Génesis 24
24
Bix úuchic u caxta'al u yatan Isaac
1Abrahame' dzo'oc ca'ach u sen ch'íijil, Yuumtzile' dzo'oc xan ca'ach u pulic u qui' t'aan yóokol, ti' tuláacal. 2Jun tenajquiaque' tu t'anaj jun túul u asab nuxibil u palitzilo'ob, ti' máax u kubentmaj ca'ach tuláacal ba'al u ti'al, ca tu ya'alaj ti':
Dzáa a kab yáanal u muuk in wooc,#24.2 Dzáa a kab yáanal u muuk in wooc. Le ba'ax tu ya'alaj Abraham ti' u palitzil ca u beeto' yaan ba'ax o'olal, u ti'al Abrahame', tu dzaj páajtalil ti' u palitzil, u ti'al le palitzilo' u chíiculal jun p'éel jalach t'aan. 3jalach t'ant teen tu kaaba' Yuumtzil, u Junab Kuil ca'an yéetel lu'um, ma' bíin a cha'a' u dzo'ocol u beel Isaac in paal yéetel jun túul co'olel canaanil te j lu'um tu'ux caja'anena', 4ba'ale' bíin xi'iquech tin caajal u ti'al a yéeyic jun túul atan ichil u co'olelilo'ob in láaktzilo'ob.
5Le palitzilo' tu núucaj ti':
¿Cux túun wa ma' tu yóoltic taal le co'olel tin wéetele', Ba'ax quin in beetej? ¿Unaj in bisic a paal te j lu'um tu'ux j lukecho'?
6Abrahame' tu ya'alaj ti':
¡Ma', ma' a bisic in paal te'elo'! 7Yuumtzil u Kuil ca'an, máax jóokesen tu yotoch in taata yéetel tu lu'umil in láaktzilo'obe' tu séeb chi'itaj teen u dzáic le lu'uma' ti' in ch'i'ibalo'ob, leti' xane' bíin u túuxt u ángel ta táan u ti'al ca a taas jun túul atan u ti'al in paal. 8Wa le co'olel ma' tu yóoltic taal ta wéetele', ca p'áatal x ma' si'ipilil ti' le kax t'aana'; ba'ale', bic táabaquech a bis in paal te'elo'.
9Le palitzil túuno' tu dzaj u kab yanal u muuk yooc Abraham u dzuulil, ca tu jalach t'antaj ti' bey bíin u beet je'el bix dzo'oc u ya'ala'al ti'o'. 10Cu dzo'ocole' tu yéeyaj siibalo'ob ichil le ma'alob ba'alo'ob yaan ca'ach ti' u dzuulilo', tu ch'a'aj diez u túulul camello'ob ca j bin tu nojoch caajil Nacor tu lu'umil Mesopotamia. 11Le ca j kuch le palitzil tu jáal le nojoch caajo', táan ca'ach u ye'esame'ental. U súutuquil u bino'ob le co'olelo'ob u ti'al jóokeso'ob ja'. Le palitzilo' tu beetaj u je'elel le camello'ob tu yicnal le ch'e'eno', 12ca j payalchi'inaj beya': U Yuumtzil, u Ku in dzuulil Abraham, beet ca xi'ic teen utzil, e'es teen a wutzil ti' in dzuulil. 13Bíin in ca'aj p'áatal way tu yicnal le ch'e'ena', ca'aliquil u taalo'ob j ch'a'a ja' u x ch'uup paalalil le cúuchila'. 14Dzáaten ca úuchuque', le quéen in wa'al ti' wa máax x ch'uup paalil: Beet utz a wéensic a p'uul u ti'al in wukic ja'i', ca u núuc teen: Uk le ja'o', je'el xan in dzáic ja' ti' a camello'obe', ca úuchuc, x leti' le a yéeymaj u ti'al Isaac a palitzil, beyo' je'el u páajtal in tuclic utz a pucsi'ikal yéetel in dzuulile'.
15Ma' jach dzo'ococ u payalchi'e', ca tu yilaj u taal jun túul x ch'uup paal u dzaama u p'uul tu queléembal. Lela' x Rebeca u x ch'upul paal Betuel. Betuele' u paal Milca yéetel Nacor u yíidzin Abraham. 16Rebecae' jach qui'ichpam ca'achi, sujuy x ch'úupal xan; mix jun túul j xiib yanac ba'al yila'a' x yéetel. J éem tu'ux yaan le sayabo' ca tu chupaj u p'uul, u ti'al u suutbal tu yotoch 17le palitzilo' áalcabnaj u chucpachte ca tu ya'alaj ti': Beet utz, cha'ic in wukic jun p'íit u ja'il a p'uuli'.
18Leti'e' tu núucaj ti': Je'ela', uke'.
Tu séeblaquil tu yéemsaj u p'uul ca tu ch'úuy kabtaj ca tu dzaj u yuk le ja'o'. 19Le ca j dzo'oc u yukic ja' le palitzilo', x Rebecae' tu ya'alaj ti':
Bin in ca'aj xan in jóokes ja' u ti'al a waalak camello'ob, u ti'al u yukico'ob je'el buca'aj ja' u káato'obe'.
20Tu séeblaquil tu láalaj u ja'il u p'uul te tu nu'ucul u yukico'ob ja' le ba'alche'ob, áalcabnaj ya'ab u téenel te j ch'e'eno' tac ca tu jóoksaj ja' u ti'al tuláacal le camello'obo'. 21Ca'aliquile' le palitzilo' ma' tu t'aan chéen táan u yilic, tumen jach u káat u yojéelt wa Yuumtzile' dzo'oc u beetic u bin utzil ti' u j tusbeelil. 22Le ca j dzo'oc u yukico'ob ja' le camello'obo', le máaco' tu ch'a'aj jun p'éel oro tuup míin seis gramos aalil ca tu ch'uyquintaj tu ni' Rebeca. Tu dzaj xan ti' ca'a p'éel x bakal kabo'ob maanal cien gramos oro aalil. 23Ca tu ya'alaj ti':
Beet utz a wa'alic teen máax a taata, wa yaan xan cúuchil tu yotoch, tu'ux c máansic áakab, teen yéetel in wéet xiibilo'oba'.
24Leti'e' tu núucaj: Tene' u x ch'upul paalen Betuel, leti'e' u paal Milca yéetel Nacor. 25T otoche' yaan cúuchil u ti'al a máansic áakab, yaan xan sen ya'ab su'uc yéetel u láak ba'al u jaanto'ob le camello'obo'.
26Le palitzil túuno' j xolaj ca tu kultaj Yuumtzil, 27ca tu ya'alaj: Qui'iqui' t'anta'ac Yuumtzil u Ku Abraham in dzuulil, tumen utz, chuca'an yóol xan yéetel in dzuulil, tu nu'uctaj in beel tac tu yotoch u láaktzilo'ob.
28Rebecae' j bin áalcabil tu yotoch u maama u ti'al u tzicbalt ti' tuláacal le ba'alo'ob dzo'oc u yúuchulo'. 29Yaan ca'ach jun túul u sucu'un u kaaba'e' Labán, leti'e' jóok áalcabil tu tojil le ch'e'eno' u ti'al u nactáanticubáa yéetel le máaco', 30tu yo'olal tu yilaj le tuup yéetel le x bakal kabo'ob cu bisic tu kab u yíidzin, tu yo'olal tu yu'ubaj xan u tzicbaltic le ba'ax a'ala'ab ti' tumen le máaco'. Labane' j náadz tu yicnal u palitzil Abraham, ti' yanili' yéetel le camello'ob tu yicnal le ch'e'eno', 31ca tu ya'alaj ti':
Co'oten u j qui' t'aanech Yuumtzil. Bix canel j p'áatal way paach caaje', wa dzo'oc in nu'ucbesic naj yéetel c'uuchil u ti'al le camello'obo'.
32Le palitzil túuno' j bin te j najo'. Te'elo' Labane' tu yéemsaj u cuuch le camello'ob ca tu dzaj ba'al u jaanto'ob, cu dzo'ocole' tu taasaj ja' u ti'al u p'o'ic u yooc le palitzilo' bey xan u yooc le máaco'ob yéet taalaco'.
