%C9xodo 20
20
Lajuj utzij upixab' i Dios
1I Dios xch'awik i xub'ij ronojel i tziji:
2Yin in Awajwal Dios, chi xatwesaj li pa Egipto, chila ipa at o wi te'eq pa k'ax pu'ab' i rajaw achak.
3“Matzukuj taq jub'an chik dios man lik xwi Yin in a-Dios.”
4“Ma'an taq jun atiox re kakoj u'ij, xaq ma'an taq uk'exwach ni'pa i o chikaj, ni'pa i o chwach ulew, xaq ni'pa i o pa mar chuxe' ulew. 5Maxuk awib' chkiwach, xaq makoj ki'ij, man Yin in Awajwal Dios, Dios chi lik xwi Yin kmajawik koksax in-ij. I qajawxelab' xaq i chuchxelab' chi tzel kinkilo xaq ktitat kipam chwe, lik kinya ni utojb'alil kimak pkiwi kak'al, pkiwi ki kimam, pkiwi kixikin xaq pkiwi kimuq kixikin. 6Xwiri kink'ut ni rutzil ink'ux chke konojel taq lemajil chi k'ax kinkina'o, chi xaq kekojon che intzij inpixab'.”
7“To' mawetz'b'ej ub'i Awajwal Dios, man Ire kuya ni utojb'alil che i jun chi to' kretz'b'ej ub'i.”
8“Chk'un chak'ux i ij sábado chi elsam re kojb'al u'ij i Ajwal. 9Waqib' ij katchakun na xaq ka'an ni ronojel ni'pa i rajwaxik chawe. 10Xwiri che uwuq ij, lik are ni i ij sábado, re kojb'al u'ij Awajwal Dios; mijun chak ka'an che i ij le, xaq keje ak'ojol, ami'al, xaq i je ataqon, achi, ixoq, achikop xaq i ajposar chi je o pawachoch. 11Man waqib' ij xu'an i Ajwal chuyijb'axik i kaj, ulew, mar xaq ronojel ni'pa o chwach; are uri che uwuq ij xuxlanik, rumali xuya u'ij i ij sábado le xaq xu'ul i ij le re kojb'al u'ij Ire.”
12“Chatkojon chke aqajaw achuch, man keje ile i Awajwal Dios kuya ni chawe chi naj katk'asi chwach i jyub' ta'aj chi kuya Ire chawe.”
13“Matkamsanik.”
14“Mamin awib' ru' jun winaq chi at k'ulinaq ti ru'.”
15“Matel-anik.”
16“Manuk' tzij chrij alok'anij.”
17“Marayij uwach rachoch alok'anij xaq marayij uwach i rixoqil, je utaqon, achi, ixoq, ub'oyex, u'axna, lik mijun ub'itaq re alok'anij marayij taq uwach che.”
I aj Israel kkixij kib' chu'anik i utz taj chwach i Dios
18Konojel aj Israel lik je ajsaqinel tzij re i ureplajik xetaq kaj, rumal uraqlajik pacha taq ray, rumal uch'awb'al i trompeta xaq i jyub' chi ch'uqtajnaq rumal i sib', i je aj Israel lik keb'arb'at rumal kixib'rikil xaq naj xek'iji wi. 19Rumali i je aj Israel xkib'ij che ma Moisés:
—Chab'ij yet chqe wach kqa'ano man yoj kojkojon ni chawe. Xwiri mch'aw i Dios qu' man we kch'aw chik i Dios qu' moqxa kojkamik —xecha.
20I ma Moisés xub'ij chke i winaq:
—Mixij iwib', i Dios xa xk'un chuk'amik ipam man keje ile kiya u'ij xaq kixmakun taj —xcha.
21Are uri i je aj Israel naj xek'iji wi tz'aqat xtejeb' pan ma Moisés chupam i tz'intz'ik equm ipa o wi i Dios.
I atb'al tzij re i sujb'al sipon
22I Ajwal xub'ij che ma Moisés, chab'ij iri chke aj Israel:
“Yix itom chik chi Yin xinch'aw li chiwe chikaj. 23Mi'an taq tiox che i saq-o'oj xaq che i an-o'oj, xaq mikoj taq ki'ij pacha ki'an chwe Yin. 24Chit'ub'a uchi' jut'ub'aj ulew re sujb'al sipon chinwach, man puwi i sujb'al sipon le kisujuj wi ichij, ichikop xaq isipon chi kporoxik re chomb'al ib'. Yin kink'un ni che i k'ijib'al ipa kinb'ij wi chiwe, man chila kikuxtaj kinataj wi inb'i, xaq chila kinya wi utzil chomal piwi. 25We ki'an jun sujb'al sipon tusum ab'aj, i ab'aj le lik kipaxij ti pa taq nik'aj, man i paxb'al re xa kuqajsaj u'ij i ab'aj le. 26Mikoj cholchol che i sujb'al sipon le man are kixel b'ik moqxa ketzun b'i winaq pi'u'.”
Currently Selected:
%C9xodo 20: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
