Mavanga 10
10
Korineye miimono imono-miisu
1Hu musyenge a Sezare, hwaba na muutu mumosi nduhi Korineye. Nde aba mukuutu a buli la kama (100) li balwani ba musyenge a Looma, wu bubaateele ti «konge ya Itali». 2Nde na ikuta hya nde hyosi, baakakinza Nzambi, mu mifudi mya nde myosi. Akabaakwila lingebe na ubaakumbasa biyaha bi Bayudaayo. Nde akasambila Nzambi tangu yoosi. 3Ilumbu imosi, bebele na ngunga yi matatu ya humbisa a mwangulu, nde asi imono-miisu. Nde amoni pa yalala pofi a Nzambi mu ukoto mu nzo a nde. Pofi ateeli nde: «Korineye!» 4Korineye atali pofi, na likamba loosi, na aleeli nde: «Ki dyambu Pfumu?» Pofi afutili nde: «Masambulu ma we na kwili a we lingebe mu biyaha, bi miikumasa huli Nzambi. Na Nzambi miiyuha masambulu ma we na uyaka mo we bungodu. Nde miiyibwala we monyi. 5Bunuubu, tsindaha baatu hu musyenge a Yafa, bo bayavolo muutu mumosi wu bubaateele Simoni, nga kumbu Peetelo. 6Nde li mu utsahala huli muutu mukima nga nduhi a Simoni, wu uli mutaandi bibaanda bi banyama. Nzo a nde yili ŋa muvanga mubu.» 7Bu pofi wu akatoyo na nde hayeni, Korineye ateeli basalili ba nde boole na lisadaadu limosi, muutu wu asungama. Nde li ŋa hati la ba baabaambana na nde. 8Humbisa ayabisi bo moosi ma nde hamoni, Korineye atsindihi bo hu Yafa.
Peetelo miimono imono-miisu
9Mu ilumbu hya ndaanda, bu baatu ba Korineye hatsindihi baaba mu nzila bebele na Yafa, Peetelo avati hu yulu lipombo li ibanga mu usambila Nzambi. Hwaba aka ngunga ya bebele na mwangulu. 10Nzala yafwengi nde na asahi udya. Bu baakavangimasa nde byudya, nde ayenduhi mu Livupu na asi imono-miisu. 11Nde amoni yulu laadibuma, na isiha imosi hyakakulamana mu ifwani hya tsanda yi baakaanga mu matsoso ma mana. Isiha mohina, hyakasutaha ŋa toto. 12Hutso a tsanda moyiina, hwaba na bibulu bya pila mu pila. Bibulu bya miilu mina byosi, na bibulu bya toto bi bibaayene mu bali, na banyunyi ba hu yulu. 13Ndaha mosi yaleeli nde: «Teleme, Peetelo, duba na dya!» 14Ka Peetelo afutili: «Oo! Naana Pfumu! Me kini a handiidi ibaabi ve buve hi hyavele hya ngidi.» 15Mu leele la moole, nde abweyuha ndaha: «Hina hi Nzambi haleele hya ngidi, a hamono hyo hi hyasumaha ve.» 16Nde ayuhi ndaha moyina nzuha tatu. Titswene mu mawasa, tsanda moyina yakumisi hu yulu.
17Peetelo akasaha mbindulili a imono-miisu hi nde hamoni. Mu tangu moyina, baatu ba Korineye hatsindihi, baasahi nzo a Simoni, na bo baayateleme ŋa munywa a nzo a nde. 18Bo baateeli na baafuuli tso ni ŋaniŋa Simoni wu bubaateele Peetelo ubaatsahala? 19Buuna, bu Peetelo haba mu utsima mu imono-miisu, Livupu laaleeli nde: «Yuha Peetelo, mono baatu batatu bali mu usaha we. 20Kulamana, na yene na bo hwavele matsika, mu toni ati ni me miitsindaha bo.» 21Peetelo asutihi na aleeli huli baatu mobaana: «Me ni wu benu lili mu usaha. Ki toni yi ibehi benu ŋaniŋa?» 22Bo baafutili: «Mukuutu balwani Korineye, miitsindaha bisu huli we. Nde li muutu wu asungama na wu ubaakinza Nzambi. Ni nde wuna, wu Bayudaayo boosi bubaasilasa mbiili. Pofi a Nzambi ayamonehele na nde, na uleele nde atsiha we hu nzo a nde. Muutu mowuna na nzala uyuha mambu ma we uyaabisa nde.» 23Buuna Peetelo ayaki bo, na alaasi bo mu nzo a nde.
Peetelo miiyabwana Korineye hu nzo a nde
Ŋa ngwali, nde atelimi na ayeni na bo. Banga hiitu bamosi, bisu Yafa, baayeni na nde. 24Ilumbu hya ndaanda, Peetelo atoodi hu musyenge a Sezare. Huuna, Korineye akakeele bo, na nde atsihi ikuta hya nde napa bambaahi ba nde ba mutima. 25Bu Peetelo ali mu ukoto mu nzo, Korineye wu ayabwana nde, abwidi ŋa miilu mya nde na akongimini. 26Ka Peetelo atelimisi nde na aleeli: «Teleme, me kaka muutu ndi we we.»
