Jɔn 6

Yeso chi agheynum təkam tətaa

(Mat 14.13-21; Mak 6.30-44; Luk 9.10-17)

1Ambə ghəə ghən a tsəghə tsunə, Yeso nsə ngəd tə wi tə n daŋ shi ndow n nguŋ ə nyi i Galili i loʼ zey ghə tɔŋŋə soʼonə nə̀ a loʼ nyi i Tiberia. 2Nɔɔ kə aghə̂ kə nii kə n dzûmə ndòw wi, n təŋkey ghə mâ koʼ faalə n wi mey tə â ghəŋŋənə ni baŋŋə ghə̂ a dzaŋa ghə. 3Yeso n nuu kɔʼ ndòw nə ukaʼ, ndòw doʼo tsu fu ghi dzûmə tə wi tə. 4À n loʼ nə̀ nəŋə zey ghə̂ a Təjuu a zə̂ənə Zə̂ kə taa zaʼa kə nya kuʼlə may bənu. 5Ambə Yeso nuu laalə tsəghə ndòwnə luʼu tə, tə n koʼ nɔɔ kə aghə̂ kə tsuŋu bənə n səə wi. Tə sey bəb ndòwnu tə̀ Filip nə̀, “A loʼ ni zuu ghee fəzəə wə fa tə̀ ghə̂ ghən ni zə̂ ə?” 6Tə â dza ghəə ghən ni mɔm koʼ Filip, n təŋkey Yeso n wû u wi wə â khənu ghəə zey tə î ghəŋŋənə.

7Filip n beeli ndòw wi nə̀, “Abə a tsəm ney kɔʼ kənə khəə wey ghə loʼ ni tsə̂ wù tii nə təndzɔŋɔ tətuubə, zuu kɔʼ ufəzəə tii tə̀ ghə̂ ghən, wə i nam kpii way fəzəə wey aghə̂ adzəm loʼ ni baʼ ntə̀ghə̀ tii.”

8Andria, waazə ə Shimun Pita, tə â loʼnə ngəd umɔʼ n ngəd tə Yeso n dza tə̀ Yeso nə̀, 9“Waa u loʼ u loʼ fa n tuʼu mə nbaa mə ntaa nsə tsəghə tə təbəghə. A kee loʼ nə̀ u ka kɔʼ ngələ dzə ni ghəŋə ghə i loʼ zə ghi ghə̂ ghən adzəm.”

10Yeso n dza nə̀, “Doʼlə naŋa tsu na ghə.” Ghî kə â ngii loʼ fu n luʼu kə tii kə. Sey, ghə̂ ghey ghə n doʼo tsu. Gheynum ghə â loʼ fu tə a loʼ təkam tətaa. 11Yeso n daŋŋə ney kɔʼ kəbaa, fuu ndòw zɔŋɔ K-a-zə̀, dzaw fu ndòw tə̀ ghə̂ ghey ghə â doʼnə fu. Tə n ghəŋə tsu soʼo ighələ ghi tsəghə tey, ghə̂ ghən adzəm n keeli ufəzəə ndəm tə ghə ləghənə. 12Ambə ghə zə̂ kow tsunə, Yeso n dza ndòw tə̀ ngəd tə wi tə nə̀, “Kûmmə bə na boʼo mey n doʼo səənə, kə̂ a nə̂ nyabə maʼanə fə̂ kə loʼ kə.” 13Sey, ghə n zuŋŋə bə boʼo mey ghə̂ ghə â zə̂ sənə n baa wey utaa, mə n shi kɔʼ ukhəə ighəm n khəə wə ubəghə.

14Nghee tə̀ nɔɔ kə aghə̂ kən koʼ tsunə ndzoʼo faalə mən Yeso â ghəŋŋənə, ghə n dza, “Wù wən ndzəm loʼ Wù tûm Kəzə̀ wey tə â khənə ni bə fa mbi.”

