Mag 4
4
Ngam məgri imbə̀ʼ wə̀d ne fàʼà a mben
(Mat 13:1-9; Lug 8:4-8)
1Yeso ya ywìrì ko ni chwiti inug iban atəŋ ze a Galìli. Inɔ̰ bəd ne ya yaʼi kwàʼ ìwi kyen ya ghò fète chè kad aməd. Ane, wì ya nyi chùghi inga abaŋ igyi igun atəŋ ze. Inɔ̰ bəd we ijìm ya si chùghi iban atəŋ ze. 2Wì ya ko ni chwiti inug nɔʼ nɔʼ inɔb ane tìngam məgri. Wì ya ghà inɔb gha:
3“Mbə̀ zug! Mbaŋà mɔ̀ʼɔ ne fàʼà a mben ya ghò ni nyɔ̀ʼ ìmbi ighi ngwèd. 4Anyumə̀ ne wì yaya nwḭ̀yḛ̀ ighi mbe, titam mɔ̀ʼɔ ya fendi igun inɔnjì, tìnən gwe mèrì. 5Ìti mɔ̀ʼɔ ya fendi igun igho ne ìseg ya yaʼi məyi iki piʼì. Titam te ya zàmbà gwed, dù icheg ne ìseg ya nàta. 6Anyumə̀ ne achwi ya zuʼi kà, ze ya ghì ighi mbe nə̀ŋə̀, ku imbə̀ʼ icheg ne chəyi ighaŋ ighi mbe ya nyi inga aseg icheg chɔm. 7Ìti mɔ̀ʼɔ ya fendi inga ìjə̀ŋì. Ìjə̀ŋì we ya kweg nib ighi mbe. Chəyi mbi ya ko titam. 8Ìti mɔ̀ʼɔ ya fendi inga ìseg chɔm. Ti ya kweg bə̀ ko titam nɔʼ nɔʼ. Ìti mɔ̀ʼɔ ya ko titam achug ìghum itad, ìti mɔ̀ʼɔ ko achug ìghum tìfughə, ìti mɔ̀ʼɔ ko achug iki ifibì.”
9Yeso ya si nwḭ̀yḛ̀ gha, “Wə̀d ne tì wì zug anug, wì zug!”
Aton ne Yeso yaya ghàmà inug ane tìngam məgri
(Mat 13:10-17; Lug 8:9-10)
10Anyumə̀ ne Yeso ya yaʼi yi tèzìʼì, bəd mɔ̀ʼɔ abɔ̀ʼ mbe ne ya yaʼi inga inɔ̰ we ne ya che kad aməd tì mə̀mə̀nənùg məd mbe ìghum chɔ̀b ibe ya ghà ibo gha wì toʼro tìngam məgri te. 11Wì ya ywìtì inɔb gha, “Ŋwiye fə nàʼ iwe inən gha mbə̀ kyeri inug mbe ne yaʼi inə̀mbi imbə̀ʼ anug ìfɔ̀n məd. Si ya gha, mbi biri ghà inug ijìm abə bəd mbe ne chəyi awɔb abɔ̀ʼ inən ane tìngam məgri. 12Ane ya ni ghì gha;
‹Mbi biri nèn ywìrì nèn,
si ya gha, chəyi mbi biri bàd.
Mbi biri zweri ywìrì zwèri,
si ya gha, chəyi mbi biri kyeri;
nji mbi biri bə̀ŋì ìtɔb fìŋ,
Ŋwiye waʼ ìmbɔb inug tibɔ̀ŋ.›”#4:12 Àzayà 6: 9,10
Aton ane ìngam məgri we imbə̀ʼ wə̀d ne fàʼà a mben
(Mat 13:18-23; Lug 8:11-15)
13Yeso ya biri inɔb gha, “Àkə chəyi mbə̀ kyeri aton ane ìngam məgri gho̰? Mbə̀ kə si chè iye ni kyeri aton ane tìngam məgri ndəŋ? 14Wə̀d we ne fàʼà a mben ya wə̀d ne ghàmà Ìngam Ŋwiye. 15Bəd mɔ̀ʼɔ ya icheg ighi ngwèd mbe ne ya fendi igun inɔnjì. Mbɔb ya mə̀ zug Ìngam Ŋwiye, Sàtàn ghò chì ìngam we ne mbi nyɔ̀ʼi inɔb inga fìŋ kwàʼ məyi ati ati. 16Bəd mɔ̀ʼɔ ya icheg ighi mbe ne ya fendi igun igho. Mbɔb ya mə̀ zug Ìngam Ŋwiye, mbi niŋ ane igyendi kwàʼ ati ati. 17Si ya gha, chəyi ìngam we ya taŋ nyi inga ìtɔb fìŋ. Wì ya chùghə məyi ane iki nyumə̀. Anyumə̀ ne ngəʼ yèʼe, kə̀ anyumə̀ ne mbi chɔʼi ìmbɔb ibɔʼì ighog imbə̀ʼ ìngam we, mbi ya to̰ awɔb ìngam we kwàʼ ati ati. 18Mbi mɔ̀ʼɔ ya icheg ighi mbe ne ya fendi inga ìjə̀ŋì. Aŋa ya bəd mbe ne mbe mə̀ zug Ìngam Ŋwiye, 19anug ni nwìʼì nyɔd imbə̀ʼ ighi igun isəg, tì anug ni bèrì ighi nɔʼ nɔʼ, fɔrɔ anug ni ghə̀ʼrì ighi nɔʼ nɔʼ, ya nàʼà ifemi igun ìngam we. Ane, chəyi wì ya ko titam. 20Bəd mɔ̀ʼɔ ya icheg ighi ngwèd mbe ne mbi ya nwìyḭ igun ìseg chɔm. Mbɔb ya zùghə Ìngam Ŋwiye, bḛ. Ane, mbi ya ko titam. Mbi mɔ̀ʼɔ ya ko titam achug ìghum itad, mbi mɔ̀ʼɔ ko achug ìghum tìfughə, mbi mɔ̀ʼɔ ko achug iki ifibì.”
Ngam məgri imbə̀ʼ anam
(Lug 8:16-18)
21Yeso ya biri abə bəd mbe gha, “Bəd mbe wa nìŋə anam nyḭ̀yḛ inga nəb kùbrə aton fiko, kə̀ chà aton abaʼ? Imbə̀ʼ mbi ya nɔ̀ŋɔ̀ yaʼ igun asiŋi ne mbe nɔ̀ŋɔ̀ anam? 22Chəyi anug mɔ̀ʼɔ inə̀mbi ne chəyi mbi biri tòʼ asaŋ. Chəyi bə̀ yi isə mɔ̀ʼɔ ne chəyi wì biri dù asaŋ. 23Wə̀d ne tì wì zug anug, wì zug!”
24Wì ya bə̀ ywìrì ghà inɔb gha, “Mbə̀ ziye atog ane inug mbe ne mbə̀ zughi. Icheg ne mbə̰ mbe sàʼa bəd ndəŋ, à ya bə̀ icheg ne Ŋwiye biri saʼ awən. Si ya gha, Ŋwiye biri saʼ awən chè icheg ne wì biri saʼ bəd ndəŋ. 25Wə̀d we ne beri ighi, mbi biri nàʼ ìmbi ndəŋ ibo, wì si bèrì ighi nɔʼ nɔʼ. Àsi wə̀d we ne chəyi wì beri aghi, ka bèyi iki we ne wì bèri, mbi biri niŋ ibo.”
Ngam məgri imbə̀ʼ ighi ngwèd ne kwèghe
26Yeso ya chè imbìghè gha, “Anug ìfɔ̀n Ŋwiye ya icheg ne wə̀d nìŋi ighi ngwèd ni ghò nwḭ̀ ibo mben. 27Tisi fɔrɔ tizimi, kə̀ wì kə ikyèʼi kə̀ wì kə gwḛ, ighi mbe biri gwed kweg. Si ya gha, chəyi wì ya kyère icheg ne ighi mbe mbe chè bɔŋ se kwèghe. 28À ya ìseg ze ghìyə̀ gha ighi mbe kweg. Ighi mbe biri bi zì tifuʼ, kùm, bɔŋ se ko titam. 29Si ya gha, ighi mbe mə̀ tə̀n, wə̀d we biri niŋ ibeg ghò niŋ ighi mbe imbə̀ʼ icheg ne nyùmə̀ ni niŋ ighi a mben fə kòʼ.”
Ngam məgri imbə̀ʼ fitam mostàd
(Mat 13:31-32,34; Lug 13:18-19)
30Yeso ya biri gha, “Tì kə anìŋ mə̀grì anug ìfɔ̀n Ŋwiye ane aghə? Ìngam məgri ne tì tì niŋ tòʼrì angu àkə iweg? 31Anug ìfɔ̀n Ŋwiye ya icheg fitam mostàd#4:31 Fitam mostàd ya kwàʼ isighì isighì se gwère kwèghe bə̀ŋə̀ ane azed kyen.. Wə̀d mɔ̀ʼɔ ya niŋ fitam fe ghò nyɔ̀ʼ aseg. Fitam mostàd fe kə chè titam azed tijìm igun isəg. 32Si ya gha, anyumə̀ ne mbi nyɔʼi, fi biri kweg, faŋ chè ized ijìm. Fi biri zì tìtab kyen kyen ne tìnən biri kɔd ìtɔb kàn igun.”
33Yeso ya ghàm Ìngam Ŋwiye abə bəd ane tìngam məgri nɔʼ nɔʼ icheg ìto̰. Wì yaya ghàmà ane icheg ne tì bəd zug kyèri. 34Chəyi wì yaya ghà anug mɔ̀ʼɔ abə bəd ne chəyi wì zi ìngam məgri abɔ̀ʼ. Si ya gha, anyumə̀ ne wì ya chughi yi tèzìʼì tì ìmbi mə̀mə̀nənùg, wì ya tòʼrì inug ijìm inɔb.
Yeso ya ghì afim sɔbɔ
(Mat 8:23-27; Lug 8:22-25)
35À ya yaʼ ikwikwiri we ne Yeso ya ghà abə ìmbi mə̀mə̀nənùg gha, “Tì bani atəŋ ghò injḭ ìywin.” 36Mə̀mə̀nənùg mbe ya nɔ̀ʼ sàŋì bəd nɔʼ nɔʼ mbe, si niŋ aməd inga abaŋ igyi ze ne wì ya yaʼi inga, mbi ko ghò. Ibaŋ igyi ndəŋ yaya bə̀ angu. 37Mbi ŋa zə̰, afim ka ka nɔ̀ʼ ko chè. Àwàwà ya nyi inga abaŋ igyi ze, si ghì mənib se kə̀bə̀ ni sweg inga. 38Yeso yaya gwḛ yi anjìm abaŋ ze, nɔ̀ŋì àze atog igun pirè#4:38 Pirè ya pillow ichug mə̀kara.. Mə̀mə̀nənùg ya nɔ̀ aməd ghà ibo gha, “Àchwitìnùg, chəyi àghò bàri gha tì ya anìŋ ichug iwu?”
39Wì ya nɔ̀ʼ, ghàm abə afim ze gha, “Sɔbɔ!” bə̀ ghàm abə àwàwà ze gha, “Zùyə!” Anyumə̀ ne wì ya ghàmi ane, afim ze ya sɔbɔ, isiŋi zù muuud#4:39 Muuud: ya gì ni chwi icheg ne isiŋi ya zu angu. 40Yeso ya si bìri abə mə̀mə̀nənùg mbe gha, “Mbə̀ kə bɔ aghə? Chəyi mbə̀ kiri beri ibḛfiŋ?”
41Tiwḛ ya gwì awɔb. Ane, mbi ya ghàm mbɔb mbɔb gha, “Wə̀d gho̰ kə anìŋ yaʼ iku wə̀d iweg ne ka bèyi afim, ze ya zùgrə aməd, àwàwà bə̀ zùgrə aməd?”
Currently Selected:
Mag 4: MBTP
Highlight
Share
Copy
Want to have your highlights saved across all your devices? Sign up or sign in
© 2019 CABTAL
