Matìyò 26

Mənaŋ ni zweti Yeso

(Mag 14:1-2; Lug 22:1-2; Jɔn 11:45-53)

1Anyumə̀ ne Yeso ya fə màni ni ghà inug mbo̰, wì ya ghà abə ìmbi mə̀mə̀nənùg gha, 2“Mbə̰ kyèri àzən aghi gha à si bùʼ ineg ibe ni jəg Iteri Chègun. Inga ineg iteri mbo̰, mbi biri gwì Ŋwan Wə̀d nàʼ gha mbe kɔmbɔ igun azed abaʼri.”

3Anyumə̀ we, itog bəd mbàn Ŋwiye fɔrɔ bəd kyen inga aben ya fete inga ìtɔʼ ìzi Kayifàs ne ya yaʼi atog wə̀d igun bəd mbàn Ŋwiye. 4Mbɔb ya ghò fète ni chuʼri icheg ne mbɔb biri gwì Yeso anjìm anjìm, zwèti. 5Mbɔb yaya se ghà mbɔb mbɔb gha, “Chəyi ze biri bɔ̀ŋ gha tì zweti aməd ane nyùmə̀ Iteri Chègun imbə̀ʼ bəd nɔ̀ʼ bàd, bùg ndum.”

Àyi mɔ̀ʼɔ zɔʼɔ Yeso a Betanì

(Mag 14:3-9; Jɔn 12:1-8)

6Anyumə̀ ne Yeso ya yaʼi a Betanì inga achan Sayimùn we ne ya kweʼì ghɔ̀n àwàrikə̀m, 7àyi mɔ̀ʼɔ ya ghò iban məd tì məwud àka inun inga chəŋ àlàbastà. Anyumə̀ ne Yeso yaya jə̀ghə, àyi we ya tù məwud mbe ibo igun atog. 8Mə̀mə̀nənùg ìmbi Yeso ya bàd anug ze, gaŋ, si bìri gha, “Aton ne àyi gho̰ we chìkə̀ məwud àka inun mbo̰ anìŋ àkə gha? 9Nji məd kə̀ fèn məwud mbo̰ ane ikab nɔʼ nɔʼ si nàʼ ikab we abə bəd ne chəyi àzɔb.”

10Yeso ya kyeri inug mbe ne mbɔb yaya ghà, ane, wì ya si bìri inɔb gha, “Mbə̀ kə chə àyi gho̰ ane aghə? Məd fə fàʼ àfàʼì chɔm inum. 11Bəd mbe ne chəyi àzɔb biri yaʼ abɔ̀ʼ inən mà nyumə̀ ijìm. Àsi mo, chəyi mə̀ biri yaʼ abɔ̀ʼ inən mà nyumə̀ ijìm. 12Àyi gho̰ tù məwud àka inun mbo̰ igun inum ni chuʼri ìmə nyàmnyɔd, ni gha anyumə̀ ne mə̀ ku, mbi si twə̀ŋi mə. 13Mə gha tesiʼ inən gha, mà isiŋi ijìm igun isəg aŋa ne bəd biri chèti ikən chɔm gho̰, mbi biri se ghà anug azo̰ ne àyi gho̰ fàʼi ni wendi məd.”

Judàs bḛ ni fèn Yeso

(Mag 14:10-11; Lug 22:3-6)

14Wə̀d mɔ̀ʼɔ abɔ̀ʼ mə̀mə̀nənùg ìmbi Yeso mbe ìghum chɔ̀b ibe ne ikum məd ya Judàs Ikarìyɔ̀d ya ghò abə itog bəd mbàn Ŋwiye. 15Wì ya pè bìri inɔb gha, “Mbə̰ biri nàʼ aghə inum anyumə̀ ne mə̀ chwi Yeso inən ghì mbə gwiye aməd?” Mbɔb ya zug anug ze ane, taŋ ikab sibà ìghum itad nàʼ ibo. 16Judàs Ikarìyɔ̀d ya si ko ane nyumə̀ we se kə̀bə̀ apan ni ghì gha mbɔb gwi Yeso.

Yeso jəg Iteri Chègun tì ìmbi Mə̀mə̀nənùg

(Mag 14:12-21; Lug 22:7-13; 22:21-23; Jɔn 13:21-30)

17À ya yaʼ igun aneg mbègtog inga ikab, ne mbi ya ko ni jəg Iteri Ngə̀ŋ mə̀kara ne chəyi àfòrì inga, ne mə̀mə̀nənùg ìmbi Yeso ya gho bìri ibo gha, “Asiŋi ne àghò kə̀bi gha tì gho chùʼri ne àghò bìri jəg Iteri Chègun angu àkə ayeg?”

18Wì ya ywìtì inɔb gha, “Mbə̀ gho inga ikye aben, pè ghà abə mbaŋà mɔ̀ʼɔ ze angu gha, ‹Àchwitìnùg gha tì gha ine gha ìwi nyumə̀ fə kòʼ. Zìye biri jəg Iteri Chègun tì ìmbi mə̀mə̀nənùg ine inga achan.› ”

19Ane, mə̀mə̀nənùg mbe ya bə̀ fàʼ məyi kwàʼ icheg ne Yeso ya gha inɔb, si tàngi ighi ni jəg Iteri Chègun angu.

20Àsi ikwikwiri we, Yeso ya chughi aseg ni jəg tì ìmbi mə̀mə̀nənùg mbe ìghum chɔ̀b ibe. 21Anyumə̀ ne mbɔb yaya jə̀ghə, wì ya ghà inɔb gha, “Mə gha tesiʼ inən gha, wə̀d mɔ̀ʼɔ abɔ̀ʼ inən biri fèn mə.”

22Mə̀mə̀nənùg mbe ya taŋ sɔ̀mnɔ̀. Ane, mbɔb ya ko se bìre ibo imɔʼ imɔʼ gha, “Anɔŋisəg, à wa kə mo?”

23Yeso ya ywìtì inɔb gha, “Wə̀d ne jə̀ghə inga akaŋ afibì tì inum biri fèn mə. 24Ŋwan Wə̀d biri ku icheg ne mbi ya fə ŋwàʼri imbə̀ʼ aməd. Si ya gha, ngəʼ kyen biri nyi igun wə̀d we ne fḛ aməd. Àkə aghi ne chəyi mbi ya bi gwi tengàŋ nji ze bì bɔ̀ŋ.”

25Ane, Judàs we ne ya fḛ aməd ya bə̀ bìri gha, “Àchwitìnùg, à wa kə mo?”

Yeso ya ywìtì ibo gha, “À ya icheg ne àghò gha.”

Icheg ne mbi ya ko anug ni jəg Itari

(Mag 14:22-26; Lug 22:14-20; 1Kɔ 11:23-25)

26Anyumə̀ ne Yeso tì ìmbi mə̀mə̀nənùg yaya se jə̀ghə, Yeso ya niŋ chiŋ ngə̀ŋ mə̀kara, chàʼra Ŋwiye, bə̀ʼri, nàʼ abə mə̀mə̀nənùg mbe, si ghà inɔb gha, “Mbə̀ niŋ jəg. Aŋa ya ìmə nyàmnyɔd.”

27Yeso ya bə̀ niŋ toʼ mənoʼ, chàʼra Ŋwiye, nàʼ toʼ mənoʼ ze inɔb, si ghà inɔb gha, “Mbə̀ niŋ no mbə̰ məjìm. 28Aŋa ya àmə anəm ne Ŋwiye fə niŋi ni wàd ikan feg tì inən angu. Anəm azo̰ ya àze ne biri chəmbi imbə̀ʼ ìtḛ̀ bəd nɔʼ nɔʼ ni ghì gha Ŋwiye waʼ ìmbɔb inug tibɔ̀ŋ. 29Mə ghà inən gha, chəyi mə̀ biri ywìri no mənoʼ mbo̰ pè ane aneg ze ne mə̀ biri si no mənoʼ feg tì inən inga anug ìfɔ̀n ìmə Mbaʼ.”

