Galaciaĉantyidyes 6
6
Jemoñeꞌ vaj meij ñútyitiĉaꞌ bäꞌjaꞌ
1Vojity, yirity muꞌyaꞌ jụijyaꞌ peñi juchajĉan, miꞌin Jenꞌsiꞌtumtyiꞌ Ạꞌedyeꞌ bäꞌyity miꞌin, jemoñeꞌ rụijsistum p̂eyacdyeꞌ jịꞌcaꞌñebajtinte quivij, jämꞌyedyeꞌtum qui na ramꞌ jébajtinte miꞌin paj qui quivij caꞌñibun, jam jụijyaꞌ meꞌ miꞌin areꞌĉa miꞌinmun peñi chimeꞌdye. 2Jemoñeꞌ vaj meij raꞌ ñútyitidyeij miꞌin, jedyeꞌ chuc carijsis jụijyaꞌ miꞌin. Meꞌ jụijyaꞌ bäꞌyi miꞌin chat qui raꞌ jịꞌcätsebitinte Cristos p̂eyacdyeꞌ muꞌ.
3Jam raꞌ vaꞌbunyi miꞌin. Tyi chuc ĉụiꞌ yi: "Yụ nash mujuꞌchaꞌ", muꞌ meꞌ yity, ĉụiꞌ mọmoꞌ väñätuti, ĉaĉaij na muꞌ uyaꞌyaꞌ Jenꞌsiꞌyaꞌ vej shupqui. 4Jemoñeꞌ ĉụiꞌ dyijtuĉaꞌ junꞌ chuc bäꞌjaꞌ tsun. Rụij bäꞌjaꞌ jụijyaꞌ tsun, tupuj ĉụiꞌsiꞌyaꞌ dyijyedyeꞌ maꞌjotaĉaꞌ tsun, aty raꞌ jam yoctyis dyijtucsebijaꞌ tsun. 5Jemoñeꞌ vaj cäts ĉụiꞌ ĉujcatiĉaꞌ junꞌ chuc bäꞌjaꞌ tsun.
6Seꞌvaquity Jenꞌsiꞌ p̂eyacdyeꞌ in jemoñeꞌ meꞌ meꞌ ĉụiꞌsiꞌ jedyeꞌ jämꞌsiꞌ muꞌin soꞌmete in muꞌin jịꞌchiyacsity in.
7Jam raꞌ ĉụiꞌ väñätuti miꞌin, Jenꞌ jam junꞌ tupuj majmatuc mijam väñätuc, muꞌ räj chäyisinꞌ. Jeshaꞌ yiris vej jụꞌñis chuc quịc jụijyaꞌ, mọꞌdye mọmoꞌ intsiiꞌ judyeyaꞌ qui vädac, meꞌdye chimeꞌ tsun, junꞌ chuc bäꞌjaꞌ jụijyaꞌ tsun, areꞌ jämꞌ areꞌ jam, meꞌ buꞌjaꞌ raꞌ soꞌmac tsun. 8Tyi chuc dyijtuiꞌ in aꞌc̣his aꞌsiꞌ muꞌin, muꞌin raꞌ cạiꞌ sänꞌdyeꞌ in, mọꞌ raꞌ jeñej buꞌyiꞌ vädacdyeꞌ muꞌin. Muꞌin na chiqueptety Jenꞌsiꞌ Ạꞌedyeꞌ in, muꞌin raꞌ Jenꞌyaꞌ bäꞌyi in, mọꞌ raꞌ jeñej buꞌyiꞌ muꞌinsiꞌ vädacdyeꞌ muꞌin. 9Mọꞌdyes jam raꞌ shọijtyejaꞌ carijtacdyeꞌ Jenꞌdyes, jämꞌ raꞌ yejĉojaꞌ bäꞌjaꞌ tsun, yirisĉan raꞌ mạyedyeꞌ mọꞌ ayij jämꞌsiꞌ vädacdyeꞌ, mọꞌ raꞌ chucdyeꞌ tsun, jam farajjejaꞌtyiꞌ jụijyaꞌ tsun. 10Mọꞌdyes junꞌsiꞌ jụijyaꞌ ĉụiꞌ tupuj tsun, jemoñeꞌ räj nọ́tyetacsejaꞌ muntyiꞌ in, dadamꞌ muꞌin anicjetety Jenꞌ in jemoñeꞌ nọ́tyetacsejaꞌ in.
