Ətefɨ̂aʼ 1
1
Zhə̀fè tə tomə Sèzuʼse Ŋwaʼase
1Pɛ̀ apɨəyn Tyofilùs:
Ə̀ tè nyi ə ŋwàʼlè zɨm ə zə shi sê ghò, mə nyàʼà ə̀ghɛ ə̀kɨ̂m ghɛ Njisə̀s tè nə̂, è ghɛ ə È tè zaʼlə̂ ghɨghə təyn. È tè nəyn əghɛ ghɨ̀yn se zhə̀tè ashìŋə̀ kɛ ə È tè zhə̀te fɨaʼa Vəynke 2se zaʼâ kə Zhə̀fè tè nji Vəyn ekwùtwəyn. Tsɔ̀fə kə ə nji Vəyn ekwùtwəyn, Zuʼse Ŋwaʼase ə fo àtyaʼ, È və zaʼlə̂ ə̀ghɛ se ghɨ ghɛ ə È chɔʼte kə sechùmtè èpàm sə tom sə Vəynse kə ghənə nə̂. 3Ə̀ tè nyi kə Njisə̀s fe ngəʼ èghaʼâ ə kwuə ə kɛsə zômə̀, È və tyə̀ynə̀ ngɨŋə̂ Vəyn sê ghɨətom ə Vəynghe nə zhi ə zòmə̀ səmɔʼ. È və nə̀ nyi ə tendom ə tendom, sə teshìŋə̀ se tsɨ̀ əfètəyn m̀tuʼ m̀ghɨm m̀kyàʼ, ə fɨnə wâmnə̀ sê ghənə kûmə̀ èfɔ̂yn ə Fezhə̀vè. 4Tuʼve ə zo tuʼ fîfe, ghənə e zhiə, È və tsɛsə̀ sə alàŋ sê ghənə nə, “Kə ghàyn ndo ə Njèlusalɛ̀m zôyn. Ghàyn lɨmte fo zɛ ə M tè tsayn nə Pɨ̀a Vɨm və tsɨ̀nə̀ se fo sê ghàyn. 5Njɔyn tè fo mmo sê ghɨ è môm mə̂ tsòm pîza zôyn e sè nyi mə ə̀ faŋ ke m̀tuʼ m shyàʼ nyi kə ə tə fo m̀mo sê ghàyn è Zuʼ se Ŋwaʼase.”
Njisə̀s ə kɔʼ ekwùtwəyn
6Tuʼve ə zo tuʼ fîfe, Njisə̀s yî ghɨətom ə Vəynghe e tsɨ̂yntè tsɨs luʼve emɔ̀ʼ, ghɨətom ə Vəynghe e sè pfɨfə sê Vəyn nə, “Pɛ̂pɛ, shîŋə̀kè ə kwəyn kə Ò nəyn, ə kɛse fo èfɔ̂yn sê ghɨə Isìlây ghə?”
7Njisə̀s ə pə̀ynsə̀ sê ghənə nə, “Ghàyn kyi va tyaʼa se kê ashìŋə̀ kɛ ə ghɛ nə ghɨnə tə kyânə̀ ətəyn. Ə̀ nyi Pɨ̀a kə È kyi tyaʼke se pɨaʼtê ashîŋə̀ è tuʼ fɛ ə nâʼàpî èghɛ èkè kàʼaze tə kyayn. 8Pîza ghàyn e ke nə ghàyn nə̀ kyiə àtyaʼ ezhoghɛ Zuʼse Ŋwaʼase pə̂yn sê ghàyn, ə ghàyn ə nyi sètsɛ̀ èsaʼ Sɨmse endaʼ ə Njèlusalɛ̀mzè, è pâs endaʼa Njòndyâkè è kə Sàmalyàkè akɨ̂m, se nduə tàyn tâŋ tə mbi tekɨ̂m.” 9Kə Njisə̀s wàmnè mɨ̂sè ghɛ nə ghɨ̂yn, Zhə̀fè ə nə̀ È və kɔʼɔ ekwùtwəyn. Kə ghənə tè pa naynə̂ kɔʼsə̂ ndûə Vəyn, È və kɔʼɔ kə nyi mbàʼsè ə kɨlə fɨ̂nə̀ Vəyn, ghənə ə tàʼa kɛsə fe Vəyn.
10Ghənə tè pa naynə̂ kə ekwùtwəyn kə Njisə̀s ndùə, ndômnè yî ghə pfɨ̂ŋə̀ tyəmə̂ ə ghənə ə ngwùŋ, ə̀ pɛ̀, mə ə màʼ ndzɨse fɨfə̂sè. 11Ndômnè nə ghɨ̂nə̀ ə̀pɛ̀ ə ke ə pfɨf sê chùmtè èpàm nə sɛ nə, “Kûmə̀ ghè ə ghàyn tyəm naynə̂ kɔʼsə̂ è kwùtwəyn nyi ə ghɨ Ngalìlîə? Njisə̀s vɨ̂yn, ə nji ə ghàyn əfètəyn È ve È kɔʼ ekwùtwəyn, tə kɛsə̂ pə̀ kə endom vɛ ə ghàyn fe È ndùə ətəyn.”
Màtyâs ə njì luʼ ə Njondàsvè
12Ghɨətom ə Njisə̀s ghè ə ndò ndûə ə pfɨ̀ynə̀ sè Olìf ə kɛse tso ə Njèlusalɛ̀m, ghaf ətəynke e tsɛ̂tə̀ kə apɨaʼ ə mâylkè se chə. 13Ghənə pə̀ tâ ə Njèlusalɛ̀m ə njiə kɔʼɔ ndùə ə lûm ə̀ ndɛ èkwùtwəyn zɛ ə ghənə tè ndamə ətəyn. Ghɨ ə tom nə ghɨnə tè nyi Pità, è Njɔyn, è Njə̂m, è Andɨ̀lò, ə nyi Filìp, è Tɔ̀mɔ̂s, ə nyi Pàtòlòmiyà, è Matyò è Njə̂m ə va Àfeyùs, è Shimùyn vɛ ə è tè kàʼa è kwu kûmə̀ èndaʼ ə vəynze, ə̀ fɨyn nyi Njondàs ə va Njə̂m. 14Ə̀ tè nyi zâ, ghənə e zâŋsə̀ zûŋtə̀, tsɨ̂yntə̀ nə̂ ètsə̂m yî ghə̀ zəyn yîghe è Mèli nyìə Njisə̀s, è ghɔnyìə Njisə̀sghè.
15Ə tè nyi tuʼ fife, ghɨə poməghe e fɨyn tsɨs kepî luʼve emɔ̀ʼ, zaʼâ ə̀ghɨ ewə̀ m̀ghɨm m̀pɛ̀, Pità ə ndwìə tyəmə̂ ə wàmnə̀ sê ghənə ə pìə nə, 16“Ghɔnyì ghɨmə, ghɛ ghɨnə ə ghe vâ kyàyn kûmə̀ Njondàs nyi va kyi ke se kyàyn se lwiynse eghɛ zɛ ə Zuʼse Ŋwaʼase tè nəyn Ndàfît ə wàmnə̀, ə fɨnə nyàʼa ə Ŋwàʼlè ə̀ Fèzhə̀ kûmə̀ vəyn Njondàs nə è tə tyə̀ynə̀ Njisə̀s nə ghɨ ghɛ ə ghe fɨ̂aʼà ə ndɛ̂ Fèzhə̀ ko. 17Njondàs vâ nyi wùə ə ghâsènì anɔ̀yn. Njisə̀s tè chɔʼ vəyn nə è və nə̂ èfɨaʼ zɨ̀yn kèpî kə È tè chɔʼ ghâsènì.”
18(Ə̀ tè nyi za mə Njondàs ə njì kɛ vɛ ə tè ndâʼ vəyn ətəyn kûmə̀ èghɛ ekwəmnə zɛ ə è tè mɔm ə zhɔnə eluʼ mchive ətəyn. È və tə pfɨ̂ə famə elùʼ, ndwɔ̂ vəynve ə pùʼə̀, njate ə fɨə ətəyn nâʼà tèkɨ̂m, è və kwuə. 19Nâʼà ghɨghe əkɨ̂m ə Njèlusalɛ̀m ə zɨə èghɛ zɛ ə ze kyâyn sê Njondàs sè tɔŋtə eluʼ ə mchi nə vɛ ə ghənə ewàmnè endaʼze nə Akèndamà, e tyə̂nə̀ nə, mchi mə ə M̀ndəmə̂.)
20Pità ə pìə kwəynsə̂ nə, “Ə nyàʼ ə ŋwàʼlè ə̀ sè Njàŋ nə,
‹Ndɛ vəyn faŋ kè ezom,
kə wùə tə ndam ətəyn,›
ə fɨyn nyàʼ kèpi nə,
‹Wùə ndò nji luʼ ə vəyn, ə è və fɨ̂aʼà.›”
21-22Pità ə tsâ nyi ə ke pì nə, “E za tyə̀nə̀ nə ghâsènì kyi se chɔʼɔ wùə èmɔ̀ʼ. Wùə nə vɨ̂yn kyi sə nyi wùə vɛ ə è tè nyì ghâsènì shîŋə̀ tekɨ̂m kə ghâsènì ghə̀ Pɛ̂pɛ Njisə̀s tè kwìə ndûə ə telùʼ ə telùʼ, se zhə̀tè ə shɨŋ zɛ ə Njɔyn tè fo môm se ghɨ se nduə tàyn ə shɨŋ zɛ ə Njisə̀s tè kɔʼ ekwùtwəyn. È kyi sə nyi wùə mə è kàʼa è tə tsayn èghɛ kûmə̀ èzomə̀ ə Njisə̀szè.”
23Ghənə ə chɔʼɔ Njosɛ̀f, mə zə vəyn zə atàsèzè nyi nə, Pàsapàs, (mə tè tɔŋtə kəpî vəyn nə Njustùs) ə fɨnə chɔʼɔ Màtyâs. 24Ghənə ə nə̀ nyi ə ke tsə̀m ə pìə nə, “Pɛ̂pɛ Ò nyîə ke ə̀təm ə ghɨ̀ghè əkɨ̂m. Tyə̀yn wùə vɛ ə Ò chɔʼ əfètə̂ ə̀ ghɨ ghɨyn ə̀pɛ̀, 25nə è nji luʼə wùətom vɛve Njondàs kə è tè za ə ndùə elùʼ vɛ ə è kyi sə̂ nyi ətəyn.” 26Ghənə ə tɨmə pə̀ʼ, zə ə Màtyâs zə fɨə pə, ə ke paʼsə̂ vəyn anɔ̀yn ə ghɨətom ghɛ njò èmɔ̀ʼ.
Currently Selected:
Ətefɨ̂aʼ 1: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL
