Intaliko 31
31
Jekapu asamala Labani
1Jekapu ayivwa kuno awanakwe Labani wakulilizika wakuti, Jekapu wasenda vyonsi ivyakwe tata. Insawo yonsi yino ali nayo yafuma ku yakwe tata. 2Swinya Jekapu alola kuno Labani atamupechezile nu kumukunda ndivino pakutalika. 3Apano Imfumu e Leza anena Jekapu ati, Nyoka uye kunsi yakwe waso na kunko zyako, nandi ndawa nawe. 4Ngapano Jekapu atuma ku kwita Rakelo nu Leya ukuti waye kuno kwalinji ivikwato vyakwe. 5Awanena ali, Nalola kuno eso atampechezile nu kunkunda ndivino pakutalika. Ukuwa e Leza wakwe watata watela ali nani. 6Mwamanya kuno nawombela eso na maka yane yonsi. 7Eso wanchenjezya nu kupilula amalipilo yane impindi ikumi, ukuwa Leza atanga amuzumilizye ukuti ankalalile nene. 8Ndi wiza wati a zya mawala a zili chilambu chako, fwandi zyonsi-nye zili na mawala; pamwi ndi angati a zya myondolozi a chili chilumbu chako, fwandi uwufyo wonsi wuli ni zyamyondolozi. 9Mu mwata wonye-woo Leza wapoka ivikwato vyakwe eso, avimpe kwe nene.
10Mu mpindi yakupupuchilwa kwa vikwato, injinula aminso, ndola mu chilota, kuno wasawe wano wapupu-chilanga walinji awamawala, awamyo: ndolozi na wawutuluchile. 11Apano umusole wakwe Leza anjita mu chilota ati, Jekapu, nani inti, Mulali. 12Ngapano anena swinya ati, Yinula aminso vako ulole, imbuzi zyonsi zino zikupupuchila mu wufyo a zya myondolozi, izyamawala, ni mvutuluchile; amuno nalola vino Labani akuchita kwe wewe. 13Ne Leza wa ku Betele, kulya-nye kuno wapasile amafuta kwiwe ulayilizya kwe nene. Kanonzi katuka fuma munsi yoo unyochele kunsi yino wakwatizilwe.
14Achaleka e Rakelo nu Leya awatolelela awati, kusi ichipya chimwi nanti achipyanwa chino chasyala mung’anda yakwe tata chino a chitu. 15Tuli ngati swe makandi kwe weliwe. Amuno watukazya, swinya walya ni ndalama zitu. 16Insawio yonsi yino Leza wasenda kwe tata a yitu na wana witu; achino chonsi chino Leza wakunena, chila.
17Apano Jekapu akwezya awachi na wanakwe pa ngamila; 18asokala ing’ombe ni vikwato vyonsi vino walinji navyo munsi ya Mesopolamia akaluka alyakuti aye ku nsi ya Kenani kwe yisi Ayizeki. 19Pano Labani wayile mukuputula ameya ku ng’onzi zyakwe, e Rakelo ayiwa utumakolania twakwe yisi mu nganda. 20Nawe Jekapu wachenjezizye Labani uwa mu Aramu, muno atamunenile kuno akulonda ukongoloka. 21Asyala ayongoloka na vyonsi vino walinji navyo, aya alamba nu luzi Yufureti, alungama ku myamba ya ku Giliadi.
Labani akonchelela Jekapu
22Walanga pano Labani wasyala wanenwa pa wanda wachititatu kuno Jekapu wongolosile, 23wasenzile awantu wakwe awamukonchelela amanda munenulambali, awakonkana nawe ukuya fika ku myamba ya ku Giliadi. 24Ukuwa Leza aloleka kwe Labani uwa mu Aramu mu chilota uwusiku amunena ali, Ulize unene Jekapu izwi limwi, nanti alizima nanti aliwipe.
25Labani ayazana Jekapu azenzile umutanda wakwe pa myamba, nawe Labani na wantu wakwe awazenga pa myamba mu nsi ya Giliadi. 26Labani awuzya Jekapu ati; Nga muno chani chino unchenjezizye wasenda uwanane ngati antapwa? 27Nga uchisile chani, vino wongolosile, nanti kunena alyakuti pano mukupita wawimbilile indwimbo zyakusechela, walizye amazeze, wume ni ng’oma na wansango-sango? 28Ngachani chino utalesile ukuti ndayane na wanane na wizikulu wane mbafyompe nu kuwafyompa? Uchisile uwuwi. 29Indi na maka ya kukuchita mwalwe; ukuwa e Leza wakwe eso waneniie uwusiku iyolo wati, Chenjela utavwanga chimwi ichizima nanti a chiwipe kwe Jekapu. 30Kanonzi wapita, amuno achiluka cha ng’anda yakwe eso, ukuwa achani chino mwivile amakolania yane? 31Jekapu atolelela ati, Natela nkutina nkuti wandi umpatichizye umpoke awanako. 32Ndi wazana wumwi ali nu tumakolania twako ungamukoma. Pa minso ya wantu witu panichisya usonte chino a chako. Wandi usende. Ukuwa Jekapu atamanyile kuno Rakelo wivile.
33Ngapano Labani aya ayinjiia mu mutanda wakwe Jekapu na mu mutanda wakwe Leya na mu mutanda wa wawomvi wakwe awanachi wawili apotwa. Nga afuma mu mutanda wakwe Leya aya ayinjila mu mutanda wakwe Rakelo. 34Rakelo wasenzile utumakolania twa mu ng’anda yakwe yisi atuwika mukasi mu chikalilo cha ngamila, apano ayikalila. Labani avwamba mu mutanda monsi apotwa. 35Nga Rakelo anena yisi ati, utavitwa tatakulu amuno ntanga nkatuke pankolelo pakwe wewe, amuno indi kumpepo. Avwamba apotwa nanti kuzana utumakolania twa mu nganda yakwe.
36Apano Jekapu avitwa awapokosya Labani; amunena ati, A mulandu-chi wuno nchisile, nu luwembu luno unkonchezile? 37Wuzye chingatenga wavwamba mu viya vyane vyonsi, nga wazana chani? Leta umulandu woo pankolelo pa wantu wako na wantu wane uleke watupanzye. 38Pano nikalila nawe imyaka amakumi yawili (20), ing’onzi zyako ni mbuzi zyako zisitele zivuwuzye, swinya nsitela nkome ing’onzi yako yimwi nanti we sukusuku wa vikwato vyako ukuti indye. 39Nazino zyalikanga ku vinyamana ntakuletelanga, zyansingamanga nene mu makasa yane; lela wayilolanga, nanti ayino awantu wiwa uwusiku nanti a musanya. 40Zino napyelanga umusanya, ni mpepo uwusiku, nanti tulo. 41Ku myaka amakumi yawili (20) yino nikalanga mu ng’anda yako; nawomba imyaka ikumi lyonga ni myaka yini (14) muno awanako awakazyana wawili ni myaka mutanda muno a vikwato, ukuwa wapilula amalipilo yane impindi ikumi. 42Ndi achino Leza wakwe tata, e Leza wakwe Abrahamu, e Leza wino Ayizeki wapakatanga, ndi atela atalinji nani, nachawuzimanye wanga uyize undeke kanonzi mbele makasavye. Ukuwa Leza waweni ukuzunkuntika kwane nu kuwombesya kwa makasa yane, achaleka wakukalipizile uwusiku.
E Jekapu azumilizyania nu Labani
43Achaleka Labani atolelela anena Jekapu ati, Awana wakazyana waa awanane, nu twananye atwanane, ivitekwa vyoo avyane, na vyonsi vino ukulola a vyane. Ukuwa ngachani chino ingachitila wanane awakazyana ilelo pamwi awana wawo wano wapapa? 44Zanga kanonzi tulayane, uleke ilayano liwe we kalola pakwe sweswe swewili.
45Apano Jekapu asenda iwe asimpa ngati a lupanda. 46Anena awantu wakwe ati, Wunganikani amawe, awasenda awawunganika umufuli, awalila ichakulya paponye. 47Labani ayita masyo-nye yayo ati, Jegarsahaduta: ukuwa Jekapu weni watili, Galidi. 48Labani ati, Umufuli-nye awali kalola witu swensi ilelo, achaleka ati, we Galidi, 49niwe ati, Mizipa, muno watili, Imfumu e Leza awatulola swensi swe wili pano twapawunkana. 50Utize uyize ukakwelengule awanane, nanti akuwapalichila awanachi wanji. Chingatenga nsipo, yizuka kuno Leza awili kalola witu.
51Labani anena Jekapu ati, Lola umufuli ni we vino twawika pakasi pakwe wewe nani. 52Umufuli woo we kalola, ni we lyoo we kalola. Ntalitela njize mpitilile pa mufuli woo njize kwe wewe, nanti awewenye utize uchile umufuli woo ni we lyoo uyize kwe nene, muno a lombwa. 53E Leza wakwe Abrahamu e Leza wakwe Nahori, e Leza wakwe wayisi apanzye pakasi pakwe sweswe. Achaleka Jekapu alapa Leza wino yisi Ayizeki wapakatanga. 54Ngapano Jekapu apa inzuwi pa mwamba, ayita wantu wakwe ku kulya ichakulya; awala walya ichakulya awalanga wali pa mwamba uwusiku wonsi.
55Umutondotondo Labani akatuka afyompa awizikulu wakwe na wanakwe awapepa, awalayana alema umusinzo wakwe anyochela ku mwawo.
Currently Selected:
Intaliko 31: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
