Jone 14

Mae Jisas ngala u nabrou te mala thoke ka God na

1Mae Jisas ne cheke eghu ka nogna mae fanomhore, “Thosei nanga nomi nei diꞌanagnafami eghu. Fatutuani ni God nei fatutuani ghau la iara. 2Jare na kmana chogho te mala au ghotilo ka sugagna mae Mama na. Jame theome tutuani na, iara jame theome chekeni igne ka ghotilo. Iara na kulu tei jare mala tarabana choghomi ghotilo. 3Ke leghugna te tei iara te tarabana choghomi ghotilo na, iara nake pulo mei. Aonu iara ginauna hata ghami ghotilo mala au balugu ka vido aheva nate au iara na. 4Ghotilo lasenihi u nabrou te thoke ka vido aheva nate tei iara na.”

5Mae Tomas ne cheke eghu ka mana, “Lord, ghehati theome laseni aheva nate tei iagho na. Faneha eghume laseni ghehati nabrou te tei thoke jare na eghu sia?”

6Mae Jisas ne cheke eghu ka mana, “Iara nabrou na, iara tutuani na, nei iara karha na. Jare na theo kaisei nabrou heva nga te mala tei te thoke ka Mama na, mei ka iara. 7Gognarona ghotilo la lase ghauhi iara, eghume ghotilo ginauna laseni mae Mama. Funu gognarona ghotilo lasenihi mae Mama, eghuteuna ghotilo filonihi mana.”

8Mae Filip ne cheke eghu ka mana, “Lord, tuana ngala unha te magnahagheni ghehati na mala falalase iagho mae Kmamu na ka ghehati.”

9Mae Jisas ne cheke eghu ka mana, “Ghema Filip, iara au raughahi balumi ghotilo. Ba theome lase fakeli ghau ngala iara si ghotilo ia? Tutuani fara, mae ihei te filo ghau iara na, mana la filonihi mae Mama. Naugna unha site chekeni iagho, ‘Fatakle ranghi ghami mae Mama na’ teu gnea? 10Fatutuani ghau iara sagho. Iara au balugna mae Mama, nei mae Mama au balugu iara. Cheke te chekedi iara ka ghotilo igre theome nogu cheke iara thegu. Nu mae Mama te au balugu iara na te edi nogna glokure. 11Khogla fatutuani ghau iara te au balugna mae Mama, nei mae Mama au balugu iara. Ghotilo jame fatutuanidi nogu cheke iara te tutuani igre, naugna ghotilo la filodihi gloku biꞌo te edi iara ra eghu. Eghuteuna ghotilo mala fatutuani eidi glepo tuare. 12Tutuani fara te chekeni iara ka ghotilo na. Mae ihei te fatutuani ghau iara na, mana ginauna edila glepo te edi iara re. Mana ginauna na edi glepo ke kmanadi te edi iara igrei, naugna iara na tei kokoni nauthoglu igne mala tei au balugna mae Mama. 13Eghuteuna iara na eni unha te toreni ghotilo ka nanghagu iara na. Iara na eni igne ranghi ghami ghotilo mala filoni naiknore nogna nolaghi biꞌo mae Mama te thakle mei ka iara mae Thugna na. 14Tutuani fara, unha te toreni ghotilo ka nanghagu iara na, iara na eni ranghi ghami ghotilo.”

