1 Corintios 12
12
I Lo'laj Utewal i Dios kuya i qachak chqajujunal
1Ix, wachalal chwach i Cristo chi lik k'ax kixinna'o, kwaj yin kiwetamaj ronojel ni'pa i kojtiki chu'anik chi kuya i Lo'laj Utewal i Dios chqe.
2Yix lik iweta'am chi ujer are k'amaja kixkojon che i Dios, xiya iwib' che i terejik chkij i tiox chi xa je mem. 3Wo'or ix re chik i Dios, rumali kwaj kiwetamaj iri, we o jun kub'ij: “¡Chk'oqox i Jesús le!” Ire le uk'am ti uri rumal i Lo'laj Utewal i Dios. Xaq we o jun kub'ij: “Are i Jesús are i Ajwal”, ire le uk'am uri rumal i Lo'laj Utewal i Dios.
Uk'iyal xaq u'anik junam che i k-an tikilem che
4Xwiri i patan chi kuya i Dios chqe, lik xa jun ti uwach, xwiri i Lo'laj Utewal i Dios chi kjachaw chqe, xa jun. 5Lik jalajuj uwach i qapatan chwach i Ajwal, xwiri xa jun i Ajwal chi kojtijin chu'anik uchak. 6I uchak Dios, lik jalajuj taq u'anik k-anik; xwiri xwi Ire k-anawik chi chqajujunal kqa'an ni i chak le. 7I Dios kuya jun qapatan chqajujunal, aljinsab'al re chi o Utewal qu', xwiri kraj Ire chi utz kel chke konojel. 8Are i Lo'laj Utewal i Dios kuya chke i jujun wach i kkib'ij, lik o i nojb'al che i kitzij; xaq keje i jub'an chik wach i kkib'ij, lik ktatajik chi lik k'i i keta'am. 9Xaq o jub'an chik, chi rumal Lo'laj Utewal i Dios, lik nim ukub'ib'al kik'ux che i Dios. Xaq o jub'an chik chi are Lo'laj Utewal i Dios kuya chke chi kekutzirsaj iwab'ib'. 10Xaq rumal ire o jujun o pki'ab' kki'an i nimaq taq il; xaq o jujun je ajb'il re chke i winaq wach utzijom i Dios chke. Xaq o jub'an chik chi ketiki chretamaxik wach o ru' jun winaq, we are i Lo'laj Utewal i Dios o we xa are itzel tew o ru'. Xaq o jub'an chik, chi rumal i Lo'laj Utewal i Dios, kkiriq jun ch'ab'al chi kkita ti ub'e. Xaq o jub'an chik, chi rumal Lo'laj Utewal i Dios, ketiki chu'aljinsaxik wach usuk' i tzij le. 11Xwiri ni'pa i k-aniki, lik are i ucho'ab' i Lo'laj Utewal i Dios k-anaw ronojel ile. Ire xa jun, are ire kjachaw chqe chqajujunal wach kqa'ano, pacha kraj ire.
12Jun ch'akulaj re winaq, k'iyal taq o che; o u'ab', o raqan, o ujolom. Keje ile u'anom i Cristo, keje pacha jun ch'akulaj. Xwiri xa jun chi ch'akulaj u'anom. 13Qonojel yoj xoj-eloq oj uch'akul i Cristo, xa jun xe'eloq. Nti k-ono we oj aj Judío winaq, xaq we oj aj Grecia winaq; nti k-ono we xa oj winaq pa k'ax rumal i rajaw qachak, o we oj o'talik. Are xqajsax ya pqawi, xa oj jun ch'akulaj xojel loq rumal i Lo'laj Utewal i Dios; xaq xa jun Utewal yatal chqe chqajujunal.
14Jun ch'akulaj k'i uwach o che, xa jun taj. 15I raqan i ch'akulaj, we kub'ij: “Kwaj te Yin in ab'aj, rumali in re ti ch'akulaj” ¿Xatab'a re ti i ch'akulaj? 16Xaq i uxikin i ch'akulaj we kub'ij: “Kwaj te yin inb'a'wach, rumali in re ti i ch'akulaj” ¿Xatab'a re ti i ch'akulaj? 17Wetene ronojel i qach'akul is qab'a'wach. ¿Wach tanik uri kqa'ano? Wetene ronojel i qach'akul is qaxikin. ¿Wach siqanik uri kqa'ano? 18Xwiri, i Dios lik uyijb'am pacha kraj Ire; lik chila rajwaxik ipa xeukoj wi che i qach'akul. 19Wetene ronojel xa jun uwach, nti ne qach'akuli. 20Xwiri keje ti ile xe'eloq; man tupu k'iyal uwach o che, xa jun ch'akulaj elnaq ronojel.
21Rumali, i qab'a'wach kub'ij ti che i qa'ab': “Yet, nti achak chwe.” Xaq keje i qajolom kub'ij ti che i qaqan: “Yix, nti ichak chwe.” 22Ni'pa i o che i qach'akul, kqach'ob' yoj chi nti qas kicho'ab'. Xwiri ile mas kkiriq uchak chqe. 23Xaq ni'pa i o che i qach'akul chi kojk'ix che, xaq lik mas kqachajij. Xaq ni'pa i kmajaw taj k-iltajik, xaq lik mas kqach'uq uri. 24Xaq ni'pa i utz chi k-iltajik, nti uchak kqach'uqu. Keje ile xuyijb'a i Dios qach'akul; ni'pa i o che chi nti qas u'ij, lik uya'om uri mas u'ij. 25Keje xu'an i Dios ile che i qach'akul. Kraj Ire chi ni'pa taq i o che, kki'an ti ch'oj chkiwach, xa kkito kib' chkiwach. 26We o k'ax che jun qaqan xaq we che jun qa'ab', lik ronojel i qach'akul kuna uk'axk'ol. Xaq keje ile, we xya' u'ij i qaqan o qa'ab', xaq lik kkikot uri ronojel i qach'akul.
27Yix iwonojel ix uch'akul i Cristo, xaq ni'pa yix chijujunal o uri jun ichak chi lik kixajwaxik. 28Rumali i Dios uya'om ichak chijujunal chi ix jutzob'aj re Ire: Nab'e, je o i apostolab'; ukab', o jujun profeta chi kkib'ij chke i winaq wach u'aljinsam i Dios chke; urox, je o i tijonel, xaq o jujun winaq chi kki'an i nimaq taq il; xaq o jujun kekutzirsaj iwab'ib'; te'uri je o jujun lik ketonik; xaq o i keok'aw utzam chke i je re i Dios, xaq o i kkiriq jun ch'ab'al chi kkita ti ub'e. 29¿Je konojel taq wa, je apostolab'? ¿Xatab'a konojel i profeta? ¿Xatab'a xaq konojel lik je tijonelab'? ¿Xatab'a konojel kki'an i nimaq taq il? 30¿Je konojel taq wa kkiriq rutzirsaxik iwab'ib'? ¿Je konojel taq wa kkiriq jun ch'ab'al chi kkita ti ub'e? ¿Xatab'a konojel is kkiriq u'aljinsaxik i tzij le chi junwi? Konojel taj. 31Yix chiya ik'ux chutzukuxik i patan chi lik utz.
Xwiri yin kink'ut ni jun b'e chiwe chi lik mas utz.
Currently Selected:
1 Corintios 12: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala