Juan 21

Jesús jiꞌcaviti yävätidyeꞌyityyaꞌ jịꞌchiyactyiꞌ muꞌ

1Aty meꞌsiꞌ muꞌ Jesús cuvij jiꞌcaviti jịꞌchiyactyiꞌyaꞌ muꞌ, sinve Mar Tiberias muꞌve jiꞌcaviti muꞌ, Galilea chimeꞌ tịj mọꞌ mar. Meꞌ jiꞌcaviti muꞌinyaꞌ in: 2Räjdye muꞌyaꞌ tsudyujñiti in muꞌ Simón Pedro, judyeyaꞌ muꞌ Tomás, Epoj jétety in, judyeyaꞌ muꞌ Natanael, Canáĉantyiꞌ muꞌ, mọꞌ Galileaĉansiꞌ bäꞌyedyeꞌ. Muꞌyaꞌ chimeꞌdye päräꞌ ạvaꞌ muꞌ Zebedeoty, judyeyaꞌ chimeꞌ yoctyiꞌ päräꞌ jịꞌchiyactyiꞌ muꞌ. 3Muꞌyaꞌdye muꞌ c̣honꞌjeꞌ p̂eyacdyeꞌ muꞌ Simón Pedro, jéyacsi:

—Tạbi raꞌ yụ.

Vorjete muꞌin in:

—Tsunmun raꞌ chimeꞌ.

Meꞌdye p̂aiꞌjoij covambacheꞌ in, dyutsenꞌ tsedyedyeꞌ tạbi tsanꞌ in, mijam qui namꞌ yiris jäqueꞌ tạbedyeꞌ in. 4Aty nạijjoiꞌ rụiꞌcujcuj vatyquej sinve jiꞌcaviti muꞌ Jesús, muꞌin na jịꞌchiyactyiꞌ muꞌ jam chị́yete in. 5Meijtucsi jéyacsi:

—Chätidyeꞌ, ¿jam jäctiñeꞌ tạbedyeꞌ u? —jéyacsi.

Vorjete in:

—Jam u.

6Jesús jéyacsi:

—Vaꞌquecvac quivij sạjiꞌ miꞌin tacvetaque covamba miꞌin, meꞌ raꞌ chat jäctiñeꞌ —jéyacsi.

Meꞌdye vaꞌquequeꞌ in tacvetaque covamba, rumenꞌ vatyquej jäqueꞌ in, bänꞌ tŝọiꞌ sạjiꞌĉan muꞌin, aty jam junꞌ cheꞌteꞌ in. 7Muꞌ jịꞌchiyactyiꞌ Jesústyiꞌ muꞌ, muꞌ fer jạmaꞌjajitity yi jéte Pedro:

—Ayoꞌ na jiquej muꞌ —jéte.

Pedro seꞌveꞌ mọmoꞌ mọꞌ p̂eyacdyeꞌ junꞌ chuc muꞌ Ayoꞌ jiquej, chat qui muꞌ Pedro meꞌĉandye cofjibun coftyityĉan muꞌ, ĉaĉaij na cädäj tạbi, chat qui roiꞌyi ojñiꞌĉan ĉọcte muꞌ Jesús. 8Muꞌin na yoctyiꞌ jịꞌchiyactyiꞌ muꞌ taccheꞌ muꞌin covambacheꞌ in, meij mọmoꞌ muꞌin joiꞌdyi in, bubeꞌ jịjcaqui sạjiꞌ muꞌin chijämꞌ jámanvejoij in. Jam moch buꞌyi in cạvete in muꞌ Jesús, yiriꞌ cien metro meꞌsiꞌ buꞌyi moch. 9Sojquiti in chat qui p̂aiꞌjoij in, dạquicte in muꞌ Jesús farayevaꞌjoij tạbedyeꞌ judyeyaꞌ muꞌyaꞌ pan chimeꞌ muꞌ. 10Jesús jéyacsi:

—Tuvac tạbedyeꞌ miꞌin mọꞌ jäctiñes —jéyacsi.

11Muꞌ Simón Pedro quivij covambacheꞌ jijtuban, bubebanꞌ sạjiꞌ muꞌin, jámancheꞌ jịjijcayeꞌ muꞌ. Anic shach mọꞌĉan tạbedyeꞌ in, yiriꞌ cien ĉanamꞌ quiꞌtac chibin jiyiꞌ, meꞌsiꞌ jäcacsi in yedyej därmunsiꞌ in. Meꞌ tsanꞌ meꞌyiꞌ javquiꞌ jam qui namꞌ shẹiꞌyiꞌ mọꞌ sạjiꞌ muꞌin. 12Jesús jéyacsi:

—Atsijamꞌ, damꞌyejamꞌ chum miꞌin —jéyacsi.

Muꞌin jịꞌchiyactyiꞌ muꞌ jam mạꞌjeꞌ jéte in: "¿Tyi mi u?" ĉaĉaij na chị́yete in muꞌ Ayoꞌ. 13Muꞌ qui Jesús jäcte muꞌ pan soꞌmacsi, judyeyaꞌ tạbedyeꞌ chimeꞌ.

14Aty ọij chibin quiꞌ jiꞌcavibun Jesús jịꞌchiyactyiꞌyaꞌ muꞌ, aty vañinyebanyaꞌ.

Jesús javoroꞌti muꞌ Pedro

15Aty meꞌsiꞌ säcsi in chat qui muꞌ Jesús yi jéte Simón Pedro:

—Mi Simón, Juantyiꞌ ạvaꞌ mi, ¿mi buty mujuꞌchaꞌ mạꞌjitim, jam jeñej uts yoctyiꞌ in? —jéte.

Pedro vorjete:

—Anicdye u meꞌ Jịꞌchiyacsity, mi chäyitim junꞌ chuc mạꞌjeye yụ —jéte.

Jesús jéte:

—Ĉujcabutiꞌ ram yụ́tyiꞌ oveca in —jéte.

16Quivij yi Jesús jéte Pedro:

—Mi Simón, Juantyiꞌ ạvaꞌ mi ¿mi buty fer mạꞌjitim? —jéte.

Vorjete Pedro:

—Anicdye u meꞌ Jịꞌchiyacsity, mi chäyitim yụ mujuꞌchaꞌ mạꞌjeye —jéte.

Vorjete Jesús:

—Ĉujcabutiꞌ ram yụ́tyiꞌ oveca in —jéte.

17Cuvij yi muꞌ Jesús, chibin quiꞌ jéte mọꞌdye p̂eyacdyeꞌ:

—Mi Simón, Juantyiꞌ ạvaꞌ mi, ¿mi buty fer mạꞌjitim? —jéte.

Mọꞌ muꞌ jajiꞌtariti muꞌ Pedro ĉaĉaij na chibin quiꞌ jéte muꞌ Jesús: "¿Mi buty fer mạꞌjitim?" Chat qui yi muꞌ Pedro vorjete:

—Mi nash räj chịj Jịꞌchiyacsity, chäyitim yụ anic mạꞌjeye —jéte.

Vorjete Jesús:

—Ĉujcabutiꞌ ram yụ́tyiꞌ oveca in. 18Yụ anic jéye, nanatydyemꞌ jiquej mi anic jämꞌ yuꞌti cäti mi, sacjeꞌ mi junaꞌ ĉụiꞌ nati mi, junꞌ chuc mạꞌjeꞌ jämꞌtaqui mi, meꞌ mi. A na raꞌ ishoꞌ jụijyaꞌ mi, mi raꞌ chụiꞌjeyacsi un mi aty saptyinyaꞌ in, chat qui raꞌ junaꞌ ĉụiꞌ can in, meꞌ raꞌ tsanꞌ jam mạꞌjeꞌ mi —jéte Jesús.

19Rụijdye muꞌ yi Jesús jéte muꞌ Pedro junꞌ chuc raꞌ ijac muꞌ, Jenꞌdyes raꞌ jiꞌmeꞌte in, meꞌ raꞌ muꞌ jorojĉanjepte mọꞌ fer buꞌyedyeꞌ Jenꞌsiꞌ muꞌ. Chat qui yi muꞌ Jesús jajiti Pedro:

—Cäc̣häꞌchutiꞌ mọmoꞌ —jéte.

Jịꞌchiyactyiꞌ Jesústyiꞌ muꞌ, muꞌ fer jạmaꞌjajitity

20Camanꞌyi cạvi muꞌ Pedro cạvete meij jijtuij yoctyiꞌ jịꞌchiyactyiꞌ muꞌ, muꞌ fer jạmaꞌjajitity, muꞌ cạ̈rꞌyejĉojĉoijtyiꞌ Jesúsyaꞌ jiquej, yoquiꞌdyemꞌ säcsiyaꞌ feshtadyes jiquej u in, muꞌ jétety jiquej: "¿Tyi buty raꞌ meꞌ jiꞌmeꞌtyin mi?" jétety jiquej, muꞌdye muꞌ cạvete Pedro. 21Pedro jéte Jesús:

—Uts na q̂uinꞌ meij jijtuijtyiꞌ, ¿junꞌ bu raꞌ muꞌ jábiyaꞌ? —jéte.

22Vorjajiti Jesús:

—Yụ mạꞌjeꞌ jụijyaꞌ paj qui muꞌ yejĉoij tsạꞌ buꞌyi junꞌ quiꞌ chuc caꞌñibunyaꞌ yụ, jam jedyedyety jemoñeꞌ chịj mi. Mi na cäc̣häꞌchutiꞌ mọmoꞌ —jéte.

23Ọij p̂eyacdyeꞌ tseꞌejĉoiꞌ jịꞌchiyactyiꞌyaꞌ muꞌ jítidyeij in, "Uts penꞌdyeꞌ tsun jam raꞌ säñi." Muꞌ na jam meꞌ yi Jesús, meꞌ mọmoꞌ yi muꞌ: "Mạꞌjeꞌ jụijyaꞌ yụ paj qui yejĉoij tsạꞌ buꞌyi junꞌ quiꞌ chuc caꞌñibunyaꞌ yụ, jam jedyedyes jemoñeꞌ chịj mi", meꞌ mọmoꞌ yi.

24Uts jạmaꞌjajitity jịꞌchiyactyiꞌ Jesústyiꞌ muꞌ, muꞌdye räj cạveꞌ ọij chat qui sáñeꞌ muꞌ junꞌ chuc cạves muꞌ, chị́yepte tsun anic rụijsis räj sáñeꞌsiꞌ muꞌ.

Räꞌis p̂eyacdyeꞌ

25Junꞌ quiꞌ tacaꞌ mọꞌyaꞌ yocsiꞌ carijtacdyeꞌ Jesússiꞌ u muꞌ jam qui namꞌ mọꞌ sánacsiꞌ ọ́ĉan. Ñäp jụijyaꞌ sánac mọꞌ, a vuty jam junꞌ vav o ọij jacches quirca in, meꞌ ĉúti yụ.

Currently Selected:

Juan 21: CAS

Highlight

Copy