1 Corintios 15
15
I Jesucristo xwalij che i kamik chkixol i kamnaq
1Ix, wachalal chwach i Cristo, kwaj kink'unsaj chik'ux i tzij chi xinb'ij kan chiwe chi i utz laj tzij k'ak' re i Dios; kwaj kinb'ij usuk' chiwe. I tzij k'ak' le are i tzij chi xikoj yix, xaq are o wi wo'or chi lik ikub'am ik'ux che. 2Rumal i utz laj tzij k'ak' re i Dios, kixtotaj na we ksach ti ukub'ib'al ik'ux che Ire pacha i xinb'ij yin chiwe, xwiri we xa junwi xikojo lik nti uchak uri chiwe.
3Nab'e, are xink'ut i tzij chiwe chi lik xaqjun ru' i k'uttal chwe yin; are iri: I Cristo xkamik tojb'al re i qamak, keje ile i tz'ib'tal kan chupam uwuj i Dios ujer;#15.3 Are k'amaja kalax wi i Cristo. 4chi ire xmuqik, xwiri xwalij che i kamik chkixol i kamnaq churox ij, lik keje pacha kub'ij i tzij chi tz'ib'tal kan chupan uwuj i Dios ujer.#15.4 Salmos 16.10; Mateo 12.40; Hechos 2.24-32. 5Nab'e xuk'ut rib' che i ma Pedro, te'uri xuk'ut chik rib' chke i kab'lajuj apostolab'. 6Te'uri xuk'ut rib' chke kolo mas che i Jo'winaq jumo' (500) qachalal chwach i Cristo chi lik konojel kuk'am kib'. Ike le je k'i k'a je k'aslik, xwiri xaq o jujun chke je kamnaq chik. 7Te'uri xuk'ut rib' che i ma Jacobo, te'uri xaq chke konojel i apostolab'.
8I pa k'isb'al re, xaq xuk'ut rib' chwe yin. Che i ij le, yin in pacha jun noch' chi xtz'aqat ti u'ij, chi xaqte'et xalaxik. 9Yin, nti qas in-ij pacha ki'ij i jub'an chik apostolab'; qas ti kmajawik kb'ix “apóstol” chwe, man xin-an ch'oj chrij i jutzob'aj re i Dios. 10O jub'i' in-ij, lik rumal i rutzil uk'ux i Dios chwe. I rutzil uk'ux chi uya'om chwe, to' ti xuya taq chwe, lik xuriq uchak chwe man yin mas xinchakun chkiwach i jub'an chik apostolab'. Xwiri yin ti xin-anawik, lik are i Dios x-anawik, lik rumal i rutzil uk'ux chwe. 11Nti ku'ano we are yin kinpaxsaj i tzij, o we je are ike, xaqjun chitzij kqapaxsaj, man lik are i tzij chi ikojom yix.
I kamnaq kewalij che i kamik
12B'ay, i tzij chi qab'im kan chiwe are iri: I Cristo xwalij che i kamik, we keje ile ¿B'uchak uri o jujun chiwe ketijin chub'ixkil chi i kamnaq kewalij ti che i kamik? 13Wetene qatzij chi i kamnaq kewalij ti che i kamik, xaq keje teneri xwalij i Jesucristo che i kamik. 14Wetene xwalij ti chik i Jesucristo che i kamik, nti uchak uri kojtijin chupaxsaxik utzijol; xaq i ukub'ib'al ik'ux, lik nti uchak uri chiwe. 15Wetene keje ile, ni'pa uri i qab'im chiwe chrij i Dios, ke'eloq xa t'oronik tzij, man qab'im chik chiwe chi Dios xuwalijsaj i Cristo che i kamik. We qatzij taj chi i kamnaq kewalij che i kamik, xaq keje ri i Jesucristo xwalij ti che i kamik. 16Man we i kamnaq, kewalij ti chik che i kamik, xaq keje neri i Cristo, xwalijik ti che i kamik. 17Wetene xwalij ti Cristo, i ukub'ib'al ik'ux yix, nti uchak uri ke'eloq, xaq k'a o teneri imak chiwij. 18Wetene keje ile, i qachalal chi je kamnaq chik, xa xesachsax neri pa tojb'al mak. 19To' qawach yoj wetene xwi i waral chwach i jyub' ta'aj o wi i utz chi qoy-em che i Cristo; lik to' qawach uri chkiwach konojel i winaq.
