%C9xodo 1

Uyej chi xkitij aj Israel pa Egipto

1Are kib'i aj Israel iri chi xeupon junam ru' mam Jacob pa Egipto, chkijujunal kik'amom b'i kalk'uwal: 2Ma Rubén, ma Simeón, ma Leví xaq ma Judá; 3ma Isacar, ma Zabulón xaq ma Benjamín; 4ma Dan, ma Neftalí, ma Gad xaq ma Aser. 5I kik'iyal umuq uxikin mam Jacob je lajuj oxwinaq (70) konojel. Xwiri ma José o chik chila pa Egipto.

6Ma José, ratz ucha' xaq konojel i lemajil le xekamik. 7Xwiri i je aj Israel lik je k'i kak'al xaq xek'iyarik. Rumali chi lik o kicho'ab' lik xnoj uwach ronojel ulew Egipto ipa je o wi, rumal kik'iyal.

8Are uri xok chik jun ajawinel k'ak' puwi i tinimit Egipto chi xretamaj ti uwach ma José; are uri xub'ij chke uwinaq: 9Chita pe', i je aj Israel lik je k'i chik xaq lik o chik kicho'ab' chqawach yoj. 10Wo'or lik chqach'ob'o uri wach kqa'an chke, man keje ile kek'iyar ti chik, man we kqa'an ti chke lik kek'iyar uri, xaq we o taq je ajch'oj kewalij chqij, qeta'am taj moqxa kkiya taq kiwach ku', lik ketiki uri chqe, xaq ke'el b'i uri che i tinimiti. Keje ile xub'ij i ajawinel chke uwinaq.

11Are uri i je aj Egipto xekikoj taqanel pkiwi aj Israel chu'anik k'ax laj taq chak, xki'an keb' tinimit chi are: Pitón xaq i Ramesés, ile k'olb'al re i jalajuj taq tijawik re, re ma faraón. 12Xwiri are xkiya mas k'ax laj taq chak chke; xa ne mas xek'iyarik xaq xpax b'i kiwach aj Israel chwach ulew Egipto. Rumali i je aj Egipto le lik xkixij kib' chke.

13Xekitaq aj Israel chu'anik i k'ax laj taq chak, lik xkil ti tob'al kiwach; 14xaq lik x-ani k'ax che kik'aslemal chuyijb'axik i xo'ol anb'al xan xaq chu'anik ronojel i jalajuj taq chak pa taq es; ronojel i chak le chi xki'an aj Israel, lik x-il ti tob'al kiwach kumal aj Egipto. 15Chila pa Egipto je o keb' parterab' je aj Hebreo chi are tit Sifra xaq i tit Fúa. I ajawinel re i tinimit le xlapan ku' i parterab', xub'ij chke:

16—Are keito ixoqib' aj Hebreo ru' kitujanik, chikojo retalil wach ropis i kak'al, we ala chikamsaj xwiri we ali chik'asb'a.

17Xwiri i parterab' le kekojon che i Dios, rumali xki'an taj pacha xub'ij i ajawinel chke. 18Are uri i ajawinel chi ke aj Egipto, xutaq kisik'ixik i parterab' le te'uri xutz'onoj chke:

—¿B'uchak xi'an ile chi xeik'asb'a i alab'om?

19I parterab' xkila' uwach che i ajawinel, xkib'ij:

—I ixoqib' aj Hebreo je keje taj pacha ixoqib' aj Egipto; man i je aj Hebreo lik nti k'ax chke xaq lik o kicho'ab', rumali je alannaq chik are kojupon yoj —xecha.

20Lik keje upetik kicho'ab' aj Israel ile xaq lik keje kik'iyarik ile lik arewi mas o kicho'ab', 21xaq kumal i parterab' chi kekojon che i Dios, rumali chi i Dios lik xril tob'al kiwach xuk'iyarsaj kimuq kixikin, 22Are uri ma faraón xub'ij chke konojel uwinaq: “Cheik'aqa b'i konojel ral taq alab'om aj Hebreo chwi ya chi kealaxik; xwiri i ral taq altom konojel cheik'asb'a kanoq.” Xcha.

Currently Selected:

%C9xodo 1: ACHICUB

Highlight

Compare

Copy