Jone 19

1Aonu, mae Paelat ne chekedi nogna mae soldiare mala purini mae Jisas. 2Ke leghugna igne, mae soldiare ne lolhopo kaisei khepi fifiriulu ne nhaꞌa lao ka pha'ugna mae Jisas na. Eghuteuna, mare ne fapoko lao kaisei nogna phoko ukru king ka mana mala maꞌeni mana. 3Aonu, mare ne mei koba ke ulugna mae Jisas ne tuturupuku soru ne cheke eghu, “Cheke fakeli nigho, iagho nodi king mae Jiu!” Gnafa teuna, mare lao ne taponi mana.

4Mae Paelat neke jiflai ne cheke eghu ka mae Jiu gre, “Tore, filo si ghotilo! Iara atha fajiflani mae Jisas ka ghotilo. Naugna iara magnahaghei ghami ghotilo te laseni iara theome filoni kaisei najafra ka mana te nabagna te mala fate faleheni mana na.” 5Aonu, mae Jisas ne jifla mei ne kegra ke uludi mare balugna khepi fifiriulu na, nei nogna phoko ukru mae king. Mae Paelat ne cheke eghu ka mae Jiu gre, “Filoi ghotilo! Igne mana na!”

6Kate filoni mae Jisas na mae pris ulu nei mae pulis te reireghi gna Sugablahi na mare filo lao ka mae Jisas ne eha fabiꞌo, “Tupijuruni mae tuana! Tupijuruni mae tuana!”

Mae Paelat ne cheke eghu ka mare, “Athani mana si ghotilo mala tupijuruni mana themi. Naugna iara theome filoni kaisei najafra ka mana te nabagna te mala fate faleheni mana na.”

7Mae Jiu gre ne eha fabiꞌo ka mae Paelat, “Unha te risoni ka nomi vetula ghehati na, mae igne nabagna te lehe, naugna mana ne kiloni thegna Thugna God.”

8Kate nomhini mae Paelat cheke te Thugna God teu igne, mae Paelat ne mhaghu nogna fara. 9Aonu, mana neke ruma lamna suga ne ghusna eghu ka mae Jisas, “Iagho neke mei funumu aheva sia?” Mae Jisas ne theome cheke tughu ka mana. 10Mae Paelat ne cheke eghu ka mana, “Iagho tirou cheke tughu ka iara sia? Ba, iagho theome lase ghau iara sia? Iara au nogu nolaghi te mala hata fajifla nigho ba tupijuru nigho kau gaju fafatha. Ba, theome laseni sagho tuana ia?”

11Mae Jisas ne cheke eghu ka mae Paelat, “Iagho theo kaisei nou nolaghi ke klignagu iara. Nu iagho tangomana te tupijuru ghau iara na, naugna God neke snakre nigho iagho te mala eni tuana. Nu mae ihei te snakre ghau iara ka khamemu iagho na, mana thono nakhibogna biꞌo fara ke tulao mu iaghoi.”

12Kate nomhini mae Paelat cheke igne, mana ne funu hiro phoge te mala snakre teini mae Jisas. Eghuteuna, mae Jiu gre ne eha fabiꞌo eghu ka mae Paelat, “Te snakre teini iagho mae igne na, ghehati lase nigho iagho theome kheragna Sisa mae funei biꞌo gna Rom na eghu. Naugna mae ihei te kiloni thegna mae king na, mana theome keli ranghini mae Sisa.”

13Mae Paelat nomhidi unha te chekedi mae Jiu igre ne atha fajiflani mae Jisas ke kosi suga. Mae Paelat ne gnokro ka sape mala fate te kiloi “Thabasoa” na, ka cheke Hibru na “Gabatha”. 14Ka vido tuana la namo naublathahi, eghuteuna nodi narane te mala tarabana eigna nodi Gaghamu Ghasa-polho mae Jiu gre.

Mae Paelat ne cheke eghu ka mare, “Filo si ghotilo, igne nomi mae king ghotilo na.”

15Mae Jiu gre ne eha eghu ka mae Paelat, “Atha tei mae tuana delei! Faleheni mae tuana! Tupijuruni mae tuana ka gaju fafatha!”

Mae Paelat ne cheke eghu ka mare, “Tore, ghotilo magnahaghei ghau iara te tupijuruni nomi king gne sia?”

Hatimare mae pris ulu re ne cheke eghu ka mae Paelat, “Mae tuana theome nomi king ghehati. Nomi king ghehati na kaisei mae Sisa ngala!”

16Aonu, mae Paelat ne snakreni mae Jisas ka mare mala tupijuruni mana kau gaju fafatha.

Mae soldia re ne tupijuruni mae Jisas kau gaju fafatha

(Mat 27:32-44; Mak 15:21-32; Luk 23:26-43)

Mae soldiare ne hatani mae Jisas ne tei. 17Jisas pala nogna gaju fafatha thegna na ne jifla ka namono biꞌo na ne tei ka thogele te kiloi “Khorongosa”, ka cheke Hibru na “Golgota”. 18Jare mare ne tupijuruni mae Jisas ka gaju fafatha na. Mare ne tupijurudi langau phia mae balugna mae Jisas, kaisei fei mairi nei keha na fei nhetagna, eghuteuna mana hotei.

19Mae Paelat ne risoi kaisei fagaglana ne nhaꞌa haghe ke kligna gna mae Jisas ka gaju fafatha na cheke igre:

“MAE JISAS GNA NASARET, NODI KING HATIMARE MAE JIU.”

20Kmana mae Jiu te liu jare na, mare filoni fagaglana tuana. Naugna aheva te tupijuruni mae Jisas na namo fara Jerusalem. Thilo nafnata cheke te rioriso soru mae Paelat na, ka nodi cheke mae Jiu, ka nodi cheke mae Rom, nei ka nodi cheke mae Griki. 21Kate filoni mae pris ulure fagaglana igne, mare ne tei ne cheke eghu ka mae Paelat, “Thosei risoni iagho ‘Nodi King mae Jiu’ teu ana. Nu te keli na rioriso eghu agne, ‘Mae igne ne cheke eghu, Iara nodi King mae Jiu.’ ”

22Mae Paelat ne cheke eghu ka mare, “Unha cheke tela risodihi iara na, khudau ngala jare.”

23Ke leghugna te tupijuruni mae Jisas ka gaju na, mae soldiare ne hata nogna pohe mana. Mare ne tufa ka fati vido, kaisei vido kaisei mae ka fati mae soldiare. Mare jaola ne atha nogna phoko mana na. Phoko igne neke hohoro kaisei vido biꞌo kolho.

24Mae soldiare ne cheke eghu fari thedi, “Tahati jame neke theome tufa phoko igne. Nu tahati jame neke lalahu khale mala laseni mae ihei nate atha na.” Cheke igre ne horoghoto kau gaoghathogna unha teke risoni kaisei mae profet tifa,

“Mare ne tufa nogu pohe iara na farihoteidi thedi nei lalahu khale nogu phoko iara na.”

Eghume, hatimare mae soldiare neke eni igne.

25Naikno kegra teu rhegna gaju fafatha mae Jisas na igre: idogna mae Jisas, tahigna idogna mana na, Meri khetogna mae Klopas, nei Meri gna Makidala. 26Mae Jisas ne filoni idogna na. Mana jaola ne filoni nogna mae fanomho te namhani fara mana kegra teu jare na. Mana ne cheke eghu ka idogna na, “Naikno biꞌo, filoni mae ana, ghathoni mana jateula mae thumu eghu.” 27Aonu mana neke cheke eghu ka nogna mae fanomho tuana, “Filoni thau ana, ghathoni naꞌa jateula idomu eghu.” Funu ka narane tuana, mae fanomho igne ne tathalei idogna mae Jisas na ne tei ka sugagna na ne tajini.

