Mavanga 11
11
Peetelo aviidi ikumbu huli libundu la Yeruselemi
1Bilumbi na baana ba ngu babaaba hu musyenge a Yuda, baayuhi ti baatu ba baavele Bayudaayo kaka, ba baasiingi mambu ma Nzambi. 2Mu tangu yi Peetelo hafutihi hu musyenge a Yeruselemi, Bayudaayo ba baasiingi Yisu, baasyembi nde bu: 3«We miikoto huli ba baavelekete, na we miidya na bo!»
4Buuna, Peetelo abinduli bo mu tsiki moosi ma maavyohi. Nde aleeli bunuubu: 5«Me ambeedi hu musyenge a Yafa, na me akatsambila. Me amoni mu imono-miisu, isiha imosi hyakakulamana mu ifwani hya tsanda yi baakaanga mu matsoso ma mana. Isiha mohina, hyakasutaha ŋa toto nate huli me. 6Me akakengese bubwe-bubwe, na me amoni banyama ba miilu mina, bibulu bya bwadi, bibulu bi bibaayene mu bali na banyunyi ba hu yulu. 7Me anzuhi ndaha mosi yakaleele me: “Teleme Peetelo! Duba na dya.” 8Ka me apfutili: “Naana! Pfumu, ka me kini a handiidi ibaabi ve, buve hi hyasumaha.” 9Ndaha yabweyuhana hu yulu: “Hina hi Nzambi haleele hya ngidi, a hamono hyo ibaabi tso hyasumaha ve.” 10Imono-miisu mohina hyamonihili monehele tatu, titswene byosi byakambuhi hu yulu.»
11«Ka masulubete, babahala batatu ba baamati hu musyenge a Sezare, baayidi hu nzo yi bisu laaba. 12Livupu la Ngidi laaleeli me mu uyene na bo hwavele utsika. Baana ba ngu mu Kristo basamunu ba me anzidi na bo, baayavehese me hu Sezare. Na bisu boosi laakoti mu nzo a mukuutu Korineye. 13Korineye ayabisi bisu buni nde hamoni pofi wu akateleme mu nzo a nde na wu akaleele nde ti: “Tsindaha muutu hu musyenge a Yafa mu uyavolo Simoni, nga kumbu Peetelo. 14Nde sa aleele we mambu ma mu ubehele we liyobolo. Liyobolo huli we, nate huli ikuta hya we hyosi.”»
15«Ŋa me ambaandihi utoyo, Livupu la Ngidi laabwidi ŋa yulu a bo, we bu lo laabwidi ŋa yulu a bisu ŋa mbandu. 16Me anzibwili monyi mu ma Pfumu haleeli: “Yowani atondihi baatu mu mamba, ka benu, sa batondehe benu mu Livupu la Ngidi.” 17Nzambi aviidi bo kabu li bungodu li laafwana. Ni we kabu li nde havidi bisu mu tangu yi bisu laasiidi hiitu mu Pfumu Yisu Kristo. Buuna, na me ambeedi mu ubisala Nzambi?» 18Humbisa uyuha mambu momaana, bo baavudimini, baayusi Nzambi. Bo baaleeli: «Kaahu mbuli, Nzambi amiiva nzila yi usobo mbiili na yi uyaka monyi a mbuli, huli ba baavele Bayudaayo.»
Libundu li musyenge a Antyokya
19Mbingisili yi yabwidi mu tangu yi baadubi Etyene, yaatumisi banga hiitu mu utsamuha. Bamosi ŋa hati la bo baayeni nate hu itanzi hya Fenesiya, hu iliiŋa hya Kipere na hu musyenge a Antyokya. Ka bo baakalongese mambu ma Nzambi ndulu huli Bayudaayo. 20Buuna bakima ŋa hati la bo, ba baaba ba ibiingi hya Kipere na bisu Kilene, bo ka baayeni hu musyenge a Antyokya. Ka bo baakayabisa ka Bangeleke na ulongese bo musamu wu mubwe wa Pfumu Yisu. 21Matwala ma Pfumu maabeedi na bo. Ni mu buuna, baatu babalahi baasiidi hiitu mu Pfumu na baaduukili nde.
Baranabasi ahwadisi libundu la Antyokya
22Libundu la Yeruselemi laayuhi tsangu a kinguli buyedi ya baatu mo baana. Lo laatsindihi Baranabasi hu musyenge a Antyokya. 23Bu nde hayato huuna, nde amoni buni Nzambi hasyemi ba baasiili nde hiitu. Nde amoni kinya na ahwadisi bo boosi mu ukangama na hiitu hyosi mu Pfumu. 24Baranabasi abeedi muutu wu mubwe, wu aluula mu Livupu la Ngidi na mu imiinu mu Nzambi. Baatu babalahi baabiisili Pfumu. 25Titswene, Baranabasi ayeni hu musyenge a Tarese mu uyasaha Sahuli. 26Bu nde hasooli Sahuli, nde abiti nde hu Antyokya. Bo baboole baavyosi ilima hi itindala itwadi mu libundu moliina. Bo baakalongese mabuli mamanene ma baatu. Hu Antyokya, ni huuna baateeli bayihi ba Yisu hati a tsomi, ti bo «Bakristo».
27Mu tangu moyina, hwabeedi na mimbihuli mi myamati hu Yeruselemi mu uyene hu Antyokya. 28Mumosi mu bo nduhi a nde Angabusi, ayabisi mu matwala ma Livupu la Ngidi ti husaali hole, limbunga lilinene sa liba mu toto yoosi. Limbunga moliina, laavangimi mu tangu yi pfumu a Looma haba nduhi Koloode. 29Bayihi baavoli kesili ti muutu-muutu mu bo, atsindaha likumbasa huli baana ba ngu ba baakatsahala hu itanzi hya Yuda. 30Bo baavangi buuna. Na baatsindihi bungodu mobuuna ŋa myoho mya Baranabasi na Sahuli, huli bakuutu ba libundu ba hu Yuda.
Currently Selected:
Mavanga 11: TSA
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
