Galaciaĉantyidyes 3
3
Jenꞌsiꞌ yụꞌtacdyeꞌ muꞌ judyeyaꞌ mọꞌ anicyedyeꞌ tsun
1Anic itŝity dyijyedyeꞌ miꞌin Galaciaĉantyiꞌ miꞌin. ¿Tyi ĉaĉaij jiꞌshapuyibunac dyijyedyeꞌ u miꞌin paj qui farajjetiñeꞌ mọꞌ rụijsis p̂eyacdyeꞌ? Anic jorojĉan jéyac yụ yụ́siꞌyaꞌ jiꞌchäyitidyeꞌ, jeñej buꞌyi miꞌinsiꞌyaꞌ vej yụ jịꞌcaveyeyac junꞌ chuc croshcheꞌ ijac muꞌ Cristo, meꞌ buꞌyi shupquiꞌ jiꞌchäyitidyeꞌ yụ. 2Jeshaꞌ jítiĉaꞌ yụ miꞌin: ¿Jenꞌ buty meꞌ mọmoꞌ soꞌminac Ạꞌedyeꞌ muꞌ cäc̣häꞌchucdyeꞌyaꞌ mọꞌ yụꞌtacdyeꞌ jiquej? Jam junꞌ, anicyedyeꞌyaꞌ muꞌ soꞌminac. 3Itŝity dyijyedyeꞌ miꞌin. Jeshaꞌ tashcheꞌ jiquej anicyedyeꞌyaꞌ miꞌin muꞌ Jenꞌ soꞌminac ĉụiꞌsiꞌ Ạꞌedyeꞌ muꞌ, mọꞌ tsạꞌchunac miꞌin Jenꞌdyes. ¿Junꞌ qui dash ĉaĉaij meꞌ dyijyi miꞌin q̂uinꞌ chat tupuj p̂añi Jenꞌdyes miꞌin mọꞌ cäc̣häꞌchucdyeꞌyaꞌ yụꞌtacdyeꞌ? Jam junꞌ. 4Farajjetiñeꞌ qui jụijyaꞌ mọꞌ rụijsis jiꞌchäyitidyeꞌ miꞌin, fibidyes raꞌ shupquiꞌ mọꞌ räj jịꞌĉojtiñes miꞌin cäc̣häꞌchucdyeꞌyaꞌ miꞌin p̂eyacdyeꞌ. Faraj vuꞌ caꞌ jam meꞌ miꞌin farajjetiñeꞌ mọꞌ paj qui jam meꞌ fibidyes shupquiꞌ mọꞌ jiꞌchäyitidyeꞌ seꞌvetiñes miꞌin. 5Yụ raꞌ jéyac miꞌin: ¿Muꞌ Jenꞌ soꞌminac buty Ạꞌedyeꞌ muꞌ judyeyaꞌ jiꞌcaviyinac ferdyeꞌ muꞌ cäc̣häꞌchucdyeꞌyaꞌ miꞌin mọꞌ yụꞌtacdyeꞌ? Jam junꞌ meꞌ. Muꞌ meꞌ ñịbeꞌjinac ĉaĉaij na miꞌin anicjetiñeꞌ mọꞌ jämꞌsiꞌ p̂eyacdyeꞌ Jenꞌsiꞌ muꞌ seꞌvetiñes jiquej miꞌin.
6Meꞌdye muꞌ chimeꞌ Abraham jiquej anicjete Jenꞌ, meꞌdyes qui muꞌ Jenꞌ rụij jayuꞌti.#3:6 Génesis 15:6 7Jeshaꞌ, muꞌin anicjetety Jenꞌ in muꞌin nash anictyity vóshiꞌ Abrahamtyiꞌ, meꞌ yụꞌtac in. 8Tashiꞌ jäꞌmij yiꞌ sánacdyeꞌ junꞌ chuc raꞌ muꞌ Jenꞌ rụij yụꞌtacsi muꞌin jam judío in anicyedyeꞌyaꞌ muꞌin. Jenꞌ jäꞌmiij tashcheꞌ jasoꞌmiti p̂eyacdyeꞌ muꞌ Abraham mọꞌ c̣honꞌdyedyes p̂eyacdyeꞌ, yiꞌ: "Míyaꞌdye raꞌ yụ räj ñịbeꞌjeyacsi jacchety muntyiꞌ in", yiꞌ sánacdyeꞌ.#3:8 Génesis 12:3 9Muꞌ Abraham anicjepte Jenꞌsiꞌ p̂eyacdyeꞌ muꞌ, mọꞌdyes qui muꞌ Jenꞌ ñịbeꞌjajiti jiquej. Meꞌdye q̂uinꞌ chimeꞌ, tyi chuc anicjetety Jenꞌ in muꞌin raꞌ ñịbeꞌjeyac Jenꞌyaꞌ in, yojdyemꞌ Abrahamvun jiquej u.
10Tyi chuc dyijyity tsanꞌ tupuj c̣hoñi cäc̣häꞌchucdyeꞌyaꞌ yụꞌtacdyeꞌ, muꞌ meꞌ dyijyity, vaꞌtacdyedyety muꞌ shupqui, ĉaĉaij na mọꞌ yiꞌ sánacdyeꞌ: "Tyi chuc jam räjenꞌ chiqueꞌtyiꞌ mọꞌ sánacdyeꞌ yụꞌtacdyeꞌĉansiꞌ, vaꞌtacdyedyety muꞌ shupqui." 11Anic jorojĉan ọij shupquiꞌ sánacdyeꞌ Jenꞌsiꞌ muꞌ, muꞌ raꞌ jam rụij yụꞌtacsi muntyiꞌ in cäc̣häꞌchucdyeꞌyaꞌ in mọꞌ yụꞌtacdyeꞌ, ĉaĉaij na mọꞌdye p̂eyeꞌ sánacdyeꞌ, yiꞌ: "Muꞌ na rụij yụꞌtactyiꞌ anicyedyeꞌyaꞌ, muꞌ raꞌ c̣hoñi." 12Muꞌin cäc̣häꞌchuiꞌtyiꞌ in mọꞌ yụꞌtacdyeꞌ, muꞌin na jam dyijtuiꞌ in anicyedyeꞌ Jenꞌcheꞌ, yụꞌtacdyemꞌ dyijtuiꞌ in. Ọij sánacdyeꞌ p̂eyeꞌ mọꞌ yụꞌtacdyeꞌ yiꞌ: "Tyi chuc räjenꞌ chiqueꞌtyiꞌ in mọꞌ sánacdyeꞌ yụꞌtacdyeꞌĉansiꞌ, muꞌin raꞌ c̣hoñi in."
13Cristo jiꞌc̣honsinꞌ tsun paj qui jam tsuncheꞌ tŝọiꞌ mọꞌ vaꞌtacdyeꞌ muꞌ, mọꞌ cạiꞌsiꞌ yụꞌtacdyeꞌ, ĉaĉaij na Cristocheꞌ tŝọiꞌ mọꞌ vaꞌtacdyeꞌ, mọꞌ cạiꞌsiꞌ yụꞌtacdyeꞌ, mọꞌ tsunsiꞌ cạiꞌ vaꞌtacdyeꞌ. Anicdye meꞌ cạ̈tsiꞌ mọꞌ sánacdyeꞌ yiꞌ: "Tyi chuc ijactyiꞌ soncheꞌ in, muꞌin soꞌmac vaꞌtacdyeꞌ Jenꞌyaꞌ in." 14Mọꞌ dyijyedyeꞌ Jenꞌsiꞌ muꞌ, muꞌ Cristo meꞌ cabusinꞌ vaꞌtacdyeꞌ tsun paj qui muꞌindyes chimeꞌ jam judíodyes in shupquiꞌ ọij p̂eyacdyeꞌ jayuꞌtyiyitis Jenꞌ Abraham jiquej, paj qui räjtumdye tsun soꞌmac tsun Jenꞌsiꞌ Ạꞌedyeꞌ muꞌ anicyedyeꞌyaꞌ tsun muꞌ Jesucristo.
