Uñedye' 1
1
Jenꞌ raꞌ soꞌmacsi Ạꞌedyeꞌ
1Teófilo, q̂uinꞌ yụ raꞌ quivij yocsiꞌ sánacdyeꞌ sáñeꞌ mídyes. Tashis jiquej sánacdyeꞌ yụ sáñeꞌ räj junꞌ chuc muꞌ Jesús carijtaqui judyeyaꞌ jịꞌchiyacsi jiquej, 2chat q̂uinꞌdyemꞌ mạyedyeꞌcheꞌ jácabun muꞌ Jenꞌ. Jambiꞌdyemꞌ muꞌcheꞌ jịjcaban muꞌ, tashcheꞌ jäꞌmij jịꞌchiqueyacsi tsimꞌtactyiꞌ muꞌ jutacdyety raꞌ muꞌ, Jenꞌsiꞌ Ạꞌedyeꞌ muꞌ meꞌ jañutyiti. 3Vañinyeban chat qui rụiꞌcuꞌĉan jiꞌcavibun muꞌinyaꞌ in, jorojĉan aty muꞌyaꞌ quivij tsạꞌ buꞌban. Vạjpedyeꞌ quiꞌtac mạyedyeꞌ bäꞌyetaqui úcheꞌ jaccheꞌ, daiꞌ quiꞌ jiꞌcaviti muꞌinyaꞌ in, jéyacsi Jenꞌsiꞌ p̂eyacdyeꞌ p̂eyeꞌ ayoꞌbuꞌyedyes Jenꞌsiꞌ muꞌ.
4Yirisĉan mạyedyeꞌ muꞌ penꞌdyetucsi jutactyiꞌ muꞌ, jéyacsi paj qui taĉan chum Jerusalénĉan in. Yi jéyacsi:
—Jambiꞌ chum raꞌ shupqui miꞌin úĉantyiꞌ Jerusalénĉantyiꞌ miꞌin, bisvac chum mọꞌ Jenꞌ raꞌ soꞌminacsiꞌ jiꞌcätsiyinac mọꞌ p̂eyacdyeꞌ yuꞌtyiyinacsiꞌ jiquej. Soꞌminac raꞌ Jenꞌsiꞌ Ạꞌedyeꞌ muꞌ, yoj jeyacdyemꞌ yụ jiquej u. 5Muꞌ Juan jiquej chojtyinac ojñiꞌĉan miꞌin, jäquiꞌve qui raꞌ junꞌsiꞌ ĉụiꞌ Jenꞌsiꞌ Ạꞌedyeꞌ muꞌ yuꞌtyiyinac Jenꞌ —jéyacsi Jesús jiquej.
Jesús mạyedyeꞌcheꞌ jịjcaban
6Jesústyiꞌ jutactyiꞌ muꞌ tsudyujñitidyeꞌĉan muꞌin chat qui jéte in muꞌ Jesús:
—Tsuntyiꞌ Ayoꞌ, ¿q̂uinꞌ buty raꞌ mi vaꞌcacsequi muꞌin Romaĉantyiꞌ in paj qui quivij yụꞌbajtem ĉụiꞌtyiꞌ ayoꞌ tsun Israeltyiꞌ vóshiꞌ tsun? —jéte in.
7Jesús vorjeyacsi:
—Jam miꞌin soꞌmac Jenꞌyaꞌ ĉaĉaij na jam chị́yeptinte dyijyedyeꞌ muꞌ junꞌsiꞌdye raꞌ ĉụiꞌ jịꞌcätsaqui dyijyedyeꞌ muꞌ, mumꞌ yirity ĉụiꞌ chịj. 8Jiꞌtŝunac raꞌ Jenꞌsiꞌ Ạꞌedyeꞌ muꞌ, mọꞌ raꞌ soꞌminac ferdyeꞌ, chat qui raꞌ q̂uinꞌdyemꞌ miꞌin jịꞌchiqueyacsi yoctyiꞌ muntyiꞌ in mọꞌ cavibutiĉas jiquej miꞌin, ijacdyeꞌ yụ judyeyaꞌ vañinyedyeꞌ yụ. Jéyacsi raꞌ miꞌin tashcheꞌ úĉantyiꞌ Jerusalénĉantyiꞌ in, judyeyaꞌ Judeaĉantyiꞌ in, judyeyaꞌ Samariaĉantyiꞌ in, judyeyaꞌ paiꞌ junaty ĉụiꞌ in räj jadyicvety jac chimeꞌ in, meꞌ meꞌ raꞌ jéyacsi miꞌin mọꞌ p̂eyacdyeꞌ p̂iyinsiꞌ yụ —jéyacsi Jesús.
9Jesús p̂eyactaqui chat qui mạyedyeꞌcheꞌ jácabun Jenꞌ muꞌ. Muꞌin na jutactyiꞌ muꞌ jịꞌĉojcayebajte muꞌin in, meꞌdye jemonjoban dyicbaꞌbadyeꞌĉan, aty jam junꞌ nạijbajte in. 10Yejĉoij mọmoꞌ cạvevaꞌjoij cheꞌve in yócheꞌdyemꞌ jịjcabancheꞌ u, ĉụiꞌdye vátyequej jiꞌcaviti päräꞌ muntyiꞌ in, jaiꞌbatyĉantyiꞌ quịꞌsiꞌ in. 11Yi muꞌin in jéyacsi in:
—Miꞌin Galileaĉantyiꞌ, ¿jedyeꞌ caꞌ cạvevaꞌtiñeꞌ mạyedyeꞌcheꞌ? Yojdyemꞌ mụiꞌdye Jesús jọban mạyedyeꞌcheꞌ jịjcaban u, meꞌdye raꞌ quivij atsijban muꞌ —yi muꞌin päräꞌ jiꞌcavitity muntyiꞌ in.
Tsimꞌtac Matías jutactyiꞌ Jesústyiꞌ jeñej buꞌban Judasvun
12Aty meꞌsiꞌ Jesústyiꞌ jutactyiꞌ muꞌ chat qui yạjquibajte in muꞌ mụcuꞌ Orivo, Jerusalénĉan jijtuban in. Jam moch jịjcaban in c̣hẹiꞌyaꞌ, yiris quirometro meꞌsiꞌ moch. 13Venjoban muꞌĉan in, rụij buꞌban sisan acaꞌĉan in, mọꞌ vavdyeꞌ cheꞌves, muꞌcheꞌ jịjcaij in yócheꞌdyemꞌ dyäqui u in muꞌin jutactyiꞌ muꞌ: Pedro, judyeyaꞌ Juan, judyeyaꞌ Santiago, judyeyaꞌ Andrés, judyeyaꞌ Felipe, judyeyaꞌ Tomás, judyeyaꞌ Bartolomé, judyeyaꞌ Mateo, judyeyaꞌ Santiago, Alfeotyiꞌ ạvaꞌ muꞌ, judyeyaꞌ Simón, muꞌ cäc̣häꞌchucsity jiquej muꞌin fạ́cacsity Romaĉantyiꞌ in, judyeyaꞌ yoctyiꞌ Judas, yoctyiꞌ Santiagoty ạvaꞌ muꞌ, meꞌ meꞌ tịj muꞌin. 14Pucmun tsudyujñiti in cọdyete Jenꞌ in, Jesústyiꞌtum vojity in judyeyaꞌ tseꞌ muꞌ, judyeyaꞌ yocsiꞌ p̂en chimeꞌ in, meꞌ meꞌ tsudyujñiti in vajmuꞌyaꞌ in.
15Yirisĉan mạyedyeꞌ muꞌin anicjetety Jenꞌ in räj tsudyujñiti in, yiriꞌ cien päräꞌ quiꞌtac meꞌsiꞌ muꞌin rụiꞌcuꞌ in. Pedro sacyi jéyacsi:
16—Vojity, anic cạ̈tsiꞌ mọꞌ sánacdyeꞌ Davidsiꞌ jiquej muꞌ, Jenꞌsiꞌ Ạꞌedyeꞌ muꞌ jap̂eijdyi muꞌ Judas jiquej, muꞌ cạcsity muꞌin raꞌ tapjetety Jesús in. 17Muꞌ tsuntumtyiꞌ jiquej, muꞌ chimeꞌ tsimꞌtactyiꞌ carijtaqui jiquej yiriꞌyaꞌ tsuntum. 18Muꞌ jiꞌmincatety Jesús, aꞌc̣hisyaꞌ dyijyedyeꞌ soꞌmac querec̣ha, muꞌyaꞌdye yaꞌij yiris jac. Muꞌĉan jọꞌchaij juñꞌ tŝọij, top tŝọiꞌ voꞌcomꞌ, c̣honꞌ tŝọiꞌ jínomꞌ, jadyic säñi muꞌ. 19Chị́qui Jerusalénĉantyiꞌ in meꞌdyes qui ĉụiꞌsiꞌĉan p̂eyacdyeꞌ jeꞌ mọꞌ jac in: Aceldama jeꞌ in. (Aceldama yiꞌ ca yiꞌ "Chäshtumsiꞌ Jac".) 20Salmosĉansiꞌ sánacdyeꞌ muꞌdye jap̂eijdyi Judas, yiꞌ:
"Vavtiꞌ raꞌ acaꞌ muꞌ,
paj jam jụꞌñity bäꞌyi atsvun muꞌĉan in."
Chimeꞌdye yocsiꞌ sánacdyeꞌ yiꞌ:
"Paj yoctyiꞌ qui yụꞌtac mọꞌdye mọmoꞌ carijtacdyedyes muꞌ,
yoctyiꞌ raꞌ jeñej buꞌban muꞌ."
21-22Mọꞌdyes jemoñeꞌ yoctyiꞌ yụꞌtac cạyacsity p̂eyacdyeꞌ, p̂eyeꞌ raꞌ junꞌ chuc vañinyeban muꞌ Jesucristo. Jemoñeꞌ tsimꞌtac muꞌ jụꞌñity chuc tsuntum bäꞌyi jiquej, cäc̣häꞌchutety muꞌ Jesucristo, tiyacchuiꞌ muꞌ Juan chojtacsi muntyiꞌ jiquej, chat q̂uinꞌdyemꞌ mạyedyeꞌcheꞌ jịjcaban muꞌ Jesús —jéyacsi Pedro.
23Tsimꞌtac päräꞌ in, tyi a ĉa yụꞌtac, Matías judyeyaꞌ José, yocsiꞌ tịj muꞌ Josés: Barsabás judyeyaꞌ Justo, meꞌsiꞌ tịj muꞌ. 24Chat qui cọdyete Jenꞌ in jéte in:
—Tsuntyiꞌ Ayoꞌ, mi nash räj chị́yacsebi ĉojtyiꞌ muntyity in, jítiĉamꞌ tsun uts päräꞌ muntyiꞌ in jụꞌñity bu raꞌ tsimꞌte mi paj qui muꞌ yụꞌtac 25jutacdyety mi, muꞌ raꞌ jeñej buꞌban Judasvun. Ĉaĉaij nash muꞌ Judas räj vaꞌquequeꞌ yụꞌtacdyeꞌ muꞌ yoquiꞌdyemꞌ juchaijyaꞌ jiquej u, meꞌdyes qui vaꞌtacdyeꞌĉan bäꞌyi —yi cọdyete Jenꞌ in.
26Chat qui majmadyeꞌ yụꞌtyeꞌ in tyi a ĉa yụꞌtac, Matías tŝọ́taqui muꞌ tapyejoij. Cächyi muꞌ yụꞌtac paj qui jutactyiꞌ Jenꞌtyiꞌ muꞌ, penꞌdyetucsi muꞌin yiriꞌtac yirity jiyity in.
Currently Selected:
Uñedye' 1: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
