1 Corintios 11
11
1Yix are chi'ana pacha i kin-an Yin, chi kin-ano pacha xu'an i Cristo.
I ixoqib' pa molb'al ib' chukojik u'ij i Dios
2Kinkikot iwu' man lik arewi kink'un chik'ux, xaq kixtijin chu'anik pacha i xink'ut kan chiwe. 3Wo'or kwaj yin kita ub'e chi i Cristo are nab'e chkiwach i achiyab', xaq i achiyab' je nab'e chkiwach i ixoqib', keje pacha i Dios are nab'e chwach i Cristo. 4Jun achi, are klapan ru' i Dios, o are kusaqij wach u'aljinsam i Dios che, we uch'uqum ujolom, kuqajsaj uri u'ij ire. 5Xwiri we jun ixoq klapan ru' i Dios, o are kusaqij wach u'aljinsam i Dios che, ire we uch'uqum ti ujolom, k'ixb'al uri kel ile che ire. Xaqjun ke'eloq pacha taq resam b'i uwi ronojel. 6Jun ixoq, we kuch'uq ti ujolom, mas utz uri wetene kresaj b'i uwi ronojel. We lik k'ixb'al che jun ixoq chi kk'atzix uwi, xaq we kresaj b'i uwi ronojel. Xaq lik k'ixb'al uri che we uch'uqum ti ujolom. 7Jun achi utz taj kuch'uq ujolom, kumaj taj man ire are uk'exwach i Dios, xaq k-aljin u'ij uchomal i Dios che. Xwiri i ixoq, k-aljin u'ij i rachijil che. 8Man i Dios are xu'an i achi nab'e, che ti ixoq xel wi, are i ixoq xel che i achi. 9I Dios are xu'an i achi rumal ti ixoq, xwiri are xu'an i ixoq rumal i achi. 10O uchak uri chi ixoq kukoj puwi ujolom jun ilb'al re i atb'al tzij man keje ile xaq kkil i ángel. 11Xwiri, chwach i Ajwal, xaqjun qa'ij, man we nti ixoqib', nti achiyab' uri; xaq we nti achiyab', nti ixoqib' uri. 12Qatzij, i nab'e ixoq xel che i nab'e achi; xwiri i achi ru' ixoq kalax wi, xaq ronojel lik ru' i Dios kpe wi.
13Jun ixoq are klapan ru' i Dios, we uch'uqum ti ujolom, ¿Utz nawi ile kib'ij yix? 14Uxeb'al i k'aslemal re i qatinimit qeta'am chi lik k'ixb'al we jun achi nimaq uwi, 15xwiri, jun ixoq we nimaq uwi, k'ixb'al taj, o u'ij rumal, man i Dios uya'om uwi che, ch'uqb'al re ujolom. 16We je o jujun junwi kkich'ob' chrij ile, yin xwi kinb'ij chke chi yoj ax kqa'an wi ile; xaq keje ile kki'an i tzob'aj re i Dios, lik qeta'am ti chik jun uxeb'al i k'aslemal re i tinimit.
Ni'pa taq i utz taj chi kki'an i winaq are kkitij uch'akul xaq kkitu' ukik'el i Ajwal
17Are i kinb'ij chiwe wo'or, o uchak kixinyaj jub'i', man wach i kixtijin chu'ankil are kimol iwib', lik nti kixuto wi chu'anik i utz; xa utz ti kixtijin chu'anik. 18Nab'e kinb'ij chiwe chi yin intom utzijol chi o jujun chiwe chi junam ti iwach are kimol iwib' prachoch i Dios; kinch'ob' yin chi lik qatzij ile. 19Qatzij kijach ni iwach, man k-aljin na pachin chiwe lik je re i Cristo. 20Yix, are kimol iwib' che i wa'im, “Are i wa'im re i Ajwal”; kib'ij che. Xwiri we junam ti iwach chu'anik, are ti uri ile. 21Man are kuriq i or re utijawik iwa, o jujun kkimin la kib' chuk'amik kiwa nab'e, xaq o i kekanajik kenumik, xaq o i xa ab'arik kki'ano. 22¿Xatab'a nti iwachoch ipa kitij wi iwa, xaq ipa kix-ab'ar wi? Lik olik. Are i kixtijin chu'anik le, xa kiqajsaj ki'ij i je jutzob'aj re i Dios. Xaq xa kiya kik'ix i nib'a'ib'. Kinriq taj wach kinb'ij ni chiwe rumal ile. ¿Xatab'a kinya ukowil ik'ux ru' ile?
Utijawik uch'akul xaq utu'ik ukik'el i Ajwal
23I k'utunik chi inya'om kan chiwe, ru' i Ajwal petnaq wi. Keje xu'an iri: Che a'ab' chi xjach i Ajwal Jesús pki'ab' i ajch'oj chrij, are k'amaja kchaptajik, Ire xuk'am i wa re trigo, 24are uri xuk'amwaj xutioxij che i Dios; te'uri xupiro, i xub'ij: “Chitija; iri are inch'akul chi kkam na, anb'al i utz chiwe yix. O uchak ki'an ni iri, kuxtab'al we yin.”#11.24 Keje ile xub'ij chke utijoxelab'. 25Xaq keje xu'an che i uwa'al uva muqb'am are xutzin i wa'im; xuchap i tu'b'al ya xaq xub'ij chke: “I uwa'al uva muqb'am are inkik'el k'utb'al re i trat k'ak' chi ku'an i Dios iwu'. Are ki'an iri, lik kink'un chik'ux.”#11.25 Keje ile xub'ij i Jesús chke utijoxelab'. 26Rumali, are kitij i wa re trigo xaq kitu' i uwa'al uva muqb'am, kitzijoj uri ukamik i Ajwal, k'a kk'un ni chik Ire.
Wach utijawik uch'akul xaq utu'ik ukik'el i Ajwal
27Rumali, we o jun chi utz ti uk'aslemal kutij i wa re trigo xaq kutu' i uwa'al uva muqb'am, are ire uri ajmak che i uch'akul xaq i ukik'el i Ajwal. 28Rumali, yix, are kitij i wa re trigo xaq kitu' i uwa'al uva muqb'am, china ub'e we utz ik'ux o we utz taj. 29We o jun to' kutijo, to' kutu'u, kuch'ob' taj chi are uch'akul i Ajwal, xa kupetsaj uri tojpen chrij. 30Yix, keje ile kixtijin chu'anik rumali je k'i chiwe lik ix iwab', nti i cho'ab' xaq o jujun chiwe je kamnaq rumal. 31Xwiri we lik kqa'an utz che i qak'aslemal xaq kqasuk'b'a, nti tojb'al qamak uri kutaq li Ajwal pqawi. 32I Ajwal are kojuya jub'i' pa k'ax, ku'an ile suk'b'al qe, man utz ksachb'ex ti qawach junam ku' i to' je re uwach i jyub' ta'aj.
33Rumali, ix, wachalal chwach i Cristo, chiwoy-ej ni iwib' chiwach, are kimol iwib' chwa'im. 34We o jun lik knumik, chutija uwa chi rachoch; man kipetsaj ti utojb'alil imak chiwij. O chik jub'an tzij kwaj kinb'ij chiwe, xwiri k'ate kinb'ij are kinupon iwu'.
Currently Selected:
1 Corintios 11: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala