%C9xodo 12

Nima'ij re Pascua

1I Ajwal xlapan ru' ma Moisés junam ru' ma Aarón chila pa Egipto, xub'ij chke:

2I ik'i are jun ik' chi lik o u'ij chiwach yix, man are i nab'e ik' re i junab' chiwe yix. 3Chib'ij chke konojel aj Israel, chi che i lajuj ij re i ik'i, chijujunal yix kikamsaj ni jun ral chij ma o xaq nti k-ono we jun chab'at keje ile pa taq alk'uwalil. 4Xwiri jun alk'uwal we xa je keb' oxib', xaq we kkik'is ti uti'lal jun chij, kki'an jun uri che kib' ru' jun chik alk'uwal chi o chkinaqaj, kkijach i ti'ij chkiwach chrij i kik'iyal xaq chrij ni'pa unimal kkitij chkijujunal. 5I chikop chi k-ulik utz we chij xaq we chab'at, xwiri rajwaxik ma xaq aj jun junab', lik rajwaxik chi klis taj. 6I chikop chi k-ulik le rajwaxik kk'ol na; k'a che i kajlajuj ij re i ik'i, lik che i ij le, rajwaxik chi konojel i alk'uwal chi aj Israel, kkikamsaj i chikop le are kqaj i ij. 7Kkik'am ni jub'i' kik' re i chikop, kkisu che i keb' aqan re uchija re i ja chila ipa ktijaw wi i chikop le. 8Lik kkitij ni b'olom ti'ij che a'ab' le, krachi'ilaj b'i k'a laj taq ichaj xaq i wa chi nti kunb'al ru'. 9Lik mitene jub'i' ti'ij mitij taq we rax, xaq we xa po'owsam pa mi'na, rajwaxik chi lik b'olom chwach a'al, ronojel ujolom, raqan xaq i rixkol. 10Lik ronojel i ti' ktijaw b'ik, lik nti kkiya kanoq re chukab' ij, we o taq xk'is taj rajwaxik kjarsax ni uri pa a'. 11Are kikojom chik ki'u' xaq kikojom chik kixajab', kok'am chik kich'amiy pki'ab', xaq lik tijoj rib' kki'an che i chikop, man are i Pascua re i Ajwal. 12Che a'ab' le Yin kinik'aw ni chwach ronojel ulew Egipto, xaq keinkamsaj ni konojel i nab'e taq kak'al i alk'uwalxelab', xaq keje ile kin-an ni chke konojel i chikop; xaq kink'ut ni incho'ab' pkiwi konojel i jalajuj taq ki-dios aj Egipto. Lik Yin in Ajwal xinb'ij ile.

13I kik' chi o che i ja, are k'utb'al re ipa ix jeqel wi yix; man Yin are kwil i kik' kinik'aw suk'ulik, keje kikamsaxik aj Egipto ile kin-ano, xwiri yix mijun tojpen kinya piwi. 14I iji are jun ij chi lik arewi kkuxtax ni iwumal yix, rumal u'anik i nima'ij chi kojb'al u'ij i Ajwal, xaq i imuq ixikin arewi kki'an ni nima'ij le, lik junab', junab' kki'an na, kuxtab'al re chi lik are jun atb'al tzij. 15Wuqub' ij kitij i wa re trigo chi nti kunb'al ru'. Rumali kiwesaj i kunb'al re kuwalijsaj i kaxlanwa chi taq iwachoch are kjeqan i nab'e ij, man xapachin kutij i wa re trigo chi o kunb'al ru', xa pachike ij che i wuqub' ij le, saq laj tzij kelsax ni uri chkixol aj Israel. 16Ki'an jun lo'laj moloj ib' che i nab'e ij xaqjun pacha i wuqub' ij, che ronojel i wuqub' ij le lik nti jun chak k-anik, xwi kiyijb'a iwa chi re kitijo. Xwi ile chi'ana. 17Chi'ana i nima'ij re i wa re trigo chi nti kunb'al ru', man che i ij le xixwesaj li iwonojel yix pa Egipto pa taq tzob'ajil, ile lik jun atb'al tzij chke imuq ixikin, chi lik junab', junab' kki'an i nima'ij le. 18Kijeq utijawik i wa re trigo chi nti kunb'al ru', che uqajb'al ij re i ij kajlajuj re i nab'e ik', k'a che uqajb'al ij re i ij jun juwinaq (21) che i ik' le. 19Wuqub' ij chi lik nti kunb'al re kuwalijsaj i kaxlanwa kik'ol chi iwachoch, man xapachin kutij i wa re trigo chi o kunb'al ru', tupu aj Israel xaq we aj Israel taj, lik kelsax b'i uri chkixol i rachi'il chi je aj Israel. 20Lik mitij taq i wa re trigo chi o kunb'al re kuwalijsaj i kaxlanwa ru' xaipa ix o wi, xwi i wa re trigo chi nti kunb'al ru' kitij na. Keje ile xub'ij i Dios che ma Moisés.

