Matyo 14

Ewu Eyɔɔ Andɛʼndim

(Mak 6:14-29; Luk 9:7-9)

1Èndzobo chɛ Hɛrɔd, m̀fɔ̀ abɛ Galilii à zo mbɔʼ Yeso ngɛ, 2engɔ ga ebe bɔ afwɛʼ mɔ kpe, “Éŋwaʼa, ewùnɔ ne Eyɔɔ Andɛʼndim a shi wu zhwɛm, ne ǹji yɛ è me le m̀pè ekama zɔnɔ é le abwa zodo zodo ngɛ.” 3Hɛrɔd à na ga énde mbɔʼnga engɔ à shi dye ndɛʼ etsɛrɛ kpe e bere Eyɔɔ Andɛʼndim, koro engɔ è ge a ndɔdzɔm. À le énde nɔ mbɔʼ Hɛrɔdyas, eye ghongwaanɔm mɔ Firiboʼ. 4Enga à ne efwɔ endzobo deʼ, Eyɔɔ Andɛʼndim ke Hɛrɔd ga kpe, “E ke me koʼro engɛ̂ é nu Hɛrɔdyas eye ghongwa ngwɛ bo.” 5Hɛrɔd à na ke é zhudu engɔ shi ma bumu bɔ mbɔʼnga angɔ à ne nu Eyɔɔ na Àmɛnɛkɔn Ngwe nɔ. 6À shi anji be Hɛrɔd, ŋwɔaye Hɛrɔdyas chi m̀pè abin deʼ efàarà enɔrɔ bɔ gimkpaʼ Hɛrɔd gɛnɛ amɔ ngwo nɛɛ. 7Éngɛ engɔ tɔ̧ɔrɔ eŋwɔ wɛ ga kpe, “Mmɛ kanna abwa engɛ̂, biiri ala ngwo ma ke ngɛ ena, mmɛ wa ndɛʼ.” 8Eŋwɔ wɛ dɔrɔ ngɔɔ biiri ebe áʼɔ̧̀ mɔ. Áʼɔ̧̀ ga kpe engɔ ga ebe m̀fɔ̀ kpe, “Mmɛ wa ke ato Eyɔɔ Andɛʼndim efwɔ m̀pɛ̀rɛ̀ aka!” 9Awuu m̀fɔ̀ ku, bɛʼngɛ aŋu à shi kanna abwa efàarà àgɔn mɔ gimkpaʼ ngɛ, è tɔm bɔ kpe e le aŋu eŋwɔ wɛ à biiri ngɛ. 10Éngɛ e ngɔɔ tsɛd ato Eyɔɔ a ndɔdzɔm. 11Â nu ato yɛ zeʼe ndɛʼ ebe aŋwɔaye wɛ efwɔ m̀pɛ̀rɛ̀ aka, è nu ngɔɔ ndɛʼ ebe abli mɔ. 12Bɔ bɛɛrɛ abwa Eyɔɔ zeʼ nu etseʼre gho àmɔ̀ ngɔɔ kpa gɛ̀rɛ̀ nyɛrɛ ngɔɔ sɛ̀ɛrɛ̀ ebe Yeso.

Yeso ndee ebaŋagho

(Mak 6:30-44; Luk 9:10-17; Eyɔ 6:1-14)

13Aŋu Yeso à zo kpe â zhudu Eyɔɔ ngɛ, è geʼe nyɛrɛ afwɔ yɛ efwɔ ekpe ngɔɔ tsɔmɔ ena afwɔ deʼ yɛ gho deʼ à me tsɛʼ aŋu bo ngɛ. Ebaŋabɔ zo kpe Yeso shi ngɔɔ, e nyɛrɛ efwɔ entiri ebɛ àmɔ̀, è kìrì engɔ ebla. 14Èndzobo chɛ Yeso à gli efwɔ ekpe è zɔ ebaŋabɔ ngɛ, è klasɔn ene angɔ gɛ̀rɛ̀ gli angɔ byɛ à ma gwɔn ngɛ. 15Èndzobo chɛ etiʼi à sa di ngɛ, bɔ bɛɛrɛ abwa ngɔ zeʼ ga ebe engɔ kpe, “Tsɛ̀ʼ bɔ deʼ efwɔ afwɔ zɔnɔ bo, endzobo gɛrɛ shi fɔɔ, saa abɔ byɛ shi e ngɔɔ efwɔ entiri ebɛ byɛ ebara ngɛ è zɔn ala deʼ nde.” 16Yeso gíì kpe, “Ke le angɔ ngɔɔ bo, mbɔn mbwo ndɛʼ ala nde deʼ ebe angɔ.” 17Bɔ bɛɛrɛ abwa byɛ gíì kpe, “Mbyɛ ne le anɔ tye shuuru fyee mane ebɔʼ ǹgoŋ tan.” 18Yeso gíì kpe, “Mbɔn zeʼ ndɛʼ ena anɔ.” 19Engɔ gâ bɔ tsɔmɔ a chwâ edɔm egɛ, éngɛ engɔ nu ebɔʼ ǹgoŋ tan byɛ mane shuuru fyee chɛ, è bèʼrè efaara mɔ kɔʼ ekere ezob gɛ̀rɛ̀ ndɛʼ ebɛrɛ ebe Ngwe. È bɔʼrɔ e ǹgoŋ yɛ ndɛʼ ebe bɔ bɛɛrɛ abwa mɔ e gɛbbɛ ebe abɔ byɛ. 20Angɔ bɔ gimkpaʼ à nde zo, bɔ bɛɛrɛ abwa byɛ shunu atseʼre ande a me tye ngɛ e shwe ènkàm wum ǹchwɔ̀ fyee. 21Nuru anɔm byɛ â nde ngɛ â ne na ètɔɔshin tan nɔ, a dye nɛŋɛ aye mane adɔ̀kpara.

