Mag 5

Yeso ya ghù mbaŋà ne izwighi tibɔ̀ŋ ya yaʼi inga məd

(Mat 8:28-34; Lug 8:26-39)

1Yeso tì ìmbi mə̀mə̀nənùg ya ghò pè injḭ atəŋ ze a Galìli, inga aba aben ze a Gèrasenè. 2Anyumə̀ ne Yeso ya du inga abaŋ igyi, mbaŋà mɔ̀ʼɔ ne azwighi tibɔ̀ŋ ya yaʼi inga məd ya dù inga itog iseg ghò kɔ̀ti aməd. Itog iseg mbe ya ibighi ne mbi ya to inga igho. 3Mbaŋà ze yaya chùghə inga itog iseg mbe. Chəyi wə̀d mɔ̀ʼɔ ne tì wì ya kɔd aməd, ka bèyi ane chen#5:3 Chen ya chain ichug mə̀kara. 4Aton ya gha, mbi ya mə̀ kɔd aməd ane ndəŋ bə̀ fɔrɔ ane chen, wì ya tə̀ndə mə̀chen mbe bə̀ tə̀ndə ndəŋ te akəri akəri. Chəyi wə̀d mɔ̀ʼɔ ne tì wì ya ghì gha wì chughi inyeʼ. 5Wì yaya yḛ̀ inga itog iseg mbe bə̀ yḛ̀ igun tiwum. Wì yaya yḛ̀ ane, tisi fɔrɔ tizimi. Wì yaya yḛ̀ ne kyḛ ane gì ka ka bə̀ pɔ̀ndɔ̀ ìwi nyɔd ane ateg.

6Anyumə̀ ne wì ya bàra Yeso agha se, wì ya nòtò ghò gɔ̀m itog inwḭ ibo imbìghè, 7kyen ane gì ka ka gha, “Yeso Ŋwan Ŋwiyekɔʼ, àghò kə̀ beri anug ye ni ghì tì inum? Mə boʼ ibo ine ane ikum Ŋwiye gha imbə̀ʼ àghò chə awe aghum!” 8Wì ya ghà ane imbə̀ʼ icheg ne, Yeso ya bì ghà abə azwighi tibɔ̀ŋ ze gha, “Azwighi tibɔ̀ŋ, dùyə inga mbaŋà izo̰!”

9Yeso ya biri abə wə̀d we gha, “Ìwe ikum kə we?”

Mbaŋà ze ya ywìtì gha, “Àmə ikum ya Inɔ̰ imbə̀ʼ icheg ne tì taŋ nɔʼ.” 10Izwighi tibɔ̀ŋ mbe ya taŋ boʼ ibo abə Yeso ywìrì boʼ gha imbə̀ʼ wì chìye yi awɔb inga aba aben ze.

11Inɔ̰ ìkuŋə ne ya yaʼi kwàʼ ìwi kyen yaya jə̀ghə ibə̀m iwum angu. 12Izwighi tibɔ̀ŋ mbe ya boʼ ibo abə Yeso gha, “Cha awa inga ìkuŋə mbin.” 13Wì ya bḛ. Ane, izwighi tibɔ̀ŋ mbe ya dù ghò nyi inga ìkuŋə mbe. Inɔ̰ ìkuŋə we ijìm, ne ya yaʼi icheg ìkuŋə chuʼ tibe, ya sùyə̀ ibə̀m kəŋ ghò fen inga atəŋ ze, fum.

14Bəd mbe ne yaya nə̀ngə ìkuŋə mbe ya nòrò ghò ghà anug ne du abə bəd mbe inga asiŋi ze. Mbi ya bə̀ ghà abə bəd inga isiŋi mbe ne yaʼi iban iban. Bəd ya dù inga isiŋi mbe ghò nḛ anug ne ya du. 15Mbi ya ghò abɔ̀ʼ Yeso pè bàd mbaŋà ze ne izwighi tibɔ̀ŋ nɔʼ nɔʼ ya yaʼi inga məd. Mbaŋà ze ya si chùghi yi inyeʼ tì ìti ndwi ibəm. Atəd məd ya fə mèg. Mbi ya bàd ane bɔ. 16Bəd mbe ne ya bàri anug ze yaya ghà anug ne ya du igun mbaŋà ze tì ìkuŋə mbe abə bəd ne yaya yèʼe.

