%C9xodo 18

I ma Jetro xupon chusolixik i ma Moisés

1Xretamaj ma Jetro chi uqajaw uji' ma Moisés chi xaq ajsujul sipon chwach jun chik dios re i tinimit Madián, xretamaj ronojel ni'pa u'anom i Dios che ma Moisés xaq che utinimit Israel, xaq wach kelsaxik xu'an li chke pa tinimit Egipto. 2I ma Moisés le je u'ijlam kan i rixoqil chi ati Séfora ire le o kan ru' i ma Jetro, 3xaq xeuk'am kan i keb' rak'al, jun chke are a Gersón, man ma Moisés xub'ij: Xa in ik'awel chwach ulewi. 4Ub'i i jun chik a Eliezer, man xub'ij: “I u-Dios inqajaw xinuto xaq xinresaj chwach i kamik pu'ab' ma faraón.”

5I ma Moisés uxlannaq chila pa tz'inilik jyub' chaqij, chi o chunaqaj i jyub' re i Dios. I ma Jetro le rachi'ilam b'i umi'al chi rixoqil ma Moisés xaq i je keb' ri umam chi je uk'ojol ma Moisés. 6I ma Jetro le utaqom chub'i ub'ixkil che:

—Yin chi in aqajaw aji' kin-e chawilik, kewachi'ilaj b'i awak'al xaq i awixoqil —xcha.

7I ma Moisés xpe chuk'ulaxik uqajaw uji', are xuk'ulaj xu'aj rib' chwach xaq xutz'ub'aj. Are xyataj rutzil kiwach te'uri xe'ok b'i chupam umujb'al ma Moisés. 8I ma Moisés le xulap che uqajaw uji' ronojel ni'pa u'anom i Ajwal che ma faraón xaq chke aj Egipto, rumal i k'axnab'al ke aj Israel, xaq xulap che ronojel ni'pa uyej kitijom pa taq b'e xaq wach taq kito'ik antal rumal i Ajwal.

9I ma Jetro lik xkikotik are xretamaj chi Ajwal lik utz kilik aj Israel u'anom, xaq xeresaj pki'ab' aj Egipto. 10Are uri xub'ij:

—Choksax ni u'ij i Ajwal chi xixresaj pki'ab' aj Egipto xaq pu'ab' ma faraón. 11Wo'or xwetamaj chi i Ajwal lik nim ucho'ab', chkiwach konojel i tiox, man i je aj Egipto are xki'an nim che kib', i Ajwal xuk'ut u'ij xaq i ucho'ab' chke.

12I ma Jetro chi uqajaw uji' ma Moisés juntir xuk'am jun sipon xukamsaj xaq xujarsaj pa a' chwach i Dios; xaq xeupon ma Aarón xaq konojel i unimaqil ke aj Israel, are uri xekub'i chwa'im ru' uqajaw uji' ma Moisés.

I ma Moisés xeu'ul jub'an chik atol tzij

13Chukab' ij i ma Moisés xkub'i chu'atik tzij pkiwi aj Israel, i winaq le lik jun ij je tak'al chwach ma Moisés, are kepe i jub'an keupon i jub'an chik, xkijeq xsaqirik xaq k'a are o wi xqaj i ij. 14I ma Jetro are xril ronojel ni'pa ku'an ma Moisés ku' i winaq, xutz'onoj che:

—¿Wach taq usuk' ile chi xwi yet katkub'i chu'anik i atb'al tzij chke konojel i winaq, xaq ike je tak'al b'i jun ij chawoy-exik? 15I ma Moisés xub'ij che uqajaw uji'. I winaq kek'un wu' man kkitz'onoj kino'oj chwe chi kpe ru' i Dios. 16Are o taq kich'oj kek'un wu', man yin kin-at tzij pkiwi, are uri kinsaqij utzij upixab' i Dios chke xaq i u'atb'al tzij —xcha.

17Are uri ma Jetro chi uqajaw uji' ma Moisés xub'ij che:

—Utz ti kattijin chu'anik le. 18Ile lik katkos ku' xaq kekos i winaq awu' yet, man i chak le lik kuk'is acho'ab', xaq kattiki ti yet chu'anik atukel. 19Wo'or chata wach kinb'ij chawe: Yin katinpixb'aj xaq i Dios ol ni awu'. Are i ka'an yet, rajwaxik katch'a'at ru' i Dios pa kik'exel i winaq, ni'pa i kich'oj kajach che i Dios. 20Chak'utu i u'atb'al tzij i Dios chke xaq i uk'utunik, xaq chab'ij chke wach kki'ano man keje ile kketamaj wach rok'axik kik'aslemal kki'ano chi suk'ulik. 21Yet chea'ulu i achiyab' chkixol konojel i winaq chi lik o kino'oj xaq lik kkixij kib' chwach i Dios, chi lik je saqil laj taq achiyab', je rayinel taj, cheaya pkiwi i winaq re kaj-atzil. Jun chaya pkiwi i lajujwinaq kamo' (1,000) jun chik chaya pkiwi i jo'winaq (100) jun chik chaya pkiwi i lajuj kawinaq (50) xaq i jun chik chaya pkiwi i lajuj. 22Are ike chki'ata tzij pkiwi i winaq ronojel ij, xwiri ni'pa i ch'oj nimaq kekik'am li chawach yet; ike kki'at ni tzij puwi i ch'oj chi xa ch'utiq. Keje ile k-ob' jub'i' eqan chaqul yet, man katkito ike che. 23We keje ile ka'ano xaq we katutaq i Dios chu'anik, lik naj kach'ij uri, xaq konojel i winaq lik kekikotik ke'e chi kachoch —xcha.

24I ma Moisés xkojon che upixb'anik uqajaw uji', xaq xu'an ronojel ni'pa xb'ix che. 25Are uri ma Moisés xeu'ul achiyab' chi lik o kino'oj chkixol konojel aj Israel, xeuya pkiwi i winaq re ki'atol tzij; jun xuya pkiwi i lajujwinaq kamo' (1,000) jun chik xuya pkiwi i jo'winaq (100), jun chik xuya pkiwi i lajuj kawinaq (50) xaq i jun chik xuya pkiwi i lajuj. 26Ike le xki'at tzij pkiwi i winaq ronojel ij; i nimaq taq ch'oj kkik'am b'i chwach ma Moisés, xwiri i ch'oj chi qas ti nimaq kki'at tzij ike pkiwi. 27I ma Moisés xu'ijla b'i uqajaw uji', are uri i uqajaw uji' le x-e chik putinimit.

Currently Selected:

%C9xodo 18: ACHICUB

Highlight

Compare

Copy