15Yeso n koʼ tɔb kɔʼ nə̀ ghə ləghə ni bə kwu wi nə kədaʼa, ghə tsuʼ wi tə a loʼ kədə̀ŋ, sey tə n nuu kɔʼ dzəŋŋə ndòw nə ukaʼ, doʼo ndòw fu n nəŋə wi.

Yeso bwey n tow kə mmuu n nyi i Galili

(Mat 14.22-33; Mak 6.45-52)

16Ambə n nəŋə i fənə tə, ngəd tə Yeso tə n nuu tsu ndòw n nguŋ ə nyi i Galili, 17nyi kɔʼ nə kəfə̀n, nuu ndow n daŋ zə n Kapenum. Tsuʼ wə n dzə bə nə̀ Yeso ka kam bə təmdzəŋi ngəd tə wi tə. 18Nghee tə ghə ndownə, zəŋ i taw i loʼ zə n kaʼ ni tsəghə, fə̀nnə shiə kɔʼɔ dzuu. 19Ambə ghə bàŋ nyi nay ndòwnə fə̀n kə tə a loʼ tam tə ji tətaa nkee tətuubə n fə̀ŋ ə inyi, ghə n koʼ Yeso tə bwey bənə n tow kə inyi, bəghə n səə kəfə̀n. Tsəŋ zə n kwu ghə. 20Yeso n dza ndòw tə̀ ghə nə̀, “Ka na tsəŋ dzə, a loʼ Mə.” 21Sey, ghə n ney nyi kɔʼ bə wi nə kəfən n wû i nyûmə zə. Ambə tə nyi kɔʼnə, ghə n koʼ kə nə fən kə n ghaʼi ndòw nyi n nguŋ i dzuu zey ghə mə ndòwnə tii.

Ghə̂ a kəŋə Yeso

22Tsətsə wey, nɔɔ kə aghə̂ key kə â doʼo səənə n nguŋ inyi i loʼ zey n taa moʼlə tsu nə̀ a mə loʼ kə kəfən kəmɔʼ fu n nguŋ inyi. Ghə n taa moʼlə tsu soʼo nə̀ Yeso â ka nyi dzəŋi dzə ghi ngəd tə wi tə, nsə nə̀ ngəd tə wi tə â nuu naŋa sə tsu wi. 23Fən u loʼ wə, wə â nuu bə n Tiberia n ndow bə fu n nguŋ inyi n səə luʼu key Mûkəbii â buulənə fəzəə wə tii, fuu tə nɔɔ kə aghə̂ kə, ghə n zə̂. 24Nghee tə̀ nɔɔ kə aghə̂ kə koʼ tsunə nə̀ Yeso way fu nə kəfən, nsə nə̀ ngəd tə wi tə way soʼo fu, ghə n ndòw nyi kɔʼ n fə̀n wey, nuu ndow n daŋ zə n Kapenum ghə kəŋə ndòwnə wi.

Yeso loʼ baa key kə fuunə muu zə

25Ambə ghə̂ ghey bə koʼ bənə Yeso n nguŋ inyi i loʼ zey, ghə n bəb tə̀ wi nə̀, “Wù dii, wə fa bə nyi zeeli.”

26Yeso n dza ndòw tə̀ ghə nə̀, “N kuum dza bə isəŋə tə̀ ghaa nə̀ ghaa mə kəŋə dzə way bòʼ faalə mey ghaa mə koʼnə mə n ghəŋənə, ghaa mə kəŋə bòʼ baa wey ghaa zə̂ kow tsunə. 27Kə̂ ghaa nə̂ fwaʼanə ni keeli fəzəə wey u loʼnə ni bəb, fəd fwaʼ na ni keeli fəzəə wey u doʼlə tsalinə. À wey loʼ fəzəə wey Waa wù sɔŋtsuʼ î fuunə tə̀ ghaa, boʼ nə̀, Bày, tɔŋŋə Kəzə̀ n kuu naŋa tsəə wi n kow wi.”

28Ghə n bəb tə̀ wi nə̀, “Ghey loʼ ni ji ngee tə ghey loʼ ni ghəŋŋə ghəə ghey Zə̀ kə ləghənə ə?”

29Yeso n beeli ndòw ghə nə̀, “Ghəə zey Zə̀ kə ləghənə nə̀ ghaa ghəŋə, a loʼ nə̀ ghaa bəghəm tə̀ wù wey tə tûm bənə.”

30Ghə n dza tə̀ wi nə̀, “Dii bə ghey n tsəə i loʼ zə tə ghey loʼ ni koʼ, ghey bəghəm fu tə wɔ. Wə î nya dii bə tsəə i ghaa zə ə?” 31Ghə n dza kpiʼi ndow tə wi nə̀, “Ghə bày bày a ghey ghə â zəə tsə fəzəə wey ghə tɔŋŋənə nə̀ a loʼ mana#6.31 Mana loʼ fəzəə wən Zə̀ kə â fuu tsu bənə tə̀ ghə̂ ghə Izree ghə n nəŋə zey ghə â loʼ nə n mbvən ə ntsaŋ. n mbvən ə ntsaŋ, tə̀ màʼlə K-a-zə̀ kə dzanə nə̀, ‘Tə â fuu ghə n baa kə, kə nuu tsu bənə idəŋ nə̀ ghə zə̂.’”

32Yeso n dza ndòw tə̀ ghə nə̀, “N kuum dza bə isəŋə tə̀ ghaa nə̀, â way dzə Mushi tə â fuunə ghaa n baa kən kə nuu tsuu bənə idəŋ, â loʼ Bày wuŋ tə â fuunə ghaa n ndzəm ndzəm k-a-baa kən kə nuu tsuu bənə idəŋ. 33I loʼ nə̀, baa key Zə̀ kə fuunə loʼ wù wey tə tsuu bənə idəŋ, a loʼ baa kə tii kə, kə fuunə muu zə tə̀ mbi idzəm.”

34Ghə n dza ndòw tə̀ wi nə̀, “Mûkəbii, i fuu bə ghey n baa kə tii kə nəŋə tədzəm.”

35Yeso n dza ndòw tə̀ ghə nə̀, “N loʼ baa key kə fuunə muu zə, wù wey tə bə doʼo bənə ghi mə̀ nə̂ dey koʼ way dzəŋ. Ghə̂ ghey ghə bəghəmnə tə̀ mə̀ fə̀ŋ ə mmuu nə zuʼlə koʼ way ghə. 36N mâ dza tə̀ ghaa nə̀ ghaa n mə koʼ, ghaa u nam ləghə way ni bəghəm tə̀ mə. 37Ghə̂ ghey adzəm Bày wuŋ fuu naŋanə tə̀ mə, î teeli bə doʼlə ghi mə. Abə wù bə doʼo bənə ghi mə, mə î dzum nuu koʼ way wi. 38N ghəə ghən dza n təŋkey n ka nuu tsu bə dzə idəŋ ni bə ghəŋə ghəə ghey n ləghənə, n fəd nuu tsu bə ni bə ghəŋə ghəə ghey wù wey tə tûmnə mə, ləghənə. 39À wən loʼ ghəə zey wù wey tə tûmnə mə ləghənə, tə ləghə nə̀ n tɔʼ kwu keeli tsu ghə̂ ghey tə fuu naŋanə tə mə, kə wù umɔʼ nə naynə tii, n nə̂ zhəm dzəŋŋə bə ghə nə ivə n tsuʼ fey mbi nə maynə tii. 40I loʼ sey kuum nə̀, ghəə zey Bày wuŋ ləghənə loʼ nə̀ ghə̂ ghey ghə koʼnə Waa, bəghəm fu tə̀ wi, ghə keeli muu zə itsali. Mə i zhəm dzəŋŋə bə ghə n tsuʼ fey mbi nə̂ maynə tii.”

41Ghə̂ a Təjuu ghə n kaʼ ni nyuŋŋə ghɔɔmə n wû i ghə bòʼ wi kuumnə tə â dza nə̀, “N loʼ baa key kə nuu tsu bənə idəŋ.” 42Ghə n dza, “À wən way Yeso waa Yosef ə? A khənu bày wi ghi nay wi, tə sə̀ loʼ ngee ni dza nə̀ tə nuu tsu bə idəŋ ə?”

43Yeso n dza ndòw tə̀ ghə nə̀, “Buu naŋa na ghəə ghey ghaa nyuŋŋə ghɔɔmənə fey n wû i ghaa. 44Wù maŋ way dzə ni bə doʼo dzə ghi mə, à may kə nə̀ a wi ney bə Bày wey tə tûmnə mə. Sey mə î zhəm dzəŋŋə bə wi, tə keeli imuu n tsuʼ fey mbi nə̂ maynə tii. 45I loʼ n maʼlə key tûm tə Kəzə̀ tə â tɔ̀ɔ naŋa nə̀, ‘À loʼ Kəzə̀ kə î diinə ghə̂ ghə adzəm n ghəə ghə’. Ghə̂ ghey ghə zownə ghɔɔmə i Kəzə̀ zə̀, zoʼlə aghəə n wɔ wi, i bə doʼlənu ghi mə. 46Wù loʼ way dzə fa n mbi tə loʼnə nə̀ tə n koʼ koʼ tsə Bày a may kə way tə wey tə shi tsu bənə n səə Zə̀ kə, à loʼ kə wi tə loʼnə nə̀ tə n koʼ koʼ tsə Bày. 47N dza bə isəŋə tə̀ ghaa nə̀, wù wey tə bəghəmnə tə mə, tə î keelinu muu zə itsali zə. 48N loʼ baa key kə fuunə muu zə. 49Ghə bày bày a ghaa ghə â zə̂ə mana n mbvən ə ntsaŋ, ghə n nam kpuulə. 50Baa kən n kee dzanə, loʼ baa key kə tsu bənə idəŋ, wù wey tə zə̂nə baa kə tii kə, nə̂ kpu koʼ way. 51N loʼ baa key kə fuunə muu zə, kə key kə shi tsu bənə idəŋ. Wù wey tə zə̂nə baa kə tii kə î keeli muu zə itsali. Baa kən n fuunə loʼ wû wuŋ. N fuu ni kùmshi tow u ghə̂ a mbi nə̀ ghə keeli muu zə itsali.”

52Ghə̂ a Təjuu ghə n kaʼ ni baŋŋə təfəghəm n wû i ghə dza nə̀, “Wù wən loʼ ngee ni fu bə wû u wi nə̀ a zə̂ ə?”

53Yeso n dza ndòw tə̀ ghə nə̀, “N dza bə isəŋə tə̀ ghaa nə̀ abə wù ka fə wû u Waa wù sɔŋtsuʼ, mə̂ kɔʼ soʼo kaŋ tə wi tən tə i fəələnə, tə î keeli dzə way muu zə itsali zə. 54Ghə̂ ghey ghə fəənə wû wuŋ wə, mə̂ soʼo kaŋ tuŋ tən mə i fəələnə, i keeli muu zə itsali. Mə̀ i zhəm dzəŋŋə bə ghə n tsuʼ fey mbi nə̂ maynə tii. 55I loʼ nə wû wuŋ u loʼ fəzəə u səŋi wə, kaŋ tuŋ tən n fəələnə, baa ndzəm loʼ soʼo nlə n səŋi mə. 56Ghə̂ ghey ghə fə̂nə wû wuŋ wə, mə̂ soʼo kaŋ tuŋ tən n fəələnə, ghə i muu ghi mə, mə i muu soʼo ghi ghə. 57Bày wən tə tûmnə mə loʼ Bày wən tə fuunə muu zə. Nghee tə n muunə bòʼ muu zən tə fuunə tə̀ mə, à loʼ ighələ ghi wù wey tə fə̂nə wû wuŋ wə, tə i muulənə bòʼ muu zən mə i fuunə tə̀ wi. 58À wən loʼ baa kən kə tsu bənə idəŋ. Kə way dzə tə̀ a loʼ baa key ghə bày bày a ghaa ghə â zə̂ə tsənə. Ghə â zə̂ənu, ghə n nam kpuulə. Wù wey tə kee zə̂nə baa kən î keeli muu zə itsali.”

59Yeso â dza ghəə ghən adzəm n nəŋə zey tə â diinə ghəə ghə n ndaw kədzəŋi ghə̂ a Təjuu n naʼ i Kapenum.

Ndəmə dzûmə tə Klisto tə tuu ni kəm dzûmə wi

60Ambə ngəd tə Yeso tə zow tsunə ghəə ghən, ndəmə ghə n dza, “Ghɔɔmə zən ngii tawnu ni dzûmə, à loʼ ndee ni bəghəm ni ghəŋə ghəə ghən ə?”

61Yeso n koʼ tɔb kɔʼ nə̀ ngəd tə wi tə nyuŋŋə ghɔɔmə kaabə bòʼ ghəə ghən. Tə n bəb tə ghə nə̀, “Ghɔɔmə zən i fəmmənu ghaa ə? 62Abə à mə̀ baa loʼ nə̀ ghaa koʼ ndòw Waa wù sɔŋtsuʼ tə kɔʼɔ dzəŋŋə ndòwnə n luʼu key tə nuu bənə tii, tə ghaa mə ji ngee? 63À loʼ Zay K-a-zə̀ kə fuunə muu zə, daʼa kə wù sɔŋtsuʼ kə maŋ loʼ kənunu. Ghɔɔmə zən n ghɔɔmə bənə tə̀ ghaa, nuu bə n wɔ Zay K-a-zə̀, kə fuunə muu zə. 64Nghee tə n tsəm dza kənə ghəə ghən, ghaa a loʼ a nam bəghəm way.” Yeso â khə zeynu ghə̂ ghey ghə loʼ nə̀ ghə î bəghəm way nsə wù wey tə î fìilə shiənə wi. 65Tə n dza kpiʼi tsu nə̀, “À wən loʼ ghə i tii zə mə â dzanə tə̀ ghaa nə̀, wù way dzə ni bə doʼo ghi mə nə̀ Bày wuŋ ka bəghəm nə̀ tə doʼo ghi mə.”

66Ambə dzûmə tə Yeso tə zow tsunə ghəə ghən, ndəmə ghə n zəghə tsu wi, kəm dzûmə way wi. 67Sey tə n bəb ndòw tə ngəd tə wi tey ighəm n ghi tə təbəghə nə̀, “Abə ghaa, ghaa ləghə soʼonu ni nuu ə?”

68Shimun Pita n beeli wi nə̀, “Mûkəbii, ghey kəm loʼ ni ndòw n səə ndee? À loʼ wɔ, wə khənə ghɔɔmə zey i fuunə muu zə itsali zə. 69Ghey n bəghəm, ghey n zowkeeli soʼo nə̀ wə loʼ Wù Kəzə̀ u zow wə, Zə̀ kə tûm bənə.”

70Yeso n beeli ndow ghə nə̀, “À loʼ mə, mə â sày kɔʼnə tow ghaa wə ighəm n ghii wə ubəghə, a kee loʼ nə̀ wù umɔʼ loʼ n fəŋŋə kə ghaa nə̀ a loʼ avəətsəə.” 71Tə â sey ghɔɔmə kuum Judas, waa Shimun Iskaliɔt. Təŋkey nghee tə̀ Judas â loʼ kənə n ngəd umɔʼ n ngəd tə wi tən ighəm n ghii tə təbəghə, tə â khə ni fìi fu Yeso.

Currently Selected:

Jɔn 6: WEH

Highlight

Copy