17Anyumə̀ ne bəd mbe ya zughi ane, mbi ya boʼ ibo abə Yeso gha wì saŋa àzɔb aba aben ghò yi.

18Anyumə̀ ne Yeso ya nyi inga abaŋ igyi, mbaŋà ze ne izwighi tibɔ̀ŋ nɔʼ nɔʼ ya du inga məd ya boʼ ibo ibo gha wì saŋa ze beni abɔ̀ʼ məd.

19Chəyi Yeso ya bḛ. Wì ya ghà ibo gha, “Ghò awe achan abɔ̀ʼ ìmbe bəd, pè ghà anug kyen ze ne Anɔŋisəg ghi ine, bə̀ ghà icheg ne wì dìgri igun ine.”

20Mbaŋà ze ya nɔ̀ʼ ghò inga aba aben ze ne mbi yaya kàrà ane Dèkapolìs.#5:20 Dèkapolìs ya gha, Tikye aben ìghum. Wì ya pè angu ko saʼ anug kyen ze ne Yeso ghi ibo. Anug ya chè bəd məjìm ne ya zughi anug ze.

Yeso ya zwemni Ŋwan àyi ìwi Jarùs, bə̀ ghù àyi ne yaya ghɔ̰̀ ìseg

(Mat 9:18-26; Lug 8:40-56)

21Anyumə̀ ne Yeso ya ywìrì bàni atəŋ ze inga abaŋ igyi, inɔ̰ bəd kwàʼ ìwi kyen ya ghò fète. Mbi ya fete chè kad aməd chuʼ anyumə̀ ne wì yaya kiri iban atəŋ ze. 22Wə̀d kyen mɔ̀ʼɔ abɔ̀ʼ bəd ne yaya sàʼa ichamì Ŋwiye ne ikum məd ya Jarùs ya bàd aməd ghò gùg aseg ibo iban ighog, 23boʼ ibo ibo ane fìŋ ijìm gha, “Ìmə Ŋwan àyi kwa kwa we fə taŋ ghɔ̰̀. Məd fə se ane nḛ̀ ni ku. Mə boʼ ibo ine, àghò yeʼe nɔ̀ŋì ìmbe ibo igun məd, aghɔn meghe, wì tḛ.” 24Ane, Yeso ya nɔ̀ʼ ko ghò abɔ̀ʼ məd.

Inɔ̰ bəd kwàʼ ìwi kyen ya beni abɔ̀ʼ Yeso se tḭ tḭ igun məd. 25Àyi mɔ̀ʼɔ ya yaʼ angu ne yaya ghɔ̰̀ ìseg. Wì ya fə ghɔ̀n ane tituʼ ìghum chɔ̀b ibe. 26Àyi we ya fə zə̰ ngəʼ ako ikye abo abə mə̀dɔgtà nɔʼ nɔʼ. Wì ya fə bə̀ chìkì ikab ijìm ne wì ya beri igun aghɔn ze. Ane, ni nji nyɔd we ya bɔti, chəyi. Wi yaya kà ghò yi gho imbìghè. 27Anyumə̀ ne wì ya zughi inug imbə̀ʼ Yeso, wì ya tàʼ inɔ̰ bəd we chè inga ìsàn, ghò anjìm abə Yeso pè bètì ndwi məd. 28Àyi we ya ghà ibo inga fìŋ gha, “Mə mə̀ bètì məyi ndwi məd, àmə aghɔn biri mèg.” 29Kwàʼ ati, ìseg ze ya sɔbɔ, wì bə zug ibo inga nyɔd gha aghɔn ngəʼ ze fə mèg.

