1 Corintios 16
16
I pwaq chi kmolik, tob'al ke i qachalal chwach i Cristo
1Wo'or kinb'ij chiwe chrij i pwaq chi kmolik tob'al pan ke i qachalal chila pa Jerusalén. Chi'ana yix pacha inb'im chke i qachalal pa taq jutzob'aj re i Dios pa jyub' Galacia. 2Pa taq domingo, yix chijujunal, ni'pa ich'akom pa seman, chijacha ni'pa i kiwaj kiya'o, xaq chik'olo. We keje ki'an ile, are kinuponik, is yij chik uri iwumal, k'ate ti kixok chumolik are kinuponik. 3Cheicha yix pachin ke'e chuya'ik i pwaq chke i qachalal chi je jutzob'aj re i Dios k'a pa Jerusalén. Are kinupon iwu', keintaq b'ik, xaq kintz'ib'aj b'i jun wuj chi kkik'am b'i ku'. 4We kmajawik chi yin kin-ek kin-e ri, xaq ke'e ike wu'.
Ma Pablo xuya pan utzijol chke i qachalal chi kupon ku'
5Wachalal, keinsolij ni jutaq tzob'ajil qachalal pa jyub' Macedonia, te'uri kinupon iwu' yix, are inik'awnaq chik chila. 6We xinuponik, kwaj kinnajtin jub'i' iwu', moqxa kwik'awsaj ni alaj chila. Keje ile kinito ru' wach rajwaxik chwe xaq kiya jub'i' ukowil ink'ux are kinmaj chub'i inb'e. 7Kinik'aw ti iwu' wo'or, man kwaj ti yin we to' kixewila; kwaj kink'iji k'iyal ij iwu', we kuya i Ajwal chwe. 8Xwiri kink'iji ni waral pa Éfeso, k'a kik'aw ni nima'ij Pentecostés, 9man inchak waral utz ktijin relik, tupu je k'i kkaj kki'atij utzij i Dios.
10Are kupon i ma Timoteo iwu', utz uk'ulaxik chi'ana man kk'ix ti chixol; chk'un chik'ux chi ire xaq kchakun che uchak i Ajwal pacha kin-an yin. 11Rumali, mijun chiwe muxutuj, man utz kkikot uk'ux are kk'un tan chik wu'. Are kumaj chal ub'e, chito che wach i rajwaxik che; kwoy-ej ni uk'unik junam ku' i jub'an qachalal chwach i Cristo.
12Xaq i qachalal chwach i Cristo ma Apolos, lik intz'onom che chi kerachi'ilaj b'i jub'an qachalal chwach i Cristo are ke'e iwu', xwiri ire xraj ti enam wo'or; k-on panoq, te'uri kupon iwu'.
K'isb'al taq pixb'anik xaq i utzil wachij
13Chixk'ask'at ni pik'ux, lik chijikb'a iwib' chwach i Dios, chikowij ik'ux chupam uchak i Ajwal, lik chijikb'a ik'ux che. 14Xaq ni'pa i ki'ano, chi'ana rumal i k'axnab'al ik'ux.
15Wachalal chwach i Cristo, iweta'am yix, chila pa jyub' Acaya, are i nab'e qachalal chwach i Cristo kijachom kib' che i Cristo, je are i ma Estéfanas ru' rixoqil xaq ralk'uwal. Ike lik kiya'om kik'ux chkito'ik i je re i Cristo. 16Ni'pa ix keje pacha ike, lik kintz'onoj chiwe, chixkojon che wach taq kkib'ij chiwe. Xaq chixkojon chke konojel ni'pa i kiya'om kik'ux che uchak i Ajwal xaq chkito'ik i qachalal.
17Lik kinkikotik, man xinkisolij i ma Estéfanas, ma Fortunato, xaq i ma Acaico. Ike lik xinkito, xki'an ik'exel yix. 18Lik xkiya ukowil ink'ux, xaqjun ru' pacha ki'anom chiwe yix. I winaq pacha ike le kmajawik we konojel i qachalal kkitioxij ni chke.
Rutzil wachij xaq k'isb'al taq tzij
19I qachalal pa taq jutzob'aj re i Dios pa jyub' Asia, kkiya pan rutzil iwach yix. Xaq i ma Aquila ru' i rixoqil chi ati Priscila, xaq konojel i qachalal chi kkimol kib' pkachoch ike, konojel kkiya pan rutzil iwach pub'i i Ajwal. 20Xaq konojel i qachalal chwach i Cristo waral kkiya pan rutzil iwach. Chwach i Dios, chitz'ub'aj iwib' chiwach.
21Yin in ma Pablo, kintaq b'i rutzil iwach; xaq ru' in-ab' lik are yin xintz'ib'aj b'i ile chiwe.
22We o jun, k'ax ti kuna i Ajwal, ¡Chk'oqox na! ¡Ajwal, we' chatk'unoq!
23I utzil chomal re i Ajwal Jesucristo ol ni piwi. 24Chiwe yix iwonojel, kintaq b'i i k'axnab'al ink'ux rumal i Jesucristo. Qatzij (Amén).
Currently Selected:
1 Corintios 16: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala