Matyo 19
19
Yeso dii aghə̂ kùm dzawwə zə iwû
(Mak 10.1-12)
1Nghee tə̀ Yeso dza may tsunə nghee tə̀ wù khənə ni neyzəə waazə tii, tə n nuu tsu fu n mboʼo Galili, nuu ndòw n mboʼo Judeya n nguŋ ə dzuu Jodan i loʼ zey. 2Nɔɔ kə aghə̂ kə n dzûmə ndòw wi fu, tə n baŋŋə ghə̂ ghey ghə â dzaŋanə fu n luʼu u tii wə.
3Ghə̂ a tə Falasi a loʼ ghə n ndòw bə n səə Yeso ni bə mɔm koʼ wi, dza tə̀ wi nə̀, “Laŋ kə saa kə bəghəmnu nə̀ wù tuu maʼa wey wi abə ghə i loʼ i shi kɔʼnə, nkee abə tə ləghə tsunə ni ghəŋə sey ə?”
4Yeso n beeli ndòw ghə nə̀, “Ghaa ka kam tɔŋɔ koʼ tsə n màʼlə K-a-zə̀ nə̀ nəŋə zey Zə̀ kə â bɔmnə mbi, tə n bɔm tsu aghə̂ weynum ghi weyzən ə? 5Tə n dza tsu nə̀, à wən loʼ ghə i tii zə, weynum khə ni zəghə tsu bày wi ghi nay wi, tə təmdzəŋi ndòw ghi wey wi, tow ghə ubəghə, ghə i doʼo bə wù umɔʼ. 6Ghə kəm way dzə aghə̂ abəghə, ghə nya loʼ tə̀ a loʼ wù umɔʼ. Sey, fə key Zə̀ kə təm naŋa dzəŋinə, kə̂ wù nə̂ dzawwənə.” 7Ghə̂ a tə Falasi ghey ghə n bəb tə̀ wi nə̀, “À loʼ kee Mushi â kee dzanə nə̀ abə wù dza i tuu maʼa wey wi, tə khə ni teeli fuu dzə wi n màʼlə kə ni dii tsu nə̀ ghə n wû i dzawwə ə?”
8Yeso n beeli ndòw ghə nə̀, “Mushi â bəghəm naŋa nə̀ ghaa loʼ ni dzawwə iwû ghi ghey a ghaa ghə n təŋkey, fə̀ŋ tə ghaa tə ngii tawnu. Zə â kee way dzə sey nə̀ nzeyyə. 9N fa dza bə tə̀ ghaa nə̀, weynum wey tə tuu maʼanə wey wi, ney ndòw wey u nuu wə nə̀ a way nə̀ wey wi taa zaʼ wi, tə sey loʼ nə̀ tə n taa zaʼ.”
10Ngəd tə wi tə n dza ndòw tə̀ wi nə̀, “Abə i loʼnə sey n doʼo i wù ghi wey wi, dzɔb loʼ nə̀ kə wù nə̀ baa neynə wey.”
11Yeso n fəd dza ndòw tə̀ ghə nə̀, “A way dzə aghə̂ adzəm ghə loʼnə ni zowkeeli ghəə zən, a may kə ghə̂ ghey ghə loʼ nə̀ Zə̀ kə n fuu ghə n tɔb u tii wə. 12Boʼnə zùŋ u loʼ n ndəm u ghəŋŋənə nə̀ ghə̂ a loʼ a ka ney ghey ghə. Ghə̂ a loʼ a way ni ney aghey nə̀ zùŋ kə tii kə loʼ nə̀ ghə â ji ghə sey, a loʼ ghə u way ni ney aghey nə̀ a ghəŋŋə aghə̂, a loʼ ghə u way ni ney aghey nə̀ a say kɔʼ ghə bòʼ ghəə a Fɔɔ wə idəŋ wə. Wù wey tə loʼnə ni bəghəm ghəə ghən, bəghəm kɔʼ.”
Yeso buulə aghinətəghə
(Mak 10.13-16; Luk 18.15-17)
13Ghə̂ a loʼ ghə n ney bə aghinətəghə n səə Yeso nə̀ tə gaʼ tsu awɔɔ n tow u ghə, tə gɔŋŋə tə ghə. Ngəd tə wi tə n fəd kii ndòw ghə̂ a tii ghə.
14Yeso n dza ndòw tə̀ ghə nə̀, “Zəghə na ghiinətəghə ghey ghə bə n səə mə, kə̂ ghaa nə buu naŋŋənə ghə, bòʼ nə̀, fɔɔ wə idəŋ u loʼ tə ghə̂ ghey ghə loʼ tə̀ a loʼ ghə.” 15Ambə tə dza tsunə sey, tə n gaʼ tsu awɔɔ n kow ghə, buulə tsu ghə. Nghee tə mayyə tsunə, tə n zəghə tsu fu, nuu ndow.
Wù kuum wə nsə fɔɔ u Kəzə̀
(Mak 10.17-31; Luk 18.18-30)
16Wù loʼ n ndòw bə n səə Yeso, bəb tə̀ wi nə̀, “Wù dii wə, a loʼ ghə i dzuŋu i ghaa zə n khənə ni teeli ghəŋə tə̀ mə ni keeli muu itsali zə.”
17Yeso n beeli ndòw wi nə̀, “À loʼ kee wə̀ bəbənə mə n ghəə zə bòʼ ghəə zey i dzɔbənə ə? À loʼ kə wù umɔʼ tə loʼnə wù dzuŋu. Abə wə̀ dza i keeli muu zə itsali, i naŋŋə ndòw laŋ u Kəzə̀ wə.”
18Wù tii n bəb tə̀ wi nə̀, “Laŋ u ghaa wə?”
Yeso n dza, “Kə wə nə̀ weynə wù, kə wə nə̀ nyəŋinə ghi wey wù, kə wə nə̀ tsɔŋɔnə, kə wə nə̀ təminə tsəm ə wù, 19i ngɔɔmə bày wə ghi này wə, nsə nə̀ wə i ləghə ghə̂ ghey n səə wɔ adzəm tə̀ wə ləghə soʼonə wû wə wə̀.”
20Wù wey n dza, “N naŋŋənu laŋ wən udzəm. À kəm loʼ ghə i ghaa zə i doʼo səənə tə mə ni ghəŋə ə?
21Yeso n dza ndòw tə̀ wi nə̀, abə wə̀ ləghənə ni doʼo tsətsəghə, ndòw fìi may tsu fə wə wə̀ udzəm, wə ney kɔʼ khəə u tii wə, wə fuu ndòw tə̀ ghə̂ a laa ghə, wə i keeli ikum idəŋ, wə daŋŋə bə dzûmə bə mə.”
22Ambə wù wən zow tsunə sey, tə n nuu ndòw n mow zə n fə̀ŋ, n təŋkey, tə â ngii kûmnu.
23Yeso n daŋŋə dza tə̀ ngəd tə wi tə nə̀, “N dza bə isəŋə tə̀ ghaa nə̀, i ngii tawnu tə̀ wù kûm wə ni nyi n fɔɔ wə idəŋ. 24N dza bə tə̀ ghaa nə̀, nyam zən ghə tɔŋŋə nə̀ à loʼ Kamel loʼnu ni zaŋŋə tsəghə tɔɔlə n sə̂ i fəsaʼ, tsəghəshi tə̀ wù kûm wə ni nyi n fɔɔ u Kəzə̀.”
25Ambə ngəd tə wi tə zow tsunə sey, dzuu zə n ngii zum ghə, ghə n bəb tə wi nə̀, “À kee baa loʼ ndee, tə loʼnə ni keeli ibəghəshi ə?”
26Yeso n laalə tsəghə ndòw ghə, dza tə̀ ghə nə̀, “Tə̀ wù sɔŋtsuʼ, ghə i tii i way ni ney kəbənə, a kee bə tə̀ Zə̀ kə, ghə i loʼ i way i taw tsəghəshiənə wi ni ghəŋə.” 27Sey, Pita n dza shi kɔʼ nə̀, “Koʼo, ghey n naŋa taʼa fə u ghey wə udzəm ni dzûmə wɔ. Ghey i kee keeli kee?”
28Yeso n dza ndòw tə̀ ghə nə̀, “N kuum dza bə tə̀ ghaa nə̀, abə Waa Weynum î doʼnə n kuu kə ufɔɔ kə wi kə nyiələ kə n mbi i fəghə zə, ghaa ghən ighəm n ghii ghə abəghə i doʼ soʼo fu n kuu u təfɔɔ, saʼa naʼa tə Izree tən ighəm n ghii tə təbəghə. 29Wù wey tə naŋa sənə ndaw tə wi tə, waazə a wi, bày wi, này wi, waa a wi, nkee sum u wi n zəd zuŋ, î keeli dzəŋŋə fə u tii wə nə nbɔm n mbi i zən, tə i keeli soʼo muu zə itsali. 30À kee loʼ nə̀, ndəmə ghə̂ ghey ghə loʼnə sə kə nya nə̂ bə doʼlə ibam, aghey ghə doʼo guŋŋənə nya, ghə nə̂ bə doʼo ghə̂ a kəsə̂.”
Currently Selected:
Matyo 19: WEH
Highlight
Share
Copy
Want to have your highlights saved across all your devices? Sign up or sign in
© 2022 CABTAL
