%C9xodo 2

Ralaxik a Moisés

1Jun achi chi kikwenta i utzob'ajil aj Leví xk'uli ru' jun ixoq chi rach tzob'ajil 2i ixoq le xk'aqtajik, xalax jun rak'al; are xrilo chi lik chom i ak'al le xruwaj oxib' ik'; 3xwiri are ktiki ti chik chruwaxik i rak'al, xuk'am jun chikach re sakaton, xutz'apij i k'ark'ar ru' lap, man keje ile kok ti ya chupam, te'uri xuya i ak'al chupam, xeuya'a chuchi' i raqana chuxol pacha taq raxaj chi je alaxnaq chi taq ya Nilo. 4Xwiri i ranab' i ak'al le xkanaj kan chinaj chrilik wach kuk'ulmaj i ral uxib'al.

5Chrijil chik ile i umi'al ma faraón xqaj b'i pa atinem chi raqana Nilo, tz'aqat i altom chi je rajke'el kemalkat chi taq ya, i umi'al ma faraón xaqte'et xrilo chi o jun chikach ch'apal chuxol pacha taq raxaj, are uri xutaq b'i jun chke rajke'elab' chuk'amik. 6I umi'al ma faraón are xujaq uwi i chikach xaqte'et xrilo chi o jun ak'al chupam ko'ik, lik k'ax xuna uk'ux, xub'ij:

—I ak'ali kak'al ixoqib' aj Hebreo —xcha.

7Are uri i ranab' ral ak'al le xtejeb' pan ru' umi'al ma faraón xaq xub'ij che:

—¿Kawaj kinsik'ij jun ixoq aj Hebreo man kuya utz'um ak'al xaq kuk'itsaj chawe? —Xcha.

8I umi'al ma faraón xub'ij:

—Utzi', jat chusik'ixik.

Are uri i ali x-e chusik'ixik uchuch i ak'al, 9i umi'al ma faraón xub'ij che ixoq:

—Chak'ama b'i ak'ali, chak'itsaj chwe, yin katintoj ni ru' i chak le.

Are uri i ixoq xuk'am b'i ak'al, xaq xuk'itsaj. 10Are nim chik i ak'al, i ixoq le xeujacha che umi'al ma faraón, i umi'al ma faraón le lik pacha rak'al xu'an che, xaq xuya pub'i i ak'al le a Moisés, man xub'ij:

—Pa ya xwesaj wi loq.

U'anmajik a Moisés chila pa Egipto

11Are achi chik a Moisés le, o jun ij x-e chkisolixik i ratz aj Hebreo, are uri xrilo chi lik k'ax i kichak xaq xrilo chi jun aj Egipto kuch'ay jun achi aj Hebreo chi rach utinimit ire. 12Are uri k'ulala xtaqenik, xrilo chi nti jun winaq kilawik x-e chrij aj Egipto xukamsaj, xaq xumuq kan pa seneb'. 13Chukab' ij xel chub'ik, xaq xeril chik keb' achiyab' je aj Hebreo kki'an ch'oj chkiwach, are uri xub'ij che i jun chi kch'ayanik:

—¿B'uchak kach'ay awach aj Hebreo?

14Ire xub'ij:

—¿Pachin taq wa xyaw i atol tzij le pa'ab' yet man ka'an taq atb'al tzij pqawi yoj? ¿Xatab'a kach'ob' inkamsaxik yin pacha xa'an che i aj Egipto?

I a Moisés are xuta ile lik xuxij rib', xub'ij: Saq laj tzij, ile ya xketamaj chi xinkamsaj jun aj Egipto; xcha. 15Are xuta ma faraón wach xu'an a Moisés, chi xukamsaj jun aj Egipto are uri xutaq utzukuxik re ukamsaxik, xwiri i a Moisés x-anmaj chwach ma faraón, x-e che ulew Madián; are ktijin ruponik xuxlan jub'i' chuchi' jun k'otom, 16are uri xeupon pan wuqub' umi'al ma Reuel chi ajsujul sipon chwach i tiox re i tinimit Madián, xeupon chila chi k'otom chrelsaxik li kiya' man kkinojsaj i yab'al ya, re uchij i kiqajaw. 17Xwiri are xeupon jub'an ajyu'ul chij xekoqtaj b'i altom le; are uri a Moisés xeuto i altom le, xaq xuya kiya' kichij. 18Are xeupon i altom le ru' ja, i kiqajaw chi ma Reuel xutz'onoj chke umi'al:

—¿B'uchak lik juntir xixk'un tan wo'or altom?

19Ike xkib'ij:

—Jun achi aj Egipto xojuto pa ki'ab' ajyu'ul chij, xwi ta la ile, ire xresaj li ya chupam i k'otom, xuya kiya' i chij —xecha.

20Are uri ma Reuel xutz'onoj chke umi'al:

—¿Ipa o wi kan i achi le? ¿B'uchak xiwo'taj kan utukel? Jisik'ij man kutij uwa qu' —xcha.

21I a Moisés xraj jeqelem chila chi rachoch i mam le; i mam le xuya umi'al che a Moisés re rixoqil, chi al Séfora ub'i. 22I ixoq le xalax jun rak'al, i ma Moisés xuya pub'i uk'ojol le a Gersón, man xub'ij: “Yin xa in aj naj rumali xa in ik'awel chupam i ulewi.”

23Are k'iyal ij chik rik'awik ile xkam i ajawinel re Egipto. I je aj Israel lik k'a kejilaw rumal i k'ax laj taq chak chi je taqtal chu'anik. I kijilawik le xupon k'a chwach i Dios. 24I Dios xuta chi lik kejilawik, are uri xk'un chuk'ux chi u'anom utrat ru' mam Abraham, ru' mam Isaac xaq ru' mam Jacob. 25Are u'ankil uri ile chi Dios xeukoj pajil aj Israel.

Currently Selected:

%C9xodo 2: ACHICUB

Highlight

Compare

Copy