P̂eyacdyeꞌ Jenꞌsiꞌ jayuꞌtyiyiti Abraham jiquej
15Vojity yụ raꞌ jiꞌshupqueyeyac jịꞌĉocdyes p̂eyacdyeꞌ. Yirity muntyiꞌ yụꞌtyeꞌyaꞌ yiris p̂eyacdyeꞌ judyeyaꞌ tịj qui yụꞌtaquiyaꞌ sánac, aty fer buꞌyiꞌ shupquiꞌ mọꞌ p̂eyacdyeꞌ, aty jam tupuj yocyiꞌ yụꞌtac. 16Meꞌdye chimeꞌ mọꞌ fer buꞌyiꞌ p̂eyacdyeꞌ Jenꞌsiꞌ muꞌ, mọꞌ jayuꞌtyiyitis Abrahamvun jiquej judyeyaꞌ vóshiꞌ chimeꞌ muꞌ. Mọꞌ sánacdyeꞌ jam jiꞌjäcacsiꞌ "muꞌindyes vóshiꞌ muꞌ", muꞌin daiꞌtyiꞌ in, meꞌdye yirity mọmoꞌ vóshiꞌ muꞌ jiꞌjäcbite ĉaĉaij na yiꞌ sánacdyeꞌ: "judyeyaꞌ vóshidyes mi." Meꞌ yiꞌ ĉaĉaij na yirity mọmoꞌ muꞌ Cristo jiꞌjäcte sánacdyeꞌ. 17Mọꞌdyes yi yụ, Jenꞌ tashcheꞌ jiquej jayuꞌtyiyiti p̂eyacdyeꞌ muꞌ Abraham junꞌ chuc anicyedyeꞌyaꞌ muꞌ rụij yụꞌtac. Jenꞌ yi: "Yụ raꞌ jịꞌcätseꞌ mọꞌ p̂eyacdyeꞌ."#3:17 Génesis 12:7 Jiyiꞌ vạjpedyeꞌ quiꞌ cien chibin quiꞌtac yómodyeꞌ meꞌsiꞌ, chat q̂uinꞌdyemꞌ yụꞌtyeꞌ muꞌ Jenꞌ mọꞌ yụꞌtacdyeꞌ muꞌ. Yụ raꞌ jéyac, mọꞌ yụꞌtacdyeꞌ mọꞌ jäquiꞌve yụꞌtacsiꞌ, mọꞌ aty jam tupuj jịꞌmotseꞌ mọꞌ tashches yụꞌtacsiꞌ p̂eyacdyeꞌ Jenꞌsiꞌ muꞌ jayuꞌtyiyitis Abraham jiquej, mọꞌ tacaꞌ fer buꞌyiꞌ. 18Jeshaꞌ, muꞌ Jenꞌ ñịbeꞌjisinꞌ jụijyaꞌ tsun cäc̣häꞌchucdyeꞌyaꞌ yụꞌtacdyeꞌ jụijyaꞌ tsun, a vuty jam ñịbeꞌjitidyesyaꞌ shupquiꞌ mọꞌ, yódyesdyemꞌ yiꞌ o mọꞌ p̂eyacdyeꞌ Jenꞌsiꞌ jiquej u, mọꞌ jayuꞌtyiyitaques jiquej muꞌ Abraham, mọꞌ yiꞌ junꞌ chuc muꞌ Jenꞌ ñịbeꞌjajiti anicyedyeꞌyaꞌ muꞌ.
19Mọꞌdyes yụ raꞌ jéyac: ¿Jedyedyes buty yụꞌtacdyeꞌ? Jäquiꞌve muꞌ Jenꞌ cächjeyeyacsi mọꞌ yụꞌtacdyeꞌ, mọꞌ jịꞌĉocdyes juchaj muntyis muꞌin. Mọꞌ fer buꞌyiꞌ yụꞌtac junꞌ quiꞌ chuc atsijyaꞌ muꞌ Jiꞌc̣honacsity Muntyiꞌ, muꞌ Abrahamtyiꞌ vóshiꞌ muꞌ, muꞌ p̂eijtyety jiquej Jenꞌsiꞌ p̂eyacdyeꞌ muꞌ. Chimeꞌdye muꞌin anjer in jiꞌjiyete Moisés in Jenꞌsiꞌ yụꞌtacdyeꞌ muꞌ, muꞌ qui soꞌmacsi muntyiꞌ in. 20Jenꞌ jam meꞌ jasoꞌmiti p̂eyacdyeꞌ muꞌ Abraham jiquej, muꞌ jam soꞌmete jiꞌjiyetety, muꞌ chụiꞌ jasoꞌmiti.
¿Jedyedyes buty mọꞌ yụꞌtacdyeꞌ?
