Matìyò 27

Mbe niŋ Yeso ghò imbìghè abə Payilèd

(Mag 15:1; Lug 23:1-2; Jɔn 18:28-32)

1Kwàʼ isusu izimi izimi, itog bəd mbàn Ŋwiye fɔrɔ bəd kyen inga aben ya nyimi ifeti ni chuʼri icheg ne mbɔb biri zwete Yeso. 2Mbɔb ya chuʼri ane, gwì aməd kɔd niŋ ghò nàʼ abə Payilèd ne ya yaʼi gɔbnà.

Judàs ghò swḛ

(Ìfà 1:18-19)

3Anyumə̀ ne Judàs we ne ya fḛ Yeso ya bàri gha mbi fə sɔb isaʼi ni zweti Yeso, wì ya bə̀ŋì fìŋ ywìrì ghò ywìtì ikab sibà we ìghum itad abə itog bəd mbàn Ŋwiye mbe tì bəd kyen mbe inga aben. 4Wì ya ywìtì ikab we ane, si ghà inɔb gha, “Mə fə gùg anug icheg ne mə fḛ wə̀d ne chəyi wì gùghi anug gha mbe zweti.”

Mbɔb ya ywìtì ichug ibo gha, “Àze kayi ywìrì ìwa isaʼi! Àze ya si ìwe isaʼi!”

5Judàs ya zug anug ze ane, màʼ ikab we inga mbàn Ŋwiye si dù ghò swḛ.

6Itog bəd mbàn Ŋwiye mbe ya gwe ikab we si gha, “Ìgho̰ ya ikab anəm, chəyi ìmba mə̀nɔ̀ʼɔ̀ chwi gha tè ziye ikab icheg gho̰ inga mbàn Ŋwiye.” 7Mbɔb ya ghàm ane, nyìmi ifeti, niŋ isɔbi anug ni zon asiŋi ze ne mbi yaya kàrà ane Mben wə̀d ne bɔ̀mɔ mbe akwiye. Mbɔb ya si nɔ̀ŋì asiŋi ze ane ati ne mbe twə̀ŋə bəd tìsɔ̀ʼ. 8À ya aton ne, ka bèyi tèchɔ̀ŋ, mbi ya kàrà asiŋi ze ane “Mben anəm”.

9Ane, anug ze ne Wə̀dkə̀n Ŋwiye Jèrìmayà ya ŋwàʼri ya dù ane tesiʼ. Anug ze ya gha, “Mbi ya niŋ ikab sibà we ìghum itad ne mə̀Izre ya bḛ gha mbi biri nàʼ igun atog məd, 10ghò zon Mben wə̀d ne bɔ̀mɔ akwiye, icheg ne Ŋwiye ya gha inum.”

Payilèd bìri inug abə Yeso

(Mag 15:2-5; Lug 23:3-5; Jɔn 18:33-38)

11Anyumə̀ ne Yeso ya təmi imbìghè abə Payilèd ne ya yaʼi gɔbnà, Payilèd ya si bìri ibo gha, “Àghò kə Ifɔn Mə̀Ju?”

Yeso ya ywìtì gha, “À ya icheg ne àghò gha!” 12Anyumə̀ ne itog bəd mbàn Ŋwiye fɔrɔ bəd kyen inga aben ya zi inug igun Yeso, chəyi wì ya ghàmi.

13Ane, Payilèd ya biri ibo gha, “Chəyi àghò zùghi inug mbo̰ ijìm ne mbi gha igun ine?” 14Chəyi Yeso ya ghàmi, ka bèyi ni ghà anug amɔʼ. Anug ya chè gɔbnà we.

Payilèd niŋ isɔbi anug gha mbe zwete Yeso

(Mag 15:6-15; Lug 23:13-25; Jɔn 18:39–19:16)

15Mà tituʼ tijìm, inga ineg mbe ne Mə̀Ju yaya jə̀ghə iteri Chègun, gɔbnà yaya nḛ ni chì wə̀d ndəŋ ifibì ne bəd dəbi sàŋì wì gho yi. 16Anyumə̀ we, mbaŋà mɔ̀ʼɔ ya yaʼ inga nəb ndəŋ ne inɔ̰ bəd ya kyeri aməd imbə̀ʼ inug tibɔ̀ŋ ne wì yaya ghìyə̀. Ikum məd ya Bàrabas 17Anyumə̀ ne inɔ̰ bəd ya fete, Payilèd ya biri inɔb gha, “Wə̀d ne mbə̀ kəbi gha mə chiye sàŋì inən àkə we? Àkə Bàrabas kə̀ Yeso we ne mbe kàrà ane Wə̀d we ne Ŋwiye zɔ̀ʼi?” 18Payilèd ya biri ane imbə̀ʼ icheg ne wì ya kyeri àze aghi gha mə̀Ju ya gwì Yeso nàʼ ibo anjìm àdeg.

19Icheg ne Payilèd ya chughi inga nəb isaʼi igun atən ze ne wì yaya chùghə igun sàʼa tisaʼi, iweg məd ya tɔm ikən ibo gha, “Imbə̀ʼ àghò ziye awe ìfe ifeg inga inug wə̀d gho̰ imbə̀ʼ icheg ne chəyi wì gùghi anug mɔ̀ʼɔ ka. Mə ya ghàmà anìŋ imbə̀ʼ icheg ne mə zən ngəʼ ako anjə̀m izimi tèchɔ̀ŋ imbə̀ʼ aməd.”

20Itog bəd mbàn Ŋwiye fɔrɔ bəd kyen inga aben ya to atog abə bəd ghì mbɔb ghà abə Payilèd gha wì chiye Bàrabas sàŋì si ghì mbe zwete Yeso.

21Payilèd ya biri inɔb gha, “Inga mbaŋà ìto̰ tìbe, wə̀d ne mbə̀ kəbi gha mə chiye sàŋì inən àkə ìwa?”

Mbɔb ya ywìtì gha, “Chìye Bàrabas”

22Payilèd ya biri inɔb gha, “Mə̀ si ghə̀nə tì Yeso gho̰ ne mbe kàrà ane Wə̀d we ne Ŋwiye zɔ̀ʼi?”

Mbɔb məjìm ya ywìtì gha, “Kɔ̀mbɔ aməd igun azed abaʼri!”

23Payilèd ya biri inɔb gha, “Wì kə̀ gùghi anug?” Mbɔb ya ywìrì taŋ kyen ane gì ka ka gha, “Kɔ̀mbɔ aməd igun azed abaʼri!”

24Anyumə̀ ne Payilèd ya zə̰ gha chəyi yaya ywìrè anug mɔ̀ʼɔ ne tì məd ywìrì ghì chèyi ni gha, zìye mə̀ ywìrì ghò imbìghè ni ghàm, bəd biri bùg ndum, wì ya niŋ mənib sò ìmbi ibo imbìghè abə inɔ̰ bəd mbe, si ghà inɔb gha, “Chəyi ìfum ìfeg inga iwu wə̀d gho̰! À ya mbə̰ kyeri anug imbə̀ʼ iwu məd!”

25Bəd mbe məjìm ya ywìtì gha, “Ndɔ̀n imbə̀ʼ icheg ne mbi zweti aməd nyi igun ina bə̀ nyi igun ìmba bɔn!”

26Ane, Payilèd ya chì Bàrabas sàŋì inɔb. Wì ya si ghì gha mbe ywiri Yeso ane fìngwàn nɔ̀ʼ niŋ ghò kɔ̀mbì igun azed abaʼri.

Mə̀sogyì chàpì Yeso

(Mag 15:16-20; Jɔn 19:2-3)

27Mə̀sogyì ìmbi Payilèd ne ya yaʼi gɔbnà ya niŋ Yeso nyi inga ìtɔʼ gɔbnà. Mbɔb ya pè fèti mə̀sogyì məjìm mbi təmbi chè kad aməd. 28Mbɔb ya chì ndwi məd si niŋ ndwi ifɔn zì igun məd. 29Mbɔb ya bə̀ niŋ agyen njəŋ njəŋ kad icheg aghi atog zì ibo. Mbɔb ya bə̀ niŋ fìmbàŋì zì ibo aba abo jəghi si nɔ̀ʼ gɔ̀m itog inwḭ ibo imbìghè, chàpì aməd gha, “Mbè! Ifɔn mə̀Ju, tè chàʼrì awe!” 30Mbɔb ya ched timad igun məd, bə̀ niŋ fìmbàŋì fe ibo ikye abo kwèn atog ibo angu. 31Anyumə̀ ne mbɔb ya fə màni ni chàpì aməd, mbɔb ya chì ndwi ifɔn ze ibo ibə̀m ywìrì si zì ìti məd tì ndwi igun məd. Mbɔb ya si niŋ aməd ghò ni ghò kɔ̀mbi igun azed abaʼri.

Mə̀sogyì kɔ̀mbì Yeso igun azed abaʼri

(Mag 15:21-32; Lug 23:26-43; Jɔn 19:17-27)

32Icheg ne mə̀sogyì mbe yaya nìŋə Yeso dùwə̀ inga aben Jèrusalèm, mbɔb ya bɔ̀mbi tì mbaŋà mɔ̀ʼɔ a Sayirèn ne ikum məd ya Sayimùn. Mə̀sogyì mbe ya nyimi aməd ane ika ghì wì niŋ azed abaʼri ze abə Yeso bèʼì. 33Mbɔb ya yèn ghò pè ane asiŋi ze ne mbe kàrà ane Golgotà. (Golgotà ya gha, “Asiŋi Awu atog.”) 34Anyumə̀ ne mbɔb ya pe ane asiŋi azo̰, mbɔb ya nàʼ mənoʼ ne mbi nyàmbi tì məbug nwḭ nwḭ abə Yeso. Anyumə̀ ne wì ya zweʼi mənoʼ mbe, wì ya ton yi ni no.

35Anyumə̀ ne mbi ya pe kɔ̀mbì Yeso igun azed abaʼri, mbɔb ya buʼ tikaʼì, ghàpì ndwi məd mbɔb mbɔb. 36Anyumə̀ ne mbɔb ya ghi ane, mbɔb ya chughi aseg se nḛ̀ aməd. 37Mbɔb ya ŋwàʼri isaʼi we ne mbɔb ya zi igun məd si kɔ̀mbì àŋwàʼrì ze igun azed abaʼri ze ibo igun atog. Àŋwàʼrì angu ya gha, “Aŋa ya Yeso, Ifɔn mə̀Ju.” 38Mbi ya bə̀ kɔ̀mbì məji mɔ̀ʼɔ məbe igun ized abaʼri ibe iban Yeso. Ifibì ya yaʼ aba abo jəghi, ìywin yaʼ aba abo təŋ.

39Bəd mbe ne yaya chè iban asiŋi ze ya bàra Yeso se chìʼrè atog bə̀ chàpà aməd. 40Mbɔb yaya ghà gha, “Àghò we ne biri sàʼ mbàn Ŋwiye bə̀ ywìrì niŋ ineg itad kɔd, pumni ìwe nyɔd! Kwàʼ àghò mə yaʼ Ŋwan Ŋwiye, swiʼi igun azed abaʼri aghɔ!”

41À ya bə̀ ane ne itog bəd mbàn Ŋwiye tì mə̀chwitì mə̀nɔ̀ʼɔ̀ fɔrɔ itog bəd inga aben yaya bə̀ chàpà aməd. Mbɔb yaya ghà gha, 42“Wì yaya pùmnə bəd ndəŋ. Wì pumni ìwi nyɔd tì bara. Imbə̀ʼ məd ya Ifɔn mə̀Izre! Wì swiʼi ikaŋ azed abaʼri ze, tì biri nɔ̀ŋì ibḛfiŋ igun məd. 43Məd nɔ̀ŋì fìŋ igun Ŋwiye, ane Ŋwiye mə kə̀b, wì pumni aməd kwàʼ tèchɔ̀ŋ icheg ne wì yaya gha zìye ya Ŋwan Ŋwiye.”

44À ya bə̀ ane ne məji mbe ne mbi ya bə kɔ̀mbì igun ized abaʼri yaya bə̀ chàpà aməd.

Icheg ne Yeso ku

(Mag 15:33-41; Lug 23:44-49; Jɔn 19:28-30)

45Ni ko ane mə̀nyùmə̀ ìghum chɔ̀b ibe tisi, isiŋi ya fin inga aben ajìm. Mbi ya fin anene ghò dù ane mə̀nyùmə̀ itad tisi. 46Ane mə̀nyùmə̀ itad ya se kòʼò, Yeso ya kyen ane gì ka ka gha, “Èli, Èli, Lama sàbatàni!” Ane ya gha, “Ìmə Ŋwiye, ìmə Ŋwiye, aton ne àghò waʼi mə àkə gha?”

47Anyumə̀ ne bəd mɔ̀ʼɔ ne ya təmi iban angu ya zughi icheg ne wì ghàmi ane, mbɔb ya gha, “Wə̀d gho̰ ya kàrà Èlayijà gha wì yeʼe wètì aməd.”

48Kwàʼ ati ati, wə̀d mɔ̀ʼɔ abɔ̀ʼ inɔb ya nòtò ghò niŋ juʼ, chùb inga àtwaŋi mənoʼ, fàmì atog fized, nɔ̀ ikaŋ, zì ibo ichug gha wì sɔri.