21Are uri ma Moisés xutaq kisik'ixik kinimaqil aj Israel, xub'ij chke: Jix chila ipa iya'om wi i jalajuj taq ichikop, chi'ulu li jun chij o we ntaj jun chab'at, re kitij ku' iwalk'uwal, lik chikamsaj anb'al i Pascua re i Ajwal. 22I kik' chiya chupam jun yab'al, xaq chitzukuj jun ral yotaj hisopo pacha es re mesb'al, re kimu chupam i kik', te'uri chisu che i keb' aqan re uchija xaq che uwi i uchija; mijun kel b'i chiwe chisaq k'a ksaqir na. 23Man kik'aw i Ajwal chkikamsaxik i nab'e taq alk'uwalxelab' chwach ronojel ulew Egipto, xwiri are kril i kik' chi sutal che ronojel uchi' uxol chija kik'aw suk'ulik. Man i Ajwal kuya ti che i ángel ajkamsanel kok piwachoch. 24Chixkojon che i pixb'anik le man lik are jun taqanik chiwe, xaq chke iwalk'uwal ronojel ij saq. 25Are kixupon chwach ulew chi usujum i Ajwal chiwe, lik arewi chi'ana i nima'ij le. 26Are kkitz'onoj iwak'al chiwe, ¿Wach usuk' i nima'ij le chiwe yix? 27Yix kisaqij ni chke: I ukamsaxik i chiji are kojb'al u'ij i Ajwal re i nima'ij Pascua, man i Ajwal le are xik'aw chi taq qachoch chila pa Egipto, xeukamsaj ti nab'e taq qak'al yoj, xwi i nab'e taq kak'al aj Egipto xeukamsaj. I je aj Israel are xkita ile, xexuki'ik xaq xkikoj u'ij i Ajwal. 28Are uri i je aj Israel, xe'e chu'anik ronojel pacha xub'ij i Ajwal che ma Moisés xaq che ma Aarón.

Kikamik i nab'e taq kak'al i winaq

29Are tik'il a'ab' i Ajwal xeukamsaj konojel i atzib' chke alk'uwalxelab' je aj Egipto, xujeq li ru' nab'e rak'al ma faraón chi o pa kub'ib'al chi o u'ij, k'a xuk'is ru' i nab'e rak'al ajprexil, xaq keje ile x-on chke i nab'e taq kak'al i jalajuj taq chikop. 30Konojel aj Egipto xewalij che a'ab' le, xwalij ma faraón xaq xewalij i rajpatan; konojel xe'o'ik xaq lik xesik'in rumal uk'axk'ol, man lik nti jun ja we nti kamnaq chupam. 31Lik che a'ab' le i ma faraón xutaq kisik'ixik ma Moisés xaq i ma Aarón, xub'ij chke:

—Chixel b'i yix waral chkixol inwinaq yix chi ix aj Israel, jix chukojik u'ij i Ajwal pacha ax kib'ij wi. 32Xaq chik'ama b'i jalajuj taq ichikop pacha ax kich'ach'a wi, xwiri xaq chitz'onoj che i Dios pinwi.

