Jɔn 7

Waazə a Yeso a ləghə nə̀ tə ndow n Judeya

1Ambə Yeso zə̀ghə̀ tsunə Kapenum, tə n bwey kaabə kə n mboʼo Galili, tə n ləghə way ni ndow n mboʼo Judeya, n təŋkey, ngəd tə Təjuu tey fu â kəŋə jìi ni wey wi. 2À n loʼ nə̀ zə̂ kə ghə̂ Təjuu kə loʼ kə ghə tɔŋŋə nə̀ a loʼ zə̂ kə Nfəə kə nya kuʼlə may bənu.#7.2 Zə̂ kə nfəə kə â loʼ Zə̂ key ghə̂ a Təjuu ghə â zə̂ə tsənə num tə num ni moʼlə bə nəŋə zey ghə â muu tsənə nə nfəə n mbvən ə ntsaŋ. 3Sey, waazə a Yeso ghə n dza tə̀ wi nə̀, “Nuu tsu fa, wə kɔʼ ndòw n Judeya, tə̀ dzûmə tey fu mbɔŋ koʼ ghəə ghey wə fwaʼanə. 4I loʼ nə̀, wù wey tə ləghənə nə̀ zɔŋ u wi wə i fuŋu, tə nyìə ghəŋŋə dzə way ghəə a wi ghə. Nghee tə wə ghəŋŋənə ghəə ghən, i dii shiə bə wû wə wə̀, tə ghə̂ a mbi a keeli fə key wə loʼ ghii kə.” 5Ghə â dza ghəə ghən, bòʼ nə̀, wû i waazə a wi, ghə ka tə wi bəghəm dzə.

6Yeso n dza ndòw tə̀ ghə nə̀, “Nəŋə zey n khə ni ndow tii ka kam kpii dzə, abə ghaa, ghaa loʼ ni ndow n nəŋə zey ghaa ləghənə. 7Ghə̂ a mbi a khə way zùŋ kə ni baa ghaa, ghə kee baa mə, n təŋkey, n tiilə dza nə̀ ghəə a ghə a ghəŋŋə a loʼ ghəə a bəbə ghə. 8Ndòw na nə̀ kəzə̂, mə î ndòw dzə way, n təŋkey, nəŋə zuŋ i ndòw i ka kam kpii.” 9Tə n dza tsu sey, doʼo səə ndòw n Galili.

Yeso dii aghə̂ n ghəə ghə n zə̂ kə Nfəə

10Ambə waazə a Yeso a nuu kɔʼ ndòwnə nə kəzə̂, tə n nuu kɔʼ ndòw soʼo. Tə â ka kee bə dzə n mgbaŋ, tə â fəd tsìilə bənu. 11Nghee ghə loʼnə nə kəzə̂, ngəd tə Təjuu tə n kəŋə wi fu, bəbə tə̀ ghə̂ ghə nə̀, “Ghaa koʼnu Yeso wey fa a?”

12Ndəmə aghə̂ ghə n tsɔŋɔ ghɔɔmə n wû i ghə bòʼ wi. Ghə̂ a loʼ ghə n dza nə̀, “Tə loʼ wù dzuŋu wə.” À loʼ ghə n kee dza nə̀, “Ngaŋ! Tə sìi ndzəŋŋə aghə̂.” 13Ghə n ghɔɔmə sey, kee ghɔɔmə shiə kɔʼɔ way n mgbaŋ, n təŋkey, ghə â tsəŋə ngəd tə Təjuu.

14Ambə ghə zə̂ kəŋə ndòwnə tsuʼu n kəzə̂ mə kùm ndow n fə̀ŋ, Yeso n nuu kɔʼ ndòw n Ndaw Kəzə̀, kaʼ ndòw ni dii aghəə. 15Dzuu zə n zum ngəd tə Təjuu n ghɔɔmə i wi, ghə n bəbə nə̀, “Wù wən lɔʼlə keeli ngee ghəə ghən adzəm nə̀ tə ka ndow n ndaw kəmàʼlə ə?”

16Yeso n beeli ndòw ghə nə̀, “Ghəə ghən n diinə, way dzə ghəə ghuŋ a ngəŋ ghə, a loʼ ghəə a Zə̀ key kə tûmnə mə. 17Wù wey tə ləghənə ni ghəŋŋə ghəə ghey Zə̀ kə ləghənə, tə i keelinu nə̀ ghəə ghən n diinə fa, a nuu bə n wɔ Zə̀ kə mɔ n ghɔɔmə n ngəŋ zuŋ ə. 18Wù wey tə ghɔɔmənə n ngəŋ ə wi sey ləghə nə̀ ghə̂ ghə i fuu bə wi n kɔʼlə mə. Wù wey tə kee ləghənə ni fuu kɔʼlə mə tə wù wey tə tûmnə wi, ghɔɔmə kə isəŋə, wù tii badla soʼo way ghəə ghə. 19Mushi mâ fuu ghaa n laŋ kə, a kee loʼ nə̀, wù ghaa umɔʼ way dzə tə naŋŋənə laŋ kə tii kə. Ghaa mə kəŋə kaabə tsə ni wey bòʼ kee?”

20Nɔɔ kə aghə̂ key kə n dza nə̀, “Wə khə zay kə bwu kə n kow wɔ. À kəŋə ndee jii ni wey wɔ ə?”

21Yeso n beeli ndòw ghə nə̀, “Mə â maŋ ghəŋə tsu kə ghə i faalə zə imɔʼ, dzuu zə n zum nay ndòw ghaa n ghə i tii zə. 22Mushi â fuu ghaa n laŋ kə ni səghə tyi kə waa kə. Â way dzə Mushi tə â baa kaʼnə ghəə a tii ghə, â kaʼ bə ghə bày bày a ghaa. Ghaa nya ney naŋa kɔʼ nə̀ ghaa nya khə ni səghə tyi kə waa kə n tsuʼ inaʼ. 23Abə ghaa səghə tyi kə waa kə n tsuʼ inaʼ bòʼ nə̀ ghaa ləghə way ni bwuulə maʼa laŋ kə Mushi, a kee loʼ kee ghaa fəələnə nəghə wə ghi mə a dza n baŋŋə wû u wù udzəm n tsuʼ inaʼ a? 24Kə̂ ghaa nə̂ saʼanə wù nə̀ ghaa laalə ndow tûm usə̂, i saʼa ndòw na wù n jìi zey i loʼnə tsətsəghə.”

À loʼ Yeso wù wey Zə̀ kə â dza naŋa nə̀ i tûm bənu ə?

25Ghə̂ a Yerosalem a loʼ ghə n bəbə nə̀, “À wən way wù wey ngəd tə Təjuu tə kəŋənə jìi ni wey wi ə? 26Koʼo ndòw na, tə wey tə ghɔɔmənə n mgbaŋ, ghə u dza way wi n ghə i loʼ zə. I loʼ ni doʼo nə̀ ngəd tə saa tə khənu nə̀ wù wən ndzəm loʼ wù wey Zə̀ kə â dza naŋa nə̀ i tûm bənu ə? 27Wù wən way dzə wù wey Zə̀ kə â dza naŋa nə̀ i tûm bənu, n təŋkey, saa khənu luʼu key tə shinə tii. Abə wù wey Zə̀ kə â dza naŋa nə̀ i tûm bənu i bə nə̀, wù loʼ i keeli dzə way luʼu key tə shinə tii.”

28Nghee tə̀ Yeso diinə ghəə ghə n Ndaw Kəzə̀ i nii zə, tə n naʼa shi kɔʼ n dzə̂ i taw zə nə̀, “Ghaa khənu mə, ghaa u khə soʼonə luʼu key n shinə tii, a kee loʼ nə̀ n ka bə dzə n daʼa kuŋ. Wù wey tə tûm bənə mə loʼ wù wey tə ghɔɔmənə isəŋə, ghaa kee khə way wi 29N kee khə wi, n təŋkey, n nuu bə n səə wi, a loʼ wi tə tûmnə mə.” 30Ambə ghə zow tsunə ghəə ghən tə dzanə, ghə n zey ni kəŋ jìi ni kwu wi, wù umɔʼ n kee way ni gaʼ kəwɔɔ n kow wi, n təŋkey, nəŋə zə â ka kam bə dzə tə ghə ni kwu wi. 31À kee loʼ nə̀ ndəmə aghə̂ n nɔɔ k-a-ghə̂ key mâ bəghəm tə̀ wi. Ghə n dza, “Abə wù wey Zə̀ kə â dza naŋa nə̀ i tûm bənu î bənə, ghaa moʼonə tə î diinu tsəə tə, tə tsəghəshinə tə tən wù wən dii naŋanə ə?”

Ghə tûm təsawgoʼ nə̀ ghə bə kwu Yeso

32Ghə̂ a tə Falasi ghə n zow tsu nghee tə̀ ghə̂ a tsɔŋɔ ghɔɔmə kaabənə ghəə ghən bòʼ Yeso, sey ghə n təmdzəŋi kɔʼ ghi ghə fɔɔngili a nii ghə, tûm tsu ghə̂ a keyyə ghə nə̀ ghə ndòw kwu Yeso. 33Yeso n dza, “N khə kə tɔŋɔ fə inəŋə ni doʼo kəŋə ndow ghi ghaa, mə i daŋŋə nuu ndòw n səə wù wey tə tûmnə mə. 34Ghaa i kəŋə mə ghaa i way ni koʼ mə, n təŋkey, luʼu key n loʼnə tii, ghaa ndɔm way ni bə fu.”

35Ngəd tə Təjuu tə n zey ndòw ni ghɔɔmə n wû i ghə nə̀, “Tə dza i boʼo ndòw ghee, saa î way ni kəŋ koʼ wi ə? Tə moʼlə ni ndow n naʼ i Grik, n luʼu key ghə̂ a saa a muu kaabənə tii ni dii ndòw ghə̂ a Grik ghə ə? 36Tə dza tsu fa nə̀, ‘Ghaa i kəŋə mə ghaa i way ni koʼ mə’, nsə nə̀, ‘Luʼu key n loʼnə tii, ghaa ndɔm way ni bə fu.’ I sey dii nə̀ ngee?”

