Matyo 20
20
Ghɔɔmə i fənkəfən bòʼ ghə̂ a kəfwaʼ nə usum
1Yeso n dza tə ghə nə̀, “Fɔɔ wə idəŋ u loʼ tə̀ a loʼ Muu usum u loʼ wə tə â bəd key kɔʼnə tsuʼ wə, shi ndòw ni ndòw kəŋ aghə̂ nə̀ ghə bə fwaʼ n sum u wi. 2Tə n bəghəm naŋa kɔʼ ghi ghə nə̀ tə i fuu ghə n fə key ghə tsəənə fwaʼ kə tii nə fətsuʼ, daŋŋə tûm ndòw ghə n sum u wi nə̀ ghə ndòw fwaʼ.
3Ambə nə tənəŋə tətaandzuu n bələbələ tə, tə n ndòw koʼ tsu ghə̂ a loʼ ghə, ghə maŋ teynə n bikiwən, fwaʼa way fə kə loʼ kə, 4tə n dza tə̀ ghə nə̀, ‘Ndòw fwaʼa na n sum wuŋ, mə i tsəə ghaa n fə key kə kpiinə ni tsə n fwaʼ key ghaa i fwaʼanə.’ 5Sey ghə n nuu i ndòw, ndòw fwaʼ n sum u wi.
Tə n kəm shi ndòw n fə̀ŋ ə tsə̀, nsə nə̀ tənəŋə tətəghə n tsə̀ tə, ghəŋə ndòw kə ghə i mɔʼɔ zə. 6Ambə nə tənəŋə tətaa n nəŋə i fənə zə, tə n kəm shi kpiʼi ndòw, koʼ tsu ghə̂ a loʼ ghə ghə maŋ tsəm tey. Tə n bəb tə̀ ghə nə̀, ‘À loʼ kee ghaa maŋa bəəbənə nəŋə zə fa, fwaʼa way fə kə loʼ kə ə?’
7Ghə n beeli ndòw wi nə̀, ‘Wù loʼ ka ghey ney dzə nə̀ kəfwaʼ.’ Tə n dza tə̀ ghə nə̀, ‘Ndòw fwaʼa soʼo na n sum wuŋ.’”
8“Ambə nəŋə i fənə i kpii tsunə, muu usum n dza tə̀ wù wey tə laalənə fwaʼ kə nə̀, ‘Tɔŋɔ tsu ghə̂ a kəfwaʼ ghə, wə tsə ghə. Zey tsu n kow ghə̂ ghey ghə mə bə guŋŋənə, wə ndòw kuum n kow ghə̂ ghey ghə mə bənə isə.’ 9Ghə̂ ghey ghə mə bənə fwaʼ kə nə tənəŋə tətaa n nəŋə i fənə zə n bə ney khə̀ə u ghə tə̀ ghə tsəənə fwaʼ kə nə fətsuʼ. 10Ambə a ghey ghə mə kaʼnə fwaʼ kə isə ndòw bənə, ghə n moʼlə kə nə̀ ghə î tsəə tsəghəshiənu ghə. Ghə n fəd tsə soʼo ghə ighələ ghi ghə̂ a loʼ ghey. 11Ambə ghə ney kɔʼ khə̀ə u ghə wə, ghə n kaʼ ndòw ni sənnə ghɔɔmə bòʼ muu usum wey, dza nə̀, 12‘Ghə̂ ghey ghə mə bə guŋŋənə, mə fwaʼ kə nəŋə zə izow imɔʼ, wə u kee tsənə ghə ighələ ghi ghey, loʼ sey nə̀ a fwaʼ ghey tsuʼ fə zəŋi fə, tsə̀ u zuʼ zeeli soʼonə ghey.’
13Muu usum wey n beeli ndòw wù ghə umɔʼ dza nə̀, ‘N fə̂, n ka wɔ tsìi dzə. N dza a mə bəghəm naŋa dzəŋi nə̀ mə i tsəə wɔ n fə key ghə tsəənə fwaʼ kə tii nə fətsuʼ ə? 14Ney khəə wə wə̀, wə̀ ndòw nuu. À ləghə tsu mə ni fuu tə̀ wù wey tə mə bə guŋŋənə fwaʼ kə ighələ tə̀ n fuunə tə̀ ghaa. 15N kəm khə soʼo way daʼa kə ni ghəŋə ghəə zey n ləghənə ni ghəŋə n khəə wuŋ ə? Nkee wə khə kəghoʼ nghee n khənə wɔɔ kə buu kə ni fuu tə̀ ghə̂ ghə ə?’”
16Sey, Yeso n guŋ kɔʼ nə̀, “Wù wey tə bə guŋŋənə î doʼlə wù kəsə̂, wù wey tə bənə sə kə i bə doʼlə wù ibam.”
Yeso ghɔɔmə kpiʼi nə tənəŋə tətəghə bòʼ və i wi
(Mak 10.32-34; Luk 18.31-34)
17Nghee tə̀ Yeso kɔʼɔ ndòwnə n Yerosalem, tə n ney kɔʼ ngəd tə wi tey ighəm n ghii tə təbəghə, səŋ təmi ndòw ghi ghə, dza tə̀ ghə nə̀, 18“Saa sa kɔʼɔ ndòw n Yerosalem, ghə i fìi fuu ndòw Waa Weynum tə̀ ghə fɔɔngili a nii ghə nsə ghə̂ a dii a Kəlaŋ ghə. Ghə i tsəʼlə tsu saʼ nə̀ ghə wey wi. 19Ghə i ney fuu tsəʼlə ndòw wi tə̀ ghə̂ ghey ghə bəghəm way tə̀ Zə̀ kə, ghə i tsoʼ wi, ghə lənnə wi, ghə bwɔd, ghə baa wi n zat kə fəkaʼ. A i bə nə ntsuʼ ntəghə, Zə̀ kə i zhəm dzəŋŋə bə wi nə ivə.”