Narane glehegna mae Jisas

(Mat 27:45-56; Mak 15:33-41; Luk 23:44-49)

28Ke leghugna igne, mae Jisas la lasenihi nogna gloku na la gnafahi. Te mala horoghoto kau grioriso te blahi na mana ne cheke eghu, “Iara roi koꞌu.” 29Jare na kaisei botol te fodu ka waen te raha fara na, aonu mae soldiare hata u phocho na ne tihi lao ka waen tuana. Aonu mare ne fachakhi lao phocho na ka fora na ne tusu haghe ka phepeogna mae Jisas na. 30Mae Jisas ne gnaignami waen te raha tuana ne cheke eghu, “La gnafahi!” Mana pogho soru pha'u na ne lehe.

31Narane igne narane mala tarabana eigna Sabat. Mae Jiure theome magnahaghei te gefe teu thinidi mae te lehere ka gaju fafatha na te ghilei thoke ka narane Sabat. Eigna narane Sabat igne kaisei narane blahi fara tulao. Naugna igne, mae biꞌodi mae Jiure ne tore ka mae Paelat mala tei mare lolhopa ghahedi thilo mae igre, mala lehe thilo mare mala hata tei giugilui. 32Mae soldiare mei ne lolhopa ghahedi phia mae teke tupijuru balugna mae Jisas igre. 33Eghuteuna, kate mei mare ka mae Jisas na, mana la kulu lehehi. Mare ne theome lolhopa phia ghahegna mana re. 34Kaisei mae soldia ne jajaꞌi fei gagarogna mae Jisas na ka grojo. Aonu dadara balu khoꞌu ne thofa soru ka thinigna mana na. 35Iara, mae teke kegra tekeu jare na, iara filodi glepo igre ne fatutuani ne toutonudi. Unha te chekedi iara igre thofno tutuani fara, theome chaghi. Eghuteuna iara toutonudi glepo igre mala fatutuani ni ghotilo mae Jisas Kraes. 36Gobigna lepo te edi igre ne horoghoto ka grioriso te blahi na, “Theo kaisei nhubragna mana te lolhopa mare na.”#19:36 Eks 12:46; Nab 9:12; Sam 34:20. 37Eghuteuna, keha grioriso te blahi na cheke eghu, “Naiknore ginauna filoni mae teke jajaꞌi mare na.”#19:37 Sek 12:10.

Bekugna mae Jisas

(Mat 27:57-61; Mak 15:42-47; Luk 23:50-56)

38Ke leghugna igne, kaisei mae nanghagna na mae Josep, maegna Arimatea. Mana toreni mae Paelat mala atha thinigna mae Jisas na mala giugilu. Mae Josep gne kaisei mae leghuni mae Jisas, eghuteuna mana pophoruni thegna, naugna mana mhaghudi mae biꞌodi mae Jiu. Mae Paelat ne snakreni ka mana thinigna mae Jisas na mala atha fadelei. 39Mae Nikodimas, mae teke mei filoni mae Jisas bongiro tifa ia ne tei la balugna mae Josep. Mae Nikodimas ne atha phia nafnata meresin te kilodi mur nei alo. Meresin igre famane sisiri kelidi, tahudire tolufulu kilo. 40Phia mae igre atha thinigna mae Jisas na ne pipiha ka pohe balu meresin. Igne nodi kastom giugilui mae Jiu. 41Ka vido aheva te tupijuruni mare mae Jisas na jare au kaisei nagare sisi. Ka nagare tuana au kaisei gluma majaghani te theome giugilui nga teu kaisei naikno tagna. 42Phia mare ne lilisei thinigna mae Jisas na jare, naugna gluma tuana theome thei gaꞌu. Eghuteuna, narane tuana nodi narane mala tarabana mae Jiu eigna narane Sabat.

Currently Selected:

Jone 19: mrn

Highlight

Copy