Tashches Corintoĉantyidyes 16
16
Dyimꞌtacdyeꞌ vojitydyes
1Yụ raꞌ q̂uinꞌ jéyac junꞌ chuc raꞌ dyimacdyeꞌ querec̣ha anicjetetydyety Jenꞌ in Jerusalénĉantyidyety in. Junꞌ chuc yụ jéyacsi muꞌin ñuruꞌtyity Cristoyaꞌ in paiꞌ bäꞌyity in Galaciaĉantyiꞌ in, meꞌdye raꞌ miꞌin chimeꞌ. 2Räjĉan chaꞌshetiñeꞌ dọmico, jemoñeꞌ cäts yirityityij damꞌ yụꞌtinte querec̣ha miꞌin, junꞌ quiquij chuc jäctinte carijtacdyeꞌyaꞌ miꞌin, meꞌ meꞌ raꞌ jämꞌ yụꞌtinte miꞌin dyimacdyety. Jäꞌmij raꞌ jäꞌmiiꞌtyiꞌ junꞌ quiꞌ chuc venchubanyaꞌ yụ, aty qui raꞌ jam dyimꞌtyetyeyac yụ querec̣ha venchubanyaꞌ yụ. 3Atsijban raꞌ yụ, yụ raꞌ jutacsi muntyiꞌ in paj qui Jerusalénĉan jịjcaij in, jụꞌñity chuc tsimꞌtactyiꞌ miꞌinyaꞌ, paj muꞌin cạyacsi in muꞌ querec̣ha ñịbeꞌyedyety Jerusalénĉantyidyety anicjetety Jenꞌ in, muꞌ raꞌ ñịbeꞌjeyacsi miꞌin. Yụ raꞌ yụꞌtyeyacsi sánacdyeꞌ muꞌindyes in, mọꞌ raꞌ jịꞌcaveyac muꞌinyaꞌ Jerusalénĉantyiꞌyaꞌ in paj qui muꞌin jụjtacsi in. 4Jämꞌ ĉọ́tiñeꞌ jụijyaꞌ miꞌin, yụ́mundye raꞌ chimeꞌ jịjcacsi penꞌdyetucsi muꞌĉan jịjcaij yụ.
Dyijyedyeꞌ Pablos junaꞌ chuc raꞌ cạyacsi Jenꞌsiꞌ p̂eyacdyeꞌ muꞌ
5Chimeꞌdye yụ raꞌ ĉọcyac miꞌin. Meꞌ raꞌ miꞌedyeꞌ yụ, tashcheꞌ chum raꞌ Macedoniaĉan jịjcaij yụ. Aty raꞌ cajñeꞌyaꞌ yụ mọꞌ Macedonia, chat qui raꞌ q̂uinꞌdyemꞌ miꞌinyaꞌ jịjcaij yụ ĉọcyac Corintoĉantyiꞌ miꞌin. 6Vatyquej raꞌ yụ mendye jajbuꞌyeyac miꞌin muꞌĉan, vatyquej raꞌ chimeꞌ muꞌĉan jiꞌjiyeꞌ yụ tupudyeꞌ tsịvuꞌvudyes. A raꞌ meꞌsiꞌ tupuj ñútyitiĉaꞌ yụ miꞌin aty raꞌ yacchuyacyaꞌ yụ, tupuj yocve jịjcaij yụ junaꞌ ĉụiꞌ. 7Jam raꞌ tänꞌjemcayac mọmoꞌ, yụ mạꞌjeꞌ mendye jajbuꞌyemcayac miꞌin, yi Ayoꞌ jụijyaꞌ tsun. 8Úĉan raꞌ yụ Efesoĉan junꞌ quiꞌ chuc venchuiꞌ mọꞌ feshta Pentecostés, 9ĉaĉaij na úĉantyiꞌ chimeꞌ in fer mạꞌjepte Jenꞌsiꞌ p̂eyacdyeꞌ in, tupuj carijtaqui úĉan yụ Jenꞌdyes. Muꞌyaꞌ pạrej fạ́quebitety Jenꞌsiꞌ p̂eyacdyeꞌ in, jam jayejyi muntyiꞌ meꞌtyity in.