49Mbin tì bəd ya ghà gha, “Sàŋa məd tì zən gha Èlayijà wa biri yeʼe pumni aməd?”

50Yeso ya kyen ane gì ka ka si ku yi.

51Kwàʼ anyumə̀ we, ndwi kyen ze inga fìghàra mbàn Ŋwiye ya sanda ane iba ibe, ni ko atog ghò pè aton. Ìseg ya ghùd, tigho sanda. 52Tiseg ya sanda fìʼè, Ŋwiye zwèmni bəd məd mbe ne ya fə ku. 53Anyumə̀ ne Yeso ya zweme ane iwu, bəd mbe ya bə̀ dù inga tiseg te, ghò inga aben ìzḛzḛ (ane ya Jèrusalèm). Bəd nɔʼ nɔʼ ya bàd awɔb.

54Anyumə̀ ne atog wə̀d igun mə̀sogyì tì mə̀sogyì mbe ne yaya kyèʼè Yeso ya bàri icheg ne ìseg yaya ghùrə̀ fɔrɔ inug ijìm mbe ne ya du, mbɔb ya binde, si kyen gha, “Kwàʼ tesiʼ, wə̀d gho̰ ya yaʼ Ŋwan Ŋwiye.”

55Mə̀yi nɔʼ nɔʼ yaya bə̀ angu. Mbɔb ya təm agha se se nḛ̀ inug mbe ne yaya dùwə̀. Mbɔb ya nɔ̀ʼ a Galìli bèni abɔ̀ʼ Yeso nè fàʼà ibo. 56Mə̀yi mɔ̀ʼɔ abɔ̀ʼ inɔb yaya Mèri Màdàlen tì Mèri we ne ya ngɔb Jem tì Jòseb fɔrɔ ngɔb bɔn Zebedì.

Icheg ne mbi twəŋi Yeso

(Mag 15:42-47; Lug 23:50-56; Jɔn 19:38-42)

57À ya yaʼ ikwikwiri ne wə̀d ikab mɔ̀ʼɔ ya nɔ̀ʼi a Àrimàtiyà se yèʼe. Ikum məd ya Jòseb. Məd yaya bə̀ wə̀d mɔ̀ʼɔ abɔ̀ʼ mə̀mə̀nənùg ìmbi Yeso. 58Wì ya ghò abə Payilèd ne ya yaʼi gɔbnà pè ghà ibo gha wì naʼa awu àze Yeso ini. Payilèd ya gha mbe naʼa awu ze ibo. 59Jòseb ya niŋ awu ze, nìpi inga ndwi linèn ne yaʼi ìzi feg, 60ghò zì inga iseg feg məd ne wì ya to inga igho. Wì ya bìŋi iteg kyen kən ichug iseg we, nɔ̀ʼ ghò yi 61Mèri Màdàlen tì ìywin tì Mèri ya chughi aseg imbìghè abə iseg we se nḛ̀.

Mbe nɔ̀ŋì mə̀sogyì ichug iseg Yeso

62Aneg ze ne ya beni abɔ̀ʼ, ne ya aneg ne mə̀Ju mbe chùʼrə nyɔd ni nyi inga aneg àzwètì, itog bəd mbàn Ŋwiye tì mə̀Farìsi ya ghò abə Payilèd ne ya yaʼi gɔbnà. 63Mbi ya pè ghà ibo gha, “Masà, tè wendi gha, anyumə̀ ne Wə̀d we ne tàmba bəd ya kiri yaʼi ika, wì ya gha, ‹Ineg mə̀ pè ane itad, mə biri zweme ane iwu.› 64Ane, àghò naʼa isɔbi anug gha mbe kyeʼe iseg we ghò pè ane ineg itad, nji mə̀mə̀nənùg məd biri ghò ji awu məd si nɔ̀ʼ ghà abə bəd gha, ‹Wì fə zweme ane iwu.› Mbi mə̀ ghì ane, anug ako azo̰ biri si bə chè àze mbègtog.”

65Payilèd ya ywìtì gha, “Mbə̀ niŋ mə̀sogyì ghò pè kyèʼì iseg we icheg ne mbə̀ kəbi.”

66Ane, mbɔb ya ghò pè zì aneni igun iteg we ne ya yaʼi ichug iseg we ni chwi gha imbə̀ʼ wə̀d nɔʼ fìʼì, bə̀ ywìrì nɔ̀ŋì mə̀sogyì gha mbe chughi se kyèʼè iseg we.

Currently Selected:

Matìyò 27: MBTP

Highlight

Copy