Fə key này waa a Zebedi bəbnə tə̀ Yeso
(Mak 10.35-45)
20Sey, này waa a Zebedi n ndòw bə n səə Yeso ghi waa a wi ghey abəghə, təm ndòw tənguʼ n tənə wi, nɔɔ ndòw wi n ghə i loʼ zə.
21Yeso n bəb ndòw tə̀ wi nə̀, “Wə̀ ləghə nə̀ n ji ngee tə̀ wɔ ə?”
Tə n dza tə wi nə̀, “N ləghə nə̀ wə tsəʼlə tsu kəlaŋ nə̀ abə wə i loʼnə n fɔ̀ɔ wə, waa ghuŋ ghən abəghə ghə i doʼ n səə wɔ, umɔʼ n kpii kə kə̀ təmə kə, umɔʼ n kpii kə kə̀ kwɔɔ kə.”
22Yeso n fəd dza tə̀ ghə nə̀, “Ghaa khə way fə key ghaa bəbənə. Ghaa î loʼnu ni koʼ ndzoʼo chɔd wən mə i koʼonə ə?”
Ghə n dza tə̀ wi nə̀, “Ow, ghey î loʼnu.”
23Yeso n dza ndòw tə̀ ghə nə̀, “N khənu nə̀ ghaa i ndzəm loʼnu ni fəghə, abə ni doʼo n kpii kuŋ kə təmə kə nkee n kpii kuŋ kə̀ kwɔɔ kə, luʼu tə tii tə loʼ tə̀ ghə̂ ghey Bày wuŋ bayyə naŋanə tə̀ ghə.”
24Ambə ngəd tə wi tə loʼ tey ighəm zow tsunə sey, ghə n fəələ ndòw unəghə ghi waazə ghey abəghə. 25Yeso n tɔŋɔ naŋa bə ghə adzəm, dza tə̀ ghə nə̀, “Ghaa khənu nə̀, ghə̂ ghey ghə loʼnə ghə̂ a nii ghə n naʼa tə ghə̂ ghey ghə bəghəm way tə̀ Zə̀ kə, ghə saʼa aghə̂ nə kədaʼa, sey, ghə̂ ghey ghə loʼnə tow wə, ləghə nə̀ ghə̂ ghə i fwaʼa bə tə̀ ghə. 26I kə̂ i nə̂ doʼlənə sey ghi ghaa, wù wey tə ləghənə ni doʼo wù nii n fəŋŋə kə ghaa sey khə ni loʼ tə̀ a loʼ wù kəfwaʼ tə̀ ghaa adzəm, 27wù wey tə ləghənə ni doʼo kəsə̂ n fəŋŋə kə ghaa khə ni loʼ tə̀ a loʼ kəkɔd tə̀ ghə̂ ghə adzəm. 28Ighələ tə̀ Waa Weynum â ka bə dzə̀ fa n mbi nə̀ ghə̂ a fwaʼ tə̀ wi, tə â bə ni fwaʼ tə ghə̂ ghə nsə ni fuu muu i wi ni kùm shi tow u ndəmə aghə̂.”
Yeso baŋŋə ghə̂ a fəbə ghə abəghə
(Mak 10.46-52; Luk 18.35-43)
29Nghee tə̀ Yeso ghi ngəd tə wi tə nuu shiə ndòwnə n naʼ i Jeriko, nɔɔ kə aghə̂ kə n dzûmə ndòw ghə. 30Ghə̂ a fəbə a loʼ ghə abəghə n doʼ n khəə u jìi. Ambə ghə zow tsunə nə̀ Yeso nya tsəghənu, ghə n buʼ shi bə bɔŋ kə idey dza nə̀, “Mûkəbii, Waa Devid, kwɔɔlə sî zə n kow ghey!”
31Nɔɔ kə aghə̂ key n kii naŋa ndòw ghə, dza nə̀ ghə doʼo mɔŋ. Ghə n fəd baa dey nay shi kɔʼ idəŋ dza nə̀, “Mûkəbii, Waa Devid, kwɔɔlə sî zə n kow ghey.”
32Yeso n təmi tsu, tɔŋɔ bə ghə, bəb tə̀ ghə nə̀, “Ghaa ləghə nə̀ n ji ngee n wɔ ghaa a?”
33Ghə n dza tə̀ wi nə̀, “Mûkəbii, ghey ləghə nə̀ wə ghəŋə tə̀ ghey i koʼo luʼu tə.”
34Yeso n kwɔɔlə isî n kow ghə, mɔm tsu sə̂ a ghə, ghə n daŋŋə kaʼ ni koʼ təluʼu n nəŋə i tii zə. Sey, ghə n nuu dzûmə ndòw wi.
Currently Selected:
Matyo 20: WEH
Highlight
Share
Copy
Want to have your highlights saved across all your devices? Sign up or sign in
© 2022 CABTAL
