%C9xodo 16
16
I Dios xuya i maná
1Konojel aj Israel xe'el chila Elim, xe'e pa tz'inilik jyub' chaqij chi Sin ub'i, chi o chuxol i Elim ru' i Sinaí; jun ik' ru' nik'aj kelik loq che ulew Egipto are xeupon chila Sin. 2Are uri konojel aj Israel k'ax xech'aw chrij ma Moisés xaq chrij ma Aarón chila pa tz'inilik jyub' chaqij. 3I aj Israel xkib'ij:
—Utz te'eq wetene xojukamsaj i Ajwal chila pa Egipto, man chila are kqatij wa lik kojnojik xaq k'iyal taq b'oj ti'ij kqatijo, xwiri yix xojik'am li waral pa tz'inilik jyub' chaqij, kamsab'al qe che i numik qonojel —xecha.
4Are uri i Ajwal xub'ij che ma Moisés:
—Kin-an na chi ktzaq li iwa chikaj; i winaq ij ij kkimol ni kiwa re jun ij, man kink'am ni kipam kwilb'ej re, we kekojon che in-atb'al tzij o we kekojon taj. 5Xwiri che uwaq ij rajwaxik kkimol kiwa re keb' ij uwach, ronojel kkiyijb'a kanoq re chukab' ij.
6Are uri ma Moisés xaq i ma Aarón xkib'ij chke konojel aj Israel:
—Wo'or kqaj ij kiwetamaj na chi are i Ajwal xixelsaw li chila pa Egipto. 7Te'uri chweq ksaqirik kiwil ni u'ij uchomal i Ajwal, Ire xuta chi yix k'ax xixch'aw chrij; man ¿Wach taq wa qamak yoj chi k'ax xixch'aw chqij?
8I ma Moisés xub'ij chik chke:
—Wo'or kqaj ij i Ajwal kuya ni ti'ij chiwe re kitijo, chweq ksaqirik wa kuya ni chiwe, man ire utom chik chi k'ax xixch'aw chrij man ¿Wach taq wa qamak yoj? Chqij ti yoj k'ax xixch'aw wi, lik chrij i Ajwal —xcha.
9Te'uri ma Moisés xub'ij che ma Aarón:
—Chab'ij chke konojel aj Israel chi chetejeb' chwach i Ajwal, man ire je utom chik chi k'ax xech'aw chrij —xcha.
10I ma Aarón are ktijin che i lapanik ku' konojel aj Israel, ike xetzun b'i pa tz'inilik jyub' chaqij, are uri xkil u'ij uchomal i Ajwal chi xwinaqir li pa sutz'. 11I Ajwal xlapan ru' ma Moisés, xub'ij:
12—Intom chik chi aj Israel k'ax xech'aw chwij, chab'ij chke chi: “Wo'or kqaj ij kkitij ni ti'ij, i chweq ksaqirik lik k'i i wa re trigo kkitij tan chik.” Keje ile kiwetamaj na chi Yin in Iwajwal Dios —xcha.
13Xaq che uqajb'al ij le, xeupon jub'an kokox, chi xkinojsaj uwach i k'ijib'al ipa je o wi aj Israel, xaq are xsaqirik lik saq chunchoj u'anom uxaq k'aj chrij chwach i k'ijib'al ipa je o wi, 14are xchaqij uxaq k'aj le x-on kan pacha atz'am chi lik utz, tixnaq chwach ulew chaqij. 15Are xkil aj Israel ile xkitz'onoj chkiwach: “¿Wach taq ile?” Xecha; man ike keta'am taj. Are uri ma Moisés xub'ij chke:
—Ile are i wa re trigo chi kuya i Ajwal chiwe re kitijo —xcha. 16Are taqanik iri chi uya'om i Ajwal chwe: Chik'ama ni'pa i rajwaxik chiwe re kitijo, chrij ni'pa i k'iyal, junam ku' iwalk'uwal, kakab' k'ox chijujunal.
17Lik keje ile xki'an aj Israel, o jujun chi lik k'i xkimolo xaq o jujun chi xa jub'i' xkimolo. 18Xwiri are xe'ok chupajik pa taq k'ox, i jujun chi lik k'i xkik'amo lik nti pich' uwi xkanaj ku', xaq i jujun chi xa jub'i' xkik'amo xqare xtz'aqat i keb' k'ox chkiwach.
19Are uri ma Moisés xub'ij chke:
—Mijun kuk'ol taq kan uwa re chukab' ij. 20Xwiri o jujun chke xekojon ti che ma Moisés, xkik'ol kan jub'i' kiwa re chukab' ij; xwiri ni'pa i kiwa chi xkik'ol kanoq le, lik xe'ok amol ru' xaq lik x-on chu. Are uri ma Moisés xpe roywal chke.
21Rumali ij ij lik we' kkimol ni'pa i rajwaxik chke chkijujunal re kkitijo, man are kmi' i ij xa kjarik. 22Xwiri che uwaq ij, xkimol kiwa re keb' ij uwach, chi ke'eloq wajxaqib' k'ox chkijujunal. Are uri konojel i kaj-atzil aj Israel xe'e chub'ixkil che ma Moisés. 23Are uri ma Moisés xub'ij chke:
—Keje ile ub'im i Ajwal, man chweq sábado, i ij le lik elsam re ukojik u'ij i Ajwal, rumali chicha'saj kanoq ni'pa i cha'saxik re, xaq chipo'owsaj kanoq ni'pa i po'owsaxik re, i kk'is taj chik'olo kanoq re chweq.
Keje ile xub'ij ma Moisés chke.
24I je aj Israel xki'ano chrij pacha xetaq che rumal ma Moisés, i kiwa chi xkik'is taj xkik'ol kanoq re chukab' ij. Xwiri lik xe'ok ti amol che xaq x-on ti chu. 25Are uri i ma Moisés xub'ij chke:
—Ni'pa iwa chi xik'ol kan iwir chitija wo'or, man che i iji lik nti kiriq pa taq es tupu kix-e chutzukuxik, man wo'or sábado, ij chi lik elsam re kojb'al u'ij i Ajwal. 26Waqib' ij kimol ni iwa, man che uwuq ij chi are i ij sábado lik nti kiriq pa taq es tupu kix-e chutzukuxik —xcha.
27O jujun chke aj Israel xe'e chutzukuxik kiwa pa taq es che uwuq ij le, xwiri lik nti xkiriqo. 28Rumali i Ajwal xub'ij che ma Moisés:
—¿K'a junpa nawi kimayij ile chi kixkojon ti che intzij inpixab', xaq che ink'utunik? 29Chikojo pajil chi Yin in Ajwal inb'im chik chiwe chi i ij sábado are jun ij chi kixuxlanik, rumali chi che uwaq ij le keb' ij uwach iwa kinya'o keje ile iwonojel kixkanaj ni ru' ja, mijun kel b'i chiwe pa taq es che uwuq ij —xcha.
30Are uri i aj Israel xe'uxlan che uwuq ij le.
31Xkiya pub'i i wa le chi xkimolo, maná, saq ktzunik pacha ub'a' kulantr, xaq lik ki pacha ktijaw wa re trigo puwa'al kab'.
32Te'uri ma Moisés xub'ij chke:
—Keje iri xub'ij i Ajwal: “Chinojsaj keb' k'ox maná, man kkil ni uwach imuq ixikin wach ktzun i wa chi xinya Yin chiwe pa tz'inilik jyub' chaqij, are xixwesaj li pa Egipto.” —Xcha.
33Te'uri ma Moisés xub'ij che ma Aarón:
—Chatzukuj jun yab'al, chajama keb' k'ox maná chupam, chaya chwi sujb'al sipon re i Ajwal, man keje ile kik'ol kan chke imuq ixikin chi kealax na k-on panoq.
34Are uri ma Aarón xuya pan i maná chwach i kaxa re i Ajwal, pacha ub'im i Ajwal che ma Moisés.
35I je aj Israel kawinaq (40) junab' xkitij i maná, k'ate xkimayij utijawik are xe'ok b'i chwach ulew Canaán.
36Ujer chila ku' aj Israel, i kipajb'al ike chi jun gomer keb' k'ox o che xaq i jun efa juwinaq k'ox o che.
Currently Selected:
%C9xodo 16: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