Yeso dza nə̀ i loʼ sə̂ i dzùu zən i fuunə muu zə itsali zə

37Tsuʼ fey zə̂ kə nfəə kə â maynə tii â loʼ tsuʼ fə nii fə. Yeso n nuu təmi kɔʼ idəŋ, naʼa shi kɔʼ n dzə i taw zə nə̀, “Wù wey fə̀ŋ ə mmuu zuʼlənə wi, tə bə n səə mə. 38Wù wey tə bəghəmnə tə̀ mə, tə bə mə̂, n təŋkey màʼlə K-a-zə̀ kə dza nə̀, ‘Mmuu mey n fuunə muu zə itsali zə, i bənə shiə bə n fə̀ŋ ə wi tə a loʼ fədzuu.’” 39Yeso â ghəə ghən a dza bòʼ Zay kə Zow key ghə̂ ghey ghə bəghəmnə tə̀ wi î keelinə. Â loʼ n nəŋə i tii zə nə̀ Zə̀ kə ka kam tûm dzə Zay kə Zow kə tə̀ ghə̂ ghey ghə bəghəmnə tə̀ wi, n təŋkey, Zə̀ kə â ka kam kɔʼlə dzə̂ Yeso n ghaʼ i wi.

40Ambə ghə̂ a loʼ a zow tsunə ghəə ghən Yeso dzanə, ghə n dza, “Wù wən ndzəm loʼnu Wù tûm Kəzə̀.”

41Ghə̂ a loʼ ghə n dza, “Tə loʼ wù wən Zə̀ kə â dza naŋa nə̀ i tûm bənu.” A loʼ ghə n kee dza, “Wù wey Zə̀ kə â dza naŋa nə̀ i tûm bənu, way dzə ni shi n Galili. 42Màʼlə K-a-zə̀ kə dza nə̀ wù wey Zə̀ kə â dza naŋa nə̀ i tûm bənu î loʼ waa a waa a Fɔɔ Devid. Ghə i jiə wi n naʼ i Betelehem, n naʼ zey Devid â shinə tii.” 43Sey, nɔɔ kə aghə̂ key n dzawwə doʼo tsu n moʼlə tə ghə bòʼ Yeso. 44Ghə̂ a loʼ ghə n ləghə ni kwu wi, wù umɔʼ n ka kee gaʼ kəwɔɔ n kow wi.

Ngəd tə Təjuu tə tuu ni bəghəm tə̀ Yeso

45Nghee tə ghə̂ a keyyə ghey ghə â tûmnə nə̀ ghə ndòw kwu Yeso dzəŋŋə ndownə, ghə fɔɔngili a nii ghə nsə ghə̂ a tə Falasi ghə n bəb tə̀ ghə nə̀, “Ghaa ka ney bə wi nə̀ a loʼ kee?”

46Ghə̂ a keyyə ghey n dza nə̀, “Wù loʼ ka kam ghɔɔmə koʼ tsə ghəə ghə tə̀ a loʼ wù wey.”

47Ghə̂ a tə Falasi ghə n bəb ndòw tə̀ ghə nə̀, “Tə n ghaa nəb fu soʼo ə? 48Ghaa n koʼ koʼ tsə ngəd u loʼ wə nkee wù Falasi u loʼ wə tə bəghəmnə tə̀ wi ə? 49À kee loʼ nə̀ nɔɔ kə aghə̂ key buʼ khə way laŋ kə Mushi kə, Zə̀ kə n ghə ləŋ naŋa.”

50Nikodemus, wù Falasi wey tə â ndòw koʼnə Yeso n tsuʼu tə, n bəb ndòw tə̀ ghə̂ a tə Falasi a loʼ ghey nə̀, 51“Laŋ kə saa kə diinu nə̀ a tsəʼlə saʼ n kow wù nə̀ ghə chɔd wi nə̀ a ka kəŋ shi kɔʼ dzə ghəə zey tə ghəŋə bəəbənə ə?”

52Ghə n beeli ndòw wi nə̀, “Wə shi soʼo n Galili ə? Tɔʼɔ kəŋ shi kɔʼ n màʼlə K-a-zə̀, wə i koʼ tsu nə̀ Wù tûm Kəzə̀ u loʼ u nə shi koʼ way n Galili.”#7.52 Maʼlə u wey u loʼ u khə way maʼlə kə Jɔn kə nə ukə̀m usəghəmbəghə nə təghələ nghəm ntaa n ghii tə tətəghə ndow kùm ndow nə ukə̀m ifam nə təghələ ifam n ghii zə imɔʼ.

53Sey, ghə adzəm, n sali nuu ndòw n ndaw tə ghə.

Currently Selected:

Jɔn 7: WEH

Highlight

Copy