33Le ca jáalab u janale', u palitzil Abrahame' tu ya'alaj: Tene' ma' tu páajtal in janal ma'ili' in wa'alic ba'ax yaan in wa'ale'.
Tu ya'alaj Labán: T'aanen.
34Le palitzilo' tu ya'alaj:
Tene' u palitzilen Abraham. 35Yuumtzile' u pulmaj ya'ab u qui' t'aan yóokol in dzuulil, u sen ayikalcuntmaj yéetel j tamano'ob, wacaxo'ob, oro, plata, palitzilo'ob x palitzilo'ob, camello'ob yéetel burro'ob. 36U láak ba'ale', x Sara u yatane' quex jach ch'ija'ane' tu dzaj jun túul paal ti'; in dzuulile' Dzo'oc u p'atic ti' u paal tuláacal ba'ax yaan ti'. 37In dzuulile' tu beetaj in jalach t'antic ti' ba'ax tu kuben t'antaj teen: Ma' cha'ic u dzo'ocol u beel in paal yéetel jun túul u x co'olelil Canaán tu'ux cajacbalena'. 38Qui' xeen ichil u láaktzilo'ob in taata, caxant ichil u co'olelilo'ob in wéet ki'ikel jun túul atan u ti'al Isaac. 39Teen túune' tin wa'alaj ti': In taataen, ¿cux túun wa le co'olel ma' tu yóoltic taal tin wéetele'? 40Ca túun tu núucaj teen: tene' maanaja'anen tu beel Yuumtzil, leti' bíin u túuchi'it u ángel ta wéetel, u ti'al ca xi'ic teech utzil te j bejo' ca a ch'a'a atan u ti'al in paal ichil u co'olelilo'ob in láaktzil, in káat in wa'ale' ichil u láaktzilo'ob in taata. 41Ja'ali' wa in láaktzilo'ob ma' u káat u dza'ob teech le x ch'úupalo' chéen beyo' ca p'áatal x ma' si'ipilil ti' le jalach t'aan ta beetaj teno'.
42Bey úuchic in kuchul bejela'a' te j ch'e'eno', ich payalchi'e' tin wa'alaj ti' Yuumtzil, u Ku Abraham in dzuulil: wa jach tu jaajil bíin a beet ca xi'ic teen utzil ti' le taaliquena', 43quin káat óoltic teech ca'aliquil ti' yanen tu yicnal le ch'e'ena' ca úuchuc lela': le x ch'uup paal cu taalbal j ch'a' ja'e', le quéen in wa'al ti': Beet utz a cha'ic in wukic jun p'íit u ja'il a p'uul, 44ca u núuc teen: Uke, bíin in ca'aj xan in jóokes ja' u ti'al a camello'ob, ca leti'ichajac le co'olel a yéeymaj u ti'al u paal in dzuulilo'. 45Ma' jach qui' dzo'ococ in payalchi'e', ca tin wilaj u taal x Rebeca yéetel u p'uul tu queléembal. Éem te j sayab u jóokes le ja'o', ca tin wa'alaj ti': beet utz a dzáic teen ja' in wuke. 46Leti'e' tu yéemsaj tu séeblaquil u p'uul, ca tu ya'alaj teen: Uke, je'el xan in dzáic u yuk a camello'obe'. Leti' túune' tu dzaj teen ja' bey xan ti' in camello'ob. 47Cu dzo'ocole' tin káatchi'itaj ti': ¿Máax a taata? X leti'e' tu núucaj teen: U x ch'upul paalen Betuel, u paal Nacor yéetel x Milca. Ca túun tin dzaj tuup tu ni' yéetel ca'a p'éel x bakab kab tu kabo'ob, 48xolajen túun ca tin kultaj Yuumtzil u Ku in dzuulil Abraham, tu yo'olal tu taasilaquen jach tu beelil u ti'al in ch'a'a' jun túul u x ch'upul paal u láaktzil in dzuulil u ti'al u paal. 49Bejela'a' tune' a'ale'ex teen, wa bíin a we'ese'ex a wutzile'ex yéetel a jaaj óolale'ex ti' in dzuulil, wa ma'e', a'ale'ex teen xan u ti'al in wojéeltic ba'ax u najmal in beetic.