30Anyumə̀ ne mbi ya fə jəghi itari we, mbɔb ya zə̀ʼ ikyeg, si nɔ̀ʼ dù ghò ikaŋ iwum mə̀Olìf.

Yeso gha Pità biri to̰ yi awi

(Mag 14:27-31; Lug 22:31-34; Jɔn 13:36-38)

31Anyumə̀ ne Yeso tì mə̀mə̀nənùg məd ya pè ikaŋ iwum mə̀Olìf, Yeso ya ghà inɔb gha, “Kwàʼ məyi izimi tèchɔ̀ŋ, mbə̰ məjìm biri nòrò awən sàŋì mə. A ze inga Àŋwàʼrì Ŋwiye gha,

‹Mə biri zweti Àjənjə̀g,

izam njə̀g si sàkà.›

32Àsi igun aneg ze ne Ŋwiye zwemni amə iwu, mə biri ghò inən imbìghè a Galìli.”

33Pità ya ywìtì abə Yeso gha, “Ka mə̀mə̀nənùg mbo̰ məjìm nòrò awɔb sàŋì awe, chəyi mə̀ biri nɔʼ ghì ane.”

34Yeso ya ghà ibo gha, “Mə ghà tesiʼ ine gha, məyi kwàʼ izimi tèchɔ̀ŋ, bɔŋ inɔm ngub biri se tɔ̀ŋɔ, àghò biri to̰ awe aghəm atad gha chəyi àghò kyèri amə.”

35Pità ya ywìtì gha, “Ka ze bì chwi gha mbi biri zweti awe, bə̀ zweti amə, chəyi mə̀ biri nɔ̀ʼ to̰ awe.”

Mbin tì mə̀mə̀nənùg məjìm ya bə̀ ghà məyi ane.

Yeso chàʼra Ŋwiye a Gèsemanì

(Mag 14:32-42; Lug 22:39-46)

36Yeso tì ìmbi mə̀mə̀nənùg ya nɔ̀ʼ ghò a asiŋi mɔ̀ʼɔ ne mbe kàrà ane Gèsemanì. Anyumə̀ ne mbɔb ya pe angu, wì ya ghà inɔb gha, “Mbə̀ chughi aŋa, mə̀ tindi ghò imbìghè chàʼra Ŋwiye.” 37Anyumə̀ ne wì ya gha ane, wì ya niŋ Pità tì bɔn Zebedì mbe məbe mbi fɔrɔ ghò. Wì ya taŋ sɔ̀mnɔ̀, ze bə̀ se nàʼà ngəʼ ibo fìŋ. 38Ane, wì ya ghà inɔb gha, “Àsɔ̀mnì fə sweg inum inga fìŋ se kə̀bə̀ ni zweti amə. Mbə̀ chughi aŋa bə̀ yaʼ ikyèʼi.”

39Icheg ne wì ya gha ane, wì ya sùngì ghò imbìghè iki piʼì pè kùbri ìfe aseg, chàʼra Ŋwiye gha, “Ìmə Mbaʼ, icheg mə̀ yaʼ àghò chiye ngəʼ ìzo̰ igun inum. Si ya gha, àghò ghiyə yaʼ anug ne àghò kə̀bi, kayi àze ne mə̀ kəbi.”

40Wì ya bə̀ndi ghò a asiŋi ne mə̀mə̀nənùg məd mbe mətad ya yaʼi angu, pè bàd gha mbɔb yaya gwḛ awɔb. Ane, wì ya biri abə Pità gha, “Ane ya gha chəyi tì mbə̰ chughi ikyèʼi tì inum ane awà fìbì? 41Mbə̀ chughi ikyèʼi chàʼra Ŋwiye ni gha imbə̀ʼ mbə̰ nɔ̀ʼ nyi inga àkwàʼrì. Fìŋ ze kə̀bə̀ gha mbə̀ ghiyə anug ne koʼi, si ya gha, nyàmnyɔd bɔd.”

42Anyumə̀ ne Yeso ya gha ane, wì ya ywìrì ghò chàʼra Ŋwiye ane ighəm ne pè ane ibe gha, “Ìmə Mbaʼ, àmə chəyi icheg ne tì Àghò chi ngəʼ ìzo̰ igun inum, nji àghò ghiyə icheg ne àghò kə̀bi.”

43Anyumə̀ ne wì ya ywirì bə̀ndì ghò abɔ̀ʼ mə̀mə̀nənùg məd mbe mətad, wì ya pè kɔ̀ti awɔb ne mbe gwḛ awɔb. Mbɔb yaya gwḛ imbə̀ʼ icheg ne ngwḛ ya fə jəg awɔb.

44Ane, Yeso ya ywìrì sàŋì awɔb ghò, ywìrì chàʼra Ŋwiye ane ighəm ne pè ane itad, ghà məyi inug mbe ne wì ya bi ghà.

45Anyumə̀ ne wì ya bə̀ndì ghò abə mə̀mə̀nənùg məd mbe mətad, wì ya biri inɔb gha, “Mbə kiri biri gwḛ zwètè awən? Mbə̀ nḛ, nyùmə̀ fə kòʼ ne mbi fə fḛ Ŋwan Wə̀d abə bəd inug tibɔ̀ŋ. 46Mbə̀ nɔ̀ʼɔ tì gho! Wə̀d we ne fḛ amə gho̰ fə se aŋa!”

Inɔ̰ bəd gwì Yeso

(Mag 14:43-50; Lug 22:47-53; Jɔn 18:3-12)

47Icheg ne Yeso yaya kiri ghamà, Judàs we ne ya yaʼi wə̀d mɔ̀ʼɔ abɔ̀ʼ mə̀mə̀nənùg məd mbe ìghum chɔ̀b ibe ya pè. Inɔ̰ bəd yaya yḛ̀ abɔ̀ʼ Judàs tì tibeg ibid fɔrɔ mboʼ. À ya itog bəd mbàn Ŋwiye fɔrɔ itog bəd inga aben ya cha awɔb. 48Wə̀d we ne ya fḛ Yeso ya fə nàʼ aneni inɔb bə̀ ghà inɔb gha, “Mbaŋà ze ne mə nyɔ̀ŋì ndə̀ʼ məd, à ya wə̀d we ne mbə kə̀bə̀. Mbə̀ jwiʼ nyimi.”

49Judàs ya si ghò kwàʼ abə Yeso pè ghà ibo gha, “Àchwitìnùg, mə chàʼrì awe!” Wì ya chàʼrì aməd ane si nyɔ̀ŋì ndə̀ʼ ibo.

50Yeso ya ywìtì ibo gha, “Ìmə sə̀ʼ, fàʼa aghi ze ne àghò yèʼe ni fàʼ!”

Icheg ne Judàs ya ghì ane, bəd mbe ya si jwiʼ Yeso ane ika nyìmi. 51Mbaŋà mɔ̀ʼɔ abɔ̀ʼ bəd mbe ne ya yaʼi abɔ̀ʼ Yeso ya chɔʼ ibeg ibid inga baʼ, nwḭ̀ sɔb àtɔ̀ŋi abə wə̀d àfàʼì ìwi atog wə̀d igun bəd mbàn Ŋwiye.

