jadyic raꞌ jiꞌpensinꞌ sänꞌdyeꞌ, mijam raꞌ quivij meꞌbusinꞌ", yiꞌ sánacdyeꞌ. 56Mọꞌ juchaj soꞌmeꞌ ferdyeꞌ mọꞌ sänꞌdyeꞌ, mọꞌ qui meꞌsinꞌ, mọꞌ na yụꞌtacdyeꞌ Jenꞌsiꞌ muꞌ, mọꞌ soꞌmacsiꞌ vaꞌtacdyeꞌ muꞌin juchajtumtyiꞌ in. 57Yoshoropaij jéjaꞌ Jenꞌ tsun, Jesucristoyaꞌ Ayoꞌ tsun, muꞌ jiꞌc̣honsinꞌ sänꞌdyeꞌyaꞌ tsun.
58Vojity, miꞌin mạꞌjeyacdyety yụ, fer buꞌyi raꞌ miꞌin, jam raꞌ yocve dyijyi miꞌin, fer raꞌ carijtaqui Ayodyes miꞌin, jämꞌtujcavac. Aty chịj miꞌin carijtaĉaꞌ Ayodyes jụijyaꞌ tsun, mọꞌ jam fibis shupquiꞌ carijtacdyeꞌ tsun, anic yaꞌiꞌ mọꞌ shupquiꞌ.
Currently Selected:
Tashches Corintoĉantyidyes 15: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'