50Labán yéetel Betuel túune' tu núucajo'ob ti':
Tuláacal le ba'ala' ti' Yuumtzil u taal, to'one' ma' tu páajtal c a'alic teach wa je'ale' wa ma'. 51Il a wile wa yaan Rebecae'; ch'a'e', bise. Atanta'ac tumen u paal a dzuulil, jach je'el bix u nu'uctmail Yuumtzile'.
52Le ca tu yu'ubaj u palitzil Abraham le t'aan beya', noclaj tu táan Yuumtzil, u táan jo'ole' t'áal tac lu'um. 53Cu dzo'ocole' tu jóoksaj dze'edze'ec ba'alo'ob oro u ca'aj wa plata u ca'aj, tac nooko'ob, ca tu láaj dzaj ti' Rebeca. Bey xan ti' u sucu'un yéetel ti' u maama tu dzaj siibalo'ob. 54Cu dzo'ocole' ca j jaano'ob, ukulnajo'ob xan leti' yéetel u yéet palitzilo'ob, ti' tu máansajo'ob le áakabo'. Tu láak kiine' le ca j líiko'obe', le palitzilo' tu ya'alaj: Cha' in suut tu yotoch in dzuulil.
55Ba'ale' u sucu'un yéetel u maama x Rebecae' tu ya'alajo'ob ti': P'áatac le x ch'uup paal t éetel quexi' diez kiino'ob, cu dzo'ocole' je u páajtal u bin ta wéetele'.
56Ba'ale' le palitzilo' tu ya'alaj ti'ob: Ma' a xaancuntiquene'ex waye'. Kue' dzo'oc u yáantiquen iquil taaliquena', let o'olale' cha'ex in suut tu yotoch in dzuulil.
57Leti'ob túune' tu núucajo'ob: Co'ox t'anic le x ch'úupalo', u ti'al c u'uyic ba'ax cun u ya'alej.
58Tu t'aanajo'ob Rebeca ca tu káatchi'itajo'ob ti': ¿A káat j bin yéetel le máaca'?
Leti'e' tu núucaj: In káati.
59Ca túun j cha'ab u bin Rebeca yéetel le co'olel canantic ca'acho', tac xan u palitzil Abraham yéetel le máaxo'ob láakintico'.
60Ca tu qui' t'antajo'ob Rebeca beya':
Je'el túun techo' x íidzintzil,
¡ca béeyaquech maamail ti' sen ya'abcach máaco'ob!
a ch'i'ibalo'obe' ca u ti'alto'ob nucuch caajo'ob ti' u aj p'ectajo'ob.
61Bey túuno' x Rebeca yéetel u x palitzilo'obe' tu nat'ajo'ob le camello'obo' ca tu tzáay pachtajo'ob u palitzil Abraham. Bey úuchic u ch'a'abal x Rebeca tumen le palitzilo' ca j luko'ob te'elo'.
62Isaaque' táan ca'ach u suut, ti' lukbal tu yicnal le ch'e'en cu kaaba'intic: Le máax cuxa'ano' cu yiliquen, tumen ti' caja'an ca'ach tu lu'umil Négueve'. 63Joka'an ca'ach xíimbal ti' oca'an kiin. Ti' lelo' tu yilaj u náadzbal dze'edze'ec camello'ob. 64X Rebecae' j paacatnaj xan, j éem ti' le camello le ca tu yilaj Isaaque' 65ca tu káatchi'itaj ti' le palitzilo':
¿Máax le máac cu xíimbal te j chakano', le cu taal way tu'ux yano'ona'?
Le palitzilo' tu núucaj: In dzuulil.
Leti' túune' tu ch'aj u bóoch'e' ca tu pixaj u yich yéetel.
66Le palitzilo' tu tzicbaltaj ti' Isaac tuláacal ba'ax tu beetaj. 67Cu dzo'ocole' Isaaque' tu bisaj x Rebeca tu chuybil naj x Sara u maama, ca j dzo'oc u beel x yéetel. Isaaque' tu sen yaabiltaj x Rebeca, bey utzchajic yóol ti' quíimic u maamao'.
Currently Selected:
Génesis 24: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
