Jäqui'ves Corintoĉantyidyes 11
11
Muꞌ Pablo p̂eyeꞌ junꞌ chuc muꞌin cäj jịꞌchiyacsity in
1Q̂uinꞌ raꞌ yụ jéyac paj qui damꞌ tyumꞌchutidyeꞌtum seꞌvibutiĉaꞌ miꞌin ọij vaꞌbunyedyeꞌ p̂eyacdyeꞌ ĉúbutiĉas yụs miꞌin. 2Yụ fer ạ̈räjjeyac miꞌin, yódyemꞌ Jenꞌ ạ̈räjjinac u, meꞌdye yụ chimeꞌ ạ̈räjjeyac miꞌin. Jeshaꞌ yụ jiꞌsisyac Cristoyaꞌ, aty qui raꞌ atsijbanyaꞌ muꞌ, muꞌsiꞌyaꞌ qui raꞌ vej muꞌ yụꞌtyeyac, miꞌin raꞌ p̂en buꞌyi shupqui. Mọꞌdyes q̂uinꞌ mumꞌ yirity cäc̣häꞌchumac, mijam raꞌ yocsiꞌ dyijyedyeꞌ cäc̣häꞌchutiñeꞌ, jeñej yiris p̂en p̂eyacsiꞌ atsvun jambiꞌ tyushte sonꞌ junꞌ quiꞌ chuc vämiꞌ mọꞌ, meꞌ buꞌyi raꞌ miꞌin chimeꞌ. 3Anic ạ̈räjjeyac yụ vatyquej raꞌ yocve dyijyi miꞌin, vatyquej raꞌ seꞌ jaꞌyinac väñädyeꞌyaꞌ muꞌin, yódyemꞌ Eva jiquej o jụjbite nassiꞌ väñädyeꞌ muꞌ#11:3 Génesis 3:1-5, 13, vatyquej raꞌ meꞌ miꞌin chimeꞌ. Areꞌĉa farajjetiñeꞌ miꞌin mọꞌ rụijsis cäc̣häꞌchucdyeꞌ Cristos muꞌ. 4Meꞌ atsij jụijyaꞌ in cäj jịꞌchiyacsity in, jam jeñej tsunsiꞌ jiꞌchäyitidyeꞌ, muꞌin qui namꞌ in miꞌin cavin tiĉunacsi. Muꞌin yocve jiꞌjäctety Jesús in, mijam Jenꞌsiꞌ Ạꞌedyeꞌ p̂eijbite in, yocsimꞌ p̂eyeꞌ in. Meꞌ tsanꞌ meꞌ cäjsis p̂eyacdyeꞌ tuiꞌ in, mọꞌ jam jéyacsiꞌ tsun jiquej miꞌin, miꞌin qui namꞌ jụjtacsebi mọꞌ jiꞌchäyitidyeꞌ tuiꞌsiꞌ in. 5Jeñej aty mujuꞌchaꞌ Jenꞌtyiꞌ jutactyiꞌ ĉọcsi u miꞌin, jam na meꞌ. Yụ na jam junꞌ uyaꞌyaꞌtacsi uts meꞌtyity in. 6Meꞌ tsanꞌ yụ jam jämꞌ jiꞌshupqueyeyac voroꞌtacdyeꞌ ĉúbutiĉaꞌ yụ miꞌin, rụij qui namꞌ jéyac yụ, chị́yepte yụ Jenꞌsiꞌ p̂eyacdyeꞌ muꞌ, mọꞌ jorojĉanyiꞌ miꞌinyaꞌ ĉaĉaij na miꞌin räjĉan seꞌvibutiĉaꞌ miꞌin rụijsis jiꞌchäyitidyeꞌ yụ, judyeyaꞌ chimeꞌ miꞌin räjĉan cavibutiĉaꞌ carijtacdyeꞌ yụs miꞌin.