Jäquiꞌves p̂eyacdyeꞌ Pablos judyeyaꞌ voryetacdyemꞌ
11Cavibutiĉamꞌ ọij q̂uinꞌ därmunsiꞌ sánacdyeꞌ yụ, sáñeꞌsiꞌ yụ ĉụiꞌsiꞌyaꞌ un yụ. 12Quivij raꞌ jéyac yụ, muꞌin cäjsis jiꞌchäyitidyeꞌ tuiꞌtyiꞌ in muꞌin mạꞌjeꞌ seꞌ jaꞌyinac in paj qui seiꞌtac aꞌ miꞌin, joꞌmes mọꞌ dyijyedyeꞌ muꞌin ĉaĉaij na muꞌin mạꞌjeꞌ in paj qui maꞌjotac judíoyaꞌ in, muꞌin ĉútity seiꞌtacdyeꞌcheꞌ in, paj qui joꞌmety judío in jam jịꞌñibeꞌcacsi in, ĉaĉaij na muꞌin pạrej judío in fạ́quete Cristo in, muꞌ ijactyiꞌ croshcheꞌ jiquej. 13Jeshaꞌ muꞌin, seiꞌtactyiꞌ aꞌ in, muꞌin tacaꞌ jam chiqueꞌ yụꞌtacdyeꞌ in. Muꞌin mạꞌjeꞌ jiꞌseiꞌtyinac in mạꞌjeꞌ vaꞌbunyi miꞌincheꞌ in junꞌ chuc muꞌin seꞌ jaꞌyinac in. 14Yụ na jam jedyeꞌyaꞌ vaꞌbunyi yụ, meꞌdye yirity mọmoꞌ dyijtute yụ, muꞌ Jesucristo Ayoꞌ tsun, muꞌ ijactyiꞌ croshcheꞌ jiquej, mumꞌ yirity timaꞌquete yụ. Yụ́mun säñi croshcheꞌ, jadyic dyijtuiꞌ yụ jacches dyijyedyeꞌ, jeñej buꞌyi säñity shupqui yụ jacchescheꞌ jedyeꞌ in. 15Meꞌ tsanꞌ seiꞌtactyiꞌ aꞌ jụijyaꞌ tsun, meꞌ tsanꞌ jam, jam mọꞌ jedyeꞌ yiꞌ, meꞌdye yiris mọmoꞌ jemoñeꞌ jedyeꞌ dyijtuc, paj qui muꞌ Jenꞌ mụiꞌsis dyijyedyeꞌ soꞌmisinꞌ tsun 16Yụ cọdyete Jenꞌ paj qui muꞌ ñịbeꞌ ĉọcsi judyeyaꞌ soꞌmacsi maꞌjodyeꞌ ĉojtyiꞌĉandyes muꞌin, räj muꞌin chiqueptety in ọij p̂eyacdyeꞌ jéyacsiꞌ yụ miꞌin q̂uinꞌ. Ọij cọdacdyeꞌ yụ q̂uinꞌ chimeꞌ räjtumdyes Jenꞌtyidyes muntyiꞌ in.
17Ọij raꞌ jadyiquis p̂eyacdyeꞌ jéyac: Paj jadyic meꞌtyin yụ in Jenꞌdyes. Aꞌcheꞌ yụ jorojĉan paiꞌ aty tätsacdyeꞌ yụ cäc̣häꞌchucdyeꞌyaꞌ Jesús yụ, mọꞌ jịꞌĉocdyeꞌ yụ anictyity úñity muꞌ.
18Vojity, yụ cọdyete muꞌ Jesucristo Ayoꞌ tsun paj qui miꞌin räj soꞌminac ñịbeꞌjitidyes muꞌ ĉojtyiꞌĉandyes miꞌin. Paj meꞌ.
Currently Selected:
Galaciaĉantyidyes 6: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'