Mae Jisas ne nhaꞌa chekeni eigna u Tharunga te Blahi

15Mae Jisas ne cheke eghu ka nogna mae fanomhore, “Uve, jame te namha ghau iara tutuani ghotilo na, ghotilo leghudi koba nogu cheke iara gre. 16-17Iara ginauna toreni mae Mama mala kuru meini mana ka ghotilo keha mae te mala togho ghami ghotilo, mana ginauna au fabrahu balumi ghotilo. Mana mae Tharunga te Blahi, mae ihei nate falalase glepo te tutuani eigna God na. Naikno te leghuni puhigna nauthoglu igne na, naikno tuana theome snakreni mae Tharunga te Blahi te mala mei ka mana, naugna mana ne theome laseni nei filo glanini neu mana. Nu ghotilo lasenihi mana, naugna mana au balumi ghotilo, eghuteuna mana ginauna theome tei koko ghami ghotilo. 18Iara na theome tei koko ghami ghotilo, jateula goro sua te theo ihei nga te mala tajidi ra eghu. Naugna iara nake pulo mei mala au balumi ghotilo. 19Na theome raugha naiknogna nauthoglu igne na theome filo ghau iara. Nu ghotilo na filo ghau iara, naugna iara na karhau ngala. Eghuteuna ghotilo na karha la, naugna iara ginauna nake kegra fapulo kau karha. 20Kau narane tuana, ghotilo ginauna lase ghau iara te au balugna mae Mama, eghuteuna ghotilo au balugu iara, eghuteuna iara au balumi ghotilo. 21Mae ihei te nomhidi nei leghudi teu nogu vetula iara re, mae tuana ngala te namha ghau iara na. Eghuteuna mae ihei te namha ghau iara na, mae Kmagu iara na ginauna namhani mana. Eghuteuna iara ginauna namha nila mana, nei na fatakle ghau thegu ka mana.”

22Aonu, mae Judas (theome mae Judas Iskariot), ne nomhidi cheke igre ne cheke eghu ka mae Jisas, “Lord, naugna unha site magnahaghei fatakle nigho themu kolho ka ghehati, nu theome ka naikno te leghuni puhigna nauthoglu gne teu gnea?”

23Mae Jisas ne cheke eghu ka mana, “Tutuani fara, mae ihei te namha ghau iara na, mana ginauna leghudi nogu farirhiu iara re. Mae Mama ginauna jaola namhani mana, eghuteuna ghepa mae Mama ginauna mei ka mana mala au fabrahu balugna mana. 24Mae te theome namha ghau iara na, mana theome leghudi nogu farirhiu iara re. Uve, farirhiu te nomhini ghotilo igne theome khogla nogu farirhiu iara kolho, nu jaola mei funugna ka mae Mama, mae teke kuru mei ghau iara na.

25 “Iara kafe chekedi glepo igre ka ghotilo kani au ngau iara balumi. 26Nu mae Tharunga te Blahi te mala togho ghami ghotilo na, mae Mama ginauna kuru meini mana ka nanghagu iara. Kau narane te mei mana na, mana ginauna farirhiu ghami ghotilo gobigna lepore, eghuteuna mana ginauna eni igne mala ke ghatho fapulodi ghotilo gobigna lepo teke chekedi iara ka ghotilo ra. 27Iara na lilisei soru nogu pharikeli na balumi ghotilo, nogu pharikeli iara igne tusu ari ka ghotilo. Nogu pharikeli iara igne theome jateula glepo te tusu ari naiknogna nauthoglu igne eghu. Eghume thosei nanga nomi nei thosei mhaghu eghu ghotilo ia.

28 “Ghathoni unha teke cheke eghu iara ia, ‘Iara ginauna tei ka mae Mama, eghuteuna iara nake pulo mei ka ghotilo.’ Te thofno namha ghau iara ghotilo na, ghotilo ginauna keli tami te tei iara ka mae Mama na, naugna mae Mama na mae ke biꞌogu iarai. 29Iara kulu chekedi glepo igre ka ghotilo kani theome tei koko ghami ngau iara. Kate tei koko ghami iara na ghotilo ginauna ghathodi nei fatutuanidi eghu unha te chekedi iara igre. 30Iara ginauna theome cheke faraugha balumi ghotilo, naugna mae Satan mae funei gna nauthoglu igne, la namo meihi. Tutuani fara, mana theo kaisei nogna nolaghi ke klignagu iara. 31Nu iara magnahaghedi naiknogna nauthoglu igne te lase ghau iara te namhani mae Mama na. Eghume iara edi ngala unha te chekedi mae Mama mala edi iara teku mana re.

“Uve, kheraguro, ghotilo kegra haghe mala tei kokoni tahati vido igne.”

Currently Selected:

Jone 14: mrn

Highlight

Copy