52Yeso ya ghà abə wə̀d we ne ya chɔʼi ibeg ibid gha, “So ìwe ibeg ibid inga baʼ. Kyeri gha, wə̀d ne zɔ̀ŋɔ̀ chɔ̀ʼɔ ibeg igun wə̀d biri bə ku ichug ibeg. 53Chəyi mbə̀ kyeri gha mə we tì mə dèg abə ìmə Mbaʼ, wì zambi chà tinɔ̰ mbè angirə̀ ne che tinɔ̰ ìghum chɔ̀b ibe gha mbe yeʼe wètì amə? 54À ya məyi gha mə mə̀ ghì ane, nji Ìngam Ŋwiye we ne gha inug mbo̰ mənyìʼ dù anìŋ kə ywìri si dù ane tesiʼ iye?”

55Yeso ya si bìri abə tinɔ̰ bəd mbe gha, “Mbə kə̀ si yèʼe ni gwì amə tì tibeg ibid fɔrɔ mboʼ icheg ni gha mo ya tìka iji? Mə yaya chùghə inga mbàn Ŋwiye mà ineg ijìm, chwìte inug inən, chəyi mbə̀ ya gwi amə. 56Inug mbo̰ ijìm fə dù ni chwi gha inug ijìm ne bədkə̀n Ŋwiye ya gha mbe duwə ane tesiʼ.”

Anyumə̀ ne Yeso ya ghà ane, mə̀mə̀nənùg məd məjìm ya nòrò awɔb sàŋì aməd.

Mbi niŋ Yeso ghò imbìghè abə Itog bəd ne sàʼa aben

(Mag 14:53-65; Lug 22:54-55; 22:63-71; Jɔn 18:13-14; 18:19-24)

57Bəd mbe ne ya gwi Yeso ya niŋ aməd ghò inga ìtɔʼ Kayifàs we ne ya yaʼi atog wə̀d igun bəd mbàn Ŋwiye. Mbɔb ya pè angu kɔ̀ti mə̀chwitì mə̀nɔ̀ʼɔ̀ tì itog bəd inga aben ne ya fə fete. 58Pità ya beni abɔ̀ʼ se yḛ̀ anjìm, kwàʼ agha agha. Wì ya beni anjìm ane, ghò pè inga ìtɔʼ Kayifàs. Wì ya nyi inga ìtɔʼ ze ghò chùghi abɔ̀ʼ bəd ne yaya nə̀ngə mbàn Ŋwiye, se ghɔ̀mɔ̀ ni bàd aghi ne mbi biri ghì tì Yeso.

59Itog bəd mbàn Ŋwiye fɔrɔ bəd məjìm ne yaya sàʼa aben ya ko se kə̀bə̀ bəd ne biri zì inug ako igun atog abə Yeso ni ghì gha mbe zweti aməd. 60Mbi ya jiʼì kə̀b ane, si ya gha, chəyi mbɔb ya bàri ka bì wə̀d imɔʼ, ka bəd nɔʼ nɔʼ ya jiʼì yèʼe ni zì inug ako igun atog abə Yeso.

Anyumə̀ ne mbi ya se pè ane ìnwḭ, mbaŋà mɔ̀ʼɔ tibe ya dù təm imbìghè, 61si gha, “Mbe gho̰ kə̀ gha, ‹Mə we tì mə buʼ mbàn Ŋwiye ywìrì kɔd ane ineg itad.› ”

62Anyumə̀ ne mbɔb ya gha ane, atog wə̀d igun bəd mbàn Ŋwiye ya təm titighe, si bìri abə Yeso gha, “Chəyi àghò beri anug ni ywìtì ane anug azo̰ ne mbi gha igun ine?” 63Yeso ya chim yi tizi. Ane, atog wə̀d igun bəd mbàn Ŋwiye we ya ghà ibo gha, “Gha àze anug tesiʼ ane ikum Ŋwiye we ne yaʼi izɔm, àghò kə Wə̀d we ne Ŋwiye zɔ̀ʼi, ne yaʼi Ŋwan Ŋwiye?”

64Yeso ya ywìtì ibo gha, “À ya icheg ne àghò gha. Mə ghà inən gha, nɔ̀ʼ tèchɔ̀ŋ, mbə biri bàd Ŋwan Wə̀d ne wì chùghi aba abo jəghi Ŋwiye we ne beri ika ijìm. Mbə̰ biri bə bàd icheg ne məd we yèʼe inga pàʼ ikaŋ àbɔ̀ŋɔ.”

65Icheg ne wì ya gha ane, atog wə̀d igun bəd mbàn Ŋwiye we ya nyimi ìti ndwi sètì, si kyen gha, “Wì fə chàpì Ŋwiye! Tì kə ywìrè kə̀bə̀ bəd ndəŋ ni ghàm imbə̀ʼ aghə? Mbə fə zug icheg ne wì chàpi Ŋwiye. 66Mbə̀ kə kɔ̀ndɔ gha tì sɔb isaʼi gho̰ gha?”

Inɔ̰ bəd we ya ywìtì gha, “Wì fə gùg. Ze kòʼ gha mbe zweti aməd.”

67Anyumə̀ ne mbɔb ya gha ane, mbi ya ched timad igun ìfe abə Yeso, bə̀ sɔm aməd. Mbi mɔ̀ʼɔ tì bəd ya twi aməd, 68si gha, “Icheg ne àghò yaʼi Wə̀d we ne Ŋwiye zɔ̀ʼi, mə̀tə ikum wə̀d ne twi awe!”

Pità to̰ yi Yeso

(Mag 14:66-72; Lug 22:56-62; Jɔn 18:15-18; 18:25-27)

69Pità ya chughi isəg inga ikam ìtɔʼ Kayifàs. Ane, ŋwan àyi mɔ̀ʼɔ ne ya yaʼi wə̀d àfàʼì ìwi Kayifàs ya ghò iban Pità, pè ghà ibo gha, “Àghò we kə̀ bə̀ abɔ̀ʼ Yeso, wə̀d a Galìli we.”

70Pità ya ton yi anug ze imbìghè abə bəd məjìm ne ya yaʼi angu, si gha, “Chəyi mə̀ kyeri anug ne àghò we ghà.” 71Anyumə̀ ne wì ya gha ane, wì ya dù ghò inuʼ ikam. Ŋwan àyi àfàʼì ndəŋ ya zən məd, ghà abə bəd mbe ne ya təmbi iban iban gha, “Mbaŋà ìzo̰ ze kə̀ tì Yeso, wə̀d a Nazarèd we.”

72Pità ya ywìrì ton yi anug ze si zɔ̀m gha, “Chəyi mə̀ kyeri wə̀d ne àghò we ghà!”

73Ane, chəyi amad ya sa, mbaŋà te ne ya təmbi iban iban ya ghò ghà abə Pità gha, “À ya kwàʼ tesiʼ gha àghò ya wə̀d mɔ̀ʼɔ abɔ̀ʼ inɔb. Aton ya gha icheg ne àghò we ghàmà angu chwi gha àghò nɔ̀ʼ a Galìli.”

74Ane, Pità ya ywìrì ko to̰ yi bə̀ ywìrè zɔ̀mɔ̀ ìwi nyɔd gha, “Kwàʼ ane ikum Ŋwiye, chəyi mə̀ kyeri wə̀d we ne mbə̰ mbe ghà.”

À məyi kwàʼ anyumə̀ we, inɔm ngub ya tɔŋ. 75Ane, Pità ya si wèndi anug ze ne Yeso ya ghà ibo gha, “Bɔŋ inɔm ngub we se tɔ̀ŋɔ, àghò biri fə ton awe aghəm atad gha chəyi àghò kyèri amə.” Icheg ne wì ya wendi ane, wì ya dù ghò isəg dèg se mèʼè məchə.

Currently Selected:

Matìyò 26: MBTP

Highlight

Copy