20Xwiri wo'or, lik qatzij chi i Cristo xwalij che i kamik chkixol i kamnaq; are ire nab'e xwalijik, aljinsab'al re chqe chi konojel i kamnaq kewalij che i kamik. 21Man lik xa rumal jun winaq xok li kamik chqaxol; xwiri, xaq rumal jun winaq xk'un i walijik che i kamik. 22Lik keje uri pacha i Adán chi konojel kekamik; xaq rumal i Cristo konojel kek'asi chik. 23Xwiri junam taj kojwalijik che i kamik, man nab'e xwalij i Cristo; xwiri are kk'un tanchik, te'uri kojwalij yoj chi oj re Ire. 24Te'uri kk'un i Cristo pa k'isb'al uwach i jyub' ta'aj, re kuqajsaj kicho'ab' konojel ni'pa i je o pkiwi i winaq, ni'pa i nimaq taq atol tzij, ni'pa taq i o kicho'ab' chi k-iltaj ti kiwach. Are tikinaq chik che ronojel ile, te'uri kujach i ajawinik pu'ab' i Qajaw Dios. 25Man i Cristo lik ktiki ni che i ajawinik, k'a kuriq ni ij are kuqajsaj ni kicho'ab' konojel i je ajch'oj chrij.#15.25 Salmos 110.1. 26I k'isb'al ajch'oj chi i Cristo kusachsaj ni uwach, are i kamik. 27Man i Dios, is ronojel uya'om ni pu'ab' i Cristo;#15.27 Salmos 8.6. keje ile tz'ib'tal kan chupam i wuj re i Dios; xwiri are kub'ij chi is ronojel uya'om pu'ab', ile ke'el taj chi xaq o i Dios pu'ab' i Cristo, man are i Dios are yawnaq ronojel che i Cristo. 28Are kuriq i ij chi is o chik pu'ab' Cristo, te'uri ire, chi uk'ojol i Dios, kujach rib' pu'ab' Uqajaw, man are Ire yawnaq ronojel pu'ab' Uk'ojol. Te'uri i Dios kk'iji puwi ronojel i ni'pa i olik.
29O jujun kkitz'onoj kqajsax ya pkiwi, tob'al ke i je kamnaq chik. Xaq kkib'ij chi kewalij ti chik i kamnaq, ¿B'uchak uri keje kki'an ile? I kamnaq, we kewalij ti chik che i kamik, ¿B'uchak uri kkitz'onoj uqajsaxik ya pkiwi pkik'exel i kamnaq? 30We qatzij taj chi kewalij chik i kamnaq, yoj nti uchak uri we kqaya qib' pa kamik chub'ixkil i tzij le. 31Ix, wachalal chwach i Cristo, ij ij in o chwach i kamik. Lik qatzij ile, lik qatzij chi nim inkikotemal iwumal yix chi ix re chik i Qajwal Jesucristo. 32Wetene qatzij taj chi i je kamnaq kewalij chik, ¿Wach uchak uri xintij uyej pa Éfeso, pacha jun achi ktijin che i ch'oj ku' itzel chikop? ¿Wach kinch'ak che ile? Man we qatzij taj chi kewalij che i kamik, to' kin-an neri pacha kkib'ij i winaq: “Chojwa'oq, choj-ab'aroq, man chweq kojkamik”; kecha.#15.32 Isaías 22.13.
33Miya iwib' che i t'oronik, moqxa ke'eloq pacha kub'ij jun tzij: “Jun utz laj winaq, we kerachi'ilaj i ne te utz, kusach uri u'ankil i utz”; kb'ixik. 34Chijikb'a i nojb'al; chimayij i makunik, man o jujun chiwe yix chi iweta'am ti uwach i Dios; kinb'ij ile chiwe yab'al re i k'ix.
Wach kiwalijik i kamnaq
35Moq o jujun chiwe kkitz'onoj, ¿Wach walijik che i kamik? ¿Wach ktzun tan chik i kich'akul? 36I tz'onb'enik le lik nti nojb'al che. Iweta'am yix, jun ija are ktikik, kmuq na, te'uri kpo' tan chik xaq kk'asi chik. 37Are ti o chik uxaq ktikik, xa are i ral ija ktikik; keje utikik i trigo ile, xaq i jub'an chik ija. 38K-on panoq i Dios, ku'an keykaq che i ija le, pacha uch'ob'om ire; ku'an chke chkijujunal pacha kmajawik. 39Ni'pa i ch'akulaj xaqjun ti ketzunik; i kich'akul i winaq, winaq ktzunik; i kich'akul i chikop, chikop ktzunik; keje i tz'ikin, xaq keje i kar, junwi ketzunik. 40O i ch'akulaj aj chikaj, xaq o i ch'akulaj aj chwach jyub' ta'aj. Xwiri i kichomal i ch'akulaj aj chikaj, keje taj pacha i ch'akulaj re uwach i jyub' ta'aj. 41I uchomal i ij xaqjunam taj ru' uchomal i ik', xaq i ch'umil. Xwiri i ch'umil, xaqjunam ti kichomal chkiwach.
42Xaq keje ku'an i ch'akulaj ile are kwalij che i kamik. Ni'pa i ch'akulaj chi muqtalik ile k-ayik; xwiri are kwalij che i kamik i ch'akulaj le junwi chik. 43Are muqtalik nti u'ij, xwiri we xwalij che i kamik, i ch'akulaj le lik nim uchomal. Are muqtalik nti ucho'ab', xwiri we xwalij che i kamik lik o ni ucho'ab'. 44I kmuqik to' ch'akulaj re waral; we xwalij che i kamik, are chik i ch'akulaj aj chikaj. O i ch'akulaj re aj uwach i jyub' ta'aj, xaq o i ch'akulaj re aj chikaj.
45Qeta'am ile, man i tzij chi tz'ib'tal chupam uwuj i Dios kub'ij: “I Adán, chi nab'e achi, xya' uk'aslemal uch'akul re uwach i jyub' ta'aj”; Xwiri, i k'isb'al Adán x-an i ch'akulaj aj chikaj che, chi kuya k'aslemal. 46Chi kqata wi, i nab'e ch'akulaj xa re uwach i jyub' ta'aj; te'uri kya' i ch'akulaj aj chikaj. 47I nab'e achi, yijb'am che ulew, xa ulew te'eq; i ukab' achi, xpe chikaj. 48I ch'akulaj re uwach i jyub' ta'aj, xaqjun u'anik pacha i uch'akul i achi chi antal che ulew; xaq i ch'akulaj aj chikaj keje pacha re i jun chi k'unnaq chikaj. 49Wo'or kojmajaw ru' i achi chi antal che ulew; xaq k-on panoq kojmajaw ru' i Cristo chi aj chikaj. 50Ix, wachalal chwach i Cristo, kwaj kinb'ij iri chiwe: I ch'akulaj chi to' b'aq, to' ti', kok ti chila chikaj ru' i Dios. Kok taj, man ni'pa taq i knajtin taj, nti re che ile chi nti uk'isik.
51Chita pe', kwaj kin-aljinsaj ni jun tzij chiwe chi ujer uwam uwach. Are iri: Qonojel taj kojkamik, xwiri qonojel kjalwachix ni qach'akul 52che jun jo'taj tan k-antaj ile, are kch'aw i trompet re i k'isb'al ij; xa juntir pacha u'ankil jumutz'aj qab'a'wach, keje k-on qajalwachixik ile. Are kch'aw ni trompet, ni'pa i je kamnaq, kewalij che i kamik, xaq yoj, chi ni'pa i oj k'aslik, kjalwachix ni qach'akul. 53Ronojel i o chqe chi kuch'ij ti naj, o uchak kjalwachix ni ru' ile chi kk'is taj. I qach'akul chi to' kkamik, o uchak kjalwachix ni ru' i ch'akulaj chi kkam taj. 54Ni'pa i o chqe chi to' k-ayik, kjalwachix ni che ile chi k-ay ti chik; i qach'akul chi to' kkamik, kjalwachix ni che i kkam ti chik. Are kqil ile, kqetamaj chi nti chik kamik; ke'eloq pacha kub'ij uwuj i Dios: “I kamik ya chuptal chik; ya xqajsax ucho'ab'.” 55#15.55 Ke'eloq pacha kqab'ij keje iri che i kamik.“Yet, at kamik, ¡Lik nti chik pa'ab' ka'an k'ax chqe! Yet, at muqb'al kamnaq, xach'ob'o chi katch'akanik, xwiri xattiki taj.” 56Keje ile kel chqe, man we nti chik qamak, kojkanaj ti kan uri che i kamik, man i uch'ut i kamik are i mak atzalal. Xwiri ile, nti chik ucho'ab' pqawi man oj o chik pu'ab' i Jesucristo, oj nti chik pu'ab' i ujer atb'al tzij. 57K'amori che i Dios, man rumal i xu'an i Qajwal Jesucristo, i Dios uya'om chqe chi kojtiki ni che i ucho'ab' i kamik.
58Rumali, ix, wachalal chwach i Cristo chi kixwaj, lik chijikb'a ik'ux; ko chixtak'aloq. Chikowij mas u'ankil uchak i Ajwal. Yix iweta'am chi utz kel i chak le chi kixtijin chu'anik junam ru' i Ajwal.
Currently Selected:
1 Corintios 15: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala