Jäqui'ves Corintoĉantyidyes 10
10
Pablo ñutsjeyaqui yụꞌtacdyeꞌ muꞌ
1Yụ Pablo yụ raꞌ fercheꞌ jéyac ọij p̂eyacdyeꞌ yụ, seꞌvibutiĉamꞌ miꞌin. Jeshaꞌ pạrej muꞌyaꞌ p̂iyin yụ in yi in: "Pablo junꞌsiꞌ ĉụiꞌ penꞌdyetusinꞌ tsun ĉụiꞌsiꞌ tsị́cadyeꞌ muꞌ uyaꞌyaꞌjajiti, a qui namꞌ vaꞌve jụijyaꞌ muꞌ anic sonꞌ buꞌyi yuꞌti, fạraꞌyiꞌ jämꞌtyeꞌ sánacdyeꞌcheꞌ muꞌ", meꞌ yi pạrej miꞌin. Meꞌ tsanꞌ meꞌ yi miꞌin, yụ qui namꞌ mạꞌjeꞌ jämꞌyedyeꞌtum bäꞌyi, judyeyaꞌ tyumꞌchuti chimeꞌ yụ, yojdyemꞌ muꞌ Cristo u, meꞌdye yụ chimeꞌ mạꞌjeꞌ. 2Mọꞌdyes yụ jéyac miꞌin ñäñitiĉaty miꞌin paj qui jäꞌmij farajjeyaqui aꞌc̣his dyijyedyeꞌ miꞌin jambiꞌdyemꞌ ĉọcyac yụ. Jam meꞌ jụijyaꞌ miꞌin sonꞌ buꞌyi raꞌ yuꞌti yụ fạraꞌjeĉunꞌyac raꞌ aꞌc̣hisyaꞌ dyijyedyeꞌ miꞌin aty dạquicyacyaꞌ. Tupuj yụ́dye fạraꞌjeĉunacsi muꞌin ñäñintyiꞌ tsun in. Muꞌin yi in: "Pablo jacches mọmoꞌ dyijyedyeꞌ cạiꞌtyiꞌ", yi in. 3Tsun jam meꞌ, meꞌ tsanꞌ úcheꞌ jaccheꞌ bäꞌyi tsun jam qui namꞌ jacchesyaꞌ dyijyedyeꞌ cạiꞌ tsun, chuti tsun carijtacdyeꞌ Jenꞌdyes muꞌ. 4-5Meꞌ chutidyeijyaꞌ tsun jam jacches ñutsjitidyes bächäiꞌ tsun, jam joꞌmesyaꞌ ñutsjiti tsun, Jenꞌsiꞌyaꞌ ferdyeꞌ chuti tsun, mọꞌ nash mọjoꞌchaꞌ ferdyeꞌtumsiꞌ, mọꞌ tupuj jiꞌpeñeꞌ räj aꞌc̣his jacches dyijyedyeꞌ in. Tsun jiꞌpenacsebi räj cäjsis p̂eyacdyeꞌ muꞌin väväjñitysiꞌ in. Chimeꞌjeyacsebidye tsun dyijyedyeꞌ muꞌin vaꞌbunyitysiꞌ in, muꞌin jam mạꞌjeꞌtyiꞌ in paj qui muntyiꞌ chị́yepte in Jenꞌsiꞌ p̂eyacdyeꞌ muꞌ. Chimeꞌdye tsun fercheꞌ jéyacsi muntyiꞌ in paj qui vaꞌquequeꞌ in mọꞌ cäjsis dyijyedyeꞌ muꞌin, paj qui muꞌ Cristo bächäcsebi dyijyedyeꞌ muꞌin. 6Mọꞌdyes miꞌin jemoñeꞌ chäquibutiĉaꞌ p̂eyacdyeꞌ tsunsiꞌ miꞌin, aty meꞌ jụijyaꞌ miꞌin, chat tsun qui raꞌ vaꞌtacdyeꞌ soꞌmacsi tsun muꞌin jam chäquintyiꞌ tsun in.
