%C9xodo 11

Utzijoxik kikamsaxik i nab'e taq kak'al i winaq

1I Ajwal xub'ij che ma Moisés:

—Kinya chik jun tojpen puwi ma faraón xaq pkiwi aj Egipto, te'uri kuya b'i chiwe kix-ek. Lik are ire kixresaj b'ik. 2Wo'or chab'ij chke konojel aj Israel, che achiyab' xaq che ixoqib', chi chkitz'onoj b'i jalajuj taq b'iroxik an-o'oj xaq i saq-o'oj chke i kilok'anij chi je jeqel chkinaqaj.

3I Ajwal xu'an chke aj Egipto chi lik xkil tob'al kiwach aj Israel, xaq xu'an chke i rajpatan ma faraón xaq chke konojel i aj Egipto chi lik xkiya u'ij ma Moisés.

4I ma Moisés xub'ij che ma faraón:

—I Ajwal keje iri xub'ij: “Tik'il a'ab' kinik'aw ni pa ronojel ulew tinimit Egipto, 5keinkamsaj ni konojel i nab'e taq ak'alab', kinjeq li che i nab'e rak'al ma faraón chi o pa kub'ib'al chi o u'ij, kink'isa ni k'a ru' i nab'e rak'al ixoq chi kchaqaw i tzi, xaq keje ile chke konojel i nab'e taq kak'al i chikop. 6Che ronojel ulew Egipto, konojel i winaq kesik'in ni che o'ej xaq rumal jun nim laj b'is, b'is chi lik kilom taj, chi xaq lik kkil ti chik k-on panoq.” 7Xwiri chkixol konojel aj Israel, mitene i tz'i keti'an ti chke i winaq xaq mitene chke i chikop, keje ile kawetamaj na chi i Ajwal junwi kilik aj Israel ku'ano, chwach i ku'an chke aj Egipto. 8Are uri konojel awajpatan kek'un ni wu', lik kexuki ni chub'ixkil i tziji chinwach: “Jat, xaq cheak'ama b'i konojel i winaq chi je teren chawij.” Are kkib'ij ile chwe te'uri kin-ek —xcha i ma Moisés che ma faraón.

I ma Moisés le lik petnaq roywal are xel chwach ma faraón le. 9Chrijil chik ile i Ajwal xub'ij chik che ma Moisés, chi ma faraón kkojon ti chke, xwiri ile lik rajwaxik chi kuk'ulmaj na, man keje ile i nimaq taq anik re i Ajwal kk'iyar ni chwach ronojel ulew Egipto.

10I ma Moisés xaq i ma Aarón xki'an ronojel i nimaq taq anik le chwach ma faraón, xwiri i Ajwal xu'an ko che uk'ux ma faraón, rumali xuya ti chke aj Israel chi ke'el b'ik.

Currently Selected:

%C9xodo 11: ACHICUB

Highlight

Compare

Copy