Jäqui'ves Corintoĉantyidyes 2
2
1Mọꞌdyes dyijyi yụ jiquej, jambiꞌ raꞌ ĉọcyac cuvij ĉaĉaij na yụ jam mạꞌjeꞌ jiꞌtareyac miꞌin fạraꞌjeĉunꞌyacyaꞌ aꞌc̣hisyaꞌ dyijyedyeꞌ miꞌin. 2Jiꞌtareyac jụijyaꞌ yụ, ¿tyi qui bu raꞌ maꞌjoij yuꞌtyin yụ? Aty itŝij muꞌyaꞌ in, meꞌ tári jụijyaꞌ miꞌin, mijam raꞌ tupuj maꞌjoij yuꞌtiĉaꞌ yụ miꞌin. 3Mọꞌdyes yụ jiquej tashcheꞌ sánaqui miꞌindyes p̂eyacdyeꞌ ĉaĉaij na jambiꞌdyemꞌ mạꞌjeꞌ cạvecyac miꞌin. Dyijyi yụ vatyquej raꞌ tári shupqui yụ nạijbiyacyaꞌ aꞌc̣his dyijyedyeꞌ jụijyaꞌ miꞌin. Mọꞌ jam mạꞌjeꞌ yụ jemoñeꞌ miꞌin maꞌjoij yuꞌtiĉaꞌ miꞌin. Yụ mạꞌjeꞌ jiquej paj qui jäꞌmiiꞌtyiꞌ dyijyedyeꞌ miꞌin paj qui maꞌjodyeꞌtum dạquicyac yụ, miꞌinmundye raꞌ chimeꞌ maꞌjoij. 4Sánaqui yụ jiquej miꞌindyes anic táristum sánaqui yụ, anic där táreyac ĉojtyiꞌĉan dyijtucdyeꞌyaꞌ yụ miꞌincheꞌ, aty p̂eijbiyacyaꞌ juchaj miꞌin. Meꞌ tsanꞌ meꞌ jam qui namꞌ mạꞌjeꞌ jiꞌtareyac, mọmꞌ mạꞌjeꞌ jịꞌcaveyeyac anicsis mạꞌjitidyes yụ.
Pablo aty farajjeꞌ dyijtucdyeꞌ juchaj muntyis
5Juchaijtyiꞌ muntyiꞌ chị́yetintety miꞌin, jam yụmꞌ jiꞌtarin, miꞌinmun chimeꞌ jiꞌtarinac, araj räj jiꞌtarinac. Yi yụ: "Araj räj meꞌ jiꞌtarinac muꞌ", jam yụ yi: "Räj jiꞌtarinac", ĉaĉaij na jam mạꞌjeꞌ cächjeꞌ mọꞌcheꞌ p̂eyacdyeꞌ yụ. 6Q̂uinꞌ, aty tupuj junꞌjeyetinte miꞌin, ĉaĉaij na araj vaj cäts dyijyi miꞌin junꞌjetinte muꞌ juchaijtyiꞌ muntyiꞌ, tupuj q̂uinꞌ tiĉunꞌbajtinte. 7Q̂uinꞌ chat jemoñeꞌ farajjetiñeꞌ dyijtuptinte juchaj muꞌ, jemoñeꞌ jiĉun yụꞌbajtinte paj qui jam tyumꞌyi ĉojtyiꞌ muꞌ táredyeꞌyaꞌ muꞌ. 8Mọꞌdyes yụ fercheꞌ jéyac paj qui jịꞌcaveyebajtinte mạꞌjitidyes muꞌ. 9Mọꞌjeyac yụ jiquej sáñeꞌ yụ mọꞌ tashches sánacdyeꞌ miꞌindyes, mọꞌ dyijyedyeꞌ yụ mạꞌjeꞌ jịꞌĉojtyeyac miꞌin vátyequej raꞌ chäquibutiĉaꞌ miꞌin sánacdyeꞌches p̂eyacdyeꞌ yụ, junꞌjetinte chuc raꞌ muꞌ juchaijtyiꞌ muntyiꞌ. 10Q̂uinꞌ chat tupuj farajjetiñeꞌ dyijtuptinte juchaj muꞌ, meꞌdye yụ chimeꞌ aty farajjeꞌ yụ dyijtucdyeꞌ juchaj muꞌ. Mọꞌyaꞌ jụijyaꞌ juchaj muꞌ juchatuntyiꞌ yụ, yụ chimeꞌ aty jam dyijtupte juchaj muꞌ, meꞌ yi yụ Cristosyaꞌ vej muꞌ paj qui vaj cäts dyijyeban miꞌin. 11Meꞌ raꞌ vaj cäts tsun farajjejaꞌ dyijtucdyeꞌ juchaj muꞌ paj qui muꞌ Satanás Sọyoꞌ jam jiꞌpensinꞌ tsun, ĉaĉaij na tsun anic jämꞌ chị́yepja dyijyedyeꞌ muꞌ.
Troasĉan muꞌ Pablo fer dyijtute muꞌ Tito
12Troasĉan jịjcaij yụ cạyacsi yụ jämꞌsiꞌ p̂eyacdyeꞌ Cristos muꞌ. Aty venjoij yụ muꞌĉan, muꞌ Ayoꞌ tsun vanacjiyin yụ paj qui tupuj muꞌĉan carijtaqui yụ. 13Meꞌ tsanꞌ meꞌ tacaꞌ qui namꞌ tári ĉojtyiꞌĉan yụ ĉaĉaij na jam dạcte yụ muꞌĉan vojity tsun Tito. Mọꞌdyes qui yụ vorjeyacsetaqui muꞌĉantyiꞌ in, yạjquicseban qui yụ, Macedoniaĉan qui jịjcaij yụ.
Cristo yi paj qui jam penjaꞌ tsun
14Yoshoropaij an muꞌ Jenꞌ tsun, aty Cristoty tsun. Jenꞌ jayuꞌti muꞌ Cristo paj qui jiꞌpenacsi räj sọyoꞌ in, tsunmun chimeꞌ yuꞌsinꞌ paj qui tsun chimeꞌ räj jiꞌpenacsebijaꞌ aꞌc̣his dyijyedyeꞌ muꞌin. P̂eyacdyeꞌ muꞌ cạyacsejas tsun där jämꞌsimꞌ, jeñej yiris jämꞌsiꞌ jẹrejres, paiꞌ jịjcaiꞌsiꞌ p̂oquedyemꞌ, meꞌ buꞌyiꞌ mọꞌ. 15Tsun voroꞌtacsejaꞌ tsun jeñej jämꞌsiꞌ jẹrejres yụꞌtyes muꞌ Cristo soꞌmetes Jenꞌ, meꞌ buꞌjaꞌ shupquejaꞌ tsun. Mọꞌ chaꞌshacsiꞌ räj muntyiꞌ in Jenꞌyadyety in judyeyaꞌ tsäquiꞌsisĉandyety in. 16Muꞌindyes in muꞌin tsäquiꞌsisĉandyety in mọꞌ p̂eyacdyeꞌ jeñej yiris jebacdyeꞌ säñiꞌsiꞌ topjoiꞌ, meꞌ shupquiꞌ mọꞌ muꞌindyes in mọꞌ p̂eyacdyeꞌ cạyacsejas tsun, mọꞌ jiꞌsänacsiꞌ. Muꞌin na Jenꞌyadyety in jeñej yiris jämꞌsiꞌ jẹrejres tsạꞌchucsis, meꞌ buꞌyiꞌ muꞌindyes in. ¿Tyi buty meꞌ tupuj carijtaqui Jenꞌdyes in? 17Tsun tupuj meꞌ carijtaqui ĉaĉaij na rụijsisyaꞌ dyijyedyeꞌ meꞌ carijtaqui tsun, mijam querec̣hadyes voroꞌtacsi tsun, jam jeñej muꞌin yoctyiꞌ in. Jenꞌ yuꞌtyin tsun meꞌ, muꞌsiꞌyaꞌ vej voroꞌyi tsun ĉaĉaij na Cristoty úñity tsun.
Currently Selected:
Jäqui'ves Corintoĉantyidyes 2: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'