30Bə̀ kwàʼ anyumə̀ we, Yeso ya zug icheg ne ika ya du inga məd. Wì ghàbri bìri abə inɔ̰ bəd we gha, “Wə̀d ne bèti ìmə ndwi, àkə we?”

31Mə̀mə̀nənùg məd ya ywìtì ibo gha, “Àghò kə nḛ bəd nyə̀mə̀ nyə̀mə̀ iban ine, àghò ywìrè bìrè wə̀d ne bèti awe iye?”

32Yeso ya chè yi imbìghè ni kə̀b wə̀d ne ya bètì aməd. Ane, wì ya ghabri nyɔd nèn isiŋi chè kad 33Àyi we ya bàd gha aghɔn məd fə mèg. Ane, wì ya ghò nè bìnde, bɔ, pè gùg imbìghè abə Yeso, mə̀tì tesiʼ ijìm ibo. 34Yeso ya ghà ibo gha, “Ìmə ŋwan, ìwe ibḛfiŋ fə ghì àze aghɔn mèg. Ìze ngəʼ fə bə̀ mèg yi. Si ghò ane àbɔrɔ̀bɔd.”

35Kwàʼ icheg ne Yeso yaya kiri ghàmà, bəd mɔ̀ʼɔ ya nɔ̀ʼ inga nəb abə Jarùs we ne ya atog wə̀d inga ichamì Ŋwiye, yèʼe. Mbi ya pè ghà abə Jarùs gha, “Imbə̀ʼ àghò ywiri nàʼ awe ngəʼ abə Àchwitìnùg. Ìwe ŋwan àyi we fə ku.” 36Yeso ya zug anug ne bəd mbe ya gha abə Jarùs, si ghàbri ghà ibo gha, “Imbə̀ʼ àghò bɔ awe. À ya məyi gha, àghò bere ibḛfiŋ.”

37Wì ya ghà ane si nɔ̀ʼ ni ghò inga achan Jarùs, niŋ məyi Pità tì Jem fɔrɔ Jɔn ne yaʼi ifi Jem. 38Anyumə̀ ne mbi ya pè inga achan Jarùs, Yeso ya bàd icheg ne bəd yaya sɔ̀mɔ nyɔd, kyḛ̀, dèghè. 39Wì ya nyi inga nəb bìri abə inɔ̰ bəd we gha, “Mbə̀ kə sɔ̀mɔ nyɔd, kyḛ̀, dèghè aghə? Chəyi ŋwan we ku. Wì ya gwḛ.” 40Mbi ya zug ane, chəʼ aməd.

Yeso ya chà wə̀d ijìm isəg, si niŋ mbaʼ tì ngɔb ŋwan we, fɔrɔ mə̀mə̀nənùg məd mbe ne ya yaʼi tì məd, mbi nyi ghò atog nəb ze ne ŋwan we ya yaʼi angu. 41Wì ya pè, nyìmi abo abə ŋwan àyi kwa kwa we, si ghà ibo ane ìngam aben məd gha, “Tàlità kum.” Ane ya wì gha, “Ŋwan àyi kwa kwa, nɔ̀ʼɔ.” 42Kwàʼ anyumə̀ we, ŋwan we ya gàd, nɔ̀ʼ, yèn. Anug ya chè awɔb. Ŋwan àyi kwa kwa we ya yaʼ tituʼ ìghum chɔ̀b ibe. 43Yeso ya sìmì àtɔ̀ŋi abə wə̀d ijìm we ne ya bàri anug ze, ghà inɔb gha, imbə̀ʼ wə̀d gha yi anug ne du abə wə̀d. Wì ya si ghà inɔb gha, “Mbə̀ naʼa ighijəg abə ŋwan we.”

Currently Selected:

Mag 5: MBTP

Highlight

Copy