7Miꞌinĉandyemꞌ jiquej yụ, yoquiꞌdyemꞌ voroꞌtyeyacyaꞌ jämꞌsiꞌ p̂eyacdyeꞌ Jenꞌsiꞌ muꞌ, mijam yiris jedyeꞌ cọdyetyeyac carijtacdyeꞌyaꞌ yụ. Yụ ñịbeꞌ yuꞌti paj qui meꞌ tupuj soꞌmeyac Jenꞌdyes miꞌin. ¿Chäcdyis buty juchaj soꞌmeyac yụ jam cọdyetyeyacyaꞌ yụ, meꞌ ĉútiĉaꞌ yụ miꞌin? 8Miꞌinĉandyemꞌ jiquej yụ, muꞌin yocve bäꞌyity anicjetety Jenꞌ in muꞌin jutiyin yụ in querec̣ha, muꞌ tsạꞌ buꞌyedyety yụ. Jeñej buꞌyi muꞌin chutacsity querec̣ha in, meꞌ buꞌyi muꞌin in, paj qui yụ tupuj voroꞌtyeyac miꞌin. 9Miꞌinĉandyemꞌ yụ jiquej, junꞌsiꞌ chuc jayejjotaquiyaꞌ yụ jedyeꞌ, yụ jam damꞌ cọdyeyac miꞌin, muꞌin vojity Macedoniaĉantyiꞌ atsij in, muꞌin soꞌmitin yụ in tsạꞌ buꞌyedyety yụ. Yụ jam mạꞌjeꞌ cọdyeyac tsạꞌ buꞌyedyety yụ, yejĉoij raꞌ meꞌ yụ, yụ raꞌ jam cọdyeyac. 10Yódyemꞌ Cristo u rụij p̂eyaquity, meꞌdye yụ chimeꞌ rụij p̂eyaqui. Yụ raꞌ jéyac yụ raꞌ jam junꞌ farajjeꞌ ọij dyijyedyeꞌ yụ junꞌ chuc jam cọdyetaqui jedyeꞌ yụ voroꞌtacdyedyes yụ, paiꞌ raꞌ jéyacsi yụ Acayaĉantyiꞌ in junꞌ chuc meꞌ jam cọdaqui yụ. 11Jam meꞌ cọdyeyac miꞌin, jeñej aty jam mạꞌjeyac ĉútiĉaꞌ u miꞌin. Jam nash meꞌ, muꞌ Jenꞌ chịj yụ fer mạꞌjeyac miꞌin.
12Meꞌ tsanꞌ meꞌ, yejĉoij qui na ramꞌ meꞌ yụ jam cọdyeyac jedyeꞌ voroꞌtacdyedyes yụ. Yụ jam jeñej muꞌin meꞌ cäj jịꞌchiyacsity in, muꞌin jam meꞌ fibiꞌyaꞌ voroꞌyi in, jam junꞌ tupuj meꞌ yi in, "Tsun jam cọdaqui jedyeꞌ voroꞌtacdyedyes yojdyemꞌ Pablo u", jam tupuj yi in. 13Muꞌin jam anictyity jutactyiꞌ Cristoty in, väñädyeꞌyamꞌ seꞌ jaꞌyacsity muntyiꞌ in, jeñej jutactyiꞌ tsanꞌ Cristoty, meꞌ buꞌyi tsanꞌ yuꞌti in. 14Jam raꞌ äjjejaꞌ mọꞌ ĉaĉaij na muꞌdye Satanás itŝij chäꞌteij jiꞌcaviti muꞌ, jeñej mạijquedyeꞌtumtyiꞌ anjer, meꞌ buꞌyi yuꞌti chimeꞌ muꞌ. 15Mọꞌdyes qui jam carij Sọyotydyes úñity in paj qui muꞌin jeñej jutactyiꞌ Jenꞌtyiꞌ muꞌ, muꞌ rụijtyity, meꞌ buꞌyi yuꞌti in, muꞌin cäj jịꞌchiyacsity in. Muꞌin meꞌtyity in vaꞌtacdyeꞌ raꞌ soꞌmac in junꞌ chuc ac̣hiꞌ bäꞌyi in.
