Jäqui'ves Corintoĉantyidyes 12
12
Jenꞌ jiꞌcaviti Pabloyaꞌ
1Fibidyes vaꞌbunyedyeꞌ yụ, meꞌ tsanꞌ meꞌ jemoñeꞌ qui namꞌ p̂eyeꞌ yụ junꞌ chuc muꞌ Ayoꞌ jiꞌcaviti yụ́yaꞌ. Meꞌ raꞌ yụ jéyac mọꞌ junꞌ chuc muꞌ jiꞌcaviti yụ́yaꞌ jiquej judyeyaꞌ chimeꞌ junꞌ chuc muꞌ soꞌmin yụ p̂eyacdyeꞌ muꞌ. 2Jiquej yiriꞌtac vạjpedyeꞌ jiyiꞌ yómodyeꞌ muꞌ Jenꞌ jiꞌcaviti yụ́yaꞌ, jam tsanꞌ mọꞌ mạꞌjeꞌ vaꞌbunjeꞌ yụ miꞌinyaꞌ. Mạyedyeꞌcheꞌ qui cạc yụ jadyicchescheꞌ mạyedyeꞌ. Jam qui namꞌ chịj yụ, areꞌ ạꞌedyeꞌ cạc yụ, areꞌ aꞌ yụ, meꞌdye Jenꞌ mọmoꞌ yirity chịj. 3-4Muꞌcheꞌ cạc yụ jämꞌsiꞌcheꞌ bäꞌyedyeꞌ, areꞌ ạꞌedyeꞌ cạc yụ, areꞌ aꞌ yụ, jam chịj yụ, meꞌdye Jenꞌ mọmoꞌ yirity chịj. Muꞌcheꞌ seꞌveꞌ yụ caminsis p̂eyacdyeꞌ, mọꞌ jam tupuj jiꞌjäcacsiꞌ, mijam tupuj p̂eyacsiꞌ. 5Tupuj tsanꞌ yụ vaꞌbunjeꞌ mọꞌ jiꞌcavitidyeꞌ soꞌminsiꞌ yụ muꞌ Jenꞌ, jam qui namꞌ meꞌ yụ jämꞌtaqui, mọꞌ mọmoꞌ vaꞌbunjeꞌ yụ mọꞌ ñịbedyes jịꞌĉojtyeꞌsiꞌ yụ. 6Tupuj tsanꞌ mọꞌ vaꞌbunjeꞌ yụ, ĉaĉaij na anicsis jiꞌcavitidyeꞌ yụ. Meꞌ tsanꞌ meꞌ jam qui na ramꞌ junꞌ vaꞌbunjeꞌ yụ, ĉaĉaij na yụ jam mạꞌjeꞌ meꞌ paj qui muntyiꞌ in jam mujuꞌchaꞌ ĉun yụ in jiꞌcavitidyedyes yụ́yaꞌ jiquej. Damꞌdye jämꞌ yiriꞌ mọmoꞌ cavin yụ in, junꞌ chuc rụij bäꞌyi yụ, judyeyaꞌ rụij p̂eyaqui yụ, mọꞌyaꞌ ramꞌ timaꞌquin in. 7Jenꞌ jam mạꞌjeꞌ paj qui fibiꞌnaqui shupqui yụ jiꞌcavitidyesyaꞌ yụ, mọꞌdyes qui muꞌ soꞌmin yụ areꞌredyeꞌ shushĉan yụ, mọꞌ jeñej buꞌyiꞌ yiris yutij yuꞌtyiyinsiꞌ Satanás yụ paj qui jam vaꞌbunnaqui bäꞌyi yụ. 8Chibin quiꞌ tsanꞌ cọdyete yụ Ayoꞌ tsun, paj qui meijjityibun yụ areꞌredyeꞌ yụ, 9jam qui namꞌ jụjjibun cọdacdyeꞌ yụ. Meꞌdye jin yụ: "Mọmꞌ därsiꞌ mạꞌjitidyes yụ, mọꞌ tupuj ferdyeꞌ soꞌmin paj qui tupuj dyich buꞌyi mi. Itŝiꞌ meꞌ ĉụiꞌsiꞌ ferdyeꞌ jụijyaꞌ mi, yụ́siꞌ qui namꞌ ferdyeꞌ mọjoꞌchaꞌ shupquiꞌ mídyes", meꞌ mọmoꞌ jin yụ. Mọꞌ anic fer maꞌjotyeꞌ yụ ñịbedyesyaꞌ yụ, itŝiꞌ ĉụiꞌsiꞌ ferdyeꞌ jụijyaꞌ yụ chat qui Cristos ferdyeꞌ muꞌ ñutsjin yụ. 10Meꞌdyes maꞌjotyeꞌ yụ ñịbedyes mọꞌ jịꞌĉojtyeꞌsiꞌ yụ, ĉaĉaij na Cristodyes mọꞌ yụ. Meꞌ tsanꞌ areꞌredyeꞌtum bäꞌyi yụ, meꞌ tsanꞌ ñäñin yụ in, judyeyaꞌ jịꞌñibeꞌcan yụ in, judyeyaꞌ jayejjotaqui jedyeꞌ yụ, meꞌ tsanꞌ meꞌ meꞌ jịꞌĉojtyeꞌ yụ Cristodyes, maꞌjoij qui namꞌ yụ. Meꞌ tsanꞌ itŝiꞌ ĉụiꞌsiꞌ ferdyeꞌ yụ, Cristos qui namꞌ ferdyeꞌ meꞌchupte yụ, mọꞌ ferdyeꞌtum yuꞌtyin yụ.
Pablo fer dyijtucsi muꞌin Corintoĉantyiꞌ anicjetety Jenꞌ in
11Ọ́cheꞌ q̂uinꞌ sánacdyeꞌcheꞌ yụ jeñej buꞌyi yirity shapuijtyiꞌ muntyiꞌ, meꞌ vaꞌbunyi yụ ñutsjiti ĉụiꞌ yụ. Mọꞌ miꞌinsiꞌ juchaj shupquiꞌ ĉaĉaij na miꞌin jam meꞌ ñutsjitiĉaꞌ miꞌin muꞌinsiꞌyaꞌ vej muꞌin cäj jịꞌchiyacsityyaꞌ in. Jeñej aty mujuꞌchaꞌ buꞌyi jutactyiꞌ Jenꞌtyiꞌ u, meꞌ ĉọcsiꞌ miꞌin, yụ qui namꞌ jam damꞌ uyaꞌyaꞌtacsi uts meꞌtyity in. Meꞌ tsanꞌ jam damꞌ fer buꞌyity yụ, yụ qui namꞌ jam junꞌ uyaꞌyaꞌtacsi. 12Jeshaꞌ, yụ miꞌinĉandyemꞌ jiquej yụ, anic cavitiĉaꞌ yụ miꞌin junꞌ chuc yụ tyumꞌchutidyeꞌtum carijtaqui miꞌinyaꞌ, judyeyaꞌ yụ daiꞌ quiꞌ jịꞌcaveyeyac Jenꞌsiꞌ ferdyeꞌ muꞌ. Mọꞌ tupuj jịꞌĉoyeyac yụ nash anictyity jutactyiꞌ Jenꞌtyiꞌ muꞌ. 13Yi pạrej miꞌin: muꞌ Pablo mujuꞌchaꞌ nọ́tyetacsi muꞌin yocvety bäꞌyedyeꞌ bäꞌyity anicjetety Jenꞌ in, uyaꞌyaꞌ muꞌ ñútyisinꞌ tsun, yi miꞌin. Jam junꞌ rụij meꞌ. Vaj meꞌdye nọ́tyeyac miꞌin yocvetytum bäꞌyity in, yirisdyety jayej jéyac jam jedyeꞌ cọdyetyeyac, jam jeñej yocvety in, muꞌin soꞌmin yụ in tsạꞌ buꞌyedyety. ¿Chäcdyis buty juchaj meꞌ soꞌmeyac yụ ĉútiĉaꞌ yụ miꞌin?
14Q̂uinꞌ chat cuvij raꞌ ĉọcyac miꞌin, chibinyis raꞌ mọꞌ cạveĉajyac. Meꞌdye ramꞌ yejĉoiꞌ dyijyedyeꞌ yụ, mijam raꞌ jedyeꞌ cọdyetyeyac. Yụ jam mạꞌjebiyac querec̣ha miꞌin, miꞌin chat mạꞌjeyac paj qui Jenꞌyadyety miꞌin, yụ mạꞌjeꞌ nọ́tyeyac miꞌin. Jeshaꞌ muntyity ạvaꞌ muꞌin jam tsạꞌchuqui ĉụiꞌtyiꞌ jenꞌ muꞌin, jenꞌ na muꞌin tsạꞌchuqui ạvaꞌ muꞌ, meꞌdye raꞌ yụ chimeꞌ, 15fer mạꞌjeꞌ nọ́tyeyac miꞌin. Maꞌjodyeꞌtum raꞌ yụꞌtaqui yụ räj jedyeꞌ yụ judyeyaꞌ ĉụiꞌsiꞌ ferdyeꞌ chimeꞌ yụ, meꞌ raꞌ chat tupuj nọ́tyeyac Jenꞌdyes. Dadamꞌ yụ yejĉoij mạꞌjeyac miꞌin, miꞌin qui namꞌ jam meꞌ, yejĉoij uyaꞌyaꞌ mạꞌjitiĉaꞌ yụ miꞌin.