10Ventyicnac jụijyaꞌ muꞌ Timoteo, tiĉunꞌmac muꞌ ĉaĉaij na muꞌ carijtaqui chimeꞌ Ayodyes tsun, yojdyemꞌ yụ u. 11Jam raꞌ fạ́queĉunꞌtinte miꞌin, jämꞌjeĉunꞌmac. Anꞌdyemꞌ jambiꞌ yajquibunac muꞌ, nọ́tyemac paj qui maꞌjodyeꞌtum miꞌeban atsijban yụ́yaꞌ. Yụ aty bisajte muꞌ muꞌintumdye yoctyiꞌtum vojity tsun.
12Yụ nash jéyac vojity tsun Apolos, yụ tsanꞌ fer mạꞌjeꞌ paj qui muꞌ chimeꞌ ĉucnac miꞌin, paj qui penꞌdyetucsi vojity tsun, muꞌ qui namꞌ jam mạꞌyi q̂uinꞌ. A na raꞌ mọꞌyaꞌ jụijyaꞌ tupudyeꞌ muꞌ, chat q̂uinꞌdyemꞌ raꞌ muꞌ ĉucnac.
Jadyicves voryetacdyeꞌ Pablos muꞌ
13Tsạꞌ buꞌjamꞌ miꞌin, fer buꞌyi raꞌ bäꞌyi Jenꞌdyes miꞌin, sóñiꞌyejamꞌ chimeꞌ. 14Räjĉan mạꞌjeyacsejamꞌ bäꞌjamꞌ, junꞌ chuc jämꞌtaqui jụijyaꞌ miꞌin.
15Vojity, a nash chịj miꞌin junꞌ chuc muꞌ Estéfanas, räjtumdye chätidyeꞌ muꞌ Acayaĉan bäꞌyity in, muꞌin tashcheꞌ dạcse jiquej in mọꞌ jụjyedyeꞌ Jenꞌcheꞌ jiquej. Mọmꞌ dyijtuiꞌ in mạꞌjeꞌ nọ́tacsi in muꞌin anicjetety Jenꞌ in. 16Yụ fercheꞌ jéyac miꞌin, chicacsejamꞌ muꞌin meꞌ bäꞌyitysiꞌ in, judyeyaꞌ muꞌin meꞌ nọ́taquitysiꞌ in judyeyaꞌ muꞌin meꞌ carijtaquitysiꞌ Jenꞌdyes in, meꞌ meꞌ cäc̣häꞌchutacsejamꞌ räj ọij jämꞌsiꞌ dyijyedyeꞌ muꞌin.
17Anic där maꞌjotacsebi yụ ayidyeꞌ muꞌin Estéfanassiꞌ judyeyaꞌ muꞌ Fortunatos judyeyaꞌ mus Acaicos. Meꞌ tsanꞌ itŝij úyaꞌ miꞌin, meꞌ tsanꞌ jam penꞌdyetutiĉaꞌ yụ miꞌin, 18muꞌin qui namꞌ maꞌjoij yuꞌbun ĉojtyiꞌ yụ in, yojdyemꞌ muꞌin u in maꞌjoij yuꞌnac jiquej u in. Jämꞌjeĉunacsejamꞌ muꞌin meꞌ bäꞌyity in.
19Muꞌin ñuruꞌtyity Cristoyaꞌ in muꞌin paiꞌ bäꞌyity Asiaĉantyiꞌ in, räj vorjinac muꞌin in. Muꞌ Aquila judyeyaꞌ mọꞌ Priscila, p̂en muꞌ, judyeyaꞌ räj muꞌin anicjetety Jenꞌ in vajmuꞌyaijtyiꞌ in acaꞌĉan muꞌin, muꞌin chimeꞌ vorjinac in Ayoscheꞌ tịj muꞌ. 20Räj vojity úyaty in vorjinac muꞌin chimeꞌ in. Miꞌin chimeꞌ vaj meij raꞌ vorjitidyeij miꞌin voryedyeꞌ pụꞌsacdyeꞌ mọꞌ Jenꞌdyes.
21Ọij voryetacdyeꞌ yụ ĉụiꞌsiꞌyaꞌ un yụ sánaqui yụ: Yụ Pablo vorjeyac miꞌin.
22Tyi chuc jam mạꞌjetety in muꞌ Jesucristo Ayoꞌ tsun, paj vaꞌtacdyedyety muꞌ. Mi Ayoꞌ tsun, atsiva mi.
23Paj muꞌ Jesucristo Ayoꞌ tsun ñịbeꞌjitidyes muꞌ soꞌminac miꞌin. 24Yụ mạꞌjeyac räj miꞌin Jesucristoty miꞌin.
Currently Selected:
Tashches Corintoĉantyidyes 16: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'