27Bu nde hakamoho na Korineye, nde akoti mu nzo, na abiisi baatu babalahi baakuukama. 28Nde aleeli bo: «Benu liyabi ti mikele mya bisu myasa itombi huli Muyudaayo mu ubaambana na mwenyi, buve mu ukoto mu nzo a nde. Ka Nzambi amwese me ti, me a hapfwana umono muutu tso mumosi ti nde ibaabi ali ve, buve wu avele wa ngidi. 29Ni mu buuna, ŋa benu laatsindaha baatu mu uyavolo me, me atsinga uya hwavele matsika. Bunuubu, me tondi uyaaba toni yi benu laatsiha me.» 30Korineye afutili: «Loloyi huka bilumbu bitatu. Mu ngunga yi matatu ya humbisa a mwangulu, me katsambilanga Nzambi mu nzo a me. Masulubete, muutu mumosi wu alwata bikutu bi bibaamwedeme, ayateleme ŋa busu bwa me. 31Nde aleeli: “Korineye, Nzambi miiyuhala lisambulu la we, na miiyibwala monyi mu likumbasa li we ubaava huli biyaha. 32Tsindaha baatu hu Yafa, bayatsiha muutu mumosi Simoni, nga kumbu Peetelo. Nde ubaatsahala huli Simoni mukima, wu ubaataanda bibaanda bi banyama. Nzo a nde ŋa muvanga mubu yili.” 33Ni mu buuna, me atsindaha baatu mu mawasa huli we, na we vangi bubwe bu we siingi uya. Bunuubu, bisu boosi baba ŋa busu bwa Nzambi, mu uyuha moosi ma Pfumu hatuma we mu uyabisa bisu.»
Peetelo miiyabisa Musamu wu Mubwe hu nzo a Korineye
34Peetelo abaandihi utoyo na aleeli: «Mu mbuli, me miitsikaha ti Nzambi a hali na burandu ve. 35Ka mu pasi tsi, Nzambi ubaayaka pasi nde wu ubaakiinza nde, na wu ubaavanga ma maasungama. 36Nde atsindihi bilumbi bya nde huli bisu Isereli, mana bayayaabisa bo Musamu wu Mubwe wa hyenze mu Yisu Kristo. Ni nde wu uli Pfumu a baatu boosi. 37Monwani, mambu momaana moosi maabandihi mu tangu yi Yowani hayaabisi ti: “Yakaani tondihili!” Benu liyabi mambu ma maavangimi hu tsi a Ngalili, nate hu itanzi hya Yuda hyosi. 38Benu liyabi buni Nzambi hasooli Yisu musi Nazareti, na nde aluusi nde mu Livupu la Ngidi na mu matwala ma nde. Benu liyabi ka buni Yisu hakataangila, mu uvanga mamabwe na ubeloso boosi ba baaba baakangama hu tsina matwala ma mukuyi. Nde hasiidi buuna, bu Nzambi habeedi itwadi na nde. 39Bisu lili bambangi ba moosi ma nde hasiidi mu tsi Bayudaayo, na hu Yeruselemi. Nde wuna wu baadubi na wu baakomini ŋa kuruwa. 40Ka Nzambi asuuli nde mu babaakwa mu ilumbu hi bitatu. Na Nzambi aviidi Yisu matwala ma ubwemonehele wa monyi. 41Yisu a hamonihili huli baatu boosi ve, ka ndulu huli bisu, bisu ba lili bambangi ba Nzambi hateehili usoolo. Bisu ba ladiidi na lanywidi na nde, humbisa a tsuuhili a nde ŋa hati la babaakwa. 42Yisu atumi bisu mu ulongese Musamu wu Mubwe huli baatu. Nde atumi bisu mu usilasa ti, nde ni wu Nzambi hatsahisi mu uba nzonzi a babali monyi na babaakwa. 43Mimbihuli myosi myatiili nde imbangi. Mono imbangi mo: pasi muutu wu usa hiitu mu nde, yaki linyahula li masumu mu matwala ma nduhi a nde.»
Byenyi byayaki Livupu la Ngidi
44Bu Peetelo haba kini mu utoyo, Livupu la Ngidi laayabwa ŋa yulu a boosi ba baakayuha ibila hya nde. 45Banga a hiitu, babali Bayudaayo ba baayidi na Peetelo, baakimuhi bo boosi. Bo baakimuhi, mu umono ti bungodu bu Livupu la Ngidi, bwakapuhama kaka nate hu uli ba baavele Bayudaayo. 46Mu mbuli, banga a hiitu mo baakayuha bo mu uyambila mandaha makima na uyusa bunene bwa Nzambi. Ka Peetelo afuuli bo: 47«Utwala uliha baatu mobaniba, ba baamiiyaka Livupu la Ngidi we bisu, mu utondehe bo mu mamba ve.» 48Buuna Peetelo atumisi ti bo bayaka tondihili mu nduhi a Yisu Kristo. Ba baayaki tondihili, baalembisini Peetelo mu umaakwilala na bo mu mwa matsuhu.
Currently Selected:
Mavanga 10: TSA
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
