Jäqui'ves Corintoĉantyidyes 3
3
Mụiꞌsis yụꞌtacdyeꞌ Jenꞌsiꞌ soꞌmisinꞌsiꞌ tsun
1Aty meꞌ p̂eyaquiyaꞌ tsun miꞌin, tsun ĉútiĉaꞌ miꞌin jeñej ĉụiꞌ timaꞌquiti tsun. Tsun na jam meꞌ. Chimeꞌdye tsun jam jemoñeꞌ tuyeyac yiris sánacdyeꞌ p̂eyeꞌsiꞌ yụꞌtacdyeꞌ tsun paj qui jụjjitiĉaꞌ tsun miꞌin. Pạrej yoctyiꞌ jemoñeꞌ joꞌmes sánacdyeꞌ in paj qui jụjjeyac in, tsun na jam meꞌ. Chimeꞌdye tsun jam jemoñeꞌ cọdyetyeyac joꞌmes sánacdyeꞌ paj qui jịꞌcaveyacsi tsun yoctyiꞌ in paj qui jụjtyin tsun in. 2Miꞌindyemꞌ jeñej buꞌyi mọꞌ sánacdyeꞌ, p̂eyeꞌsiꞌ yụꞌtacdyeꞌ tsun, mọꞌ jeñej sánac ĉojtyiꞌĉan tsun, ĉaĉaij na räj muntyiꞌ cavinac in aty rụij bäꞌyi miꞌin, mọꞌyaꞌ jịꞌcaveyacsi miꞌin anicsis mọꞌ p̂eyacdyeꞌ tuiꞌsiꞌ tsun. 3Anic jorojĉan miꞌin jeñej buꞌyi sánacdyeꞌ miꞌin, sáñeꞌsiꞌ Cristo judyeyaꞌ tuiꞌsiꞌ tsun ĉaĉaij na tsun chijämꞌ jụj jaꞌyeyac miꞌin. Jam qui namꞌ sánaquisyaꞌ sánac, mijam papercheꞌ sánac, mijam mijcheꞌ chimeꞌ.#3:3 Exodo 24:12 Meꞌdye muꞌsimꞌ Ạꞌedyeꞌ tsạꞌtyiꞌ Jenꞌ mọꞌ sáñeꞌ muntyityĉan ĉojtyiꞌ muꞌin, meꞌ buꞌyi miꞌin jeñej buꞌyi sánacdyeꞌ sáñeꞌsiꞌ Cristo muntyidyes in.
4Meꞌ tupuj yi tsun ĉaĉaij na Jenꞌcheꞌ ĉúti tsun, muꞌ Cristo ñútyin tsun paj qui muꞌcheꞌ ĉúti tsun. 5Tsun jam ĉúti ĉụiꞌsiꞌcheꞌ ferdyeꞌ, jam mọꞌyaꞌ carijtaqui Jenꞌdyes tsun, Jenꞌsiꞌyamꞌ ferdyeꞌ carijtaqui tsun. 6Muꞌdye soꞌmin ferdyeꞌ tsun paj qui tupuj voroꞌtacsi tsun jéyacsi tsun mọꞌ mụiꞌsis p̂eyacdyeꞌ Jenꞌsiꞌ muꞌ, mọꞌ cäc̣häꞌchujas tsun. Q̂uinꞌ aty jam cäc̣häꞌchupja urucyas yụꞌtacdyeꞌ Jenꞌsiꞌ muꞌ, mọꞌ sánacsiꞌ mijcheꞌ jiquej muꞌ. Q̂uinꞌ Jenꞌsiꞌ qui Ạꞌedyeꞌ cäc̣häꞌchupja, ĉaĉaij na mọꞌ urucyas yụꞌtacdyeꞌ jiquej mọꞌ jiꞌsänsinꞌ, mọꞌ qui namꞌ Jenꞌsiꞌ Ạꞌedyeꞌ muꞌ tsạꞌchusinꞌ.
