%C9xodo 9

K'axk'olil chke i chikop

1I Ajwal xub'ij che ma Moisés, jat ru' ma faraón chab'ij i tziji che:

—Keje iri kub'ij i Ajwal chi ki-Dios aj Hebreo: “Chaya chke inwinaq chi ke'e chukojik in-ij. 2We kaya ti chke chi ke'ek xaq we k'a kea'atij, 3Yin chi in Ajwal kinpetsaj ni jun nim laj yob'il pkiwi i jalajuj taq achikop chi je o pa taq es: Pkiwi akaway, a'axna, akamey, achikop xaq pkiwi achij. 4Xwiri i AJWAL lik junwi kilik kichikop aj Israel ku'an chwach kichikop aj Egipto, man mixatjun kichikop aj Israel kekamik.”

5I Ajwal lik xuch'ik jun ij man xub'ij:

—Yin chweq kin-an ni ile chwach ronojel ulew Egipto —xcha.

6I Ajwal lik keje ile xu'ano, man chukab' ij xekam konojel kichikop aj Egipto, xwiri i kichikop aj Israel mijun xkam chke. 7I ma faraón xeutaq b'i uwinaq chkilik kichikop aj Israel, are uri xkilo chi lik mijun xkamik, xwiri i ma faraón x-on chik ko che uk'ux man xuya ti chke aj Israel chi xe'ek.

K'axk'olil rumal i ch'ak

8Are uri i Ajwal xub'ij che ma Moisés xaq che ma Aarón:

—Chik'ama b'i jumo'aj chaj pa nuk'b'al a' man kupuk'ij ni ma Moisés chikaj chila chwach ma faraón; 9man i chaj le k-on ni k'aj ulew ktzaq ni puwi ronojel ulew Egipto. Kupetsaj ni ch'ak chke i winaq xaq chke i chikop —xcha.

10I ma Moisés xaq i ma Aarón xkik'am b'i chaj pa nuk'b'al a'; xe'e chwach ma faraón, te'uri ma Moisés xupuk'ij b'i chaj le chikaj. Are uri xpe i ch'ak chke i winaq chi lik x-on puj xaq keje x-on chke konojel i chikop. 11I je ajt'oronel xkich'ij ti olem chkiwach ma Moisés rumal i ch'ak chi xpe chkij, pacha ki'anom konojel aj Egipto. 12Xwiri i Ajwal xu'an ko che uk'ux ma faraón, lik xkojon ti che ma Moisés xaq che ma Aarón pacha ub'im i Ajwal chke.

Uk'axk'olil i k'iyal taq saqb'ach

13Are uri i Ajwal xub'ij che ma Moisés:

—We' katwalij b'i chweq man kat-e chub'ixkil che ma faraón, keje iri kub'ij i Ajwal chi ki-Dios aj Hebreo: “Chaya b'i chke inwinaq chi ke'e chukojik in-ij, 14man wo'or kintaq b'i jalajuj taq k'ax pawi yet, pkiwi awajpatan xaq pkiwi awinaq man keje ile kawetamaj na chi nti jun chik chwach i jyub' ta'aj pacha yin. 15Wetene kink'ut incho'ab' chawe xaq chke awinaq ru' jun k'ax laj yob'il, lik kinchup ne iwachi iwonojel chwach ulew. 16Xwiri in-anom ti ile chawe man kawilb'ej re incho'ab', xaq ketamax ni inb'i chwach ronojel i jyub' ta'aj. 17Tupu aweta'am ronojel ile xwiri yet k'a a'anom ko che ak'ux man aya'om ti che intinimit chi k-ek. 18Rumali chweq keje taq or iri kintzaqsaj na li k'iyal taq saqb'ach chi lik nimaq, xaq lik ilom ti pa Egipto ni'pa ujeqanik loq; 19rumali su' chataqa kik'olik ub'itaq awe xaq achikop chi je o pa taq es, man konojel i winaq xaq konojel i chikop chi je o chisaq kekam ni rumal i saqb'ach. Keje ile chab'ij che”; xub'ij i Dios che ma Moisés.

20Are uri o jujun chke i rajpatan ma faraón xkixij kib' che wach i xutzijoj i Ajwal, rumali xkitaq uk'amik kitaqon xaq i kichikop chi je o pa taq es, xek'ol ru' taq ja. 21Xwiri ni'pa i xekojon taj, xkitaq ti uk'amik kitaqon xaq i kichikop chi je o pa taq es. 22Are uri i Ajwal xub'ij che ma Moisés:

—Chayaka a'ab' chikaj man ktzaq li saqb'ach chwach ronojel ulew Egipto; pkiwi i winaq, pkiwi i chikop, xaq puwi ronojel i tikon.

23Are uri ma Moisés xuyak uch'amiy chikaj, i Ajwal xu'ano chi kraqlaj i ray chwa taq kaj, xaq xutzaqsaj li saqb'ach chwach ronojel ulew Egipto: 24Lik kt'iqiq i saqb'ach xaq lik kraqlaj i ray chupam. Lik ilom ti ile ni'pa ujeqanik li tinimit Egipto pacha x-ono le. 25I saqb'ach le lik x-on mutmut che ronojel ni'pa o chwach ulew Egipto, x-on mutmut chke i winaq xaq chke i chikop, xusach uwach ronojel ni'pa i tikon xaq xu'oqij li ronojel ni'pa u'ab' taq che'. 26Lik xwi chila pa Gosén ipa je o wi aj Israel xtzaq ti saqb'ach, lik mitene jun xtzaqik.

27Are uri ma faraón xutaq kisik'ixik ma Moisés xaq i ma Aarón, xub'ij chke:

—Xwetamaj chi yin in makunnaq, xaq keje inwinaq lik umak ti i Ajwal. 28Lik nti usuk' ray xaq i saqb'ach tzaqnaq chik, rumali chi kixin-atij ti chik, chitz'onoj che i Ajwal pqawi yoj, man kinya ni chiwe chi kix-ek —xcha.

29I ma Moisés xub'ij che ma faraón:

—Are kinel chi pa tinimit Egipto, su' kinyak in-ab' chwach i Ajwal chutz'onoxik che chi ku'atij i saqb'ach xaq i ray chi kraqlajik. Keje ile kawetamaj chi i jyub' ta'aj re i Ajwal. 30Xwiri, yin weta'am chi yet xaq i awajpatan kixij ti iwib' che i Dios man kixkojon ti che.

31I lino xaq i cebada lik xsach uwach, man i cebada k'ate ktijin relik uwach xaq i lino k'ate ne ktijin relik usij. 32Xwiri i trigo, xaq i centeno, xsach ti uwach man pen xealax loq.

33I ma Moisés are xel chwach ma faraón, xaq are elnaq chub'i pa tinimit su' xuyak chekeb' u'ab' chwach i Ajwal chutz'onoxik che, are uri xumayij tzaqik i saqb'ach xaq i ray chi lik kraqlajik xaq xik'aw i jab'. 34Xwiri ma faraón are xrilo chi xik'aw i jab', xumayij tzaqik i saqb'ach xaq xumayij i ray chi lik kraqlajik, xmakun chik xaq keje i je rajpatan man xki'an chik ko che kik'ux. 35I ma faraón lik xu'an ko che uk'ux xaq xuya ti chke aj Israel chi xe'ek. Lik pacha ub'im i Ajwal che ma Moisés.

Currently Selected:

%C9xodo 9: ACHICUB

Highlight

Compare

Copy