%C9xodo 15
15
I b'ix re ma Moisés
1Are uri ma Moisés xaq i aj Israel xkib'ixaj jun b'ix, kojb'al u'ij i Ajwal chi keje iri kub'ij:
Kinb'ixaj ni Ajwal
man xuk'ut nim laj ucho'ab'
are xeumuq kan i kaway pa mar xaq i winaq chi je annaq te'eq chkij.
2I Ajwal are Ire incho'ab' xaq are Ire inb'ix.
Are Ire kintowik xaq are Ire in-Dios;
rumali kinb'ixaj na;
are Ire u-Dios inqajaw, lik kinnimarsaj ni uri u'ij.
3I Ajwal lik jun nim laj ajch'oj,
lik Ajwal ub'i.
4I Ajwal xumuq b'i ch'ich' re i ch'oj pa mar, xaq
i winaq chi je yij che i ch'oj
xaq i je rajpatan ma faraón, lik
konojel xemuqtaj chupam i Mar Kaq.
5Lik xeqaj k'a chuxe' i mar pacha taq jun ab'aj, i uchoyil i mar lik xeumuqu.
6Lo'laj Ajwal, ru' a'ab' wiqab'im
xak'ut i nim laj acho'ab',
man ru' a'ab' le xachup kiwach ajch'oj chqij.
7Ru' nim laj acho'ab'
xachup kiwach ajch'oj chawij,
xaq ru' awoywal xeak'aq pa a'
chi pacha je uxaq taq es chaqij.
8Xa ru' jub'i' atewal xaxut'ij, lik juntir xumol rib' i ya,
x-on pacha taq tapial k'ulala
lik xuyin ti chik rib' k'a chuxe' loq.
9I ajch'oj xub'ij:
Kinterej b'i chkij k'a keinriqa na.
Lik kinkikot na
xaq kinjach ni ronojel i xinmaj chke man lik kwesaj woywal chke,
ru' i ch'ich' chi k'ulala o uware
keinkamsaj ni konojel; xcha.
10Xwiri Yet xa ru' jub'i' utewal patzam xa'an che i mar chi xeumuq b'i aj Egipto,
xeqaj b'i k'a chuxe' i mar pacha taq jun raxch'ich'.
11¿O taq wa jun chik dios
kupaj rib' awu'?
¿Pachin taq wa jun kupaj rib' awu'
chi lik at ch'am xaq lik nim a'ij?
Yet lik ka'an i nimaq taq anik, rumali lik kmajawik chi koksax a'ij
12Xach'ob' uk'utik acho'ab' rumali xa'an chke aj Egipto
chi xeb'i' b'i rumal ulew.
13Ru' i k'axnab'al ak'ux
lik awok'am i tinimiti xaq lik xato,
ru' acho'ab' keak'am b'i che i lo'laj awachoch.
14I nimaq taq tinimit are kkita ile,
lik keb'arb'at ni rumal kixib'rikil, xaq i b'is lik kuqajsaj ni ki'ij aj Filistea.
15Are uri i kaj-atzil aj Edom laj kel ni kik'ux rumal kixib'rikil,
xaq i kaj-atzil aj Moab keb'arb'at ni rumal kixib'rikil,
xaq konojel aj Canaán kb'a'krij ni kik'ux are kkita ile.
16Lik chpet ni xib'rikil pkiwi
rumal i nim laj acho'ab'
Yet Ajwal,
cheu'on ni mem pacha taq ab'aj,
k'a keik'aw ni atinimit chkixol ike le,
man lik are atinimit Israel.
17Yet Ajwal chojak'ama nu b'i pa jeqelem che i lo'laj jyub' chi awe Yet,
che i k'ijib'al chi xa'ulu ipa katjeqi wi,
che i lo'laj k'ijib'al chi xayijb'a Yet ru' a'ab'.
18I Ajwal krajawin ni ronojel ij saq.
I b'ix re ati Mariy
19Man are xe'ok li winaq pa mar chi ajrij taq kaway xaq aj pa taq ch'ich' re ma faraón, i Ajwal xu'an chke chi xemuq taj kan chuxe' ya. Xwiri i aj Israel lik chwach ulew chaqij xeik'aw wi are xki'axuj li mar. 20Are uri ati Mariy chi profeta, chi ranab' ma Aarón, xuk'am jun chilchil xok chuchilchaxik, xaq konojel ixoqib' xe'ok chuchilchaxik i chilchil xaq xexajawik. 21Are uri ati Mariy xujeq b'ix chkiwach:
Chib'ixaj i Ajwal,
man uk'utum u'ij uchomal chqe, are xeumuq i kaway pa mar
xaq xeumuq i winaq chi je annaq chkij.
I ya k'a
22I ma Moisés xaq i aj Israel xe'el chuchi' i Mar Kaq, xe'e pa tz'inilik jyub' chaqij chi Shur ub'i. I aj Israel le oxib' ij xeb'in pa tz'inilik jyub' chaqij, xwiri lik nti ya xkiriqo. 23Are xeupon che jun k'ijib'al xkiriq i ya, xwiri xkich'ij ti utu'ik i ya le man lik k'a, rumali xkiya pub'i i k'ijib'al le Mara.
24Are uri i winaq xkich'ojij che ma Moisés, ru' i tziji: ¿Wach kqatu' iri wo'or kab'ij yet? Xecha. 25Are uri ma Moisés xutz'onoj che i Ajwal; i Ajwal xuk'ut jun che' che; are uri i ma Moisés xuk'aq b'i chupam i ya, te'uri i ya le juntir x-on ki.
Che i k'ijib'al le i Ajwal xuya jun atb'al tzij chke, suk'b'al re kik'aslemal xaq lik ilb'al re we kekojon che. 26Xub'ij: “Yin in Iwajwal Dios, we lik kiya ixikin che intzij, we ki'an i suk'ulik chinwach, we ki'ano pacha kub'ij in-atb'al tzij xaq we kixkojon che intzij inpixab', kinya ti uri jun tojpen piwi pacha xinya pkiwi aj Egipto. Man Yin chi in Ajwal in kunanel iwe.” Xcha.
27Te'uri i aj Israel xeupon pa Elim, chila ipa o wi i kab'lajuj ralaxb'al ya xaq lajuj oxwinaq (70) che' palmera, chila xek'iji wi naqaj che i ya.
Currently Selected:
%C9xodo 15: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
