Matyo 18
18
Wù wey tə loʼ wù nii n Fɔɔ u Kəzə̀
(Mak 9.33-37; Luk 9.46-48)
1N nəŋə zey Yeso ghi ngəd tə wi tə â loʼnə n Kampenum, ngəd tə Yeso tə n bə n səə wi bəb tə̀ wi nə̀, “À loʼ ndee wù nii n fɔɔ wə idəŋ ə?”
2Ambə Yeso zow tsu sey, tə n tɔŋɔ bə winətəghə u loʼ wə, teyyə naŋa tsu wi n sə kə ghə, 3dza tə̀ ghə nə̀, “N kuum dza bə tə̀ ghaa nə̀, a may kə nə̀ ghaa kwey kɔʼnu, doʼo tsu tə̀ a loʼ aghinətəghə, ghaa nə̂ way ni nyi n fɔɔ wə idəŋ. 4Wù wey tə zûmmə tsunə wû u wi wə tə̀ a loʼ waa wən, a loʼ wi tə loʼnə wù nii n fɔɔ wə idəŋ. 5Wù wey tə kpii neynə nyaŋi fə waa fə tə̀ a loʼ tə wən n zəd zuŋ, tə sey kpii ney soʼo mə̀.”
Ghəə ghey a chimmənə wù nə̀ tə ghəŋə bəb
(Mak 9.42-48; Luk 17.1-2)
6Yeso n dza tə̀ ghə nə̀, “Abə wù loʼ kee chimmənə nyaŋi mə n waa mən n bəghəmnə tə̀ mə nə̀ n ghəŋə bəb, dzɔb loʼ nə̀ ghə ney kɔʼ tay i nii zə, ghə kow kɔʼ n mwey u wi, ghə maʼa nyi tsu ndòw wi n fə̀ŋ ə inyi tə kuŋ fu.
7Ngoʼ loʼ fa n mbi bòʼ ghəə ghən a chimmənə ghə̂ ghə nə̀ ghə i ghəŋŋə bəb zə. Ghəə a tii a khə ni teeli shi, a kee loʼ nə̀, ngoʼ loʼ tə̀ wù wey tə chimmənə ghə̂ ghə nə̀ ghə ghəŋə ibəb. 8Abə wɔɔ kə nkee fuu kə kə̀ chimmənə wɔ nə̀ wə̀ i ghəŋŋə ghəə a bəbə ghə, khə̀ə nuu kɔʼ, wə say maʼa ndow. I baa dzɔbə nə̀ wə keeli muu zə itsali nə̀ wə khə kəwɔɔ kəmɔʼ nkee kəfuu kəmɔʼ, tsəghəshi tə̀ wɔ ni keeli awɔɔ a bəghə nkee ifuu i bəghə, wə fəd nyi ndòw n vəllə wey u nəmmə tsə way. 9Abə sə̂ zə i chimmənə wɔ nə̀ wə i ghəŋŋə ghəə a bəbə ghə, bɔʼi nuu shi bə, wə maʼa ndòw. I baa dzɔbə nə̀ wə zə̂ itsali nə̀ wə khə isə̂ imɔʼ tsəghəshi tə̀ wɔ ni keeli sə̂ ghə abəghə, wə̀ fəd nyi n luʼu key vəətsəə a chɔdlɔnə ghə̂ ghə fu nə̀ vəllə wey fu, u nəmmə tsə way.”
Ghɔɔmə i fənkəfən bòʼ njì zey zə â naynə
(Luk 15.3-7)
10Yeso n dza kpiʼi ndow tə ngəd tə wi tə nə̀, “Kə̂ ghaa nə̂ koʼo kìinə nyaŋi mə awaa mən. N dza bə isəŋə tə̀ ghaa nə̀, tsətəndəghə tə ghə tə loʼ tən n səə Bày idəŋ. 11[Waa weynum bə ni bə bəghəshi ghə̂ ghey ghə laʼanə.]#18.11 Maʼlə u wey u loʼ u khə way ghəllə zən.
12Ghaa moʼlə nə̀ ngee? Abə wù khənə njì tə fəbɔm, imɔʼ nay tsunə n njì tə tii tə. Tə î jiə tsu ngee? N dza tə î naŋŋə taʼa tsu tə loʼ tən nghəm ntaandzuu n ghii tə tətaandzuu nə ukaʼ, tə ndòw kəŋ ney bə i zey i naynə ə? 13Abə tə ndòw koʼ tsunə, n kuum dza bə tə̀ ghaa nə̀ tə n duʼlə nay ndòw ghi njì i zən imɔʼ, tsəghəshi ghi njì tə loʼ tey nghəm ntaandzuu n ghii tə tətaandzuu tə mə ka nay. 14À loʼ ighələ ghi Bày ghaa idəŋ, tə ləghə way nə̀ waa wi u loʼ u nay.”
Ghəə zey ndaw Kəzə̀ loʼ ni ghəŋə tə̀ wù wey tə ghəŋənə bəb
15“Abə waazə wə ghəŋənə ghə i bəbə zə tə̀ wɔ, ndòw n səə wi, wə dza ndòw ghəə zey tə ghəŋə bəəbənə nə̀ ghaa loʼ kə tow ghaa ubəghə. Abə tə zownə ghɔɔmə zə zə̀, i sey dii nə̀ wə n keeli dzəŋŋə waazə wə. 16Abə tə ka kee zəllə tə̀ wɔ, ney kɔʼ wù umɔʼ nkee aghə̂ abəghə wə ndòw ghi ghə n səə wi, sey nə̀, n ghɔɔmə zə, ghə̂ a doʼo tsu abəghə nkee atəghə ghə loʼnə ni təmi tiilə. 17Abə tə ka nam zow tə̀ ghaa, ney ndòw ghə i tii zə tə̀ ghə̂ a Ndaw Kəzə̀ ghə, tə ghə saʼ bə. Abə tə ka nam zow tə̀ ghə̂ a Ndaw Kəzə̀ ghə, ney ndòw na wi tə̀ a loʼ wù wey tə ka bəghəm tə Zə̀ kə, nkee wù kwɔɔ u màʼlə kə tsow kə.”
Ghəə zey ghə bəghəmnə nsə i zey ghə ka bəghəm
18Yeso n dza tə ngəd tə wi tə nə̀, “N kuum dza bə tə̀ ghaa nə̀, ghəə zey ghaa bəghəm naŋanə fa n mbi, ghə i bəghəm naŋŋə soʼonu idəŋ, i zey ghaa tuu maʼanə fa n mbi, ghə i tuu maʼa soʼonu idəŋ.
19N kuum dza kpiʼi bə tə̀ ghaa nə̀, abə tow u ghaa ubəghə u bəghəm dzəŋi kɔʼnə ghəə zə a ghəlitsə, dza ndòw tə̀ Zə̀ kə nə igɔŋŋə, Bày wuŋ idəŋ i ghəŋŋənu ghə i tii zə tə̀ ghaa. 20Bòʼ nə̀, luʼu key ghə̂ a zuŋŋə doʼonə abəghə nkee atəghə n zəd zuŋ, mə n loʼ fu n fəŋŋə kə ghə.”
Wù kəfwaʼ wey tə neyzəə way bəb i wù zə
21Pita n bə bəb bə tə̀ Yeso nə̀, “Mûkəbii, a loʼ tənəŋə tə siʼi n loʼnə ni neyzəə bəb i waazə wuŋ abə tə ghəŋənə mə n ghə i bəbə zə ə? A loʼ tənəŋə təsəghəmbəghə ə?”
22Yeso n beeli ndòw wi nə̀, “N dza bə tə̀ wɔ nə̀ a way dzə tənəŋə təsəghəmbəghə, à loʼ nghəm n tənəŋə nsəghəmbəghə, nə tənəŋə təsəghəmbəghə.#18.22 77 nə tənəŋə 7.
23Sey, Fɔɔ u Kəzə̀ u loʼ tə̀ a loʼ də̀ŋ kə loʼ kə tə â ləghənə ni bayyə aghəə ghi ghə̂ a kəfwaʼ a wi ghə. 24Nghee tə̀ tə bɔɔmə kaʼ tsunə ni bayyə aghəə, ghə n ney bə wù kəfwaʼ a wi u loʼ wə tə â khənə Mûkəbii wi n bɔ̀m ndangaŋ nə kəndaŋ. 25Wù kəfwaʼ wey n khə way khəə wə ni tsə may ndaŋ kə wi, sey, də̀ŋ key n dza ghə fìi nuu ndòw wi tə̀ a loʼ kəkɔd, ghi wey wi, waa a wi nsə fə̂ u wi wə udzəm tə̀ ghə loʼ ni tsə ndaŋ kə tii kə. 26Wù kəfwaʼ wey n təm ndòw tənguʼ n tənə də̀ŋ key, buʼ wi n wɔɔ kə dza nə̀, ‘Fuu kpiʼi tsu mə n nyaŋi fə inəŋə fə a mûkəbii, mə i tsəə maynu wɔ.’ 27Də̀ŋ key n kwɔɔlə tsu soʼo isî n kow wù kəfwaʼ wey, kàa maʼa tsu ndaŋ kə wi, zəghə maʼa ndow soʼo wi nə̀ tə ndow nuu.
28Wù kəfwaʼ u mɔʼɔ wey n nuu shi ndòw, kpiilə tsu ghi wù kəfwaʼ u loʼ wə ghə â dzəŋi fwaʼanə, tə â khə wi n ndaŋ kə nə təkam ighəm. Wù wey n fəd zən kɔʼ n mwey u wi, dza tə wi nə̀, ‘Tsə may bə ndaŋ kuŋ kə.’
29Wù wey tə â dzəŋi fwaʼanə ghi wi n nyaʼa ndow aghəd, buʼ wi n wɔɔ kə dza nə̀, ‘Zəllə tsu kənu, mə i tsəə dzəŋŋə bənu wɔ.’
30Tə n tuu, fəd ndòw fii naŋa ndòw wi n ndaw tsaʼ nə̀ tə teeli tsə may bə wi. 31Ambə ghə̂ a kəfwaʼ a loʼ ghey koʼ tsunə ghəə ghən. Ghə n fəələ nay ndòw n fə̀ŋ, ndòw dza ndòw tə̀ mûkəbii ə ghə, ghəə zey i neynə bənə kə.
32Mûkəbii wey n tɔŋɔ tsu wi dza tə̀ wi nə̀, ‘Wə tɔʼ loʼ wù kəfwaʼ u bəbə wə! N mə kàa maʼa ndaŋ kə n təŋkey, wə mə buʼ mə n wɔɔ kə nə̀ n kàa maʼa tsu. 33Wə mə khə ni mbɔŋ kwɔɔlə soʼo isî n kow wù kəfwaʼ wey, tə̀ n mə kwɔɔlənə sî zə n kow wɔ.’ 34Ghə i tii zə n fə nay ndòw də̀ŋ key n fə̀ŋ, tə n ney fii naŋa ndòw wù kəfwaʼ wey n ndaw tsaʼ nə̀ ghə chɔd wi fu ni ndow kuum n nəŋə zey tə i tsəə maynə ndaŋ kə wi kə.”
35Yeso n daŋŋə dza nə̀, “À wən loʼ nghee Bày wuŋ idəŋ î ghəŋŋənə tii tə̀ ghaa abə ghaa neyzəə way ghəə a bəbə ghey waazə a ghaa a ghəŋŋənə tə̀ ghaa n fə̀ŋ tə ghaa.”
Currently Selected:
Matyo 18: WEH
Highlight
Share
Copy
Want to have your highlights saved across all your devices? Sign up or sign in
© 2022 CABTAL
