Génesis 25
25
U ch'i'ilancab Abraham yéetel Cetura
(1 Cr 1.32-33)
1Abraham yanchaj u láak u yatan máax tu kaaba'intaj Cetura. 2U paalal yanchaj x yéetele' lelo'oba': Zimram, jocsán, Medán, Madián, Isbac yéetel Suá. 3Jocsane' u taataob Seba yéetel Dedán. U ch'i'ibalo'ob Dedane' lelo'oba': asureob, letuseob yéetel le j leumeobo'. 4U paalal Madiane' lelo'oba': Efa, Efer, Hanoc, Abida yéetel Elda. Tuláacal lelo'oba' u yo'omelo'ob Cetura. 5Isaaque' tu ti'alintaj tuláacal ba'ax yaan ca'ach ti' Abraham. 6Ti' u paalal yanchaj yéetel u láak co'olelo'obe', Abrahame' chéen tu beetaj siibalo'ob ti'ob, ca'aliquil cuxa'ane' tu jun páaycuntaj ti'ob Isaac u paal, tu láaj túuchi'itajo'ob tu.
U quíimil Abraham lu'umilo'ob j lakin
7Abrahame' cuxlaj ciento setenta yéetel cinco ja'abo'ob tu pa'ate'il, 8j quíim tu yo'olal dzo'oc ca'ach u sen nuxibtal. Ca j bin u nupubáa yéetel u yúuchben ch'i'ibalo'ob. 9J mu'uc tumen Isaac yéetel Ismael u paalal tu áactunil Macpela, le yaan tu lakin Mamre tu lu'um Efrón u paal Zohar le j hititae'. 10Le lu'uma' leti'e' tu manaj ca'ach Abraham ti' le hititaobe'. Ti' j mu'uc Abraham tu tzéel Sara u yatan. 11Cu dzo'ocol u quíimil Abrahame', Kue' tu pulaj u qui' t'aan tu yóokol Isaac, máax j p'áat cajtal tu yicnal le ch'e'en cu kaaba'intic: Le máax cuxa'ane' cu yiliquen.
U ch'i'ilancab Ismael
(1 Cr 1.28-31)
12Lelo'oba' u paalal Ismael, u paal Abraham yéetel Agar le x egipciae', u x palitzil x Sara, 13tu tzoolol bix síijico'ob: Nebaiot le u nojochil u paalal, cu dzo'ocole' Cedar, Adbeel Mibsán, 14Misma, Duma, Massa, 15Hadar, Tema, Jetur, Nafis, yéetel Cedema. 16Lelo'oba' u kaaba'ob u doce paalal Ismael, yéetel xan u kaaba'obe' j kaj óolta'ab u kaaba'ob u lu'umo'ob yéetel u cajtalilo'ob. Tu jujun túulilo'obe cu méektáantico'ob ca'ach u láaktzilo'ob.
17Ismaele' yaan ca'ach ti' ciento treinta yéetel siete ja'abo'ob ca j quíimi ca j bin u nupubáa yéetel u yúuchben ch'i'ibalo'ob. 18U ch'i'ibalo'obe' j p'áato'ob cajtal te j lu'um yaan chúumuc u lu'umilo'ob Havila yéetel Shur, actáan ti' Egipto, tu beel Asiria, ti' j p'áato'ob cajtali' quex tumen tu ma' u káato'ob ca'ach u láaktzilo'ob.
Bix síijico'ob Jacob yéetel Esaú
19Lela' u tzicbalil Isaac, u paal Abraham. 20Isaaque' yaan ca'ach cuarenta ja'abo'ob ti' ca j dzo'oc u beel yéetel x Rebeca, u yíidzin Labán u paalalo'ob Betuel, le j arameob cajacbalo'ob ca'ach Padan-aram. 21X Rebecae' ma' páatji u yantal u paalalo'obi', bey túuno' Isaaque' j káat óolnaj ti' Yuumtzil tu yo'olal leti'. Yuumtzile' tu yu'ubaj u payalchi' ca túun x yo'omchaj x Rebeca ti' iicho'ob. 22Ba'ale' tu yo'olal táan u ba'atelo'ob ca'ach le mejen iicho'ob tu jobnele', leti'e' tu tuclaj: Wa bey u yúuchul le ba'ala', ¿ba'ax u biilal le cuxtala'? Ca túun j bin u ya'al ti' Yuumtzil ba'ax cu yúuchul ti'.
