%C9xodo 10
10
K'axk'olil kumal k'iyal taq sak'
1I Ajwal xub'ij che ma Moisés:
—Jat chik ru' ma faraón, man saq laj tzij lik in-anom ko che uk'ux xaq che kik'ux rajpatanib', k'utb'al re i nimaq taq il chi kin-an chkixol ike. 2Xin-an ile man keje ile kalap ni chke awak'al xaq chke awi amam, wach kiyo'yaxik aj Egipto xin-ano, xaq i nimaq taq il chi xin-an chkixol ike; keje ile kketamaj na chi Yin in Ajwal.
3Are uri x-e ma Moisés xaq i ma Aarón chwach ma faraón, xkib'ij che:
—Keje iri kub'ij i Ajwal chi ki-Dios aj Hebreo: “¿K'a junpa kamayij ile chi lik a'anom nim che awib' chinwach? Chaya chke inwinaq chi ke'e chukojik in-ij. 4We kaya ti chke inwinaq ke'ek, chweq keintaq li jub'an sak' puwi ronojel uwach awulew, 5chi kkinojsaj ni uwach xaq k-aljin ti chik uwach kumal. Kkitij nu b'i jutaq b'i' chi xkanaj kan rumal i saqb'ach xaq kkisach ni uwach ronojel uche'lal echa'. 6Kkixit' ni kib' pa nim laj awachoch, pkachoch je awajpatan xaq pkachoch konojel aj Egipto. Ile lik xkil ti aqajaw achuch xaq mitene awatit amam ni'pa kijeqelem waral che i tinimiti.”
Are xb'itaj ile, i ma Moisés xusutij b'i rib' x-ek, xel pa nim laj ja re i ajawinel ma faraón. 7Are uri i je rajpatan ma faraón xkib'ij:
—¿K'a junpa nawi kumayij qach'ich'axik i achi le? Chaya b'i chke i winaq ke'e chukojik u'ij i Kajwal chi ki-Dios ike. ¿Xatab'a k'amaja kawetamaj chi Egipto lik ya ksach uwach?
8Are uri ma faraón xeusik'ij chik ma Moisés xaq ma Aarón, xub'ij chke:
—Jix chukojik u'ij i Ajwal, chi i-Dios yix, xwiri chib'ij chwe, ¿Je pachin taq ke'ek?
9I ma Moisés xub'ij:
Qonojel koj-ek; ke'e qak'al chi k'a je ch'utiq xaq i qaqajaw qachuch chi lik je nimaq taq winaq chik, junam koj-e ku' i qak'ojol xaq i qami'al, junam ku' i qachij xaq i qachikop man chqe yoj are jun nima'ij kojb'al u'ij i Ajwal.
10I ma faraón xub'ij chke:
—Lik alaj chiwe chi saqil ti inojb'al. ¿Kich'ob' taq yix ile chi Ajwal kixrachnimaj na xaq kinya nu b'i yin chiwe kix-e junam ku' iwak'al. 11Lik k-an taj ti ile, we kiwaj ukojik u'ij Iwajwal, xwi yix ix achiyab' chix-oj, man lik are kiwaj ile —xub'ij ma faraón chke.
Te'uri xutaq b'i kelsaxik ma Moisés xaq ma Aarón chwach.
12Are uri i Ajwal xub'ij che ma Moisés:
—Chayaka a'ab' puwi i tinimit Egipto man kepe i sak' puwi, kkinojsaj uwach ronojel ulew Egipto xaq kkitij b'i ronojel ni'pa i rax taq es, tikon xaq ronojel ni'pa i jutaq b'i' chi xtotaj kan rumal i saqb'ach.
13Are uri ma Moisés xuyak an uch'amiy puwi ulew Egipto, i Ajwal xu'ano chi che i ij le xaq che a'ab' le xuk'am li jun tew prelb'al ij, chi lik kjuk'uk' puwi i tinimit Egipto. Are xsaqir chukab' ij i tew le chi xpe prelb'al ij xeuk'am li sak'. 14I sak' le xkinojsaj ronojel uwach ulew Egipto, lik iltal ti ile ujer chi je k'i i sak' xek'unik xaq k-iltaj ti chik ile k-on panoq, 15lik je k'i i sak' man lik xkich'uq ronojel uwach i tinimit chi lik alaj ti chik pich' uwach ulew kumal, xkitij b'i ronojel i rax taq es xaq xkitij b'i ronojel echa' chwi raqan, chi xtotaj rumal i saqb'ach; lik nti chik uxaq es xaq nti chik uxaq che' rax xkanaj chwach ronojel ulew Egipto.
16Are uri ma faraón juntir xeusik'ij ma Moisés xaq ma Aarón, xub'ij chke:
—Xinmakun chwach i Ajwal chi i-Dios yix xaq chiwach yix. 17Yin kintz'onoj utzil chiwe, chikuyu chik inmak lik xwi chik che iri xinmakun chiwach; chitz'onoj che i Ajwal pinwi chi i-Dios yix, man kresaj i tojpen re i kamik pinwi —xcha.
18I ma Moisés lik xwi xel li pa nim laj ja re i ajawinel ma faraón, i xlapan ru' i Ajwal. 19Are uri i Ajwal xu'an tan chik che i tew chi xpe puqajb'al ij, chi xpe tan chik juk'uk'ik k'amb'al b'i ke i sak', xeuk'aqa pa Mar Kaq; mijun sak' xkanaj kan chwach ronojel ulew Egipto. 20Xwiri i Ajwal xu'an ko che uk'ux ma faraón, rumali chi ma faraón le xuya ti chke aj Israel ke'ek.
K'axk'olil rumal i tz'intz'ik equm
21I Ajwal xub'ij che ma Moisés:
—Chayaka an a'ab' chikaj, man kpe jun tz'intz'ik equm chwach ronojel ulew Egipto.
22I ma Moisés xuyak an u'ab' chikaj, are uri xpe jun tz'intz'ik equm chwach ronojel ulew Egipto 23chi xuch'ij oxib' ij. Mijun xril uwach i ratz ucha' xaq mijun xwalij puk'ijib'al che oxib' ij le, xwiri ku' konojel aj Israel xok ti equm, ike lik saq chi kachoch.
24Are uri ma faraón xusik'ij ma Moisés, xub'ij che:
—Jix, chikojo u'ij i Ajwal, xwiri chiya kan ichij xaq ichikop; xwi iwak'al chik'ama b'i iwu'.
25I ma Moisés xub'ij che ma faraón:
—Lik Yet na katyaw i chikop chqe chi kqasujuj xaq kqaporoj ni chwach i Ajwal, chi qa-Dios. 26Rumali keqak'am b'i qu', lik mijun chke ike kkanaj kanoq. Man kqa'ul jujun chkixol konojel i qachikop le, re kqasujuj chwach i Ajwal chi qa-Dios, xwiri qeta'am taj wach taq rajwaxik chqe k'a kojupon ni chila.
27Xwiri i Ajwal xu'an ko che uk'ux ma faraón, rumali ma faraón xuya ti chke ke'ek. 28Xaq xsik'in chub'ixkil che ma Moisés:
—¡Chatel b'i chi, xaq matk'un chik chrilik inpalaj, man we xatk'un chik lik katkam na! —Xcha.
29I ma Moisés xub'ij che:
Lik saq laj tzij i xab'ij le, man kolintzu ti chik apalaj —xcha.
Currently Selected:
%C9xodo 10: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
