%C9xodo 19
19
Kuponik aj Israel chila Sinaí
1I je aj Israel are xe'el b'i pa Egipto, k'a che oxib' ik' xeupon wi pa tz'inilik jyub' chaqij chi Sinaí ub'i. 2Chrijil chik kelik chila pa Refidim, are uri xeupon pa tz'inilik jyub' chaqij le, chila xe'uxlan wi chwach i Sinaí; 3are uri ma Moisés xel b'i puwi i jyub' Sinaí, chila xsik'ix wi rumal i Ajwal Dios, are uri xb'ix che:
—Lik chasaqij i tziji: Chke i ralk'uwal ma Jacob chi je are aj Israel. 4Yix xiwilo ni'pa xin-an chke aj Egipto, xaq wach ik'amik li yix xin-ano, lik pacha taq xixk'am li puja' uxik' jun kotxik. 5Wo'or we kixkojon che ronojel intzij xaq we kik'ol intrat pik'ux lik yix uri ix intinimit chi lik k'ax kixinna'o chkiwach konojel i tinimit, man we Yin ronojel uwach i jyub' ta'aj. 6Yin kin-an ni wajsujul sipon chiwe, xaq lik ix jun tinimit uri chi lik ix cha'om, chab'ij i tzij le chke konojel aj Israel.
Keje ile xub'ij i Dios che ma Moisés.
7Are uri ma Moisés xumol kichi' konojel i uwi ujolom i tinimit, xub'ij ronojel i tzij chke chi xb'ix che rumal i Ajwal. 8Are uri konojel aj Israel junam xkib'ij i tziji:
—Ronojel ni'pa ub'im i Ajwal lik kqa'an na —xecha.
Are uri ma Moisés x-e chub'ixkil che i Ajwal ronojel ni'pa xkib'ij i winaq. 9I Ajwal xub'ij che ma Moisés:
—Yin kinlapan ni awu' chupam jub'an sutz', man keje ile kkita i winaq are kinlapan awu', xaq kekojon ni uri chawe.
I ma Moisés xukamulij chik ub'ixkil che i Ajwal ronojel ni'pa xkib'ij i winaq che. 10I Ajwal xub'ij che ma Moisés:
—Jat, chab'ij chke i winaq chi wo'or xaq i chweq chkikojo in-ij xaq chki'ana ch'am che kib', chkich'aja ki'u', 11man keje ile je yij chik purox ij man che urox ij le Yin chi in Ajwal kinqaj li puwi i jyub' Sinaí chkiwach konojel i winaq. 12Chasutij i jyub' Sinaí pa koral man keje ile ke'ik'aw ti i winaq, xaq chab'ij chke i winaq chi metejeb' chuxe' i jyub' le xaq metejeb' pan chrij chwach, man xapachin ktejeb' panoq saq laj tzij lik kkamsax na. 13Lik mijun kuya taq u'ab' puwi i koral man we o jun kuya u'ab' puwi lik kkamsax ni uri ru' ab'aj xaq we ntaj ru' ch'ab'; xab'iroxik we winaq xaq we chikop, lik kk'asi ti chik. Xwi are kch'aw i trompeta te'uri kixel li chwi jyub' —xcha i Dios che ma Moisés.
14Te'uri xqaj li ma Moisés chwi jyub', are xk'un ku' i winaq, xeutaq chukojik u'ij i Ajwal xaq xkich'aj ki'u'. 15I ma Moisés xub'ij chke i winaq:
—Chiyijb'a iwib' re purox ij, mimin iwib' ru' iwixoqil.
16Churox ij, are xsaqirik lik kreplaj xe taq kaj, kraqlajik pacha ray xaq xqaj li jub'an sutz' puwi jyub', are uri xtataj uch'awb'al i trompeta chi lik ko kch'awik. Konojel i winaq chi je o chupam kimujb'al lik kesiksat chik. 17Are uri ma Moisés xeresaj b'i konojel i winaq chupam kimujb'al, xeuk'am b'i chwach i Dios, chuxe' i jyub' Sinaí. 18I jyub' Sinaí le lik kb'uquq sib' puwi, man i Ajwal xqaj li puwi i jyub' le chupam jub'an a'. Rumali i sib' kb'uquqik kel b'i chikaj pacha sib' re jub'an rosa, xaq ronojel i jyub' le lik kyikyatik. 19Arewi are kch'aw ma Moisés xaq are uri knimar uch'awb'al i trompeta le xaq i Dios xch'aw che ru' uch'awb'al ray.
20I Ajwal xqaj puwi i jyub' Sinaí, xaq chila puwi i jyub' le xusik'ij wi ma Moisés man kel b'i ru'. Are uri xupon ma Moisés tzam jyub', 21i Ajwal xub'ij che:
—Chatqaj b'i ku' i winaq chab'ij chke chi mkixaltej i koral re kkilb'ej we man moqxa je k'i chke kkisach uwach kik'aslemal. 22Xaq keje i ajsujul sipon chi ketejeb' chinwach rajwaxik kki'an ch'am che kib', man we kki'an ti ch'am che kib' lik kinsach uri uwach kik'aslemal —xcha.
23I ma Moisés xub'ij che i Ajwal:
—I winaq ke'el ta li waral chwi jyub' Sinaí, man yet xasaqij chqe: Chisutij i jyub' Sinaí xaq cha'ana che chi lik chatalik re i Dios— xcha.
24Xwiri xub'ij chik che ma Moisés:
—Chatqaj b'ik, chab'ij che ma Aarón kpaqi li awu', xwiri i je ajsujul sipon xaq winaq mkitij taq li elik ipa in o wi Yin, man we ke'el loq lik kinsach uwach kik'aslemal —xcha.
25Are uri xqaj b'i ma Moisés, xaq keje ub'ixkil ile xub'ij chke i winaq.
Currently Selected:
%C9xodo 19: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
