%C9xodo 3

I Dios xusik'ij ma Moisés

1O jun ij are ktijin ma Moisés chkiyu'uxik uchij uqajaw uji', chi ma Jetro ajsujul sipon chwach i tiox re i tinimit Madián, i ma Moisés le xeuk'am b'i chij k'a ch'aqap che i tz'inilik jyub' chaqij; xupon k'a pa Horeb chi are i jyub' re i Dios. 2Are o chila, i ángel re i Ajwal xuk'ut rib' che ma Moisés chupam i a' chi ktoqow che i k'ix. I ma Moisés are xrilo chi lik ktoqow i a' che i k'ix, xaq lik kjar taj; 3are uri xuch'ob'o: ¡Lik b'isb'al ile, kin-e pe chrilik b'uchak chi kjar ti k'ix! Xcha.

4Are xril i Ajwal chi ma Moisés ktijin utejeb'ik chrilik i k'ix chi ktoqowik, are uri xch'aw li che chupam i a' xub'ij che:

—¡Ma Moisés! ¡Ma Moisés!

Ire xub'ij:

—In o chi, Ta.

5I Dios xub'ij che:

—Mattejeb' chaloq xaq chawesaj axajab' che awaqan, man i k'ijib'al ipa at tak'al wi le lik ch'am. 6Yin in ki-Dios awatit amam, chi mam Abraham, mam Isaac xaq mam Jacob.

Are uri ma Moisés xuch'uq upalaj man xuxij rib' chrilik i Dios.

7I Ajwal xub'ij chik che ma Moisés:

—Saq laj tzij wilom chi lik kkitij uyej intinimit chila pa Egipto, xaq intom chi lik kejilaw pki'ab' i taqanel chi je kojtal pkiwi, xaq lik weta'am wach i k'ax je o wi. 8Rumali inqajnaq loq re keinto pki'ab' aj Egipto, xaq kewesaj nu b'i pu'ab' i tinimit le man keink'am b'i che jun utz laj ulew xaq lik nim uwach, che jun ulew chi ni' ti chawaj che i leche xaq che uwa'al kab' man lik olik. Chi are ulew ke aj Canaán, ke aj Het, ke aj Hamor, ke aj Ferez, ke aj Jiw xaq ke aj Jebús. 9Intom ni'pa ko'ej, wilom ni'pa i k'ax xaq i uyej chi k-an chke aj Israel kumal aj Egipto. 10Rumali chab'isoj chayijb'a awib', man katintaq b'i ru' ma faraón chkelsaxik aj Israel chi je intinimit, chi je o chila pa Egipto.

11Xwiri ma Moisés xub'ij che i Dios:

—¿Wach taq inpatan yin man kin-e tak'i taq chwach ma faraón xaq kewesaj li aj Israel chila pa Egipto?

12I Dios xub'ij che:

—Yin kink'iji ni awu' xaq are ni k'utb'al re iri chi Yin katintaq b'ik: Are je awesam chali intinimit pa Egipto, iwonojel yix kikoj ni in-ij waral chwi jyub'i.

13Xwiri ma Moisés xub'ij chik che i Dios:

—Are k'ax wuponik chkiwach aj Israel xaq are kinb'ij ni chke: I Dios ke iwatit imam xinutaq li iwu'; man ¿Wach kinb'ij chke we kkitz'onoj ab'i chwe?

14 Are uri i Dios xub'ij che ma Moisés:

—YIN, LIK YIN IRI. Keje inb'i ile, chab'ij ni chke aj Israel: LIK YIN IRI are xintaqaw li iwu'.

15Xwi ta la ile, i Dios xaq xub'ij chik che ma Moisés:

—Keje iri chab'ij ni chke aj Israel: “I Ajwal chi ki-Dios iwatit imam, chi are u-Dios mam Abraham, u-Dios mam Isaac xaq u-Dios mam Jacob, are Ire xintaqaw li iwu'”; katcha chke. Are inb'i ile k-e ij saq chrij, chi xaq kkuxtax ni pa jalajuj taq lemajil —xcha i Dios.

16Yet, jat, chamolo kichi' kinimaqil aj Israel xaq chab'ij chke: I Ajwal chi ki-Dios iwatit imam, chi u-Dios mam Abraham, u-Dios mam Isaac xaq u-Dios mam Jacob, xuk'ut rib' chwe, xaq xub'ij chwe: “Saq laj tzij lik kinb'ison chiwe, xaq lik wilom ni'pa i k'ax chi k-an chiwe chila pa Egipto. 17Xaq xub'ij chwe chi kixresaj li chupam i k'ax le chi ix o wi chila pa Egipto, xaq kixuk'am b'i che ulew ke aj Canaán, ke aj Het, ke aj Hamor, ke aj Ferez, ke aj Jiw xaq ke aj Jebús. Man chila che ulew le lik ni' ti chawaj che i leche xaq uwa'al kab'.” 18Man kekojon ni kinimaqil aj Israel chawe. Te'uri junam kix-e ni chwach i ajawinel re i tinimit Egipto, kib'ij che: I Ajwal chi ki-Dios aj Hebreo petnaq chqak'ulaxik, rumali chaya chqe chi koj-e pa tz'inilik jyub' chaqij, oxib' ij b'e unajtil, chila kqasujuj wi qasipon chwach i Qajwal Dios; kixcha. 19Yin lik weta'am chi i ajawinel re Egipto kuya ti chiwe chi kix-ek, we kink'ut ti incho'ab' che. 20Rumali kink'ut ni incho'ab' xaq keinya ni aj Egipto pa jalajuj taq k'ax, ru' ronojel i nimaq taq anik chi kin-an ni chkixol, te'uri ma faraón kuya nu b'i chiwe chi kix-ek. 21Xaq kin-an ni chke aj Israel chi kkich'ak ni rutzil kik'ux aj Egipto, man keje ile are ke'el chila pa Egipto to' ti tak'tik ke'ek. 22Rumali konojel ixoqib' je aj Israel kkitz'onoj ni chke i kach ixoqib' chi je o chkinaqaj chi je aj Egipto, xaq chke ixoqib' chi je ajposar ku' ru' ja, ronojel ni'pa i b'iroxik an-o'oj, saq-o'oj xaq i k'ul re ki'u' i kak'al. Keje uri umajik b'i ub'itaq ke aj Egipto ile ki'ano.

Currently Selected:

%C9xodo 3: ACHICUB

Highlight

Compare

Copy