Intaliko 30
30
1Ala pano Rakelo walola kuno atapapizile Jekapu umwana wumwi, awa nu wuzuwa ku munyina, anena Jekapu ati, Mpa awana, pamwi nandi imfwe. 2Jekapu avitilwa Rakelo ati, Wuzye nene ne Leza? We Leza awino walema ikwata lya munda yako. 3Nawe Rakelo ati, Umukazyana wane wee e Biliha; yinjilanga mwakwe weliwe, alyakuti angapapila pa makokola yane, alyakuti imbe na wana muno weliwe. 4Achaleka amupa umukazyana wakwe e Biliha amutwala; awa muchi. 5Biliha awa na panji apapila Jekapu umwana umonsi. 6Achaleka Rakelo watili, Leza wampanzya nene, swinya wivwa izwi lyane, wampa umwana umonsi, amwita izina ati, We Dani. 7Swinya-nye umukazyana wakwe Rakelo e Biliha apapila Jekapu umwana umonsi uwachitiwili. 8Achaleka Rakelo ati, Ukulwisyania kwa maka kuno nalwisyanianga nu mwanawitu, kanonzi namuchimvya; achaleka ayita umwana ati, We Nafutali.
9Ala pano Leya walola kuno impapo yasila, asenda umukazyana wakwe e Zilipa apa Jekapu awa muchi. 10Achaleka e Zilipa umukazyana wakwe Leza apapila Jekapu umwana umonsi. 11Leya ati, Ndi nu longo luzima! Achaleka amwita izina ati, We Gadi. 12Umukazyana wakwe Leya e Zilipa apapila Jekapu umwana wa chitiwili. 13Leya ati, Nkusechela, amuno awanachi wonsi wandi wawati, Akusechela; achaleka ayita umwana izina ati, Asheri.
14Impindi ya masika iyakusinza ingano, Rubeni aya asola imfungo mu mpanga atwalila Leya enyina. Walanga pano Rakelo wazilola, alambilizya Leya ati, Mpako imfungo zya mwana. 15Ukuwa nawe amutolelela ati, Wuzye wenji ukuti a kamulandu katichi pano wampoka wakwane? Ngachani chino ungasendela imfungo zya mwanane? Rakelo amutolelela ati, Ilelo wandi ayize alale mu ng’anda yako amuno a mfungo zya mwanako. 16Ala pano Jekapu wawela amanguzi ukufuma mu mpanga, Leya afuma aya amusunkania, amunena ati, Ule uyinjile mwenene, amuno a mfungo zya mwanane. Achaleka aya alala nawe uwusiku wowonye. 17Achaleka Leza wivwile Leya, aleka awa na panji akwatila Jekapu umwana wachitisano. 18Achaleka Leya ati, Leza wandambula amuno napile wakwane umukazyana wane: acheleka ayita umwana ati Isakari. 19Swinya-nye Leya awa na panji, apapila Jekapu umwana wachitimutanda. 20Achaleka Leya ati, Leza wanjimala ulupango luzima; kanonzi wakwane wandi anchindike amuno namupapila awana mutanda; achaleka ayita umwana izina ati, We Zebuloni. 21Pansizi apapa umwana mukazyana amwita izina ati we Dina.
22Ngapano Leza ayizuka Rakelo, amwivwa amwiyula uwula. 23Awa na panji apapa umwana umonsi, ati, Leza wansonzola insoni; 24amwita izina ati, We Jozefu, ati, Sivyo Leza anjonjelezye umwana monsi nawinji!
E Jekapu azumilizyania nu Labani
25Walanga pano Rakelo wapapa Jozefu, Jekapu anena Labani ati, Ndeka mpite kumwitu kunsi ya kumwitu. 26Umpe wa wakwane na wanane wano waleka nakuwombela, uleke ndapita; amuno umanyile umulimo wuno nakuwombela. 27Labani amutolelela ati, Nazina nkaninye, nsambilizile mu kulawula kuno Imfumu e Leza wampepa nene muno a wewe; 28nena amalipilo yano ukulonda nandi nkulipile. 29Jekapu amunena ati, Umanyile vino nakuwombela, swinya ulole nu kuvula kwa vikwato. 30Amuno pano ntani njize walinji ni vikwato vitichi, kanonzi vyavula nkaninye; Leza wakupepa pano niza. Nga nenji awa mu ng’anda yane ndiwawombela wandachi? 31Amunena ati, Nga nandi nkupe chani? Nawe Jekapu ati, Utandi umpe chimwi; ukuwa ndi unganchitila choo, nandi inde ndachema ivikwato vyako swinya indavisunga. 32Leka mpite mu wufyo wako wonsi ilelo, mpawule ni ng’onzi zyonsi izyamawala mawutuluchile ni zyamawala matiswe, na wana wa ng’onzi awatifi, na wamawala, na mawala mawutuluke mu wufyo wa mbuzi, azino chandi chiwe a chilambu chane. 33Apano kunkolelo ulimanya ndi ne musuwilwa, pano wiza walola ivya malipilo yane. Zyonsi zino ziza zyazanwa kuno zisi na mawala mu wufyo wa mbuzi na zino zisi a ntifi mu mufyo wa wana wa ng’onzi zilizanwa kuno a njiwe. 34Labani azumilizya ati, Chazipa! Leka chiwe ndimuno walandika. 35Ukuwa uwanda-nye wowo Labani wafumizye wasawe wamawala matiswe, na wasawe wamawala mawutuluke ni mbuzi njanachi izya mawala matoneke zyonsi zino zyalinji ni wala tiswe, nu mwana wa ng’onzi wensi wino walinji a mutifi, azipa mu makasa ya wanakwe; 36Swinya palinji umusinzo wa manda yatatu ukufuma kwe weliwe ukuya kwe Jekapu; Jekapu wachemanga ivikwato vimwi ivyakwe Labani vino vyasyazile.
37Apano Jekapu asenda imizanzu miwisi imyololoke iya miti yimwi yitatu, imifopole katichi nanti kufopola amapapa yonsi alyakuti ivitiswe ivya mukasi viloleke mumwi-mumwi ngati amawala. 38Achaleka awika imisanzu mifopole pankolelo pa vikwato vyake mu mikokolozi, akuli kuti mu misuwa muno ing’onzi zyang’ welanga minizi mwenemo, Nga amuno wasukusuku na was awe wakwelelanga ku njanachi pano wizanga mukung’wa, 39achaleka injanachi aziwa na mawele pa misanzu nga pansizi aziwavyala, izyamawala, ni zya mawala mawutuluke, ni zya mawala matoneke. 40Achaleka Jekapu wapawulanga awana wa ng’onzi atwala aminso ya mawufyo ku zyamawala ni ntifi zyonsi mu wufyo wakwe Labani, nga awika ivikwato vyakwe kumbali avipawula ku vikwato vyakwe Labani. 41Achelaka ponsi pano ingonzi mbome ikuvyala, Jekapu walambalikanga imisanzu mu mukokozi pankolelo ya chikwato chakwe alyakuti ivyalile pakasi ka misanzu, 42Ukuwa pa vitonte atalambalikanga imisanzu penepo. Achaleka ivikwato vitonte vyalinji a vyakwe Labani, imbome zyalinji azyakwe Jekapu. 43Muno a wonye-woo umuntu akula nu kuchindama, walinji ni vikwato vivule nkaninye, walinji na wawomvi awanachi na wonsi, ingamila ni ndokwe.
Currently Selected:
Intaliko 30: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