7Miꞌin anic cäj chị́yacsi muntyiꞌ miꞌin, mọꞌ qui namꞌ ĉojtyiꞌĉansiꞌ dyijyedyeꞌ muꞌin jam junꞌ chị́yacsebi miꞌin. Jeshaꞌ pạrej muꞌyaꞌ miꞌinĉantyiꞌ in vaꞌbunyedyeꞌtum yi in: "Meꞌdye tsun mọmoꞌ mujuꞌchaty jutactyiꞌ Cristoty muꞌ", yi in. Muꞌin meꞌ yity in, jemoñeꞌ tashcheꞌ rụijsisyaꞌ dyijyedyeꞌ chäyin tsun in junꞌ chuc tsun rụijtyity jutactyiꞌ Cristoty chimeꞌ muꞌ. 8Meꞌ tsanꞌ yụ vaꞌbunjeyaqui ĉụiꞌsiꞌ yụꞌtacdyeꞌ soꞌminsiꞌ yụ muꞌ Ayoꞌ tsun, jam qui namꞌ mọꞌ jiꞌtsicayin yụ, mọꞌ yụꞌtacdyeꞌ tsun Ayoꞌ soꞌminsiꞌ tsun paj qui jiꞌmaꞌyeyac Jenꞌyaꞌ, muꞌ jam yuꞌtyin tsun paj qui jiꞌpenyac yụ. 9Jam yụ mạꞌjeꞌ jiquijñeyac p̂eyacdyeꞌyaꞌ yụ sánacdyeꞌches yụ. 10Pạrej p̂iyin yụ in, yi in: "Anic tsäquiꞌyis p̂eyacdyeꞌ jutiyisinꞌ tsun sánacdyeꞌchemꞌ, tsuntum qui namꞌ jam meꞌ, uyaꞌyaꞌ tsunsiꞌyaꞌ vej shupqui, mijam méquiꞌ jämꞌ jiꞌshupquiyin tsun voroꞌyedyemꞌ," yi in. 11Tyi chuc meꞌ yity yụ raꞌ jéte: jeshaꞌ tsun jam fibiꞌ p̂eyaqui tsun, jätäjjeyac chuc tsun sánacdyeꞌcheꞌ, meꞌdye raꞌ jịꞌcätseꞌ tsun aty ventyecyacyaꞌ tsun muꞌĉan.
12Tsun jam cäc̣häꞌchucsebi dyijyedyeꞌ muꞌin cäj jịꞌchiyacsity in, muꞌin ĉụiꞌ timaꞌquititysiꞌ in. Anic cäj cạqui dyijyedyeꞌ muꞌin ĉaĉaij na vaj meij cavitidyeij in judyeyaꞌ vaj meij chäyitidyeij in jeñej rụij bäꞌyi ĉúti in ĉaĉaij na jam cạvepte Jenꞌsiꞌ p̂eyacdyeꞌ in, ĉụiꞌsimꞌ dyijyedyeꞌ cäc̣häꞌchutyiti in, meꞌ mọmoꞌ bäꞌyi in. 13Tsun jam ĉụiꞌ vaꞌbunnacdyeꞌtum yuꞌti tsun, mijam ĉụiꞌsiꞌyaꞌ dyijyedyeꞌ carijtaqui Jenꞌdyes tsun, mijam ĉụiꞌ cächjeyaqui carijtacdyeꞌ tsun. Junꞌ chuc Jenꞌ yuꞌtyin tsun, meꞌdyemꞌ carijtaqui tsun. Tsun voroꞌtyeyac miꞌin Corintoĉantyiꞌ miꞌin ĉaĉaij na muꞌdye Jenꞌ meꞌ yuꞌtyin tsun. 14Meꞌdye qui tsun jam ĉụiꞌ cächjeyaqui yụꞌtacdyeꞌ tsun aty voroꞌtyeyacyaꞌ tsun jämꞌsiꞌ p̂eyacdyeꞌ Cristos muꞌ, tsun tashcheꞌ voroꞌtyeyac miꞌin ĉaĉaij na muꞌdye Jenꞌ meꞌ soꞌmin mọꞌ yụꞌtacdyeꞌ tsun. 15Tsun jam vaꞌbunyedyeꞌtum carijtaqui tsun mijam ĉụiꞌdyes tucsebi tsun voroꞌyedyeꞌ yoctyis muꞌin, mọꞌ jam soꞌminsiꞌ tsun muꞌ Jenꞌ. Ĉụiꞌdyes tsunsiꞌ soꞌmin tsun Jenꞌ paj qui voroꞌtyeyac miꞌin, mọꞌ mạꞌjeꞌ tsun paj qui p̂añi Jenꞌdyes miꞌin, chat qui raꞌ tupuj muꞌveyaꞌ jịjcaij tsun cạyacsi Jenꞌsiꞌ p̂eyacdyeꞌ muꞌ, ĉaĉaij na meꞌ yuꞌtyin tsun muꞌ Jenꞌ. 16A raꞌ meꞌsiꞌ yocve qui raꞌ jịjcaij tsun yocsiꞌve qui raꞌ jac voroꞌtacsequi tsun mọꞌ jämꞌsiꞌ p̂eyacdyeꞌ Jenꞌsiꞌ muꞌ. Mijam raꞌ vaꞌbunyi tsun mijam raꞌ ĉụiꞌdyes tucsebi tsun yoctyis voroꞌtacdyeꞌ muꞌin muꞌĉantyis in.
17Tsuncheꞌ ca raꞌ cạ̈tsiꞌ sánacdyeꞌ yiꞌ: "Jam raꞌ ĉụiꞌ timaꞌquiti miꞌin, Ayoꞌ mọmoꞌ timaꞌquemac", yiꞌ sánacdyeꞌ. 18Jeshaꞌ muꞌ Ayoꞌ jam junꞌ jamaꞌjotyiti muꞌ ĉụiꞌ timaꞌquitity, muꞌ jamaꞌjotyiti tyi chuc timaꞌcactyiꞌ Ayoꞌyaꞌ.
Currently Selected:
Jäqui'ves Corintoĉantyidyes 10: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'