7Mọꞌ jiquej yụꞌtacdyeꞌ mijcheꞌ sánacsiꞌ. Jenꞌsiꞌ mạijquedyemꞌ jiꞌcavitiꞌ yoquiꞌdyemꞌ jasoꞌmitiyaꞌ jiquej u muꞌ Moisés mọꞌ yụꞌtacdyeꞌ, mọꞌdyes qui muntyiꞌ in jam mạꞌjeꞌ cạvete vejyaꞌ in ĉaĉaij na anic jiyi pashyi muꞌ.#3:7 Exodo 34:29 Jam qui namꞌ men meꞌ buꞌyiꞌ mọꞌ pashquedyemꞌ, cavin tyumꞌjobanꞌ muꞌ. Meꞌ buꞌyi muꞌ Jenꞌ yụꞌtyeꞌ mọꞌ yụꞌtacdyeꞌ, meꞌ tsanꞌ mọꞌ jiꞌsänsinꞌsiꞌ tsun, anic qui namꞌ jämꞌsiꞌtum mạijquedyeꞌ yụꞌtac. 8Mọꞌ na mụiꞌsis Jenꞌsiꞌ p̂eyacdyeꞌ muꞌ, dadamꞌ mọꞌ mọjoꞌchaꞌ jämꞌsiꞌ, mijam raꞌ jụꞌñisĉan mạyedyeꞌ tyumꞌjoiꞌ, mọꞌ p̂eyes Jenꞌsiꞌ Ạꞌedyeꞌ muꞌ, mọꞌ soꞌmisinꞌsiꞌ tsun. 9Anic där jämꞌsiꞌ mọꞌ yụꞌtacdyeꞌ jiquej muꞌ, meꞌ tsanꞌ mọꞌ meꞌ buꞌyiꞌ jiꞌsänsinꞌ tsun jämꞌsiꞌ qui namꞌ, mọꞌ na mụiꞌsis p̂eyacdyeꞌ dadamꞌ mọjoꞌchaꞌ jämꞌsiꞌ cheꞌsis, mọꞌ qui rụij yuꞌsinꞌ Jenꞌsiꞌyaꞌ vej muꞌ. 10Meꞌ tsanꞌ fer buꞌyiꞌ mọꞌ urucyas yụꞌtacdyeꞌ, mọꞌ qui namꞌ mụiꞌsis p̂eyacdyeꞌ dadamꞌ mọꞌ mọjoꞌchaꞌ fer buꞌyiꞌ, ọyaꞌyaꞌ mọꞌ yụꞌtacdyeꞌ jiquej. 11Meꞌ tsanꞌ fer buꞌyiꞌ mọꞌ urucyas yụꞌtacdyeꞌ jịꞌmotsac qui namꞌ, q̂uinꞌ qui namꞌ mọꞌ dadamꞌ mọjoꞌchaꞌ mọꞌ mụiꞌsis p̂eyacdyeꞌ, mọꞌ raꞌ chat jam jụꞌñisĉan mạyedyeꞌ jịꞌmotsac.
12Q̂uinꞌ chị́yeꞌ tsun jam raꞌ jụꞌñisĉan mạyedyeꞌ mọtsiꞌ mọꞌ mụiꞌsis p̂eyacdyeꞌ, mọꞌdyes jam junꞌ noiꞌyedyeꞌtum voroꞌtacsi tsun mọꞌ p̂eyacdyeꞌ muꞌ. 13Tsun jam jeñej Moisésvun jiquej. Muꞌ busjiti vejyaꞌ paj qui muꞌin Israeltyiꞌ vóshiꞌ in jam cạvete vejyaꞌ in, junꞌ chuc mọꞌ pashquedyeꞌ ọyaꞌyas, mọꞌ tyumꞌjobanꞌsimꞌ.#3:13 Exodo 34:33 14Muꞌin na Israeltyiꞌ vóshiꞌ in tofej muꞌinsiꞌ dyijyedyeꞌ in, jam chịj in jedyeꞌ buty cạiꞌ mọꞌ jiꞌcavitis. Tacaꞌdye q̂uinꞌ meꞌ, jämꞌdyeyaꞌ p̂eyeꞌ in mọꞌ tashches yụꞌtacdyeꞌ Jenꞌsiꞌ muꞌ, tacaꞌ qui namꞌ bus buꞌyiꞌ dyijyedyeꞌ muꞌin, mọꞌdyes jam junꞌ chiqueꞌ in jätäjyiꞌ chuc mọꞌ. Aty jụjjeteyaꞌ in muꞌ Cristo, chat q̂uinꞌdyemꞌ meijjetyetac in muꞌ buschucsebity dyijyedyeꞌ muꞌin. 15Anicdye meꞌ, tacaꞌdye q̂uinꞌ muꞌin Israeltyiꞌ vóshiꞌ in p̂eyepte jụijyaꞌ in Moiséssiꞌ sánacdyeꞌ in, tacaꞌ bus buꞌyiꞌ dyijyedyeꞌ muꞌin. 16A qui namꞌ jụjjeteyaꞌ in muꞌ Ayoꞌ tsun, chat q̂uinꞌdyemꞌ meijjetyetac in muꞌ buschucsebity dyijyedyeꞌ muꞌin. 17Ọij p̂eyacdyeꞌ yiꞌ jiꞌjäcte: Ayoꞌ, Jenꞌsiꞌ Ạꞌedyeꞌ jiꞌjäqueꞌ. Penꞌdyetusinꞌ tsun Ayoꞌsiꞌ Ạꞌedyeꞌ jụijyaꞌ muꞌ, aty faraj tsun. 18Mọꞌdyes q̂uinꞌ räj tsun aty jam bus buꞌjaꞌ vejyaꞌ tsun, Ayos quimꞌ mạijquedyemꞌ meꞌchupja vejyaꞌ tsun, mọꞌ qui jịꞌcaveyacsejaꞌ. Meꞌdye muꞌsiꞌ ferdyeꞌ muꞌ jämꞌ yuꞌtyiyicasinꞌ tsun, meꞌ meꞌ yejĉojaꞌ yojdyemꞌ muꞌ u. Meꞌ muꞌ Ayoꞌ, mọꞌ nash Jenꞌsiꞌ Ạꞌedyemꞌ.
Currently Selected:
Jäqui'ves Corintoĉantyidyes 3: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'