Imilimo 19
19
E Pauli mwe Efeso
1Ala pane Apolo achili ali mwe Korinte, Pauli apitingana munsi mukasi aya kwe Efeso. Aya azana awasambilizi wamwi kweneko, 2awawuzya ati, Wuzye pane mwasuwizile mwapochelezile Muzimu Mwimichile?
Awamutolelela awati, swinya tutivwa nanti akwivwa kuno kuli Muzimu Mwimichile.
3Pauli awawuzya ati, Nga mwabatizizwe batizo-chi?
Awamutolelela awati, Ibatizo lyakwe Yohani.
4Ngapano Pauli awanena ati, Yohani wabatizyanga ibatizo lyakutontolokwa kuluwembu; anena awa Israeli ukuti wasuwile mwakwe wino wi zanga pansizi pakwe weliwe-wino we Yesu.
5Awala wivwa wowonye, awabatizwa mwizina lya Mfumu e Yew. 6Pauli awika amakasa yakwe pakwe woliwo, nga Muzimu Mwimichile awawila, awavwanga nindimi-mpya swinya awawizya amazwi yakwe Leza. 7Ukuvuia kwawo walinji kwela ikumi lyonga nawawili.
8Pauli ayinjila mung'anda yakupepela, awavwanga nukusinga kumpindi yamyezi yitatu, awavwanzyania nawantu akuwafunkulila ku Wufumu wakwe Leza. 9Ukuwa wamwi watumvile awakana ukusuwila, awavwanjila ninzila ya Mfumu uwuwi paminso yiwumba. Achaleka Pauli afuma kwakwe woliwo asenda awasambilizi apita nawo; nga awalanda nawo amanda yonsi mung'anda yakusambilila iyakwe Tiranu. 10Awalanga wakachita wowonye ukufika kumyaka yiwili, achaleka awantu wonsi wane wikalanga munsi ya Asia, awa Yuda namakandi, awivwa izwi lya Mfumu.
Awanakwe Seva
11Leza achitila mumakasa yakwe Pauli ivyamayele vino visitela vichitwe. 12Nututambalanye nimyenda yakuchinga pachifuwa vino vyalinji avyakwe aviwa amulembo wakupozezya awalwale, nizyandwala aziwafuma nimizimu miwipe iwalompoka muwantu. 13Ukuwa awa Yuda-nye nawo wamwi wano wapitapitanga awawinga imizimu miwipe, nawonye awalonda ukuvwanjila mwizina lya Mfumu e Yesu pakupozya, Wanenanga imizimu miwipe wakuti, Inkukukalipilila mwizina lyakwe Yesu wino Pauli akawizya. 14E Seva umu Yuda, e simapepo mukulu walinji nawanachonsi munenulambali wane wachitanga wowonye,
15Ukuwa umuzimu wuwipe awuwatolelela awuti, E Yesu namumanya nivyakwe Pauli-nye navimanya; ukuwa nganamwe—mwewaweni?
16Umuntu wino umuzimu wuwipe walinji mwakwe weliwe awuwavundumuchila awuwalusya amaka awuwachimvya. Wonsinye awalupuka awafuma mung'andanye yo yo chintakwa swinya ampondo. 17Awala awa Yuda namakandi wano wikalanga mwe Efeso wivwa ivintunye vyovyo; intete aziwalema wonsi, nga izina lya Mfumu e Yesu ilichindikwa nkani. 18Awasuwizi wavule awaya kweneko, awazumila palwenze nukuwumbula vino wachisile. 19Awavule awakwe woliwo wano wachitachitanga ivyamayele yakutumpika awantu awawunganika wakalata wawo imifuli awocha paminso yawantu wonsi. Awapenda uwuzi wakwe wakalata awasanzya awazana wayine indalama imyandi ikumi impindi amakumi yasano (50,000). 20Mumwatanye woo izwi lya Mfumu aliwoma nkani alikwila monsi.
Imbilikiti mwe Efeso
21Avila ivintunye vyoo vyachitwa, Pauli ayelengania ukuti apite mwe Makedonia na munsi yawa Griki aye kwe Yerusalemu. Ati, Ndinaya kweneko, nyoke swinya nkalole awa ku Roma. 22Achaleka atuma Timoti nu Erastasi, awawomvi wakwe wowilinye, awaya ku Makedonia, weni atela asyala mu Asia impindi nkulu.
23Pampindi yoyonye akukatuka intazi mbipe mu Efeso muno anzila ya Mfumu e Leza. 24Ekasula wakwe silivara wumwi wino witwanga izina lyakwe Demetriasi, wasuzile amakolania yang'anda yakupepela kaleza kanachi e Artemisi, nga umulimo wowo awuletela awawomvi wakwe amalipilo makulu. 25Achaleka ayita awawomvi wakwe apaliponga, ayita nawanji wano wawombanga umulimo ndivino wowonye, awanena ati, Wayaya, mumanyile kuno ukuchindama kwitu kukafuma mumulimo wonye-woo, 26Mukuyilolela swinya nukuyivwila vino ewunji wee e Pauli akuchita. Akuti twaleza tuna twasulwa namakasa yawantu wasi awaleza nanti katichi, kanonzi wati akwemela awavule kweweliwe, awamonyemoo mwe Efeso swinya kwela nawantu wonsi wamunsi ya Asia. 27Kanonzi zyandi ziwe antazi, amuno awantu wandi wasule umulimo witu. Swinya chisi achocho chitupu, swinya kuli intazi zyakuti wandi wasule ning'anda-nye yakupepela kaleza kanachika Artemi, nuwukulu wakwe Artemi walowa—kaleza kanachi kano awantu wonsi mwe Asia namunsi yonsi nuwukulu wapakatanga!
28Alila iwumba lyivwa mazwinye yaa awavitwa kutaluvile, Awapazamuka nichongo awati, Umukulu we Artemi wa mwe Efeso! 29Iwumba lyonsi alilema Gayasi nu Aristarikasi awantu wakwe Makedonia wane wapitanga nu Pauli, awawulumuka apaliponga nawo awinjila muluwanza lwakwizizya. 30Ala pano Pauli walonda ukuti ayimilile piwumba, ukuwa awasuwizi awamulesya. 31Wakapanzya wamwi, wano walinji aviwuza vyakwe, nawonye awatuma kweweliwe awamulambilizya ukuti atize aye muluwanza. 32Amuno pampindinye yoyo, wano wawungine mwenemo wapundanga chipunde-punde; wamwi wapundanga chimwi, nawo wanji chinji, amuno wamwi watamanyile nachino wawunganizile. 33Nawo wamwi awuminkania Alekizander awati awino wachita choo, amuno awino awa Yuda wamuwisile kunkolelo. Ngapano Alekizander apunga ikasa atalika ukuvwanga ukuti ayivwanjile kuwantu. 34Ukuwa awala wamanya kuno walinji amu Yuda, wonsi awapongomoka apaliponga ichilichonganye mpindi ntali. Awati, Umukulu we Artemi wa mwe Efeso!
35Pakupelelechezya ekawalika wamukaya amyalalika iwumba. Ati, Mwe wantu wa mwe Efeso! A wantu wonsinye wamanya kuno akaya kakwe Efeso akano kakasunga ing'anda yakupepela Artemi mukulu. Niwe lyamuzilo lino lyaponile ukufuma mwiyulu. 36Pasi nanti wenga wino angakana chonyechoo, Achaleka lekani ukukosya ichongo swinya mutize muzukuwe. 37Amwemwenye mwaleta awantu waa koo, chingatenga wasi awakapoka wang'anda zyakupepela nanti akukwelengula kaleza kitu akanachi. 38Ndi achino Demetriasi nawawomvi wakwe wali numulandu numuntu wumwi, amanda yakupanzizya apano yali nawakapanzya walipo: wangalongolana kokonye. 39Ukuwa ndimuli nachimwi ichilusye choo, chandi chipanzwe mwiwungwe lyane ilyawakaya. 40Amuno tuli muntazi zyakuti twandi tulongolwe muno ambilikitiyino yaloleka. Pasi umulandu wumwi uwakuchitila ivyongonye vyoo, tungapotwa nichakuvwanga. 41Ala wavwanga wowonye, asasya iwumba ilapitao
Currently Selected:
Imilimo 19: WWN82
Highlight
Share
Copy

Want to have your highlights saved across all your devices? Sign up or sign in
Chinamwanga Bible © United Bible Societies, 1981.