23Leti'e' tu núucaj ti':
Yaan ichil a jobnel ca'a p'éel múuch' caajo'ob,
ca'a p'éel caajo'ob táan u ba'atelo'ob ma'ili' síijco'obe'.
Jun túule' yaan u sen yantal u muuk asab ti' le u láako',
le sucu'untzilo' yaan u meyatic le íidzintzilo'.
24Kuch u kiinil u síijsaj Rebecae', ca tu síijsaj mejen iicho'ob. 25Le j yáax síijo' jun túul chacxique'en paal, piim u tzo'otzel tuláacal u wíinclil. Ca j dzaab u kaaba'int Esaú. 26Cu dzo'ocole' ca j síij u yíidzin u machmubáa tu tuuncuy Esaú.#25.26 Esaú u káat u ya'al tzo'otz, Esaue' jun túul j tzo'otz wíinic, cu ya'ala'al xan Edom ti' tumen tu conaj u tojolil u yáax paalil tu yo'olal jun lac chachac janal. Let o'olale' dzaab u kaaba'int Jacob.#25.26 Jacob le kaaba'a ca'a p'éel ba'ax u káat ya'ale'; táan ooc yéetel táabsaj. Ca j síisa'abo'ob tumen x Rebecae', yaan ca'ach setenta ja'abo'ob ti' Isaac.
Esaue' tu conaj u bo'olal u yáax paalil
27Le paalalo'obo' j nuucchajo'ob. Esaue' j kuch u beeticubáa jun túul j káaxil máac jach ma'alob j dzoon. Ba'ale' Jacobe' jun túul máac jedzecnac, utz tu yóol u p'áatal tu yotoch. 28Isaaque' u yaabiltmaj ca'ach Esaú tumen qui' tu chi' u jaantic le ba'ax cu dzonic ca'achi; ba'ale' x Rebecae' u yaabiltmaj ca'ach Jacob.
29Jun p'éel kiine', Jacobe' táan ca'ach u chaquic janal; Esaue' suunaj jach ca'ana'an ti' le káaxo', 30Ca tu ya'alaj ti' Jacob:
Beet utz a dzáic teen jun p'íit le chachac janal yaan teech te'elo', tumen táan u quíimsiquen wi'ij.
(Let o'olale' Esaue' cu kaaba'intic xan Edon).
31Ca j a'ala'ab ti' tumen Jacob: Yáax táanile' dzáa teen tu kexile' u tojol a yáax paalil.
32Ca túun tu ya'alaj Esaú:
Je'el bix cu páajtal a wilico' táan u quíimsiquen le wi'ija'. Let o'olale' mix ba'al u biilal teen u tojol le in yáax paalilo'.
33Ca tu ya'alaj Jacob: Jalach t'ant teen bejela'e' je'el a dzo'ocbesic ba'ax ca wa'alico'.
Esaue' tu jalach t'antaj ti'; bey úuchic u conic ti' Jacob le u tojol u yáax paalilo'. 34Bey túuno' Jacobe' tu dzaj ti' Esaú waaj yéetel u janalil lenteja. Esaue' le ca j dzo'oc u janal yéetel u yukule', j líike' ca j bini. Bey úuchic u cúulpachcuntic le u bo'olal u j yáax paalilo'.#25.34 Yáax paalil, u ti'al le úuchben hebreob le yáax paalilo' yaan ca'ach u nojoch tojol, ti' leti' cu dza'abal u qui' t'aanil le taatao' yéetel táancoch u ayikalilo'ob.
Currently Selected:
Génesis 25: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