Yeso zhin edɔm ndim

(Mak 6:45-52; Eyɔ 6:15-21)

22Ekyɛ ŋwaʼ Yeso le bɔ bɛɛrɛ abwa mɔ e nyii efwɔ ekpe sa dye ngɔɔ embè anjid angli ze. Engɔ à tye achim é sàa ebaŋabɔ kpe angɔ klo. 23Èndzobo chɛ engɔ à shi saa bɔ kpe e klo ngɛ, engɔ kwaʼ tse egu deʼ é tsàʼrà Ngwe gho zhiʼ. Akwâ a di, engɔ da bli aŋu gho zhiʼ. 24À shi éngɛ nɔ ekpe bɔ ngɔ shi ngɔɔ efwɔ eji ghɛʼ, ndim shwe, efùu sa tiri ekpe efwɔ eji mbɔʼnga efùu à ma fùu à ngɔ̀ɔ ene abɛɛ yɛ angɔ à ma zeʼe ngɛ 25Aghɛɛghɛɛ enyɔ̀m tɛd mane mfo enchwenchwe nɔ, Yeso ma zeʼ ebara angɔ ma zhiri edɔm ndim. 26Èndzobo chɛ bɔ bɛɛrɛ abwa à zɔ engɔ ma zhiri edɔm ndim ngɛ, èklɔ̀ bere angɔ ghɛʼ, e sa bumu tsɛɛ à ga kpe, “Ne ezô.” 27Yeso gɛrɛ ga ebe angɔ ekyɛ ŋwaʼ kpe, “Mbɔn klini etaa, mbɔn ka bum na mmɛ!” 28Éngɛ Petoro pana kpe, “Masa mwɔ éŋwaʼa, ga shi mmɛ zhiri edɔm ndim zeʼ kla awɛ awaʼa!” 29Yeso gâ kpe, “zeʼ!” Éngɛ Petoro gli efwɔ ekpe è klada sa zhiri edɔm ndim é ngɔ̀ɔ ebe Yeso. 30Bɛʼngɛ aŋu à zɔ efùu kama ngɛ, èklɔ̀ bere engɔ, è klada sa ŋwɛrɛ efwɔ eji sa tsɛɛ à ga kpe, “Pweere angu Masakɛ.” 31Ekyɛ ŋwaʼ Yeso saa abwo è chɛ abwo Petoro è ga ebe engɔ kpe, “Ebɛrɛtaa njɛ ne kpɛɛ nɔ ene? Ngwo na di ayɛ?” 32Angɔ bɔ fyee gɛrɛ kwaʼ nyii efwɔ ekpe efùu fyɛ bwad. 33Éngɛ abɔ bɛɛrɛ abwa byɛ efwɔ ekpe ngɛ ghɔ Yeso gâ kpe, “Éŋwaʼaŋwâʼ ngwo na ŋwɔ Ngwe!”

Yeso gli bɔ aŋwan a Genasarɛd

(Mak 6:53-56)

34Angɔ à kpɛn angli bwɛn efwɔ chwâ Gɛnɛsarɛd. 35Bɔ à nɛɛ Yeso aŋu, ngɔɔ sàa ekɔn ebe ebɛ bara gimkpaʼ kpe e bwɛ bɔ aŋwan zeʼe ndɛʼ ebe Yeso. 36Angɔ buʼ ebwo ebe Yeso kpe engɔ shi bɔ aŋwan mɔmɔ tyetye adzɔ ǹdi ngɔ, bɔ gimkpaʼ byɛ à mɔmɔ ngɛ bwada.

Currently Selected:

Matyo 14: nbt

Highlight

Copy