21¿Yụꞌtacdyeꞌ fáquiĉunꞌtiꞌ buty Jenꞌsiꞌtum p̂eyacdyeꞌ muꞌ, mọꞌ c̣honꞌdyedyes tsun? Jam junꞌ meꞌ. Tupuj mọꞌ yụꞌtacdyeꞌ tsạꞌchusinꞌ Jenꞌsiꞌyaꞌ vej muꞌ jụijyaꞌ tsun, a vuty tupuj yụꞌtacdyeꞌyaꞌ rụij yụꞌtac u tsun. 22Jam qui namꞌ junꞌ meꞌ, ĉaĉaij na yiꞌ mọꞌ sánacdyeꞌ junꞌ chuc mọꞌ juchaj bächäsinꞌ räj jacchety muntyiꞌ tsun, jeñej buꞌjaꞌ ĉärꞌtaquisĉan yuꞌsinꞌ, paj qui dyijtupja tsun Jenꞌsiꞌ ñịbeꞌjitidyes muꞌ, meꞌ muꞌ jiꞌc̣honsinꞌ anicyejaꞌyaꞌ Jesucristocheꞌ tsun, yoj yiꞌdyemꞌ p̂eyacdyeꞌ Jenꞌsiꞌ muꞌ.
23Jambiꞌdyemꞌ ayijyaꞌ mọꞌ tupudyeꞌ paj qui jäꞌmij anicyejaꞌ Jesucristocheꞌ, yụꞌtacdyeꞌ bächäsinꞌ tsun jiquej, jeñej buꞌjaꞌ ĉärꞌtactyiꞌ meꞌ buꞌjaꞌ jiquej tsun, ĉụiꞌdye muꞌ atsij jiꞌc̣honacsity. 24Meꞌ mọꞌ yụꞌtacdyeꞌ bächäsinꞌ, mọꞌ yuꞌsinꞌ Cristoyaꞌ, mọꞌ yiꞌ paj qui Cristo dyijtuja. Aty muꞌ dyijtujayaꞌ chat qui anicyejaꞌ muꞌcheꞌ, muꞌ qui rụij yuꞌsinꞌ tsun anicyedyeꞌyaꞌ. 25Aty muꞌ qui anicjeja meꞌquiꞌdye mọꞌ bächäsinꞌ yụꞌtacdyeꞌ. 26Q̂uinꞌ chat anicyedyeꞌyaꞌ Jesucristocheꞌ miꞌin, räj Jenꞌtyiꞌ ạvaꞌ muꞌ yụꞌtac miꞌin, ĉaĉaij na aty Cristoty miꞌin. 27Aty jiꞌsäsdyi Cristoyaꞌ jụijyaꞌ miꞌin,#3:27 Ọij jịꞌĉocdyes p̂eyacdyeꞌ shupquiꞌ, yódyemꞌ jiꞌsäsdyiĉaꞌ ojñiꞌĉan jiꞌchojtiĉaꞌ jụijyaꞌ u tsun, meꞌ buꞌjaꞌ jiꞌsäsdyiĉaꞌ Cristoyaꞌ aty jụjjejayaꞌ tsun. muꞌsiꞌ qui jämꞌyedyemꞌ meꞌchuptinte miꞌin ĉaĉaij na aty muꞌtyiꞌ miꞌin. 28Mọꞌdyes muꞌ Jenꞌ vaj cäts cạvacsi muntyiꞌ in, paj tsanꞌ judío in, paj tsanꞌ jam judío in, paj tsanꞌ úñity in judyeyaꞌ paj tsanꞌ jam úñity in, sonꞌ in judyeyaꞌ p̂en in, meꞌ vaj cäts cạvacsi Jenꞌ muntyiꞌ in, meꞌdye miꞌin vaj meꞌ Jesucristoty miꞌin. 29Miꞌin Cristoty jụijyaꞌ, Abrahamtyiꞌ vóshiꞌ shupqui chimeꞌ miꞌin, Jenꞌ raꞌ ñịbeꞌjinac räj miꞌin junꞌ chuc yiꞌ p̂eyacdyeꞌ muꞌ, mọꞌ jasoꞌmitis Abraham jiquej.
Currently Selected:
Galaciaĉantyidyes 3: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'