16Pạrej ñäñitiĉaꞌ yụ miꞌin, yi miꞌin: "Uts Pablo anic ĉụiꞌ yenꞌtyi dyijyedyeꞌtumtyiꞌ yuꞌti, meꞌ tsanꞌ jam cudyityisinꞌ querec̣ha tsun, muꞌ qui namꞌ chịj junꞌ buꞌyi chuc tupuj chutyisinꞌ jedyeꞌ", yi pạrej miꞌin. 17Yụ raꞌ jéyac: Muꞌin jutactyiꞌ yụ miꞌinyaꞌ ¿muꞌin buty chutyinac jedyeꞌ in yụ́dyes? ¡Jam junꞌ! 18Chimeꞌdye jiquej yụ cọdyete muꞌ Tito paj qui muꞌ, yoctyiꞌtum vojity tsun ĉucnac in. ¿Tito buty väñädyeꞌyaꞌ chutyinac jedyeꞌ? Jam junꞌ, muꞌ yụs mọmoꞌ cäc̣häꞌchubun dyijyedyeꞌ yụ, junꞌ chuc rụij carijtaqui yụ miꞌindyes jiquej, meꞌdye muꞌ chimeꞌ.
19Vatyquej raꞌ miꞌin dyijyi tsun ñutsjiti miꞌinsiꞌyaꞌ vej, meꞌ ĉútiĉaꞌ tsun u miꞌin. Jam meꞌ tsun, Jenꞌsiꞌyaꞌ vej muꞌ anic rụij p̂eyaqui tsun ĉaĉaij na tsun úñity Cristoty muꞌ. Mạꞌjeyacdyety yụ, yụ raꞌ jéyac miꞌin mọꞌ mọmoꞌ mạꞌjeꞌ tsun paj qui nọ́tyeyac Jenꞌdyes miꞌin. 20Mọꞌ dyijyedyeꞌ yụ, vatyquej raꞌ ventyecyacyaꞌ yụ, vatyquej raꞌ dạquicyac jambiꞌ jụꞌñij farajjetiñeꞌ jụijyaꞌ aꞌc̣his dyijyedyeꞌ miꞌin, mọꞌ raꞌ jam maꞌjotyebiyac yụ, mọꞌ ramꞌ fạraꞌjeĉunꞌbiyac. Vatyquej raꞌ miꞌin jam maꞌjotyibutiĉaꞌ miꞌin mọꞌ fạraꞌnacdyeꞌ yụ. Vatyquej raꞌ dạquicyacyaꞌ jiꞌfajquiyivaꞌti p̂eyacdyeꞌ miꞌin, vatyquej raꞌ vaj meij ñäñiti miꞌin, judyeyaꞌ fáquiti miꞌin, judyeyaꞌ jiꞌmeꞌtyiyitidyeij jedyeꞌ miꞌin, judyeyaꞌ jịꞌfajquiyitidyeij miꞌin, judyeyaꞌ p̂iijtidyeij miꞌin, judyeyaꞌ fibiꞌnaqui miꞌin, judyeyaꞌ yoc yoc dyijyi miꞌin, vatyquej raꞌ tacaꞌ meꞌ bäꞌyi miꞌin. 21Meꞌ raꞌ dạquicyac jụijyaꞌ miꞌin, vatyquej raꞌ muꞌ Jenꞌ jiꞌtarin yụ quivij miꞌinsiꞌyaꞌ vej, aty cạvebiyacyaꞌ mọꞌ aꞌc̣his dyijyedyeꞌ miꞌin. Pạrej muꞌyayaj jambiꞌ farajjetiñeꞌ joꞌmes aꞌc̣his dyijyedyeꞌ aꞌsiꞌ miꞌin judyeyaꞌ voꞌvodyeꞌ miꞌin.
Currently Selected:
Jäqui'ves Corintoĉantyidyes 12: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'