Jäqui'ves Corintoĉantyidyes 13
13
Jadyiquis p̂eyacdyeꞌ Pablos
1Ọij raꞌ q̂uinꞌ chibinyisĉan ĉọcyac miꞌin. Jịꞌcäts yụꞌtacyaꞌ muꞌin juchaijtyiꞌ in, jam tupuj yirity mọmoꞌ chị́yacsebity juchaj muꞌin, jemoñeꞌ muꞌyaꞌ päräꞌ judyeyaꞌ chibin in, q̂uinꞌdyemꞌ raꞌ tupuj c̣họcoꞌtac juchadyesyamꞌ, yiꞌ yụꞌtacdyeꞌ. 2Yoquiꞌdyemꞌ ĉọcyacyaꞌ jiquej u, päräꞌyisĉan jiquej, yụ fạraꞌjeĉunacsi muꞌin tashcheꞌ juchaijtyiꞌ jiquej in. Q̂uinꞌ cuvij ọ́cheꞌ sánacdyeꞌcheꞌ yụ raꞌ jäꞌmij jéyacsi räj muꞌin meꞌtyity in, aty ventyecyac jụijyaꞌ yụ cuvij yụ raꞌ jam junꞌ c̣honchucsi muꞌin yejĉoij juchaijtyiꞌ in. 3Miꞌin pạrej dyijyi miꞌin jeñej yụ jam anictyity soꞌmactyiꞌ p̂eyacdyeꞌ Cristos muꞌ ĉútiĉaꞌ yụ miꞌin, aty qui raꞌ meꞌsiꞌ yụ fercheꞌ fạraꞌjeĉunꞌyacyaꞌ juchajyaꞌ miꞌin, meꞌ raꞌ chat chäyibutiĉaꞌ miꞌin. Jam jayej Cristos ferdyeꞌ muꞌ miꞌinyaꞌ, muꞌ fer carijtaqui miꞌinyaꞌ. 4Aty pactacyaꞌ croshcheꞌ jiquej muꞌ, itŝiꞌ ferdyeꞌ yụꞌtaqui, Jenꞌsiꞌ qui namꞌ ferdyeꞌ muꞌ jajiꞌtsaꞌibun. Meꞌdye chimeꞌ tsun Cristoty jutactyiꞌ tsun, jam fer buꞌyi jiꞌcaviti tsun miꞌinyaꞌ, meꞌ tsanꞌ meꞌ, aty qui na ramꞌ dạquicyacyaꞌ tsun, muꞌdye Cristo tsạꞌchuntyiꞌ tsun, muꞌ raꞌ soꞌmin tsun Jenꞌsiꞌ ferdyeꞌ muꞌ paj qui muꞌsiꞌyaꞌ ferdyeꞌ jịꞌcäts yụꞌtacsi tsun muꞌin juchaijtyiꞌ in.
5Dyijtutiĉamꞌ ĉụiꞌ, cạvaĉamꞌ ĉụiꞌtyiꞌ ĉojtyiꞌ miꞌin, paj qui chäyiti miꞌin areꞌ aty anicjetinte Jenꞌ, jiꞌĉujtiĉamꞌ ĉụiꞌ. ¿Jam chịj u miꞌin muꞌ Jesucristo ĉojtyiꞌĉan bäꞌyi miꞌin, rụij anicjetinte jụijyaꞌ miꞌin? 6Faraj vuꞌ caꞌ meꞌ chäyibutiĉaꞌ dyijyedyeꞌ tsunsiꞌ miꞌin, tsun nash anictyity jutactyiꞌ Jenꞌtyiꞌ muꞌ. 7Meꞌ tsanꞌ jam rụij carijtaqui Jenꞌdyes ĉútiĉaꞌ tsun miꞌin, jam mọꞌ jiꞌtarin tsun. Meꞌdye mọmꞌ dyijyi tsun cọdyete Jenꞌ tsun miꞌindyes paj qui jam damꞌ ac̣hiꞌ bäꞌyi miꞌin. Mọꞌ mạꞌjeꞌ tsun paj qui rụij bäꞌyi miꞌin, meꞌ tsanꞌ ñäñibutiĉaꞌ miꞌin mọꞌ carijtacdyeꞌ Jenꞌdyes yụ, mọꞌ jam jiꞌtarin tsun. 8Meꞌdye mọꞌ mọmoꞌ dyijtuiꞌ tsun mạꞌjeꞌ jiꞌtseꞌeꞌ tsun mọꞌ rụijsis p̂eyacdyeꞌ Jenꞌsiꞌ muꞌ, mijam tsun damꞌ ñiñeꞌ mọꞌ. 9Miꞌin jụijyaꞌ ferdyeꞌtum, mọꞌ raꞌ tsun maꞌjotyeꞌ, meꞌ tsanꞌ itŝiꞌ ĉụiꞌsiꞌ ferdyeꞌ tsun, maꞌjoij qui namꞌ tsun. Mọꞌ mọmoꞌ cọdyete Jenꞌ tsun paj qui jam jụꞌñij bäꞌyi miꞌin muꞌsiꞌyaꞌ vej muꞌ. 10Yụ jäꞌmij jéyac miꞌin ọ́cheꞌ sánacdyeꞌcheꞌ jambiꞌdyemꞌ ĉọcyac miꞌin, paj qui miꞌin tupuj jäꞌmij farajjetiñeꞌ mọꞌ aꞌc̣his dyijyedyeꞌ miꞌin, meꞌ qui raꞌ tsanꞌ dạquicyacyaꞌ yụ, aty qui raꞌ jam junꞌ jätäjjeyac miꞌin. Anicdye meꞌ muꞌ Ayoꞌ tsun meꞌ soꞌmin yụ yụꞌtacdyeꞌ paj qui jiꞌmaꞌyeyac Jenꞌyaꞌ, muꞌ jam yuꞌtyin yụ paj qui jiꞌpenyac yụ.
Voryetacdyeꞌ Pablos
11Vojity, yụ raꞌ jadyic jéyac paj qui maꞌjodyeꞌtum bäꞌyi miꞌin. Jam raꞌ jụꞌñij bäꞌyi miꞌin, vaj meij raꞌ jiꞌmaꞌyiti Jenꞌdyes miꞌin, jam raꞌ yoc yoc dyijyi miꞌin, jämꞌjitidyeij raꞌ bäꞌyi miꞌin. Chat raꞌ muꞌ Jenꞌ mạꞌjisinꞌtyiꞌ tsun, muꞌ soꞌmisinꞌtyiꞌ maꞌjodyeꞌ ĉojtyiꞌĉandyes tsun, muꞌ raꞌ penꞌdyetunac. 12Vorjitac vaj meij voryedyeꞌ pụꞌsitidyeꞌ Jenꞌdyes. 13Räj úyaty anicjetety Jenꞌ in chimeꞌ muꞌin vorjinac in.
14Yụ cọdyete Jenꞌ paj qui muꞌ Jesucristo Ayoꞌ tsun ñịbeꞌjitidyes soꞌminac miꞌin, judyeyaꞌ paj qui mạꞌjitidyes Jenꞌsiꞌ muꞌ miꞌincheꞌ buꞌyiꞌ, judyeyaꞌ paj qui Jenꞌsiꞌ Ạꞌedyeꞌ muꞌ ñútyinac paj qui vaj cäts dyijyi miꞌin.
Currently Selected:
Jäqui'ves Corintoĉantyidyes 13: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'