33I je aj Egipto xkib'ij chke aj Israel chi lik chkib'isoj b'i elik pa tinimit, man we kkib'isoj tu b'i elik moq kekam konojel ike. 34Are uri i je aj Israel xkik'am b'i ki'or chi k'amaja kkikoj kunb'al ru', xaq xkik'am b'i yot'b'al re ru', xkipasij b'i chupam ki'u' xkik'aq b'i chwi kiteleb'. 35I aj Israel xki'ano pacha b'ital chke rumal ma Moisés, xkitz'onoj b'i jalajuj taq b'iroxik chke aj Egipto chi an-o'oj, saq-o'oj xaq i jalajuj taq ki'u'. 36I Ajwal xu'an chke aj Egipto chi xkil tob'al kiwach aj Israel, man xkiya b'i ronojel chke wach xkitz'onoj. Keje umajik b'i ronojel ub'itaq ke aj Egipto ile xki'an aj Israel.

Kelik b'i aj Israel pa Egipto

37I aj Israel xe'el chila che ulew Ramesés, xe'e pusuk' b'i ulew Sucot. Kolo jo'lajujchiy oxt'ub' (600,000) achiyab' xeb'in ku' chaqan chi lik je utz re i ch'oj, je ajlam ti uri ixoqib' xaq ak'alab'. 38Lik je k'i i winaq re jalajuj taq lemajil xe'e ku' aj Israel le, xwi ta la ile, xaq lik je k'i i chikop xkik'am b'i ku'. 39Lik pa k'achirik xe'elsax loq, rumali x-antaj ti chali kiwa, lik oral xkik'am b'ik, man i aj Egipto lik juntir xekesaj b'ik, k'ate xki'an kiwa chi nti kunb'al ru' pa taq b'e.

40I je aj Israel xek'iji lajuj juwinaq jumo' (430) junab' chila pa Egipto. 41Che i ij le are xtz'aqat i lajuj juwinaq jumo' (430) junab', are uri konojel aj Israel chi je utinimit i Dios, xe'el chila pa Egipto. 42Che a'ab' le i Ajwal lik xeuchajij aj Israel rumal i kelik loq chila pa Egipto. Rumal uri konojel kilemajil aj Israel lik junab', junab' kek'ask'at ni che a'ab' le, man are a'ab' ile re kojb'al u'ij i Ajwal.

Atb'al tzij chrij i nima'ij Pascua

43I Ajwal xub'ij che ma Moisés xaq che ma Aarón:

Iri are i atb'al tzij chrij i Pascua: I winaq chi aj Israel taj, lik kutij ti uri i ti'ij chi kamsam kuxtab'al re i kelb'al loq pa Egipto. 44Xwiri konojel i winaq chi je o pa k'ax rumal rajaw kichak chi je lo'tal ru' mer, utz we kya' chke kkitijo, xwiri we antal circuncisión chke. 45Xwiri mijun aj naj xaq we to' ik'awel laj ajchak man o rajil, utz taj we kutij taq i ti' le. 46Xa jun chi ja ktijaw wi, lik mita jub'i' ti' kelsax b'i chisaq, xaq mijun b'aq k-ajsax taq che i chikop chi sujtalik. 47Konojel aj Israel rajwaxik kki'an iri. 48I winaq chi je aj Israel taj we je jeqel chixol yix xaq we kkaj kki'an i nima'ij Pascua kojb'al u'ij i Ajwal, nab'e kki'an uri i circuncisión konojel ni'pa achiyab', te'uri chki'ana i nima'ij, man ke'eloq chi je alaxnaq pa Israel. Xwiri we antal ti circuncisión chke lik kkitij ti uri ti'ij. 49Xaq are atb'al tzij ile, k-an ni chke i je alaxel pa tinimit, xaq chke i winaq chi je aj Israel taj je o chixol. Xcha i Dios che ma Moisés xaq che ma Aarón.

50Konojel aj Israel lik xki'ano, chrij pacha xub'ij i Ajwal che ma Moisés xaq che ma Aarón. 51Lik che i ij le i Ajwal xeresaj li konojel aj Israel chila pa Egipto, lik pa taq tzob'ajil x-on che i kelsaxik loq.

Currently Selected:

%C9xodo 12: ACHICUB

Highlight

Compare

Copy