Ñịbedyes jịꞌĉojtyeꞌ muꞌ Pablo yụꞌtacdyeꞌyaꞌ muꞌ
16Quivij yụ raꞌ jéyac: jam raꞌ itŝity dyijyedyeꞌ ĉútiĉaꞌ yụ miꞌin. Meꞌ tsanꞌ meꞌ ĉútiĉaꞌ yụ jụijyaꞌ miꞌin, seꞌvitiĉamꞌ, meꞌ raꞌ jéyac yụ paj qui chäyitiĉaꞌ yụ miꞌin, junꞌ chuc yụ anictyity jutactyiꞌ Jenꞌtyiꞌ muꞌ. Yụ raꞌ p̂eyeꞌ carijtacdyeꞌ yụ, junꞌ a ĉa vaꞌbunjeꞌ yụ, areꞌĉa meꞌ buꞌyiꞌ jeñej muꞌin cäj jịꞌchiyacsity in. 17Ọij jeñej buꞌyiꞌ vaꞌbunyedyes p̂eyacdyeꞌ yụ, jam Ayos muꞌ, jeñej itŝity dyijyedyeꞌ yuꞌti ĉụiꞌ yụ, meꞌ shupquiꞌ mọꞌ. 18Jeshaꞌ muꞌyaꞌ daiꞌ cäj jịꞌchiyacsity in ĉụiꞌsiꞌcheꞌ fer buꞌyedyeꞌ muꞌin, meꞌ vaꞌbunyi in, areꞌĉa yụ meꞌ chimeꞌ, paj qui chị́yacsi miꞌin muꞌin cäj jịꞌchiyacsity in. 19Meꞌ tsanꞌ muꞌin itŝity dyijyedyeꞌ in, miꞌin qui namꞌ maꞌjodyeꞌtum dyichchucsebi dyijyedyeꞌ muꞌin, dadamꞌ dyijyedyeꞌtum meꞌ ĉọcsi miꞌin. 20Meꞌ miꞌin dyichjeyacsi muꞌin jịꞌñibeꞌcanactyiꞌ in, judyeyaꞌ muꞌin sonꞌ buꞌyi miꞌindyes in, judyeyaꞌ chutyinac jedyeꞌ in, judyeyaꞌ väñätunac in, judyeyaꞌ äcäijjinac in, meꞌ tsanꞌ fạraꞌñinac in judyeyaꞌ ñäñinac in, uts na yejĉoij mọmoꞌ dyichchuti miꞌin. 21Tsun na jam meꞌjeyac miꞌin, tsunsiꞌ na jayej sóñiꞌyedyeꞌ paj qui meꞌ tsun jịꞌñibeꞌcayac miꞌin, meꞌ aty ĉútiĉaꞌ tsun u miꞌin.
Muꞌin cäj jịꞌchiyacsity in anic ĉụiꞌ vaꞌbunyi in, yụ raꞌ meꞌ chimeꞌ. Paj tsanꞌ ọij jụijyaꞌ yiris vaꞌbunyedyeꞌ, meꞌdye raꞌ itŝity dyijyedyeꞌ yuꞌti yụ yíyaꞌ yụ. 22¿Anictyity buty hebreo muꞌin in? Anictyity in, yojdyemꞌ yụ hebreo u. ¿Israeltyiꞌ buty vóshiꞌ muꞌin in? Israeltyiꞌ vóshiꞌ muꞌin, muꞌtyiꞌdye vóshiꞌ yụ chimeꞌ. ¿Abrahamtyiꞌ buty vóshiꞌ muꞌin in? Abrahamtyiꞌ in muꞌtyiꞌdye yụ vóshiꞌ chimeꞌ. 23¿Úñity buty Cristoty muꞌin in? Dadamꞌ yụ mujuꞌchaꞌ úñity muꞌdyes. (Meꞌ yíyaꞌ yụ q̂uinꞌ, mọꞌ vaꞌbunyedyeꞌ shupquiꞌ yụ, mọꞌdyes itŝity dyijyedyeꞌ yụ, meꞌ ĉụiꞌ timaꞌquiti yụ.) Jeshaꞌ yụ chat dadamꞌ mujuꞌchaꞌ fer carijtaqui Cristodyes yụ, uyaꞌyaꞌ carijtaqui muꞌin cäj jịꞌchiyacsity in. Dadamꞌ yụ daiꞌ quiꞌ ĉärꞌtac muꞌdyes,#11:23 Úñedyeꞌ 16:23 siꞌbacdyeꞌ mọjoꞌchaꞌ jịꞌĉojtyeꞌ yụ muꞌdyes, arajmun pạrej ujan yụ in, räj joꞌmes jịꞌĉojtyeꞌ yụ. 24Muꞌin judíoty ayoꞌ muꞌin ĉanamꞌ quiꞌ siꞌbin yụ in, cäts chibin quiꞌtac arajtac jiyiꞌ quiꞌ sip cạiꞌ yụ. 25Chimeꞌdye muꞌin Romaĉantyiꞌ ayoꞌ in chibin quiꞌ paꞌquin muꞌin yụ in,#11:25 Úñedyeꞌ 16:22 yiriꞌ quiꞌ chimeꞌ farajñin mijyaꞌ yụ in.#11:25 Úñedyeꞌ 14:19 Chimeꞌdye chibin quiꞌ pechtaqui marĉantyiꞌ covamba yụ, yiriꞌ jịꞌĉojtyeꞌ ojñiꞌĉan yụ, yiris tsedyedyeꞌ yiris mạijsiꞌ, meꞌquiꞌ dujruꞌ buꞌyi ojñiꞌĉan yụ. 26Anic tsäquiꞌsis jịꞌĉojtyeꞌ yụ miꞌedyeꞌyaꞌ yụ cạyacsedyeꞌyaꞌ Jenꞌsiꞌ p̂eyacdyeꞌ muꞌ, anic tsäquiꞌ cojiro, jämꞌ tsäquiꞌtaqui yụ shishiꞌatyyaꞌ in, judyeyaꞌ ĉụiꞌtyiꞌyaꞌ chätidyeꞌ yụ judío in, judyeyaꞌ muꞌinyaꞌ jam judíoyaꞌ chimeꞌ in. Tsäquiꞌsis jịꞌĉojtyeꞌ yụ bäꞌyedyeꞌĉan judyeyaꞌ cäjyaꞌ judyeyaꞌ marĉan chimeꞌ. Chimeꞌdye muꞌinyaꞌ väñäijtyiꞌyaꞌ in anicyity Jenꞌcheꞌ yuꞌtityyaꞌ in, muꞌin chimeꞌ tsäquiꞌ buꞌyi yụ́dyes in. 27Chimeꞌdye därsiꞌ noꞌbis jịꞌĉojtyeꞌ yụ, judyeyaꞌ ĉushcheꞌ bäꞌyi yụ, judyeyaꞌ dáquischeꞌ, judyeyaꞌ jajrischeꞌ yụ judyeyaꞌ tsịvuꞌvudyeꞌcheꞌ yụ, judyeyaꞌ cädädyeꞌcheꞌ chimeꞌ, meꞌ meꞌ jịꞌĉojtyeꞌ ñịbedyes yụ, carijtacdyeꞌĉan yụ Ayodyes.
28Jam mọꞌ mọmoꞌ jịꞌĉojtyeꞌ yụ, chimeꞌdye räj mạyedyeꞌ fer dyijtucsi yụ muꞌin anicjetety Jenꞌ in, paiꞌ junanaj ĉụiꞌ bäꞌyity in, junꞌ chuc muꞌin bäꞌyi in. 29Chimeꞌdye fer dyijtucsi yụ miꞌin itŝitydyemꞌ ferdyeꞌ in, yụ́mun qui chimeꞌ meꞌ yuꞌti jeñej itŝity ferdyeꞌ yụ, meꞌ buꞌyi shupqui yụ. Muꞌyaꞌ juchaijtyiꞌ jụijyaꞌ in, mọꞌ yụ jịꞌfajqueyacsi muꞌin jiꞌjuchayacsity in. 30Yụ jam vaꞌbunyi yụ, jam jeñej muꞌin in cäj jịꞌchiyacsity in, mọꞌ mọmoꞌ vaꞌbunjeꞌ yụ, mọꞌ ñịbedyes jịꞌĉojtyeꞌsiꞌ yụ, junꞌ chuc itŝiꞌ ferdyeꞌ ĉụiꞌsiꞌ yụ. 31Anic rụij p̂eyaqui yụ, Jenꞌ chịj jam väñäij yụ. Mumꞌ timaꞌqueja Jenꞌ, muꞌ Jesucristoty Jenꞌ muꞌ Ayoꞌ tsun. ¡Jam raꞌ yirisĉan mạyedyeꞌ mọtsiꞌ timaꞌcacdyeꞌ muꞌ!
32Chimeꞌdye yụ raꞌ jéyac junꞌ chuc jiꞌcaviti Damascoĉan jiquej yụ, yoquiꞌdyemꞌ Areta ayoꞌbuꞌyi jiquej u. Muꞌ yụꞌtactyiꞌ muꞌ Aretaty Damascoĉantyiꞌ, muꞌ jéyacsi jutacsi muntyiꞌ in paj qui ĉọjcacsebi in bäꞌyedyeꞌĉansiꞌ chụiꞌdyeꞌ muꞌin, dyijyi mạꞌjeꞌ tsanꞌ tapjin yụ in. 33Tsun na bäꞌyedyes naꞌru bojvebiꞌ tsun, muꞌcheꞌ buꞌyi tsun, muꞌin anicjetety Jenꞌ in därtyiꞌĉan jeꞌñety ụ́buꞌ muꞌĉan bijtyin yụ in, chat qui ventanayaꞌ jiꞌshupquin yụ in, jorojyaꞌ jịjijcayin yụ in, meꞌ buꞌyi jiꞌc̣hoñin ayoꞌyaꞌ yụ in.#11:33 Úñedyeꞌ 9:23-25
Currently Selected:
Jäqui'ves Corintoĉantyidyes 11: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'